Malipayong Nahiusa Kang Jehova ug sa Iyang Anak
Ang Labing Hinungdanong Hitabo sa Tuig Saulogon sa Marso 28
1 Pinaagi sa pagsaulog sa Panihapon sa Ginoo human sa pagsalop sa adlaw sa Marso 28, 2002, atong mapasundayag ang atong malipayong panaghiusa kang Jehova nga Diyos ug kang Jesu-Kristo. Nianang espesyal kaayong okasyon, ang nahibilin sa dinihogang mga Kristohanon magtagamtam sa espesyal nga “pagpakig-ambit” nga ilang nabatonan duyog sa ubang mga manununod sa Gingharian, sa Amahan, ug sa iyang Anak. (1 Juan 1:3; Efe. 1:11, 12) Minilyon sa “ubang mga karnero” ang mamalandong sa ilang kahibulongang pribilehiyo nga mahiusa kang Jehova ug sa iyang Anak, nga nahiusa sa kasingkasing ug hunahuna uban kanila sa pagpalampos sa buluhaton sa Diyos!—Juan 10:16.
2 Nagtambayayong Diha sa Suod nga Relasyon: Si Jehova ug si Jesus kanunayng nagkahiusa nga malipayon. Gitagamtam nila ang suod nga panag-ubanay sulod sa way-kinutobang panahon una pa sa paglalang sa tawo. (Miq. 5:2) Busa ang dulot nga bugkos sa malumong pagmahal naugmad tali kanilang duha. Ingong kaalam nga gipersonipikar, kining panganay nga Anak diha sa iyang una-tawhanong paglungtad nakaingon: “Ako gikahinangpan pag-ayo [ni Jehova] sa matag adlaw, ako nagakalipay sa iyang atubangan sa tanang panahon.” (Prov. 8:30) Ang paggugol ug di-maihap nga kapanahonan diha sa suod nga panag-ubanay uban sa Tinubdan sa gugma dako ug epekto diha sa Anak sa Diyos!—1 Juan 4:8.
3 Kay anaa sa hunahuna ang panginahanglan sa katawhan alang sa pagtubos, gipili ni Jehova ang iyang bugtong Anak, kinsa nahinangop kaayo sa mga tawo, sa pagtagana sa halad lukat, nga nagtanyag sa atong bugtong paglaom. (Prov. 8:31) Maingon nga si Jehova ug ang iyang Anak nahiusa sa pagpatuman sa usa ka katuyoan, magpabilin kitang nahiusa uban kanila ug sa usag usa diha sa mga bugkos sa malig-ong gugma, nga malipayong nagabuhat sa kabubut-on sa Diyos.
4 Pagpakita sa Atong Kinasingkasing nga Pagpabili: Pinaagi sa pagtambong sa Memoryal ug sa pagpaminaw nga maampingon ug matinahoron, atong ikapasundayag ang atong tiunay nga pagpabili sa gugma ni Jehova ug sa halad sa iyang Anak alang kanato. Ang mahigugmaong panig-ingnan ni Jesus, iyang pagkamatinumanon hangtod sa kamatayon sa pagtagana sa lukat, ug iyang pagmando ingong Hari sa natukod na nga Gingharian sa Diyos, maingon man ang mga panalangin nga dad-on sa Gingharian ngadto sa katawhan mao ang ipasiugda. Ipahinumdom usab kanato ang panginahanglan sa pagpasundayag sa atong pagtuo nga makanunayon, nga masibotong nagabuhat uyon sa kabubut-on ni Jehova ingong “mga isigkamagbubuhat diha sa kamatuoran.”—3 Juan 8; Sant. 2:17.
5 Pagtabang sa Uban nga Moduyog Kanato: Ang lawas sa mga ansiyano angayng mohimog linaing paningkamot sa pagdasig sa tanang di-aktibong mga Saksi diha sa teritoryo sa pagtambong sa Memoryal sa kamatayon ni Kristo. (Mat. 18:12, 13) Paghimog listahan niadtong pagaduawon aron walay malaktawan ug ang tanan personal nga madapit.
6 Aduna ka bay nailhan nga mahimong makatambong sa Memoryal? Manguna sa pagtukod sa ilang pagpabili alang niini nga okasyon. Mainitong dapita sila, ug abiabiha sila. Buhaton ta ang ato gayong maarangan sa pagdapit ngadto niining labing hinungdanong hitabo sa tuig sa tanan natong mga estudyante sa Bibliya ug ubang interesadong mga tawo, maingon man sa mga membro sa pamilya ug mga kaila. Ang mga kaayohan sa lukat mabatonan gihapon sa tanang buot mokat-on sa “pagkalabaw ug bili sa kahibalo ni Kristo Jesus.” (Filip. 3:8) Kadtong nagpasundayag ug pagtuo sa halad ni Kristo makaangkon sa lig-ong paglaom sa kinabuhing walay kataposan.—Juan 3:16.
7 Ayaw gayod pakamenosa ang epekto sa Memoryal nganha sa sinserong mga tawo. Duha ka tuig nga miagi diha sa isla sa nasod sa Papua New Guinea, 11 ka interesadong mga tawo ang mibiyahe luwan sa usa ka gamayng sakayan sulod sa 17 ka oras latas sa baloron nga kadagatan aron makatambong. Ngano man? Sila nag-ingon: “Buot namong saulogon ang Memoryal ni Kristo duyog sa mga isigkamagsisimba ni Jehova; busa ang biyahe takos gayod niana.” Hunahunaa lang ang kasibot nga gipakita sa maong interesadong mga tawo ug ang ilang pagpabili nga malipayong mahiusa kang Jehova, sa iyang Anak, ug sa Kristohanong mga igsoon!
8 Itanyag ang pagtuon sa Bibliya sa tanang interesado. Dasiga sila sa pagtambong nga regular sa mga tigom sa kongregasyon ug sa pagpaambit ngadto sa uban sa mga kamatuoran nga ilang nakat-onan. Tabangi sila sa ‘paglakaw diha sa kahayag’ ug sa ‘pagbuhat sa kamatuoran’ pinaagi sa pagpadapat sa mga prinsipyo sa Bibliya diha sa ilang kinabuhi. (1 Juan 1:6, 7) Tabangi sila sa pag-ugmad ug suod nga relasyon uban kang Jehova ug sa padayong pag-uswag diha sa pagpabili sa pribilehiyo nga nahiusang nagabuhat sa iyang kabubut-on.
9 Pagkatalagsaong pribilehiyo nga malipayong nahiusa diha “sa usa ka espiritu, uban ang usa ka kalag nga naningkamot kiliran sa kiliran alang sa pagtuo sa maayong balita”! (Filip. 1:27, 28) Paaboton nato ang atong makapalipay nga panag-ubanay panahon sa Memoryal sa Marso 28, nga magmapasalamaton gayod kang Jehova ug sa iyang Anak!—Luc. 22:19.