Ang Pagsangyaw sa Gingharian Motabang sa Pagluwas ug mga Kinabuhi!
1 Kini mao ang labing hinungdanong buluhaton nga ginahimo sa kalibotan niining panahona. Si Jehova nga Diyos, si Jesu-Kristo, ug ang tinagpulo-ka-libong mga manulonda nagsentro sa ilang pagtagad niana. Unsa ba kini, ug nganong kini hinungdanon kaayo? Mao kini ang pagsangyaw sa Gingharian, ug motabang kini sa pagluwas ug mga kinabuhi!—Roma 1:16; 10:13, 14.
2 Bation tingali sa pipila ka tawo nga mas makatabang pa kita sa uban kon makigtambayayong kita sa pagpauswag sa kalibotan libot kanato. Daghan ang puliki kaayo sa mga paningkamot aron maangkon ang kalinaw, maayo ang mga sakit, o mapauswag ang ekonomiya. Apan unsa man ang makatabang gayod sa mga tawo?
3 Usa ka Hinungdanon Kaayong Buluhaton: Ang mensahe sa Gingharian lamang ang nagpatin-aw sa katuyoan sa kinabuhi, sa hinungdan sa pag-antos sa tawo, ug sa bugtong kasaligang paglaom alang sa umaabot. Ang maayong balita magpaarang sa mga tawo nga mahimong mga higala ni Jehova ug busa makadawat sa “kalinaw sa Diyos nga labaw sa tanang panghunahuna.” (Filip. 4:7) Ang mensahe sa Gingharian lamang ang naghatag ug praktikal nga giya sa pagtabang sa mga tawo aron malamposong masagubang ang mga problema sa kinabuhi karon ug nagpatin-aw kon unsaon sa pagkalabang-buhi sa dihang laglagon na kining daotang kalibotan sa umaabot. (1 Juan 2:17) Dili ba kana takos sa bug-os panikaysikay nga atong himoon sa pagsangyaw sa Gingharian?
4 Sa pag-ilustrar: Unsa ang labing maayong paagi sa pagtabang sa tulog nga mga molupyo sa usa ka balangay nga nameligro gumikan sa usa ka dike nga hapit nang mosiak? Limasag tubig ang nahuyang nga dike? Panindoton ang balangay nga hapit nang malaglag? Dili! Ang mga molupyo sa balangay kinahanglang pukawon, pasidan-an sa taliabot nga katalagman, ug tabangang makalingkawas! Kadtong tulog sa espirituwal nga paagi karon anaa sa grabe kaayong kapeligrohan. (Luc. 21:34-36) Sanglit kining sistemaha sa mga butang mahanaw man sa dili madugay, maningkamot kita nga masangyawan ang tanan kutob sa atong maarangan nga may pagkadinalian!—2 Tim. 4:2; 2 Ped. 3:11, 12.
5 Magpadayon Niining Buluhatona: Mangita kitag mga paagi aron maabot ang dugang pang mga tawo nga sinsero sa maayong balita—sa ilang mga balay, sa kadalanan, sa telepono, ug sa di-pormal nga paagi. Ang buluhaton nga gihatag ni Jehova kanato nga buhaton mao ang labing hinungdanong buluhaton nga ato mang mahimo. Kon masiboton natong buhaton kana, atong ‘maluwas ang atong kaugalingon ug kadtong mamati kanato.’—1 Tim. 4:16.