Repaso sa Teokratikanhong Tunghaan sa Ministeryo
Ang mosunod nga mga pangutana pagatagdon nga binaba panahon sa Teokratikanhong Tunghaan sa Ministeryo sa semana nga magsugod sa Agosto 25, 2003. Dumalahon sa magtatan-aw sa tunghaan ang 30-minutos nga repaso pinasukad sa materyal nga gikobrehan diha sa mga asaynment alang sa mga semana sa Hulyo 7 hangtod sa Agosto 25, 2003. [Matikdi: Kon walay mga reperensiya human sa pangutana, kinahanglang mohimo kag kinaugalingong panukiduki aron makaplagan ang mga tubag.—Tan-awa ang Tunghaan sa Ministeryo, pp. 36-7.]
MGA HIYAS SA PAGPANULTI
1. Unsang mga kaayohan ang makuha gikan sa pagtan-aw sa mata sa imong kaestorya sa dihang makigbahin sa ministeryo? [be p. 125 mga par. 1-2; p. 125 kahon] Ang mga mata nga nagpakitag kainit ug pagtahod daghag ikasulti mahitungod sa matang sa imong pagkatawo ug makatabang niadtong imong gikaestorya nga mobating mas relaks. Ang haom nga pagtan-aw sa mata sa mamiminaw motabang usab kanimo sa pagtino kon unsaon pag-atubang ang nagkalainlaing mga kahimtang.
2. Kon nerbiyoson ka sa dili pa mosangyaw, unsay makatabang? [be p. 128 mga par. 4-5] Uban sa pagpangandam pag-ayo ug tim-os nga pag-ampo ngadto kang Jehova, hunahunaa ang kaluoy ni Jehova diha sa pagdapit sa mga tawo aron makapahimulos sa kinabuhing walay kataposan sa Paraiso; kat-oni ang pagsentro sa imong mga hunahuna sa mga panginahanglan sa uban. Maayong hinumdoman nga ang mga tawo adunay kagawasan sa pagpili ug mahimo nilang dawaton o isalikway ang mensahe. Ang atong asaynment mao lamang ang pagwali. (Mat. 24:14; Buh. 4:29)
3. Unsay makatabang kanimo sa pagsulti diha sa natural ug kabildohay nga paagi sa dihang mohatag ug pakigpulong gikan sa plataporma? [be p. 129 par. 2; p. 129 kahon] Ang paghatag ug pangunang pagtagad sa mga ideya ug dili sa eksaktong kahan-ayan sa mga pulong makaamot sa pagkanatural, kabildohay nga estilo sa pagsulti. Ang pagsulti mahimong dili relaks ug pormal kon sag-ulohon sa usa ka tawo ang pakigpulong o kon ang iyang mga nota detalyado kaayo.
4. Unsay angayng epekto sa mga prinsipyo nga makita diha sa Levitico 16:4, 24, 26, 28; Juan 13:10; ug Pinadayag 19:8 diha sa atong personal nga panagway, ug nganong hinungdanon kini? [be p. 131 par. 3; p. 131 kahon] Ang Bibliya nagdasig kanato nga magmahinlo, sa atong lawas ug sa atong besti, ilabina kon moadto kita sa usa ka dapit sa pagsimba o makigbahin diha sa pag-alagad sa kanataran. Ang atong personal nga panagway mahimong makaimpluwensiya sa panglantaw sa uban bahin sa atong Kristohanong mga pagtulon-an ug sa paagi sa pagkinabuhi nga atong gihawasan.
5. Hubita ang usa ka tawo nga makasaranganon ug may “maayong panghunahuna.” (1 Tim. 2:9, 10) [be p. 132 par. 1] Ang usa ka makasaranganong tawo mahunahunaon nga dili makapasilo sa uban ug dili modanig sobrang pagtagad sa iyang kaugalingon. Ang usa ka tawo nga maayo ug panghunahuna magpasundayag ug kaalam ug may maayong panghukom. Motahod siya sa diyosnong mga sukdanan ug andam mopadapat sa mga giya sa Bibliya diha sa iyang kinabuhi.
ASAYNMENT NUM. 1
6. Bisan pag mapailobong mag-inantosay ang mga Kristohanon sa usag usa, unsay dili nila tugotan sa ilang taliwala? (Col. 3:13) [w01 7/15 p. 22 mga par. 7-8] Sa bisan unsa mang paagi, ang mga Kristohanon dili gayod mouyon sa buhat nga daotan, ni sila magpakabuta sa mga sayop. (Gal. 6:1)
7. Matuod o Bakak: Ang ordinal nga numero maoy bug-os nga numero. Ipatin-aw. [si p. 282 mga par. 24-5] Bakak. Ang ordinal nga numero nagpaila sa kahan-ayan nga sunodsunod, sama sa una, ikaduha, ikatulo, apan wala kini magpaila ug tibuok nga numero. Pananglitan, sa dihang maghisgot ug ika-21ng siglo, ang usa wala magpasabot nga miagi na ang 21 ka bug-os nga mga siglo. Agig pagtandi, ang cardinal nga numero maoy bug-os, o tibuok, nga numero.
8. Unsa ang labing putling motibo nga atong mabatonan sa pagbasa sa Pulong sa Diyos, ug nganong hinungdanon ang pagbaton sa maong motibo? [be p. 24 par. 1] Ang gugma alang kang Jehova mao ang labing putling motibo nga mabatonan nato sa pagbasa sa iyang Pulong. Ang paghigugma kang Jehova uban sa atong ‘bug-os nga hunahuna’ modasig kanato sa paggamit nga kusganon sa atong mga kaisipan aron sa pagkuhag kahibalo bahin sa Diyos. (Mat. 22:37)
9. Sa unsang paagi ang tawong maalamon “nagatipig ug kahibalo”? (Prov. 10:14) [w01 7/15 p. 27 mga par. 4-5] Kinahanglang pun-on sa usa ka tawo ang iyang hunahuna sa makapalig-ong kahibalo sa Diyos, nga makaplagan diha sa “tibuok Kasulatan.” (2 Tim. 3:16, 17) Ang kahibalo sa Kasulatan angayng makaabot usab sa kasingkasing sa usa pinaagi sa regular nga pagpamalandong.
10. Nganong ang maayong batasan ni Job takos tagdon? (Job 1:1, 8; 2:3) [w01 8/1 p. 20 par. 4] Ang maayong batasan ni Job nakatabang kaniya nga mahimong “walay-ikasaway ug matul-id.” Nabatasan, o naandan, na niya nga magsilbing saserdote sa pamilya pinaagi sa pagtanyag ug mga halad alang sa iyang mga anak. (Job 1:5) Sa pamilya ni Job, ang mga kostumbre nga nasentro sa pagsimba kang Jehova maoy panguna.
SENEMANANG PAGBASA SA BIBLIYA
11. Sa unsang paagi ang mga membro sa nagamandong lawas “bug-os nga nagkahiusa” nga ang mga Hentil nga mga magtutuo dili na kinahanglang tulion aron maluwas? (Buh. 15:25) Una, giasoy ni Pedro nga gihatagan sa Diyos ang dili-tinuling Hentil nga mga magtutuo ug balaang espiritu, nga nagpunting sa pagkakabig ni Cornelio ug sa iyang panimalay. (Buh. 15:7-9) Sunod, giasoy ni Bernabe ug Pablo ang ilang mga kasinatian taliwala sa mga tawo sa kanasoran nga nahimong mga magtutuo. (Buh. 15:12) Sa kataposan, si Santiago nagpunting sa Amos 9:11, 12. (Buh. 15:13, 16) Busa, ang mga kamatuoran ug ang inspiradong Kasulatan naghimo sa hustong desisyon nga madayag sa tanan. [1, w90 6/15 p. 13 mga par. 14-15]
12. Nganong mihangyo man ang nagamandong lawas nga tumanon ni Pablo ang pipila ka kinahanglanon sa Moisesnong Balaod nga giwagtang na man ni Jehova kanang maong Balaod? (Buh. 21:20-26) [it-1 p. 481 par. 3; it-2 p. 1163 par. 6–p. 1164 par. 1] Ang Moisesnong Balaod mao ang balaod sa nasod sa Judea. Sa dihang ang pipila ka kostumbre niini wala maglapas sa Kristohanong mga prinsipyo o magsalikway sa Kristohanong doktrina, ang unang mga Kristohanon wala mag-isip niana nga kasumpaki ug misunod sa Hudiyohanong kostumbre aron dili makasilo sa uban nga wala kinahanglana.
13. Unsang bakak nga mga sumbong nga gihimo batok kang apostol Pablo ang magpahinumdom kanato sa gihimo batok sa mga Saksi ni Jehova ning bag-o pa? (Buh. 24:5, 6) [w01 12/15 p. 22 par. 7–p. 23 par. 2] Ang mga magsusupak ni Pablo nag-akusar kaniya nga mihimog subersibong mga kalihokan nga maoy nagpahinabo sa sibil nga kagubot taliwala sa katawhan sa kinatibuk-an. Sila usab nag-ingon nga siya mao ang lider sa usa ka katingad-ang kulto tungod kay ang Kristiyanidad lahi sa naandang Hudiyohanong tinuohan. Gawas pa, siya giakusar nga naglapas sa mga balaod nga may kalabotan sa legal nga pagsulod sa hawanan sa templo.
14. Sa unsang paagi si Pablo naghatag ug panig-ingnan ingong magmamantala sa Gingharian bisag gibilanggo diha sa balay sulod sa duha ka tuig? (Buh. 28:30, 31) Bisan pag nailalom sa pagdili, gibuhat ni Pablo ang kutob sa iyang maarangan ilalom sa maong kahimtang, nga nagwali ug nagtudlo uban “ang labing dakong kagawasan sa pagsulti.” Gikan sa bilanggoan iyang gisulat ang inspiradong mga sulat ngadto sa mga taga-Efeso, Filipos, Colosas, ug sa Hebreohanong mga Kristohanon, maingon man ngadto kang Filemon. [4, w90 6/15 p. 25 par. 20; Rbi8 p. 13 talaan]
15. Sa unsang paagi nga ang “labaw nga mga awtoridad” bahin sa “kahikayan sa Diyos,” ug sa unsang paagi kini makaapektar sa mga Kristohanon? (Roma 13:1, 2) [w00 8/1 p. 4 par. 5] Ang tawhanong politikal nga mga kagamhanan gitugotan nga temporaryong maglungtad ug maghupot ug relatibong awtoridad sumala sa gambalay sa katuyoan sa Diyos. Ang mga Kristohanon andam nga magpasakop sa ilang awtoridad basta wala kini molapas sa mga utlanan sa gimbut-an sa Diyos alang kanila.