Repaso sa Teokratikanhong Tunghaan sa Ministeryo
Ang mosunod nga mga pangutana pagatagdon nga binaba panahon sa Teokratikanhong Tunghaan sa Ministeryo sa semana nga magsugod sa Disyembre 29, 2003. Dumalahon sa magtatan-aw sa tunghaan ang 30-minutos nga repaso pinasukad sa materyal nga gikobrehan diha sa mga asaynment alang sa mga semana sa Nobyembre 3 hangtod sa Disyembre 29, 2003. [Matikdi: Kon walay mga reperensiya human sa pangutana, kinahanglang mohimo kag kinaugalingong panukiduki aron makaplagan ang mga tubag.—Tan-awa ang Tunghaan sa Ministeryo, pp. 36-7.]
MGA HIYAS SA PAGPANULTI
1. Nganong hinungdanon gayod ang paggamit sa Bibliya diha sa ministeryo sa kanataran? [be p. 145 par. 2, kahon] Ang Bibliya mas epektibo nga motultol sa karnerohong mga tawo kay sa bisan unsa pa nga atong ikasulti tingali sa personal. Kon unsay makita sa usa ka tawo diha sa Bibliya sa kaugalingon niyang mga mata makapatisok pag-ayo sa impormasyon.
2. Sa unsang paagi ang konteksto makaapektar sa paagi sa pagpaila sa kasulatan? [be p. 149] Kini magpaila sa usa nga gipasidunggan sa teksto nga gikutlo. Pananglitan, dili tanang salmo gitagik ni David, ug dili ang tibuok basahon sa Proverbio gisulat ni Solomon. Makaapektar usab ang konteksto kon unsay giingon mahitungod sa kon kinsay ginatumong, kon unsang ulohana ang ginahisgotan, ug kon unsang mga sirkumstansiya ang naglungtad sa panahon nga gisulat ang maong asoy sa Bibliya.
3. Nganong hinungdanon ang pagpasiugda sa hustong mga pulong sa dihang magbasa ug teksto sa Bibliya, ug sa unsang paagi kini makab-ot? [be p. 151 par. 2, kahon] Sa dihang hatagan ug tukmang pagpasiugda ang hustong mga pulong, ang paagi sa pagpangatarongan mahimong mas tin-aw ug sayon nga masabtan sa mamiminaw. Sa dihang mag-analisar ug teksto, pangutan-a ang imong kaugalingon: ‘Unsang mga pulonga ang kinahanglang mapasiugda aron makab-ot ang katuyoan nga niana ang maong teksto ginabasa?’
4. Sa unsang paagi ikapadapat nato ang tambag ni Pablo sa ‘paggamit sa pulong sa kamatuoran sa hustong paagi’ sa dihang magtudlo sa uban, ug nganong hinungdanon kini? (2 Tim. 2:15) [be p. 153 par. 2, kahon] Aron ‘magamit ang pulong sa kamatuoran sa hustong paagi,’ angay natong ipatin-aw ang mga kasulatan sumala sa gitudlo mismo sa Bibliya. Nagkinahanglan kini nga atong tagdon ang konteksto ug likayan ang pribadong interpretasyon nga gipasukad sa kinaugalingong mga ideya o kalibotanong pilosopiya. Hinungdanon kini tungod kay ang kabubut-on sa Diyos mao nga ang mga tawo makadangat sa “tukmang kahibalo sa kamatuoran.” (1 Tim. 2:3, 4)
5. Sa unsang paagi si Pablo ‘nangatarongan pinasukad sa Kasulatan’? (Buh. 17:2, 3) [be p. 155 par. 5–p. 156 par. 1] Si Pablo nag-asoy ug tinuod nga mga panghitabo sa kinabuhi ug ministeryo ni Jesus, nagpadayag nga kini gitagna na diha sa Hebreohanong Kasulatan, ug dayon naghatag ug kusganong konklusyon. Gikutlo niya ang mga kasulatan, gilain ang mga pulong o prase, ug unya gipadayag ang kahulogan niini.
ASAYNMENT NUM. 1
6. Sa dihang gamiton nato ang atong pangunang galamiton sa pagpanukiduki, ang Bibliya, sa pag-andam ug pakigpulong, nganong hinungdanon ang (1) pagsusi sa konteksto sa mga bersikulo, (2) pagsusi sa mga cross-reference, ug (3) pagtuki ginamit ang konkordansiya sa Bibliya? [be p. 34 par. 3–p. 35 par. 2] (1) Ang pagsusi sa konteksto motabang kanato sa pagsabot sa kahulogan sa mga teksto sa Bibliya ug maghatag ug mga detalye nga makadugang ug kadasig sa pakigpulong. (2) Ang mga cross-reference maghatag ug hait nga pagsabot ug tingali magpasiugda sa katumanan sa usa ka tagna sa Bibliya o sa usa ka sumbanan sa pakigsaad sa Balaod; ang ubang mga cross-reference basin yanong mopunting sa makatabang nga susamang mga ideya o impormasyon bahin sa kagikan o sa dapit. (3) Ang pagtuki ginamit ang konkordansiya sa Bibliya makatabang kanato sa pagpangitag mga kasulatan nga nalangkit sa ulohan nga atong gidukiduki ug magtugot kanato sa pagkakita sa ebidensiya sa “sumbanan” sa kamatuoran nga gipahayag diha sa Pulong sa Diyos. (2 Tim. 1:13)
7. Sa unsang paagi ang tinuod nga pagkamaunongon ikapakita ug ngadto kang kinsa? [w01 10/1 pp. 22-3] Kay samag kahulogan sa mahigugmaong-kalulot, ang pagkamaunongon may puwersado usab nga diwa sa paghatag ug pagdawat. Kon gipasundayag kanato ang mahigugmaong-kalulot, nan kita angayng maunongong mobalos. Ingong dumadawat sa mahigugmaong-kalulot ni Jehova, si David napalihok sa pagsimba ug pagdayeg sa Diyos. (Sal. 138:2) Ang pagkamaunongon kang Jehova naglakip sa pagkamaunongon ngadto sa iyang Pulong ug sa iyang organisasyon. Ang atong pagkamaunongon kinahanglang ipakita ngadto usab sa atong kapikas sa kaminyoon, magtutuong pamilya, ug mga higala.
8. Unsay nagpaila nga si Jehova maoy usa ka tukmang tigbantay-sa-oras? (Dan. 11:35-40; Luc. 21:24) [si p. 284 par. 1] Sa paghatag sa panan-awon sa “hari sa amihanan” ug sa “hari sa habagatan,” gigamit sa manulonda ni Jehova sa makadaghan ang panultihon nga “sa panahon sa kataposan.” Daghang uban pang mga kasulatan nagpaila nga si Jehova maoy usa ka tukmang tigbantay-sa-oras, kinsa nagatuman sa iyang mga katuyoan nga eksakto sa panahon.
9. Unsang mga butang ang angay natong hinumdoman sa dihang mohukom kon unsang mga puntoha ang gamiton human makapanukiduki alang sa usa ka pakigpulong? [be p. 38] Gamita lamang ang mga punto nga mapuslanon sa pagpresentar sa ulohan. Seguroa nga ang impormasyon mao ang kinabag-ohan ug nahiuyon sa labing bag-ong mga publikasyon sa mga Saksi ni Jehova. Mag-amping sa dihang mogamit ug impormasyon gikan sa sekular nga mga tinubdan, nga maghinumdom nga ang Pulong sa Diyos maoy kamatuoran ug nga gihuptan ni Jesus ang pangunang papel sa katumanan sa katuyoan sa Diyos. (Juan 17:17; Col. 2:3) Ang atong paningkamotan mao ang pagbanaag sa hunahuna sa Diyos. (Prov. 2:1-5)
10. Nganong ang giingon ni Jesus bahin “sa mga adlaw ni Noe” praktikal sa atong kahimtang karong adlawa? (Mat. 24:37) [w01 11/15 p. 31 mga par. 3-4] Ang mga Kristohanon karong adlawa maoy mga magsasangyaw sa pagkamatarong, nga nag-awhag sa mga tawo sa paghinulsol. (2 Ped. 3:5-9) Si Noe misugot kang Jehova bisan pa sa pagsupak ug kalisdanan. Siya ug ang iyang pamilya wala mahibalo sa eksakto kon kanus-a ipahinabo sa Diyos ang Lunop, apan ang pagtuo sa pulong sa Diyos nagpalig-on kanila latas sa daghang tuig sa teokratikanhong paghago. (Heb. 11:7)
SENEMANANG PAGBASA SA BIBLIYA
11. Sa unsang paagi ang sulat ni Pablo ngadto kang Filemon nagpakita nga ang buluhaton sa usa ka Kristohanon mao ang pagtabang sa mga indibiduwal nga mahimong mga Kristohanon, dili ang pagpalambo ug reporma sa katilingban? (Filem. 12) Si Pablo nagtawag kang Onesimo, usa ka ulipon nga milayas, ingong “akong anak, kang kinsa ako nahimong amahan” ug ingong “usa ka igsoon nga hinigugma.” (Filem. 10, 16) Bisan pag namati si Onesimo sa pagwali ni Pablo ug nahimong Kristohanon, wala siya ipahayag ni Pablo nga usa ka tawong gawasnon kondili nagpabalik kaniya diin siya legal nga gipanag-iya ilalom sa naglungtad nga Romanhong kahikayan sa katilingban, nga nagtugot ug legal nga pagpanag-iya sa mga ulipon. [1, w98 1/15 pp. 30-1; w63 pp. 393-7]
12. Unsay kalainan sa ‘pagkaanod,’ “pagpahilayo,” ug ‘pagbulag’? (Heb. 2:1; 3:12; 6:6) [w99 7/15 p. 19 par. 12; w86 6/1 p. 14 mga par. 16-17; w81 6/1 p. 25 par. 8] Ang ‘pagkaanod’ gikan sa kamatuoran walay hago ug mahimong magsugod nga wala tuyoa uban sa pipila ka materyal nga mga butang, kalibotanong pagpakig-uban, o pagbanabana sa Kasulatanhong mga butang. Ang “pagpahilayo” maoy daotan ug naglangkit sa pagpahilayo sa kaugalingon, o pag-apostata. Ang ‘pagbulag’ maoy usa ka tinuyong pagsalikway sa kamatuoran hangtod sa punto nga dili na makabalik, nga si Jehova ug Jesus na lamang ang makatino.
13. Sa unsang paagi atong malikayan ang paghimo sa ekspresyong “kon kabubut-on ni Jehova” nga butang nga dili kaayo hinungdanon? (Sant. 4:15) [cj p. 171 mga par. 1-2] Angay natong likayan ang kanunayng paggamit sa maong mga pulong ingong komon nga panultihon aron dayegon sa uban o pakamatarongon ang mga desisyon nga atong himoon. Hinunoa, sa bisan unsang kalihokan, sama sa pagtuman sa Kasulatanhong obligasyon sa pagtagana alang sa atong pamilya, kita angayng matinuorong magtagad sa kabubut-on sa Diyos ug magmadeterminado diha sa atong kasingkasing sa pagtuman niana.
14. Unsay kahulogan sa ‘pagpaabot ug pagbutang kanunay sa hunahuna sa presensiya sa adlaw ni Jehova,’ ug sa unsang paagi atong mahimo kana? (2 Ped. 3:12) [w97 9/1 pp. 19-20] Kini nagkahulogan nga kita magbantay ug maikagong magpaabot sa pag-abot sa “dakong adlaw sa Diyos nga Labing Gamhanan” sa Armagedon. (Pin. 16:14) Kita makahimo niana pinaagi sa paghinumdom sa “mga pulong nga gisulti kanhi sa balaang mga manalagna” bahin sa presensiya ni Jesus diha sa Gingharianong gahom ug sa paghukom sa mga dili diyosnon. Angay usab natong ibutang sa hunahuna ang “sugo sa Ginoo ug Manluluwas” nga padayong magbantay. (2 Ped. 3:2; Luc. 21:34-36)
15. Unsang hinungdanong tambag alang sa mga Kristohanon karon ang makaplagan diha sa mga mensahe ngadto sa pito ka kongregasyon nga gihisgotan diha sa Pinadayag kapitulo 2 ug 3? (Pin. 2:4, 5, 10, 14, 20; 3:3, 10, 11, 17, 19) Aron mahimong Kristohanong mga mananaog, kinahanglang dili nato wad-on ang atong espirituwal nga kadasig o gugma alang sa kamatuoran. Angay natong dahomon nga kita sulayan sa bug-os ug angayng magmadeterminado sa pagpamatuod sa atong pagkamaunongon sa tibuok natong kinabuhi. Kinahanglang isalikway usab nato ang imoralidad ug apostasya, huptan ang espirituwal nga pagkamatukawon ug pagkamalahutayon, ug dili tugotan ang kawalay-pagtagad o materyalismo nga mag-apektar kanato. [7, re p. 34 mga par. 5-6; p. 38 par. 5; p. 44 mga par. 10-11; p. 49 par. 7; p. 56 par. 7; p. 64 par. 20; p. 68 par. 8]