Repaso sa Teokratikanhong Tunghaan sa Ministeryo

Ang mosunod nga mga pangutana pagatubagon nga binaba panahon sa Teokratikanhong Tunghaan sa Ministeryo sa semana sugod sa Abril 24, 2006. Ang magtatan-aw sa tunghaan magdumalag 30-minuto nga pagrepaso binase sa impormasyong nakobrehan sa mga asaynment alang sa mga semana sa Marso 6 hangtod sa Abril 24, 2006. [Matikdi: Kon walay mga reperensiya human sa pangutana, kinahanglan kang magdukiduki aron makaplagan ang mga tubag.—Tan-awa ang librong Tunghaan sa Ministeryo, p. 36-7.]

MGA HIYAS SA PAGPANULTI

1. Sa dihang magtudlo, nganong kinahanglan kitang mohunong sa matag kausaban sa ideya, apan lagmit unsa ang mopugong kanato sa pagbuhat niana? [be p. 98 mga par. 2-3] Pinaagi sa paghunong, mahatagan natog higayon ang mamiminaw sa pagpamalandong, sa pagpasibo sa ilang hunahuna, ug sa pag-ila nga kita mobalhin gikan sa usa ka ideya ngadto sa lain. Sa dihang kita mohunong, ang pangunang mga punto mapasiugda, matisok pag-ayo, ug mahinumdoman. Ang pipila ka mamumulong magdalidali sa pagbalhin gikan usa ka punto ngadto sa lain nga dili mohunong tungod kay sila mosulay sa pagkobre ug daghan kaayong materyal.

2. Nganong hinungdanon ang paghunong sa dihang mosangyaw sa uban? [be p. 99 par. 5–p. 100 par. 4] Ang paghunong makapauswag sa atong katakos sa pagpakigkomunikar ug pagkaepektibo diha sa ministeryo. Motugot kini sa tagbalay sa pagpaambit sa iyang mga ideya, nga sa baylo modasig kaniya sa paghunahuna. Ang atong paggamit sa hustong paghunong lagmit moresulta nga ipadayag sa tawo kon unsay anaa sa iyang kasingkasing, nga magpaarang kanato sa pagtabang kaniya nga mas epektibo pa. (Prov. 20:5)

3. Nganong ang pagpasiugda sa diwa hinungdanon sa dihang mohatag ug pakigpulong, ug unsaon nato pagpasiugda ang diwa sa hustong paagi? [be p. 101 mga par. 1-5, kahon] Kon husto ang atong pagpasiugda sa yawing mga pulong ug mga ekspresyon, atong mahuptan ang pagtagad sa atong mamiminaw samtang atong gidani ug gidasig sila. Atong mapasiugda ang mga pulong pinaagi sa pagpakusog sa atong tingog, mas mainiton nga pagbati, hinay nga pagsulti, paghunong, mga pagkompas ug mga ekspresyon sa nawong, ug pinaagi sa pagpaubos o pagpataas sa tono sa atong tingog. Aron magamit ang pagpasiugda sa diwa sa hustong paagi, kinahanglang tin-aw natong masabtan ang atong materyal ug buot gayod nato nga kini mahinumdoman ug mapadapat sa atong mamiminaw. (Neh. 8:8)

4. Sa dihang magbasa sa publiko, sa unsang paagi atong matino nga mapasiugda ang pangunang mga ideya sa atong materyal? [be p. 105 mga par. 1-6] Kinahanglang tin-aw na daan diha sa atong hunahuna ang pangunang mga ideya sa katibuk-ang materyal. Kini motabang kanato sa pagkahibalo kon unsang mga puntoha ang angayng ipasiugda. Sa dihang magbasa sa makusog gikan sa publikasyon panahon sa pagtuon sa Bibliya o sa tigom, kinahanglan natong ipasiugda ang mga tubag sa gipatik nga mga pangutana ug ang mga ideya nga nalangkit sa bagag-letra nga mga sub-ulohan.

5. Nganong ang nahiangayng gikusgon hinungdanon sa dihang magtudlo, ug sa unsang paagi atong maila ang igong gikusgon? [be p. 107-8] Kon ang uban nalisdan sa pagpaminaw kanato, ang ilang hunahuna maglatagaw ug mawala ang bili sa atong ginasulti. Lagmit dili nato madasig ang atong mamiminaw sa paglihok sumala sa ilang nadunggan. Ang reaksiyon sa mamiminaw maoy maayong timailhan kon igo ba ang gikusgon sa atong tingog. Kon makamatikod kita nga ang uban naglisod sa pagpaminaw, kinahanglan natong pakusgan ang atong tingog. Ang gidaghanon ug kahimtang sa atong mamiminaw ug ang makabaldang mga kabanha makaimpluwensiya usab sa gikusgon sa atong pagsulti.

ASAYNMENT NUM. 1

6. Sa unsang paagi ang kahimtang sa mga Kristohanon karon kaamgid sa kahimtang nila ni Ester ug Mardokeo, ug sa unsang paagi atong masundog ang ilang panig-ingnan? [si p. 94 par. 17] Sama kang Ester ug Mardokeo, ang mga Kristohanon karon nagkinabuhi ubos sa “labaw nga mga awtoridad” diha sa langyaw nga kalibotan ug naningkamot nga mahimong masinugtanon-sa-balaod nga mga lungsoranon, nga nagbayad kang ‘Cesar sa mga butang ni Cesar, apan ang mga butang sa Diyos ngadto sa Diyos.’ (Roma 13:1; Luc. 20:25; Est. 1:1; 2:​5, 7, 8, 21-​23) Apan, kinahanglang ilhon sa mga Kristohanon nga ang pagkamasinugtanon sa sekular nga mga awtoridad dili bug-os kon itandi sa pagkamasinugtanon sa kabubut-on sa Diyos, sumala sa gipakita sa wala pagsugot ni Mardokeo sa mando sa hari nga moyukbo kang Haman nga Agagihanon. (Est. 3:​1-4; 5:9) Ang mga Kristohanon mahimong mangita usab ug legal nga tabang kon kini gikinahanglan. (Est. 4:​6-8; Buh. 25:11)

7. Sa dihang si Solomon miingon nga ang “tanan kakawangan ug usa ka paggukod sa hangin,” unsa ang iyang gipasabot? (Eccl. 2:11) [w04 10/15 p. 4 mga par. 3-4] Sa konteksto, si Solomon nagpasabot sa kinabuhi nga nasentro sa pagpangagpas sa kalingawan ug sa pagbaton sa tanang gitanyag niining kalibotana sa materyal ug unodnong paagi. Si Solomon nagtukod ug mga balay ug nagbaton ug mga tanaman, mga prutasan, mga ulipon, kahayopan, kabtangan, ug bahandi. Nangagpas usab siya diha sa natad sa arte. Apan, kini walay dumalayong bili ug wala maghatag kaniyag malungtarong katagbawan. (Eccl. 2:​1-​10) Siya mihinapos nga ang malungtarong katagbawan naggikan sa pagpangagpas sa espirituwal nga mga butang. (Eccl. 12:13)

8. Sa unsang paagi atong maugmad ang gugma alang sa Diyos? (Mar. 12:30) [w04 3/1 p. 19-21] Atong maugmad ang gugma alang sa Diyos pinaagi sa pagpauswag sa atong kahibalo bahin kaniya ug sa iyang katuyoan pinaagi sa makahuloganong pagtuon sa iyang Pulong, ang Bibliya. Kita usab makapamalandong sa iyang mga buhat ug sa kahulogan sa atong nakat-onan. (Sal. 77:​6, 11, 12) Ang paghinumdom sa atong personal nga mga kasinatian samtang nag-alagad kang Jehova ug sa positibong mga resulta nga misangpot tungod sa pagbuhat sumala sa iyang kabubut-on makapalig-on usab sa atong gugma alang kaniya. (Prov. 3:​5, 6)

9. Unsa ang mga kalainan tali sa espirituwal nga mga prinsipyo ug materyalismo? [w04 10/15 p. 5-7] Ang pagpangagpas sa espirituwal nga mga prinsipyo motultol ngadto sa walay-kataposang kalipay ug mga ganti, samtang ang materyalismo motultol lamang ngadto sa temporaryong kalipay nga moresultag kamatayon. (Prov. 11:4; Mat. 5:3; 2 Cor. 4:18) Ang materyalismo kasagarang mohaylo sa mga tawo sa pagpangagpas ug bahandi, katungdanan, ug gahom sa malinglahon o dili-matinud-anong paagi, samtang ang espirituwal nga mga prinsipyo modasig sa usa sa paghatag inay sa pagdawat. (Isa. 48:18; 1 Tim. 6:​9, 10)

10. Unsay makatabang kanato nga dili mabalda sa pagpaminaw panahon sa mga asembliya ug mga kombensiyon? [be p. 15-16] Ang usa ka hinungdanong butang mao nga kita mopahulay ug maayo sa gabii aron makapaminaw pag-ayo. Mahimo natong itisok sa hunahuna ang tema nianang adlawa, tagdon ang ulohan sa matag bahin sa programa, ug dahomon kon unsay ipahayag. Ang pagsulat ug mga nota makatabang usab kanato nga masundan ang pakigpulong ug masentro ang atong atensiyon nganha sa programa.

SENEMANANG PAGBASA SA BIBLIYA

11. Nganong gitabonan man ang nawong ni Haman? (Est. 7:8) Wala taboni ni Haman ang iyang nawong tungod sa kaulaw o pagbasol. Hayan gitabonan sa mga opisyal sa korte ang iyang nawong aron sa paglarawan sa kaulawan o kalaglagan. Lagmit kini ang unang lakang nga gihimo sa pagpakanaog sa silot nga kamatayon. [1, w86 3/15 p. 25]

12. Unsang matanga sa espiritung linalang ang nag-impluwensiya sa panghunahuna ni Elipaz? (Job 4:15, 16) [w05 9/15 p. 26 par. 2] Ang hinawayong tono sa mga pulong ni Elipaz nagpakita nga ang espiritung linalang dili usa sa matarong nga mga manulonda sa Diyos. (Job 4:​17, 18) Si Elipaz nailalom sa impluwensiya sa daotang espiritung linalang. Ang iyang mga komento nagpadayag ug dili-diyosnong panghunahuna. Kon dili pa, nganong si Jehova nagbadlong kang Elipaz ug sa iyang duha ka kauban tungod sa pagsultig mga bakak? (Job 42:7)

13. Ang mga pahayag ba ni Job nga nasulat sa Job 7:9, 10 ug Job 10:21 nagpaila nga siya wala motuo sa pagkabanhaw? Wala. Ang mga komento ni Job nga nasulat nianang mga bersikuloha naghisgot bahin sa haduol niyang umaabot. Ang usa ka posibleng kahulogan mao nga kon mamatay si Job, walay usa sa iyang mga katalirongan ang makakita kaniya. Sa ilang panglantaw, siya dili mobalik o makabatog dugang pag-ila hangtod moabot ang tinudlong panahon sa Diyos. Lagmit si Job nagpasabot usab nga walay usa ang makahimo sa pagbalik gikan sa Sheol nga walay tabang. Sa Job 14:13-​15, tin-aw nga si Job nagtuo sa umaabot nga pagkabanhaw. [3, w06 3/15 “Ang Pulong ni Jehova Buhi​​—Mga Haylayt Gikan sa Basahon ni Job”]

14. Unsa kahay buot ipasabot ni Job sa ekspresyon nga “ako nakalingkawas nga ingon lamang sa panit sa akong ngipon”? (Job 19:20) Morag dili kinahanglan nga paningkamotang isaysay ang gisulti ni Job sumala sa di pa dugayng nadiskobrehan sa mga siyentipiko sa tabang sa mga mikroskopyo. (it-2-E p. 977) Pinaagi sa pagsulti nga siya nakalingkawas pinaagi sa panit sa usa ka butang nga dayag nga walay panit, si Job lagmit nagpasabot nga siya nakalingkawas nga walay bisan unsa. [5, w06 3/15 “Ang Pulong ni Jehova Buhi​​—Mga Haylayt Gikan sa Basahon ni Job”]

15. Unsay buot ipasabot ni Job sa dihang siya miingon, “dili ko wad-on ang akong integridad gikan kanako,” ug unsay atong makat-onan gikan niini? (Job 27:5) Si Job lamang ang bugtong makawala sa kaugalingon niyang integridad tungod kay ang integridad nagdepende sa gugma sa usa alang sa Diyos. Busa angay natong ugmaron ang lig-ong gugma alang sa Diyos aron mahuptan nato ang atong integridad. [6, w06 3/15 “Ang Pulong ni Jehova Buhi​​—Mga Haylayt Gikan sa Basahon ni Job”]