Ayawg Biyai ang Gugma nga Imong Nabatonan sa Sinugdan
1 Ang gihimaya nga si Jesus nagtambag sa unang-siglong kongregasyon sa Efeso: “Ako adunay ikasulti batok kanimo, nga imong gibiyaan ang gugma nga imong nabatonan sa sinugdan.” (Pin. 2:4) Dayag nga daghan ang nagbiya sa una nilang gugma alang kang Jehova. Sa dihang atong nakat-onan ang kamatuoran, kita nakaugmad ug lig-ong gugma alang sa Diyos ug sa silingan, ug kini nagpalihok kanato sa pagpaambit nga madasigon sa atong bag-ong nakaplagan nga paglaom. Unsay makatabang kanato aron dili mahanaw ang unang gugma nga atong nabatonan sa sinugdan ug dili maluya diha sa ministeryo?
2 Personal nga Pagtuon ug Pagtambong sa mga Tigom: Unsay nakadasig kanato sa pag-ugmad sa gugma alang sa Diyos ug sa silingan sa dihang una natong nakat-onan ang kamatuoran? Dili ba ang tanan nga atong nakat-onan bahin kang Jehova gikan sa atong pagtuon sa Kasulatan? (1 Juan 4:16, 19) Busa, aron ang atong gugma “mosamot pa sa pagdagaya,” kita kinahanglang magpadayon sa pagkuhag tukmang kahibalo, nga susihon pag-ayo “ang lawom nga mga butang sa Diyos.”—Filip. 1:9-11; 1 Cor. 2:10.
3 Ang paghupot ug maayong rutina sa personal nga pagtuon mahimong lisod gayod niining kataposang mga adlaw nga puno sa daghang kabalaka ug kabaldahan. (2 Tim. 3:1) Kinahanglan kitang maggahin ug panahon diha sa atong eskedyul sa pagkaon ug espirituwal nga pagkaon. Ang regular nga pagtambong sa mga tigom sa kongregasyon hinungdanon usab, ilabina nga atong ‘nakita nga ang adlaw nagkaduol na.’—Heb. 10:24, 25.
4 Ministeryo: Ang masibotong pagpakigbahin diha sa ministeryo makatabang kanato sa paghupot sa atong unang gugma alang sa Diyos. Samtang atong isangyaw ang maayong balita, kita mapahinumdoman sa mahigugmaong mga saad ni Jehova, ug kini motabang kanato sa paghupot sa atong paglaom nga masanag ug sa atong gugma nga buhi. Ang pagtudlo sa mga kamatuoran sa Bibliya nagkinahanglan nga kita manukiduki aron tin-aw nato kining masabtan, ug kini magpalig-on sa atong pagtuo.—1 Tim. 4:15, 16.
5 Si Jehova takos modawat sa tanang butang, lakip sa atong gugma. (Pin. 4:11) Ayawg tugoti nga mahanaw ang imong gugma. Hupting lig-on ang imong unang gugma pinaagi sa makugihong personal nga pagtuon sa Bibliya, regular nga pagtambong sa mga tigom, ug sa masibotong pagsangyaw ngadto sa uban sa kon unsay labing bililhon kanimo.—Roma 10:10.