Gugma—Ang Yawi sa Usa ka Mabungahong Ministeryo
1 “Umari kanako, . . . ug ako magapalagsik kaninyo.” (Mat. 11:28) Ang maong madanihong mga pulong nagbanaag sa dulot nga gugma ni Jesus alang sa mga tawo. Ingong Kristohanong mga ministro, kita buot mosundog kang Jesus sa pagpasundayag sa atong gugma alang sa mga tawo nga nawad-ag paglaom tungod sa walay-gugma nga kalibotan. Sa unsang paagi kita makapakitag gugma alang sa mga tawo diha sa atong buluhatong pagsangyaw?
2 Sa Pulong: Ang gugma alang sa mga tawo maoy nakadasig kang Jesus sa pagpahimulos sa tanang kahigayonan aron ikasangyaw ang maayong balita. (Juan 4:7-14) Ang gugma motabang kanato nga dili mag-ukon-ukon sa pagsangyaw sa di-pormal nga paagi. Usa ka sayis-anyos nga batang babaye naghatag ug maayong pamatuod ngadto sa usa ka babaye nga naglingkod tupad kaniya diha sa hulatanang lawak sa usa ka klinika. Unsay nakaaghat kaniya sa pagsangyaw? Siya miingon, “Sa akong tan-aw niadtong babayhana, kinahanglan siyang mahibalo bahin kang Jehova.”
3 Atong ikapakita ang atong interes sa mga tawo pinaagig sinsero, mahigalaon nga pahiyom ug paningog. Ang pagpaminaw pag-ayo sa ilang isulti, pag-ila sa ilang mga gikabalak-an, ug pagpakitag tinuod nga personal nga interes maoy pagpasundayag usab ug gugma. (Prov. 15:23) Agig pagsundog kang Jesus, kinahanglan nga atong ipasiugda ang makapadasig nga mensahe sa Gingharian ug ang mahigugmaong kaluoy ni Jehova alang sa mga tawo.—Mat. 24:14; Luc. 4:18.
4 Sa Buhat: Pinaagig praktikal nga mga buhat, gipakita ni Jesus nga siya matinagdanon kaayo sa mga panginahanglan sa uban. (Mat. 15:32) Kita usab mahimong adunay mga kahigayonan sa pagpakitag mahigugmaong-kalulot samtang nagsangyaw. Namatikdan sa usa ka sister nga ang usa ka babaye naglisod sa pagsabot sa usa ka hinungdanong tawag sa telepono. Ang atong sister miboluntaryo sa pagtabang pinaagi sa paghubad sa gisulti sa nanawag. Kining mahigugmaong buhat nagbukas sa kahigayonan alang sa Kasulatanhong panaghisgot nga nakatabang sa babaye sa pagdawat ug pagtuon sa Bibliya. Sa laing kahimtang, nakita sa usa ka brader nga ang iyang gibalikduaw naglisod sa pagwahig sa dakong sopa nga nag-ali sa agianan. Human niya tabangi ang maong tawo, siya gipalingkod sa maong sopa nga nagsugod ug usa ka pagtuon sa Bibliya uban sa maong mapasalamatong tawo.
5 Samtang kita makigbahin sa ministeryo, atong ipasundayag ang atong gugma sa Diyos ug sa atong mga silingan. (Mat. 22:36-40) Ang pagpasundayag niana sa pulong ug sa buhat makatabang sa mga tawong matinud-anon ug kasingkasing sa pagkaamgo nga ania kanato ang kamatuoran.