‘Isulti ang Pulong sa Diyos nga Walay Kahadlok’
1 Magpanuko ka ba usahay sa pagsulti bahin sa imong pagtuo sa dihang may kahigayonan ka unta sa pagpaambit niana sa eskuylahan o sa trabahoan? Nalisdan ka ba sa pagsangyaw sa di-pormal nga paagi sa imong mga paryente o tingali sa mga tawo nga dili nimo kaila? Unsay makatabang kanatong tanan sa pagpahimulos sa haom nga mga higayon sa “pagsulti sa pulong sa Diyos sa walay kahadlok”?—Filip. 1:14.
2 Ayaw Pagpanuko: Magpanuko ka ba sa pagdepensa sa imong suod nga higala o paryente nga binakak nga giakusahan? Si Jehova, ang atong labing suod nga Higala, gidaot pag-ayo latas sa tibuok kasaysayan sa tawo. Kita adunay talagsaong pribilehiyo sa pagpamatuod dapig sa atong dakong Diyos! (Isa. 43:10-12) Ang dulot nga gugma alang kang Jehova makatabang kanato sa pagbuntog sa kabalaka o kahadlok ug kini motukmod kanato sa pagsulti, nga dili magpanuko sa pagsangyaw sa kamatuoran.—Buh. 4:26, 29, 31.
3 Hinumdomi nga ang atong mensahe maoy usa ka maayong balita. Mohatag kinig dumalayong mga kaayohan niadtong mosanong niini. Ang pagsentro sa atong hunahuna nganha sa bili sa atong pagsangyaw imbes sa atong kaugalingon o sa atong mga magsusupak motabang kanato sa pagsangyaw nga maisogon.
4 Mga Panig-ingnan sa Uban: Kita mapalig-on sa pagkamatinumanon sa uban nga nagsulti sa pulong sa Diyos nga walay kahadlok. Pananglitan, si Enoc maisogong nagmantala sa paghukom ni Jehova batok sa dili-diyosnong mga makasasala. (Jud. 14, 15) Matinumanong gisangyawan ni Noe ang mga tawo nga dili matinagdanon. (Mat. 24:37-39) Ang unang-siglong mga Kristohanon kinsa “dili edukado ug ordinaryo” nagpadayon sa pagwali bisan pa sa grabeng pagsupak. (Buh. 4:13, 18-20) Ang Bantayanang Torre ug Pagmata! subsob nga naundan ug modernong-adlaw nga mga sugilanon sa mga tawo nga pinaagi sa pagpasundayag ug pagtuo kang Jehova ilang nabuntog ang pagkahadlok sa tawo ug nahimong masibotong mga magwawali.
5 Kita mahimong magmaisogon pinaagi sa pagtagad sa kinabuhi sa matinumanong mga alagad kaniadto kinsa nakaagom ug malisod nga mga situwasyon. (1 Hari 19:2, 3; Mar. 14:66-71) Sila “nakabaton ug kaisog pinaagi sa atong Diyos” ug misulti nga may kaisog. Kita makasulti usab sa Pulong sa Diyos nga walay kahadlok.—1 Tes. 2:2.