‘Buhata ang Maayo Ngadto sa Tanan’
1 Sa Marso 2006 nga gula sa Atong Ministeryo sa Gingharian, kita gidasig sa paghimog dugang paningkamot sa pagtabang sa interesadong mga tawo nga makatambong sa Memoryal, ginamit ang bag-ong imbitasyon sa Memoryal. Tungod niana, walay duhaduha nga daghang bag-o ug di-aktibo nga mga tawo ang nanambong sa selebrasyon. Karon, “samtang kita may kahigayonan alang niini, [padayong] buhaton nato ang maayo ngadto sa tanan.”—Gal. 6:10.
2 Dapita Sila sa Pagtambong Pag-usab: Dinhi sa Pilipinas, kapin sa 300,000 ka tawo nga dili mga magmamantala sa maayong balita ang manambong sa Memoryal matag tuig. Unsay kinahanglan natong himoon aron madasig kadtong “hustong nakiling alang sa kinabuhing walay kataposan” nga mahimong “mga magtutuo”? (Buh. 13:48) Sa labing sayong maarangan, dasiga sila nga regular nga motambong sa mga tigom sa kongregasyon.
3 Nganong dili dapiton ang usa ka interesadong tawo sa pagtambong sa Pagtuon sa Libro sa Kongregasyon aron iyang mapahimuslan ang makaiikag nga panaghisgot sa librong Pinadayag? Kon ikaw paryente o kaila sa maong tawo ug gieskedyul ka nga mohatag ug bahin sa Teokratikanhong Tunghaan sa Ministeryo, dapita siya sa pagtambong ug sa pagpaminaw sa imong bahin. Pahinumdomi siya kanunay sa mga ulohan sa pakigpulong publiko nga ihatag sa mosunod nga mga semana. (Ang usa ka bag-ong eskedyul kinahanglang ipaskin diha sa information board.) Ug siyempre, kon wala nay nagdumala kaniyag pagtuon sa Bibliya, tanyagi siyang magtuon uban nimo.
4 Dasiga Kanunay ang mga Di-Aktibo: Ubay-ubay niadtong nanambong sa Memoryal mga dedikado na kang Jehova. Apan, sila mihunong na sa pagsangyaw sa maayong balita. Si Pablo nagdasig kanato sa ‘pagbuhat ug maayo ilabina kanila nga atong kabanay sa pagtuo.’ (Gal. 6:10) Busa, ang mga di-aktibo mao ang panguna natong hatagan ug pagtagad.
5 Tingali ang uban misanong na sa pagdasig sa mga ansiyano nga magmaaktibo pag-usab sa pag-alagad. Kon gihangyo ka sa mga ansiyano sa pagtabang sa pagdasig sa usa ka di-aktibo, hibaloi nga ang imong gugma kang Jehova ug sa ministeryo makadasig kaniya. Ikuyog siya sa lainlaing bahin sa ministeryo aron siya malipay niana ug madasig sa pagpakigbahin niana ug makapahimulos ug daghang panalangin.
6 Tabangi ang Bag-ong mga Magmamantala nga Makabaton ug Maayong Pundasyon: Kon ang imong gitun-an sa Bibliya naaprobahan nang makigbahin sa pag-alagad sa kanataran, tabangi siya nga makabaton ug maayong pundasyon. Tabangi siya sa pag-ugmad ug rutina sa regular nga pagpangandam ug pagpakigbahin sa pagsangyaw sa kanataran kada semana.
7 Kon ang imo mismong anak nahimo nang bag-ong di-bawtismadong magmamantala, tabangi siya nga mouswag sumala sa iyang edad ug katakos. Sa imong tabang, tingali masorpresa ka kon unsa siya ka maayo sa pagpakig-estorya ug tawo, sa pagbasa ug Bibliya, ug sa pagtanyag ug literatura. Kon duna siyay naestorya nga interesadong tawo sa kanataran, bansaya siya sa paghimog balikduaw ug pagpaloap sa interes.
8 Pauswaga ang Kaugalingon Mong Ministeryo: Ang imo bang mga kahimtang motugot kanimo sa pagpauswag sa imong pagpakigbahin sa buluhatong pagsangyaw bisan pagkahuman sa bulan sa Abril ug Mayo? Kon nalipay ka sa pag-oksilyare payunir niining bulana, napalandong mo ba kon mahimo ka kahang magpadayon sa pag-oksilyare payunir, o sa pagregular payunir pa gani? Hinumdomi nga kon mas daghang panahon ang atong gigugol sa ministeryo, mas daghang tawo ang atong matabangan nga modawat sa kamatuoran. (Buh. 8:26-39) Samtang maglantaw kita sa umaabot, hinaot ‘kanunay natong tinguhaon ang maayo sa usag usa ug sa tanan.’—1 Tes. 5:15.