Repaso sa Teokratikanhong Tunghaan sa Ministeryo

Ang mosunod nga mga pangutana pagatagdon panahon sa Teokratikanhong Tunghaan sa Ministeryo sa semana nga magsugod sa Hunyo 25, 2007. Dumalahon sa magtatan-aw sa tunghaan ang 30-minutos nga repaso pinasukad sa materyal nga gikobrehan diha sa mga asaynment alang sa mga semana sa Mayo 7 hangtod sa Hunyo 25, 2007. [Matikdi: Kon walay mga reperensiya human sa pangutana, kinahanglang mohimo kag kinaugalingong panukiduki aron makaplagan ang mga tubag.—Tan-awa ang Tunghaan sa Ministeryo, p. 36-7.]

MGA HIYAS SA PAGPANULTI

1. Sa dihang magpakigpulong, unsay atong mahimo sa pagpamenos sa tensiyon aron moarang-arang ang kalidad sa atong tingog? [be p. 185 par. 1-3] Una, kinahanglang aduna kitay hustong panglantaw sa atong mga mamiminaw. Kon sila mao ang mga tawo nga atong mahibalag sa ministeryo, angay natong hinumdoman nga sila kinahanglang makadungog sa hinungdanong mga kamatuoran nga atong nahibaloan bahin sa katuyoan ni Jehova, nahibalo man sila niini o wala. Kon kita nagpakigpulong sa Kingdom Hall, angay natong hinumdoman nga kita nakigsulti ngadto sa atong mga higala, ug sila buot nga kita molampos. Ikaduha, mouswag ang kalidad sa atong tingog kon atong irelaks ang kaunoran sa atong liog, tutonlan, ug abaga.

2. Sa unsang paagi kita ‘mahimong tanang butang ngadto sa tanang matang sa katawhan’ diha sa atong ministeryo? (1 Cor. 9:20-23) [be p. 186 par. 2-4] Ang usa ka paagi mao ang pagmatikod sa mga gikaikagan, tinuohan, o kahimtang sa pamilya sa mga tawo sa dili pa kita makigsulti kanila. Hunahunaa pag-ayo kon unsaon pagduol ang mga tawo pinaagig usa ka presentasyon nga mapuslanon gayod kanila. Kinahanglang himoon natong tumong ang pag-andam ug Kasulatanhong mga ideya nga mohaom sa nagkalainlaing mga tawo nga atong mahibalag sa kanataran. (1 Tim. 2:4)

3. Sa unsang paagi atong masundog ang panig-ingnan ni Jehova sa pagpaminaw sa uban? (Gen. 18:23-33; 1 Hari 22:19-22) [be p. 187 par. 1-2, 5] Atong mahimo kini pinaagi sa pagdasig sa uban sa pagpahayag sa ilang kaugalingon ug sa pagpaminaw pag-ayo samtang sila nagsulti. Human makasukna ug usa ka haom nga pangutana, angay kitang mohilom sa igong gidugayon aron makatubag sila. Ang atong ‘pagkaabtik sa pagpaminaw’ magpamatuod nga atong gitahod ang hunahuna ug pagbati sa uban. (Sant. 1:19; Roma 12:10)

4. Sa unsang praktikal nga mga paagi nga kita makatabang sa uban nga mouswag sa espirituwal? [be p. 187 par. 6–p. 188 par. 3] Ang paglakip sa uban sa atong mga pag-ampo magdasig kanato sa pagpadayon sa paghunahuna kanila sa tuyo nga mapaambit ang mga kamatuoran sa Bibliya nga makatagbaw gayod sa ilang mga panginahanglan. Mahimong tabangan nato ang mga estudyante sa Bibliya sa pagpanukiduki diha sa atong mga publikasyon aron matabangan sila sa pagdumala sa mga situwasyon nga ilang maatubang. Ang atong tumong mao kanunay ang pagtugot sa Pulong sa Diyos ug sa iyang espiritu sa pagdasig kanila, kay buot ni Jehova nga ang mga tawo moalagad kaniya nga kinasingkasing. (Sal. 110:3)

5. Nganong angay kitang magmahunahunaon bahin sa pagpakitag pagtahod sa uban? [be p. 190 par. 3, kahon] Ang pagpakitag pagtahod sa uban maoy usa ka Kristohanong kinahanglanon ug kini mahimong motukmod sa uban sa pagdawat sa mensahe nga atong gisangyaw. Ang pagtahod sa uban makawagtang sa mga babag sa atong pagpahibalo sa maayong balita.

ASAYNMENT NUM. 1

6. Nganong kinahanglan kitang maningkamot sa pag-abot sa kasingkasing sa atong mga ginatudloan? [be p. 59 par. 1] Hinungdanon kini tungod kay ang matuod nga pagsimba dili lang basta pagsag-ulo sa pipila ka impormasyon ug pagpahiuyon sa pipila ka lagda. Kini gipasukad diha sa maayong relasyon uban kang Jehova ug sa pag-apresyar sa iyang mga dalan. (Deut. 10:12, 13; Luc. 10:25-27)

7. Unsay epekto sa atong panig-ingnan ngadto sa atong ginatudloan? [be p. 60 par. 4] Ang atong mga aksiyon maghatag ug praktikal nga panig-ingnan kon unsaon pagpadapat ang mga butang nga atong ginatudlo. Ang mga bata nga magsundog-sundog sa ilang mga ginikanan buot mahibalo kon sama sa unsa ang pagbuhat sa mga butang nga ginabuhat sa ilang mga ginikanan. Sa samang paagi, sa dihang ang mga tawo nga atong ginatudloan ‘mahimong mga tigsundog kanato ingon nga kita tigsundog kang Kristo,’ mosugod sila sa pagtagamtam sa mga panalangin sa pagsubay sa mga dalan ni Jehova. (1 Cor. 11:1)

8. Sa unsang paagi atong mapauswag ang atong katakos sa pagpakigsulti diha sa panimalay? [be p. 62 par. 3] Ang labing hinungdanong paagi sa pagpauswag sa atong katakos sa pagpakigsulti mao ang dulot nga pagkamatinagdanon sa usag usa. (Deut. 6:6, 7; Prov. 4:1-4) Ang laing hinungdanong paagi mao ang pagkaadunay bililhong butang nga isulti. Ang mga punto gikan sa atong regular nga programa sa personal nga pagbasa ug pagtuon sa Bibliya, makapadasig nga mga kasinatian sa pagsangyaw sa kanataran, ug uban pang makapalig-ong mga ulohan nga makaamot sa malipayong panagkabildo sa pamilya.

9. Unsang panig-ingnan sa maisogong kadasig ang atong makita kang manalagnang Jeremias? [si p. 129 par. 36] Si Jeremias maisogong nagmantala sa dili-dalawatong mensahe ngadto sa dili-diyosnong katawhan. Siya wala makig-uban sa mga daotan. Iyang nasabtan ang pagkadinalian sa mensahe ni Jehova, ug kinasingkasing niyang gideboto ang iyang kaugalingon nganha sa buluhaton ni Jehova ug wala gayod siya moundang. Iyang giisip ang pulong sa Diyos nga sama sa kalayo diha sa iyang kabukogan, ug kini gikalipay ug gikahimut-an sa iyang kasingkasing. (Jer. 15:16, 17; 20:9)

10. Unsang pagsalig ang gipahayag sa Lamentaciones, apan nganong mapuslanon ang paghubit sa bug-at nga mga paghukom sa Diyos batok sa mga daotan? [si p. 132 par. 13] Ang basahon sa Lamentaciones nagpahayag sa bug-os nga pagsalig ni Jeremias sa Diyos. Kini angayng magdasig ug pagkamasinugtanon ug integridad sa tanang matuod nga mga magsisimba, nga sa samang higayon maghatag ug makahahadlok nga pasidaan niadtong wala manumbaling sa labing halangdon nga ngalan ug kon unsay gihawasan niini. Ang basahon mapuslanon gayod sa dihang gihubit niini kon unsa ka bug-at ang silot sa Diyos ngadto sa mga magpadayong rebelyoso, tikig-ug-liog, ug dili-mahinulsolon.

SENEMANANG PAGBASA SA BIBLIYA

11. Unsang pagsalig ang atong mabatonan nga nahiuyon sa kasinatian ni Jeremias sumala sa gihubit sa Jeremias 37:21? Gitabangan ni Jehova si Jeremias sa panahon nga gilikosan ang Jerusalem, sa dihang ang mga tawo ‘nagkaon ug tinapay nga tinimbang ug uban ang kabalaka’ ug sa dihang gikaon pa gani sa pipila ka kababayen-an ang kaugalingon nilang mga anak. (Ezeq. 4:16; Lam. 2:20) Ang kasinatian ni Jeremias nagpasalig sa matinumanong mga alagad ni Jehova nga bisan pa kon ang mga kahimtang daw wala nay kalaoman, Siya makatabang kanato panahon sa kataposang mga adlaw hangtod gayod sa Armagedon. [Mayo 7, w97 9/15 p. 3-4; w76-E p. 501]

12. Nganong nakaingon man si Baruk nga ‘gidugangan ni Jehova ug kaguol ang iyang kasakit,’ nga maoy ‘nakapaluya’ kaniya, ug unsay unang reaksiyon ni Baruk sa problema? (Jer. 45:1-5) Ang kaguol ug kaluya ni Baruk mahimong nalangkit sa pagkadili-masanongon sa mga Hudiyo, kinsa nagsalikway sa sublisubling mga pasidaan ug nagpadayon sa ilang apostasya sa daghan nang katuigan. Busa si Baruk misugod sa ‘pagpangitag dagkong mga butang alang sa iyang kaugalingon,’ tingali materyal nga bahandi ug kasegurohan o pagkainila. Mahigugmaon siyang gipahinumdoman ni Jehova nga haduol na ang katalagman; busa, dili kadto panahon sa pagpangagpas ug mga butang nga makababag sa iyang espirituwalidad. [Mayo 21, w06 8/15 p. 17-18; w97 8/15 p. 21]

13. Kanus-a nga ang Babilonya wala na mapuy-i, nga nahimong “usa ka awaaw sa iyang kinatibuk-an”? (Jer. 50:13) Human sa 140 W.K.P., ang yuta palibot sa Babilonya napuno sa asin ug alkali, mao nga dili na kini mauma. Mga 200 ka tuig sa ulahi, ang Babilonya usa gihapon ka siyudad nga daghag molupyo, apan kini wala magpabilin nga ingon. (1 Ped. 5:13) Sa ikatulong siglo K.P., ang historyano nga si Dio Cassius (c. 150-235 K.P.) naghubit sa usa ka bisita nga miadto sa Babilonya nga nakakaplag lamang ug “mga bungdo ug mga bato ug kagun-oban.” [Mayo 28, ct p. 106-7]

14. Unsang prinsipyo bahin sa pag-ampo ang gihimong tin-aw sa Lamentaciones 3:8, 9, 42-45? Wala paminawa ni Jehova ang mga pag-ampo sa rebelyosong mga Hudiyo niadtong 607 W.K.P. Aron tubagon ang atong mga pag-ampo, kita kinahanglang magmasinugtanon sa Diyos ug magpakitag tinuod nga paghinulsol. (Prov. 28:9) [Hun. 18, w06 9/1 p. 22 par. 4]

15. Unsay gihulagwayan sa karo nga gihubit sa Ezequiel kapitulo 1?