Repaso sa Teokratikanhong Tunghaan sa Ministeryo

Ang mosunod nga mga pangutana pagatagdon sa Teokratikanhong Tunghaan sa Ministeryo sa semana sa Agosto 27, 2007. Dumalahon sa magtatan-aw sa tunghaan ang 30-minutos nga repaso pinasukad sa materyal nga gikobrehan sa mga asaynment sa mga semana sa Hulyo 2 hangtod sa Agosto 27, 2007.

MGA HIYAS SA PAGPANULTI

1. Sa unsang paagi makapakita kitag pagtahod sa uban diha sa ministeryo ug sa kongregasyon? [be p. 192 par. 2-4] Sa dihang magsangyaw sa uban, kita maglikay nga iyagyag dayon ang sayop nilang panghunahuna ug kita magpakitag pagtahod pinaagi sa pagpaminaw pag-ayo sa ilang ginasulti ug sa pagkonsiderar sa ilang pagbati. (1 Ped. 3:15) Diha sa kongregasyon, kita makapakitag pagtahod pinaagi sa paghunahuna nga ang atong mga igsoon nahigugma kang Jehova ug buot nilang moalagad kaniya. Ang atong mga mamiminaw makamatikod sa atong pagtahod kanila kon atong ilakip ang atong kaugalingon sa dihang atong ipadapat ang Kasulatan ug likayan ang paggamit kanunay sa pulong nga “kamo.”

2. Unsay gikinahanglan aron makapahayag kita nga may kombiksiyon? [be p. 196 par. 1-3] Aron makapahayag nga may kombiksiyon, kinahanglan nga bug-os kitang kombinsido nga kamatuoran ang atong ginasulti ug ipahayag kana uban ang pagkasinsero ug kadasig. Ang pagkasabot sa materyal ug pagpahayag niana sa atong kaugalingong pulong magpakita nga kombinsido kita nga ang atong ginasulti bililhon sa atong mamiminaw.

3. Unsa ang pipila ka sugyot nga makatabang kanato nga magmataktikanhon sa dihang magsangyaw sa uban? [be p. 198 par. 1-5] Paningkamoti nga sugdan ang pakigkabildo pinaagi sa paghisgot ug usa ka ulohan nga makapaikag sa laing tawo. Ang pagkamahunahunaon sa mga panglantaw ug mga opinyon sa ubang tawo motabang kanato nga makigkabildo kanila imbes sermonan sila. Mahimo natong pangutan-on ang atong kaugalingon, ‘Unsa kahay hunahuna sa ubang tawo sa akong ginasulti?’ Kini makatabang kanato sa paggamit ug maayong panghukom ug sa paglikay nga motungha ang wala-kinahanglanang babag. (Prov. 12:8)

4. Sa unsang paagi ang pagkamataktikanhon naglangkit sa pagsulti sa hustong panahon sa dihang magsangyaw sa uban? (Prov. 25:11) [be p. 199 par. 1-3] Bisan tuod dili kita mouyon sa tanang gisulti sa tagbalay, dili kinahanglang lalison ang matag di-kasulatanhong hunahuna nga iyang ipahayag. (Juan 16:12) Pailob lang, ug ayaw pasobrahi ang imong reaksiyon sa dihang ipatungha ang mga pagtutol. Pabiling kalmado, ug isipa kana ingong kahigayonan aron matugkad nimo ang panghunahuna sa maong tawo.

5. Sa unsang paagi ikapresentar nato ang atong pakigpulong sa makapalig-ong paagi? [be p. 203 par. 3–p. 204 par. 1] Kon kita masaligon nga ang atong isigkamagtutuo buot nga magpahimuot kang Jehova, ang atong isulti ug paagi sa pagsulti mopabanaag sa maong pagsalig. (1 Tes. 4:9, 10; 2 Tes. 3:4, 5) Bisan tuod gikinahanglan ang tambag aron sa pagtul-id, ang tono sa pakigpulong magpabiling positibo kon ang pagpasiugda ibutang ilabina sa kon unsaon paglikay nga malangkit sa buhat nga daotan ug kon sa unsang paagi ang mga kinahanglanon ni Jehova manalipod kanato. (Sal. 119:1)

ASAYNMENT NUM. 1

6. Unsay ikaingon bahin sa pagkamagsusulat ni Ezequiel ug sa pagkahimong bahin sa kanon sa Bibliya ug sa pagkatinuod sa basahon ni Ezequiel? [si p. 133 par. 3] Ang basahon ni Ezequiel gilakip sa kanon sa Bibliya sa adlaw ni Esdras ug makita diha sa talaan sa mga basahon sa Bibliya sa kapanahonan sa unang mga Kristohanon, ilabina gayod diha sa kanon ni Origen. Ang pagkatinuod niini gipamatud-an sa tatawng kasamahan tali sa mga simbolismo niini ug nianang sa Jeremias ug Pinadayag.

7. Unsang hiyasa ang hinungdanong mabatonan sa usa ka tawo aron maantos niya ang inhustisya? [w05 6/1 p. 29 par. 4] Ang pagkamapainubsanon hinungdanon. Ang usa ka tawo nga taas ug paglantaw sa kaugalingon hayan dili makaagwanta sa pagdaogdaog. Maningkamot kita sa pagsundog kang Jesus, kinsa “nagpaubos ug nagmasinugtanon hangtod sa kamatayon.” (Filip. 2:5, 8) Lain pa, kinahanglang tun-an nato ang paglantaw sa uban ingong “labaw” kay kanato, nga mag-una sa ilang kaayohan inay sa atoa. (Filip. 2:3, 4)

8. Unsay atong makat-onan sa tubag ni Jesus ngadto sa mga Saduseo nga nangutana kaniya bahin sa pagkabanhaw? (Luc. 20:37, 38) [be p. 66 par. 4] Si Jesus nahibalo sa panghunahuna sa mga Saduseo—nga sila wala gayod magtuo sa pagkabanhaw. Busa gitubag niya ang ilang pangutana sa paagi nga matul-id ang sayop nga panghunahuna nga maoy lintunganayng rason sa maong pangutana. Ginamit ang binatid nga pangatarongan ug ang usa ka sinati nga asoy sa Kasulatan, gipunting ni Jesus ang butang nga wala pa gayod nila matagad kanhi—ang tin-awng pamatuod nga ang mga patay banhawon gayod sa Diyos.

9. Kon ang usa ka estudyante sa Bibliya o isigkamagtutuo mangutana kon unsay angay niyang buhaton sa usa ka tinong kahimtang, unsaon man nimo pagtubag? [be p. 69 par. 4-5] Ang matag tawo kinahanglang maoy manubag sa iyang mga desisyon sa kinabuhi. (Gal. 6:5) Ang usa ka tawong maghimog mga desisyon aron lang pahimut-an ang iyang magtutudlo sa Bibliya o ang laing tawo nagaalagad sa mga tawo, ug wala magkinabuhi pinaagi sa pagtuo. (Gal. 1:10) Busa, sa pagtabang sa tawo nga makakaplag sa tubag sa iyang pangutana, maayo gayod nga hisgotan kaniya ang nahiangay ng mga prinsipyo ug mga panig-ingnan sa Bibliya ug pangutan-on siya kon aduna ba siyay nakita diha niana nga lagmit makatabang kaniya sa paghimog maalamong desisyon.

10. Unsay nalangkit sa pagkahimong ‘mabag-o diha sa puwersa nga nagpalihok sa inyong kaisipan’? (Efe. 4:23) [be p. 74 par. 4] Kinahanglang atong ugmaron ang kusganong hilig sa hunahuna nga kaharmonya sa hunahuna sa Diyos ug ni Kristo aron atong ‘masul-ob ang bag-ong pagkatawo.’ (Efe. 4:23, 24) Kinahanglan kitang maimpluwensiyahan kanunay sa ilang hunahuna. Sa dihang kita magtuon sa mga Ebanghelyo, angay natong isipon kining mga asoy sa kinabuhi ni Kristo ingong sumbanan nga atong pagasundon. Angay natong maila ang tinong mga hiyas nga gipakita ni Jesus ug maningkamot pag-ayo nga sundogon kini diha sa atong kinabuhi. (1 Ped. 2:21)

SENEMANANG PAGBASA SA BIBLIYA

11. Sa Ezequiel 9:2-4, kinsa ang gihawasan sa tawo nga nagbesti ug lino, ug unsay gisimbolohan sa “marka sa agtang”? [w88 9/15 p. 14 par. 18] Ang tawo nga nagbestig lino naghawas sa lawas sa dinihogang mga Kristohanon dinhi sa yuta niining panahona. Sila nagbutang ug simbolikong marka niadtong mahimong bahin sa “dakong panon,” kinsa “nagapanghupaw ug nagaagulo” tungod sa dulumtanang mga butang nga gihimo diha sa Kakristiyanohan. (Pin. 7:9, 10, 14) Ang “marka” nagpaila nga ang usa dedikado ug bawtismadong indibiduwal nga may personalidad nga sama sa iya ni Kristo.

12. Sa unsang paagi ang relihiyosong mga lider sa Kakristiyanohan nahisama sa ‘hungog nga mga manalagna, nga nagsunod sa ilang kaugalingong espiritu,’ nga gihubit sa Ezequiel 13:3? [w99 10/1 p. 13] Sama sa prominente ug impluwensiyadong mga lider sa relihiyon sa adlaw ni Ezequiel, ang relihiyosong mga lider sa Kakristiyanohan wala magpasidaan sa mga tawo bahin sa nagsingabot nga paghukom sa Diyos. Wala ipatin-aw sa mga klero sa Kakristiyanohan nga ang natukod na nga Gingharian ni Jehova hapit nang mangilabot sa mga kalihokan sa yuta. (Dan. 2:44) Sila nangangkon nga nagsulti pinaagi sa ngalan sa Diyos, apan ang tinuod, sila nagsulti sa kon unsay gustong madunggan sa ilang mga membro.

13. Sa pagpahayag sa “panultihon” nga nasulat sa Ezequiel 18:2, unsay gipaningkamotan nga buhaton sa mga Israelinhon, ug unsang hinungdanong leksiyon bahin sa pagkamay-tulubagon ang gipasiugda? [w88 9/15 p. 18 par. 10] Ang mga Israelinhon misulay sa pagpamasangil sa kon kinsay mabasol sa lisod kaayong kahimtang sa nasod. Sila miingon nga ilang giani ang dili-maayong epekto sa pagkadaotan sa ilang mga katigulangan. Apan si Ezequiel nag-ingon nga ang matag usa maoy responsable sa iyang mga buhat ug manubag kang Jehova. (Ezeq. 18:20, 27-30)

14. Sa unsang diwa nga si Ezequiel ‘naamang,’ panahon sa paglikos ug paglaglag sa Jerusalem? (Ezeq. 24:27; 33:22) [w03 12/1 p. 29] Si Ezequiel wala maamang sa literal nga diwa. Ang iyang pagkaamang nagpasabot nga wala na siyay ikasulti pa bahin sa Jerusalem samtang gipahamtang ang paghukom ni Jehova. Apan, siya nagpahayag ug mga mensahe sa paghukom batok sa mga kaaway sa katawhan sa Diyos nga nagmaya sa kalaglagan sa Jerusalem. (Ezeq., kap. 25-32) Sa ulahi, human gikataho ngadto sa Babilonya ang kalaglagan sa Jerusalem, si Ezequiel nagtagna nga kini ipasig-uli.

15. Kinsa si “Gog sa yuta sa Magog,” ug kanus-a siya molihok sa paglaglag sa katawhan ni Jehova? (Ezeq. 38:2, 16) [w97 3/1 p. 14 par. 1–p. 15 par. 3]