Repaso sa Teokratikanhong Tunghaan sa Ministeryo
Ang mosunod nga mga pangutana pagatagdon sa Teokratikanhong Tunghaan sa Ministeryo sa semana nga magsugod sa Agosto 28, 2008. Dumalahon sa magtatan-aw sa tunghaan ang 30-minutos nga repaso pinasukad sa materyal nga gikobrehan sa mga asaynment sa mga semana sa Hulyo 7 hangtod sa Agosto 25, 2008.
MGA HIYAS SA PAGPANULTI
1. Sa unsang paagi atong ikapakita ang pagkamakataronganon sa dihang magpaambit sa kamatuoran ngadto sa uban? (Filip. 4:5) [be p. 251 par. 3] Kinahanglang magmahunahunaon kita sa kagikan, mga kahimtang, ug mga pagbati sa atong gikaestorya, ug andam kitang mopahiuyon kon kini gikinahanglan. Ang pagpakiglabot sa uban sa maong paagi makatabang aron sila mas modawat sa dihang kita mangatarongan pinasukad sa Kasulatan.
2. Sa unsang paagi ang panig-ingnan ni Pablo dihang siya namulong sa mga Grego sa Areopago lagmit makatabang kanato sa dihang kita magsangyaw sa mga tawong wala mag-ila sa Bibliya ingong usa ka awtoridad? (Buh. 17:22, 23) [be p. 252 par. 1-2] Sa dihang si Pablo nagsangyaw ngadto sa mga Grego sa Areopago, wala siya magsugod pinaagi sa pagpunting sa mga Kasulatan. Hinunoa, misugod siya pinaagi sa paghisgot sa mga butang nga ilang nahibaloan ug gituohan, ug iyang gigamit kini sa pag-agak kanila sa paghunahuna bahin sa Maglalalang ug sa Iyang mga katuyoan. Sanglit ang kadaghanan nangandoy man ug mas maayong mga kahimtang, atong mapakita ang pagkamahunahunaon sa mga butang nga ilang gikabalak-an ug unya ipakita ang giingon sa Bibliya kon sa unsang paagi kini masulbad.
3. Bisan pag kombinsido tingali kita nga sayop ang gisulti sa atong gikaestorya, sa unsang paagi atong ikapakita ang pagkamakataronganon sa pagpakiglabot kaniya? [be p. 253 par. 1-2] Usahay, mas maayo nga pasalamatan lamang nato siya tungod sa iyang pagpahayag sa iyang kaugalingon ug ipunting ang paghisgot sa butang nga makahatag ug labawng kaayohan. Dili nato kalimtan nga ang atong asaynment mao ang “pagpamatuod,” dili ang pagpugos sa uban sa pagtuo sa mga butang nga atong gituohan. (Mat. 24:14) Ang mga tawo maoy magbuot kon unsay ilang tuohan, ug dili nato ihikaw kanila ang maong katungod.
4. Samtang maningkamot kita sa pagsulti nga makapakombinsir, unsay angay natong hinumdoman? [be p. 255 par. 3, kahon] Ang mga tawo dili motuo o molihok pinasukad sa atong isulti gawas kon sila kombinsido nga kana tinuod. Aron mahimong lig-on ang atong mga argumento, kini kinahanglang ipasukad sa Pulong sa Maglalalang sa langit ug yuta. Sa pagpresentar sa ebidensiya sa atong Kasulatanhong mga tinuohan, dako gayog gikatabang ang mga basahon sa matinumanon ug maalamong ulipon.
5. Sa unsang paagi atong magamit ang katakos sa pag-ila sa dihang kita maningkamot sa pagtukbil sa kasingkasing sa tigpatalinghog? (Prov. 20:5) [be p. 258 par. 1–p. 259 par. 1] Ang usa ka tawo nga may hait nga pag-ila nagtagad sa kon unsay nakaimpluwensiya sa panghunahuna ug mga pagbati sa iyang tigpatalinghog. Makatabang usab ang pag-ugmad sa atong katakos sa pagpaniid. Sa dihang hisgotan ang usa ka topiko, angay natong matikdan ang bisan unsang kausaban sa ekspresyon sa nawong o tono sa tingog sa atong tigpatalinghog.
ASAYNMENT NUM. 1
6. Unsay angayng hinumdoman sa mga sister sa dihang sila mangandam sa tagboanan (setting) sa ilang bahin? [be p. 44 par. 5-6] Sa pagpangandam sa tagboanan, angayng tagdon sa mga sister ang ulohan sa ilang bahin, ang tawo nga ilang pakigsultihan, ug ang puntong gitambag nga maoy ilang pauswagon.
7. Unsay paningkamotang himoon sa mga brader sa ilang pagpresentar sa mga pangunang punto sa Bibliya? (Neh. 8:8) [be p. 47 par. 2-3] Ang katuyoan sa pagpresentar sa mga pangunang punto sa Bibliya mao ang pagpatin-aw sa Pulong sa Diyos, paghatag ug kahulogan niini, ug pagpaambit sa pagsabot. Kinahanglang ipasiugda kon sa unsang paagi ang materyal makaapektar kanato karon. Sa pagpangandam, mainampoong hunahunaon sa mga brader ang mga panginahanglan sa kongregasyon ug itagana kana pinaagi sa pagpasiugda sa mga prinsipyo sa Bibliya gikan sa giasayn nga mga kapitulo.
8. Sa unsang paagi dumalahon sa usa ka brader ang iyang asaynment sa Tigom sa Pag-alagad nga adunay pasundayag o interbiyo? [be p. 49 par. 5] Sanglit ang mga pasundayag usa man ka sumbanan nga sundogon sa kongregasyon, kini kinahanglang pangandaman pag-ayo. Kon ang mga bahin sa mga brader adunay mga pasundayag o interbiyo, kinahanglang ilang bansay-bansayon ang mga igsoon nga ilang gamiton alang niini sa dili pa ang adlaw sa tigom.
9. Giunsa pagpasiugda sa basahon sa Mga Buhat ang angay nga paagi ug gilapdon sa pagsangyaw? (Buh. 20:20, 21; 28:23) [si p. 204 par. 35] Si Pablo naghatag ug panig-ingnan tungod kay siya “wala magpugong” sa “pagtudlo . . . sa publiko ug sa balay ug balay.” Gipasiugda sa tibuok basahon sa Mga Buhat ang “bug-os nga pagpamatuod.”
10. Unsay mahimo sa mamumulong sa publiko sa pagtino nga ang Bibliya maoy basehanan sa iyang pakigpulong? (Buh. 17:2, 3) [be p. 52 par. 6–p. 53 par. 2] Ang igsoon nga mohatag sa pakigpulong publiko dili angayng maghunahuna lamang sa pagpalapad sa mga pulong diha sa gipatik nga laraw. Hinunoa, iyang sabton kon sa unsang paagi kining mga pulonga gihisgotan sa Kasulatan. Siya kinahanglang mogahin ug panahon sa pagbasa, pagpatin-aw, pag-ilustrar, ug pagpadapat sa mga teksto imbes isentro ang pagtagad diha lamang sa laraw.
SENEMANANG PAGBASA SA BIBLIYA
11. Nganong gustong “magpakamatay” ang magbalantay sa bilanggoan sa Filipos? (Buh. 16:25-27) [w90 5/15 p. 25, kahon] Tungod sa usa ka linog nabuksan ang mga pultahan sa prisohan ug nangatangtang ang mga gapos sa mga piniriso. Ang Romanhong balaod nagmando nga ang magbalantay mao ang mag-antos sa silot sa piniriso nga nakaeskapo. Dayag nga mas gusto sa magbalantay sa prisohan nga magpakamatay na lang kay sa paantoson hangtod mamatay, nga lagmit mao ang nagpaabot nga silot sa nakaikyas nga mga piniriso.
12. Unsay reaksiyon ni Aristarko ug Gayo sa paglutos? (Buh. 19:29; 20:4, 5) [w08 2/15 p. 10 par. 16-17] Dihang giguyod ngadto sa teatro sa Efeso sa nasuko nga panon sa magubtanong katawhan nga posibleng libolibo ang gidaghanon, lagmit nagtuo si Aristarko ug Gayo nga mangamatay na sila. Apan, walay timailhan nga nawad-an silag kaisog. Pipila ka bulan sa ulahi, gikuyogan nila si Pablo sa iyang ikatulong misyonaryong panaw bisan pag sila nameligro.
13. Unsay kahulogan sa ‘pagpatid ni Saulo batok sa mga igtutugsok’? (Buh. 26:14) [w03 10/1 p. 32] Ang ekspresyong “pagpatid batok sa mga igtutugsok” nagbatbat sa usa ka mananap nga nagpasakit sa iyang kaugalingon pinaagi sa pagdumbol sa talinis nga metal nga gidisenyo sa pagpalakaw ug paggiya sa mga mananap. Pinaagi sa pagdaogdaog sa mga Kristohanon, gidaot lamang ni Saulo ang iyang kaugalingon, tungod kay sa pagbuhat niana siya nakig-away sa Diyos. Gisunod ni Saulo ang giingon ni Jesus, giusab ang iyang dalan, ug nahimong ang hinigugmang Kristohanon nga si apostol Pablo. Sa Ecclesiastes 12:11, ang balaang tambag gipakasama sa mga igtutugsok tungod kay kini makapalihok ug makagiya kanato sa hustong paagi kon ato kining sundon.
14. Sa unsang paagi ang ‘sala giaghat’ pinaagi sa kasugoan sa Diyos sa Israel? (Roma 7:8, 11) [w08 6/15 “Ang Pulong ni Jehova Buhi—Mga Pangunang Punto Gikan sa Basahon sa Roma”] Ang Balaod nakatabang sa mga tawo sa pag-ila sa bug-os nga gilapdon o kamalangkobon sa sala, nga tungod niini mas naamgohan nila ang ilang pagkamakasasala. Tungod niini, ilang nakita nga sila makasasala sa daghang paagi, ug nabutyag ang pagkamakasasala sa daghang tawo.
15. Sa unsang paagi kita “magapundok ug mga baga” ibabaw sa ulo sa kaaway? (Roma 12:20) [w08 6/15 “Ang Pulong ni Jehova Buhi—Mga Pangunang Punto Gikan sa Basahon sa Roma”] Sa panahon nga gisulat ang Bibliya, ang minahon nga bato ibutang sa hurno ug butangag baga ang ibabaw ug ilalom niana. Ang nagkainit nga baga sa ibabaw makatabang sa pagtunaw sa metal ug mahimulag kini gikan sa bato. Sa samang paagi, atong ibutang ang init nga baga ibabaw sa ulo sa atong kaaway pinaagi sa paghimog malulotong buhat kaniya aron matunaw ang iyang pagkagahian ug mogawas ang maayo niyang mga hiyas.