Repaso sa Teokratikanhong Tunghaan sa Ministeryo

Ang mosunod nga mga pangutana pagatagdon sa Teokratikanhong Tunghaan sa Ministeryo sa semana nga magsugod sa Oktubre 27, 2008. Dumalahon sa magtatan-aw sa tunghaan ang 30-minutos nga repaso pinasukad sa materyal nga gikobrehan sa mga asaynment sa mga semana sa Septiyembre 1 hangtod sa Oktubre 27, 2008.

MGA HIYAS SA PAGPANULTI

1. Sa unsang paagi nato mahibaloan kon unsay gituohan sa usa ka tawo ug kon nganong siya nagtuo niana? [be p. 259 par. 1, 2] Ang pagdiskobre kon unsay anaa sa kasingkasing nagkinahanglag paningkamot ug dili angayng dalidalion. Makatabang ang pagsuknag mga pangutana nga sama sa: “Unsay imong pagtuo bahin sa . . . ?” “Unsay nakakombinsir kanimo nga . . . ?” o “Unsay imong sanong kon . . . ?” Sa dili pa nato tubagon ang sayop nga tinuohan sa usa ka tawo, sabta una kon nganong siya nakapadayag niana. Kon atong ipabati nga nasabtan nato siya, mas sayon alang kaniya nga mamati sa atong ginasulti.

2. Sa unsang paagi nato matabangan ang usa ka tawo aron iyang mawagtang ang pagkamapihigon ug pagdumot diha sa iyang kasingkasing? [be p. 260 par. 2] Ang usa ka tawong mapihigon ug madumtanon angayng makakat-on sa pag-isip ni Jehova kaniya ug sa ubang mga tawo. Sa dihang ang usa ka tawo makasabot nga si Jehova nagpakitag malumong pagtagad alang kanato, ingong mga indibiduwal, bisan unsa pay atong kagikan, nasyonalidad, o rasa, makabaton unya siyag lig-ong Kasulatanhong pasikaranan sa pagpakiglabot sa uban nga malinawon. (Buh. 10:​34, 35)

. Unsaon nato pagtabang ang atong mga estudyante aron masusi nila kon unsay anaa sa ilang kasingkasing ug makapadayon sila sa pagtubo sa espirituwal? [be p. 261 par. 3] Angay natong dasigon ang atong mga estudyante sa pagsusi sa Bibliya aron ilang makat-onan kon giunsa kita paglantaw ni Jehova. (Prov. 17:3) Tabangi sila sa pag-isip nga ang pagbasa sa Bibliya maoy usa ka paagi aron mabatonan ang pagtulotimbang ni Jehova sa “mga hunahuna ug tuyo sa kasingkasing” aron sila makakooperar sa Diyos sa paghimo sa gikinahanglang mga kausaban. (Heb. 4:12)

4. Unsay angay natong hinumdoman sa dihang maningkamot kita sa pagtukbil sa kasingkasing sa atong mga tigpaminaw? [be p. 262 par. 4] Angay natong hinumdoman nga kon kita nagtudlo sa uban, ang atong bahin mao ang pagkooperar kang Jehova. (1 Cor. 3:9) Si Jehova ang magtulotimbang sa kasingkasing ug magdani sa mga tawo aron makabaton ug maayong relasyon uban kaniya. (Prov. 21:2; Juan 6:44) Siya dili magpugos kang bisan kinsa nga dawaton ang kamatuoran, apan samtang gigamit nato ang Kasulatan, mahimong ipahinabo sa Diyos nga maamgohan sa atong mga tigpatalinghog nga ang ilang ginapamatian mao ang tubag sa ilang mga pangutana o sa ilang mga pag-ampo.

5. Nganong hinungdanon nga sundon ang gitagal nga panahon sa matag bahin diha sa mga tigom? [be p. 263 par. 1, 3, kahon] Kon atong sundon ang gitagal nga panahon, mahimo nato ang “tanang butang nga may kahapsay ug pinaagig kahikayan.” (1 Cor. 14:40) Kinahanglang hatagan ug igong panahon sa matag usa ang mga pangunang punto sa instruksiyon. Gawas pa, ang tigom gieskedyul nga mosugod ug matapos sa tinong oras bisan unsa pa ang kostumbre sa usa ka dapit o sa personal nga kagustohan.

ASAYNMENT NUM. 1

6. Unsay nagtukmod kang Pablo sa pagsulat sa iyang unang sulat sa mga taga-Corinto? [si p. 210 par. 3] Si Pablo nakadawat ug sulat gikan sa Corinto, nga bag-o pa lang nga kongregasyon, ug kini nanginahanglag tubag. Dugang pa, nakadangat kang Pablo ang makapabalakang mga report gikan sa maong kongregasyon. (1 Cor. 1:​11; 5:1; 11:18) Nakapasubo gayod kini kang Pablo ug wala gani niya hisgoti ang sulat pakisayod sa mga taga-Corinto hangtod sa unang bersikulo sa kapitulo 7 sa iyang sulat.

7. Unsa ang pipila ka rason kon nganong gisulat ni Pablo ang iyang ikaduhang sulat sa mga taga-Corinto? [si p. 214 par. 1-2] Si Tito mibalik gikan sa Corinto ug iyang gireport kang Pablo nga ang iyang unang sulat nagpalihok kanila nga maghinulsol. Apan nameligro ang espirituwalidad sa maong kongregasyon sanglit adunay “labing hawod nga mga apostol” kinsa iyang gihubit usab ingong “mini nga mga apostol” ug “malimbongong mga magbubuhat” sa Corinto. (2 Cor. 11:​5, 13, 14) Ang awtoridad ni Pablo ingong apostol giatake. Busa ang iyang ikaduhang sulat mipuno sa dakong panginahanglan.

8. Unsang tinamdan ang angayng batonan sa mga Kristohanon diha sa ministeryo? [si p. 216-217 par. 18] Sama sa tinamdan nga gipasiugda ni Pablo diha sa iyang ikaduhang sulat sa mga taga-Corinto, angay usab kitang magpakitag lalom nga pagpabili sa atong ministeryo. Ang Kristohanong ministro kinsa nahimong kuwalipikado pinaagi sa Diyos dili mamaligya sa Pulong, kondili sinsero nga moalagad kaniya. Wala siya girekomendar pinaagig sinulat nga dokumento, apan pinaagi sa iyang mga bunga sa ministeryo. Kon duna kitay mga kalamposan sa ministeryo, dili nato kana angayng ipanghambog. Hinunoa, ang maong mga kalamposan maoy tungod sa tabang ni Jehova. (2 Cor. 2:​16, 17; 3:​1-5; 4:7)

9. Sama sa mga igsoon sa Filipos, sa unsang paagi kita uyonan sa Diyos ug mahimong kalipay sa atong mga igsoon? [si p. 225 par. 12] Masundog nato ang mga taga-Filipos kon kita magmanggihatagon ug magmatinabangon sa atong mga igsoon nga anaa sa kalisdanan. (Filip. 1:​3-6) Kita pagauyonan sa Diyos kon kita padayong ‘mobarog nga malig-on sa usa ka espiritu, . . . nga maningkamot kiliran sa kiliran alang sa pagtuo sa maayong balita,’ ug magasidlak ingong “mga magbabanwag” niining daotang kalibotan. Kon ato kining himoon, mahimo kitang kalipay sa atong mga igsoon. (Filip. 1:​27; 2:​15; 4:1)

10. Unsay maayong mga epekto sa gihimo ni Pablo ug sa iyang mga kauban ngadto sa kongregasyon sa Tesalonica? [si p. 231 par. 13] Si Pablo nagtumong sa iyang kaugalingon ug sa iyang mga kauban ingong mga magwawali sa maayong balita sa Diyos, ug gawas pa niini gihatag nila ang ilang kalag sa mga igsoon sa Tesalonica. Giampo ni Pablo nga ang mga taga-Tesalonica “magpadagaya” sa ilang “gugma sa usag usa.” Kini nga gugma makapalig-on ug magpalahi sa mga Kristohanon gikan sa walay gugma, dunot, ug imoral nga kalibotan. (1 Tes. 2:8; 3:​12; 4:​1-9)

SENEMANANG PAGBASA SA BIBLIYA

11. Unsay buot ipasabot sa ‘pagtugyan sa [daotang] tawo kang Satanas alang sa kalaglagan sa unod, aron nga ang espiritu maluwas’? (1 Cor. 5:5) [w08 7/15 “Ang Pulong ni Jehova Buhi​—Mga Pangunang Punto sa mga Sulat Ngadto sa mga Taga-Corinto”] Kon ang usa mapalagpot gikan sa kongregasyon, siya mahimong bahin na usab sa daotang kalibotan ni Satanas. (1 Juan 5:​19) Siya ikaingon nga gitugyan ngadto kang Satanas. Ang pagpalagpot kaniya magwagtang sa daotang impluwensiya diha sa kongregasyon ug motunhay ang “espiritu,” o ang nagpatigbabaw nga tinamdan. (2 Tim. 4:22)

12. Unsa “kamakanunayon” ang pagsaulog sa kamatayon ni Jesus, ug “hangtod” kanus-a? (1 Cor. 11:26) [w08 7/15 “Ang Pulong ni Jehova Buhi​—Mga Pangunang Punto sa mga Sulat Ngadto sa mga Taga-Corinto”] Ang Gregong pulong nga gigamit alang sa “ingon kamakanunayon sa” nagkahulogan ug “sa matag higayon.” Busa, si Pablo nagpasabot nga sa matag higayon nga ang dinihogang mga Kristohanon makig-ambit sa mga emblema sa Memoryal, ilang “gimantala ang kamatayon sa Ginoo.” Ila kining himoon ‘hangtod sa iyang pag-abot,’ o hangtod nga sila mabanhaw sa langit panahon sa iyang “presensiya.” (1 Tes. 4:​14-​17)

13. Unsang panan-awon ang gihisgotan sa 2 Corinto 12:2-4, ug lagmit kinsay nakakita niini? [w04 10/15 p. 8 par. 4; p. 10 par. 9] Ang panan-awon naghulagway sa nahimayang kahimtang sa matuod nga pagsimba, ang espirituwal nga paraiso taliwala sa katawhan ni Jehova sa “panahon sa kataposan.” (Dan. 12:4) Sanglit ang maong teksto nagsunod sa mga bersikulo diin gidepensahan ni Pablo ang iyang pagkaapostol, lagmit siya nag-asoy sa iyang kaugalingong kasinatian.

14. Nganong gitandi man ni Pablo ang Balaod ni Moises sa usa ka “magtutudlo [mag-aagak] nga nagatultol ngadto kang Kristo”? (Gal. 3:24) [w08 3/1 pp. 18-21] Gipasiugda ni Pablo nga ang Balaod magsilbing proteksiyon ug kini temporaryo lamang. Kasagaran ang mag-aagak maoy sinaligang sulugoon nga magbantay sa bata aron kini mahilayo sa peligro ug magtudlo kaniyag hustong panggawi. Sa susama, ang Moisesnong Balaod nagpanalipod sa mga Israelitas batok sa law-ayng mga buhat ug sa mahilayong relihiyosong mga rituwal sa mga nasod sa ilang palibot. Apan inigkadako sa bata, siya dili na ilalom sa awtoridad sa iyang mag-aagak. Sa samang paagi, ang Balaod temporaryo ug sa dihang maagak na niini ang mga Hudiyo ngadto kang Kristo, matuman na ang papel niini ingong mag-aagak.

15. Unsay buot ipasabot ni Pablo sa dihang siya nag-ampo nga “ang espiritu ug ang kalag ug ang lawas ninyong mga igsoon pagatipigan”? (1 Tes. 5:23) [w08 9/15 “Ang Pulong ni Jehova Buhi​—Mga Pangunang Punto sa mga Sulat Ngadto sa mga Taga-Tesalonica ug Ngadto Kang Timoteo”] Si Pablo nagtumong sa mga membro sa Kristohanong kongregasyon. Giampo niya nga magpabilin ang “espiritu” niini, o ang ilang tinamdan sa hunahuna. Giampo usab niya ang “kalag” niini o ang ilang kinabuhi o paglungtad, ug ang “lawas” niini o ang lawas sa mga dinihogan. (1 Cor. 12:​12, 13) Agig pagsundog kang Pablo, angay usab nga madayag diha sa atong mga pag-ampo ang atong lalom nga kabalaka sa kongregasyon ug sa tibuok-kalibotang panag-igsoonay.