Pangandam Pag-ayo Alang sa Memoryal
Pagkadakong kalipay ug pribilehiyo alang sa mga sumusunod ni Kristo nga mangandam pag-ayo alang sa gabii sa paghandom sa kamatayon ni Jesu-Kristo! (Luc. 22:19) Unsang praktikal nga mga lakang ang angay natong himoon sa pagpangandam alang sa Memoryal?
◼ Oras ug Dapit: Kinahanglan nga mahibalo gayod ang tanan sa tinong oras ug dapit diin pagahimoon ang Memoryal. Kon kapin sa usa ka kongregasyon ang mogamit sa Kingdom Hall, hinungdanon nga moabot kita sa gitakdang oras ug mobiya sa hapsay nga paagi, tungod kay limitado lamang ang kal-ang nga oras sa matag tigom. Hinungdanon usab nga likayan ang pagpunsisok diha sa pultahan, sa hulatanan, sa publikong mga agianan, ug sa parkinganan.
◼ Imbitasyon: Aduna na bay suplay sa imbitasyon ang mga magmamantala, ug sinati na ba sila sa mga kaundan niana? Nangandam ka na ba kon unsaon kana pagtanyag? Kinsay imong hatagan niana? Maningkamot gayod kita sa pagpakigbahin niini aron mapanagtag ang tanang imbitasyon.
◼ Transportasyon: Ang pipila ka interesado ug ang ubang mga igsoon lagmit nagkinahanglan ug kasakyan o uban pang tabang. Unsang mga kahikayan ang gihimo aron maatiman ang ilang mga panginahanglan?
◼ Mga Emblema: Seguroha nga ang mga emblema dili una ipasa sa dili pa mosalop ang adlaw. Kon adunay dinihogan nga dili makaarang sa pagtambong tungod sa luyang panglawas, angay nga maghimog mga kahikayan aron siya masilbihan sa mga emblema. Angay nga mabatonan ug maandam ang tukmang matang sa tinapay ug bino.—Tan-awa ang Pebrero 15, 2003, nga Bantayanang Torre, panid 14-15, parapo 14, 17.
◼ Kingdom Hall: Kinahanglan nga malimpiyohan pag-ayo kini nga abante. Ang mga plato, kopa, ug ang haom nga lamesa ug mantel kinahanglang dad-on ug ipahiluna nga abante diha sa tigomanan. Kon mogamit ug laing tigomanan, paneguroa nga adunay maayong sound system aron madunggan sa tanang manambong ang mamumulong. Ang mga atendant ug ang mga mopasa sa emblema angay nga pilion ug abante nga pahibaloon bahin sa ilang mga kaakohan, sa tukmang kahikayan nga pagasundon, ug sa maligdong nga pamiste ug pamostura.
Niining labing hinungdanong okasyon, ang paghandom sa kamatayon ni Jesu-Kristo, buot natong mangandam pag-ayo ingong indibiduwal ug ingong usa ka kongregasyon. Panalanginan gayod ni Jehova ang tanan nga tiunayng nagpabili sa tanan niyang gitagana alang sa katawhan pinaagi sa halad sa iyang pinalanggang Anak, si Jesu-Kristo.