Ang Atong Ministeryo—Pamatuod sa Atong Gugma sa Diyos
1. Ang gugma sa Diyos nagtukmod kang Jesus sa pagbuhat sa unsa?
1 Ang gugma maoy nagtukmod kang Jesus sa pagtuman sa iyang ministeryo. Ang tanang bahin sa iyang ministeryo naghatag ug dili-malalis nga pamatuod sa iyang gugma kang Jehova. Si Jesus miingon: “Aron nga mahibalo ang kalibotan nga gihigugma ko ang Amahan, sumala gayod sa gisugo kanako sa Amahan nga pagabuhaton, kana ang akong ginabuhat.” (Juan 14:31) Ingong mga tigsundog ni Jesus, kita usab adunay pribilehiyo nga pamatud-an ang atong halalom nga gugma sa Diyos diha sa atong ministeryo.—Mat. 22:37; Efe. 5:1, 2.
2. Sa unsang paagi ang gugma kang Jehova mag-apektar sa atong ministeryo?
2 “Pagabalaanon Unta ang Imong Ngalan”: Kon kita masibotong magpahimulos sa tanang kahigayonan sa pagsangyaw sa uban bahin kang Jehova ug sa iyang Gingharian, atong gipakita ang atong gugma sa Diyos, ug pinaagi niana, kita makaamot sa pagbalaan sa iyang ngalan. (Sal. 83:18; Ezeq. 36:23; Mat. 6:9) Sama sa ministeryo ni Jesus, ang atong ministeryo magpamatuod sa atong tim-os nga tinguha nga mabalaan ang ngalan ni Jehova ug matuman ang iyang kabubut-on.—Mat. 26:39.
3. Sa unsang paagi ang atong gugma kang Jehova makatabang kanato sa pagbuntog sa mga babag?
3 Ang Gugma Makatabang Kanato sa Pagbuntog sa mga Babag: Ang gugma alang kang Jehova makabuntog sa tanang kababagan. (1 Cor. 13:4, 7) Si Jesus nakaatubang ug daghang kahimtang nga mahimong makapaluya kaniya sa pagtuman sa iyang ministeryo. Apan, ang iyang dakong gugma sa Diyos ug tinguha sa pagbuhat sa kabubut-on ni Jehova nakatabang kaniya nga mabuntog ang mga problema. (Mar. 3:21; 1 Ped. 2:18-23) Kita usab makasinati ug daghang kalisdanan, apan ang atong gugma sa Diyos makatabang kanato sa pagbuntog niana. Pinaagi sa pagsunod pag-ayo sa panig-ingnan ni Kristo, kita makabatog pagsalig ug kadasig sa pagtuman sa atong ministeryo. Bisan tuod mahimo kitang maapektohan sa pagsupak sa pamilya, balatian, pagkatigulang, ug kawalay-interes sa mga tawo sa katibuk-an, kini dili makapugong kanato sa pagpakita sa atong gugma kang Jehova pinaagi sa pagtuman sa atong ministeryo kutob sa atong maarangan.
4. Unsang pribilehiyo ang atong nabatonan maylabot sa atong gugma kang Jehova?
4 Dako gayod ug mahimo ang gugma, ug kita gihatagag pribilehiyo nga pamatud-an ang atong tibuok-kalag nga gugma sa Diyos diha sa atong ministeryo. (1 Cor. 13:13) Samtang tulin nga nagsingabot ang panahon nga ang ngalan ni Jehova mabalaan na sa dayon, hinaot nga ang atong “gugma mosamot pa sa pagdagaya.”—Filip. 1:9; Mat. 22:36-38.