Ang mga Payunir Makatagamtam ug Dagayang mga Panalangin
1. Unsay nagtukmod sa daghan sa pagpayunir?
1 Sa miaging tuig, miaberids ug kapin sa usa ka milyong magmamantala ang nag-alagad ingong oksilyare o regular payunir sa tibuok kalibotan. Nganong gihimo nila kana? ‘Kay ang takna sa paghukom sa Diyos miabot na.’ Walay laing buluhaton karon nga mas dinalian kay sa pagmantala sa “walay kataposang maayong balita.”—Pin. 14:6, 7.
2. Unsay nakatabang sa daghan aron makapayunir?
2 Kon Unsaon nga Makapayunir: Sanglit “ang panahong nabilin mubo na,” ang mga payunir naningkamot sa paghupot sa ilang kinabuhi nga yano. (1 Cor. 7:29, 31) Nangita silag mga paagi sa pagpakunhod sa ilang mga galastohan aron diyutayng oras lang ang ilang magugol sa sekular nga trabaho. (Mat. 6:19-21) Uban sa nagasakripisyo-sa-kaugalingon nga espiritu ug pagsalig kang Jehova, daghan ang nakahimo sa pagpayunir. Makapayunir ka ba? Nganong dili mangutana sa malamposong mga payunir kon giunsa nila kana paghimo? Pakig-uban kanila diha sa ministeryo ug sinatia ang ilang kalipay. Atong repasohon ang pipila ka panalangin nga natagamtam sa daghang payunir.
3-5. Unsang mga panalangin ang natagamtam sa mga payunir?
3 Mga Panalangin ug mga Kalipay: “Ang pagkahibalo kon unsaon paggamit ang Pulong sa Diyos sa hustong paagi maoy usa gayod ka panalangin,” miingon ang usa ka batan-ong payunir. “Karon kon mamalaybalay ko, makahunahuna dayon kog mga teksto nga haom sa matag tagbalay.”—2 Tim. 2:15.
4 Ang pagpayunir magtudlo usab sa mga batan-on kon unsaon pagbahinbahin sa ilang panahon sa maalamong paagi, kon unsaon pagdumala sa ilang mga galastohan, ug kon unsaon pagpakiglabot sa mga tawo. Miuswag ang espirituwal nga panglantaw sa daghan tungod sa ilang pagpayunir.—Efe. 4:13.
5 Lagmit ang kinadak-ang panalangin sa pagpayunir mao nga kini motabang kanato nga mas masuod kang Jehova. Usa ka sister nga nakasinati ug grabeng mga kalisdanan miingon: “Ang suod nga relasyon nga akong naugmad uban kang Jehova pinaagi sa pagpayunir mao ang nakatabang kanako sa pagsagubang niining tanan. Kini nakapaarang kanako sa paglahutay sa mga paagi nga wala nako damha.”—Buh. 20:35.
6. Nganong ang Septiyembre maoy usa ka maayo kaayong panahon sa pagpayunir?
6 Makasugod Ka ba sa Septiyembre? Ang unang bulan sa bag-ong tuig sa pag-alagad maoy maayo kaayong panahon sa pagregular payunir. Nakaoksilyare payunir ka na ba, nga migugol ug 50 ka oras matag bulan? Madugangan ba nimo kinig 20 ka oras matag bulan aron mahimong regular payunir? Payunir ka ba kaniadto, apan miundang tungod sa pipila ka problema? Ang imo bang mga kahimtang karon magtugot na kanimo sa pagpayunir pag-usab sa Septiyembre? Giawhag namo ang tanan nga pamalandongon kini pag-ayo ug, kon posible, ‘paliton’ ang panahon gikan sa ubang mga kalihokan ug gamiton kini sa pagpayunir sa 2010 nga tuig sa pag-alagad.—Efe. 5:16.