“Ang Kaalam Mapamatud-ang Matarong Pinaagi sa mga Buhat Niini”

1. Giunsa paglantaw sa uban ang atong buluhaton?

¹ Usahay kita makahibalag ug mga tagbalay nga may negatibong reaksiyon tungod kay sayop ang ilang pagtuo kanato o sayop ang ilang nadunggan bahin sa mga Saksi ni Jehova. Tingali naimpluwensiyahan ang ilang panglantaw sa mapihigong mga report sa media. Sa ubang mga dapit kita gitawag ug “peligrosong sekta.” Unsay angay natong buhaton kon atong madunggan ang maong kritisismo?

2. Unsay makatabang kanato aron dili maluya sa dihang kita daoton?

² Paghupot Kanunay ug Positibong Tinamdan: Sa unang siglo, sagad sayop ang pagtuo sa mga tawo bahin kang Jesus ug sa ubang mga alagad ni Jehova, ug gani sila gidaot. (Buh. 28:22) Apan wala nila ikaulaw ang ilang ministeryo tungod niini. Si Jesus miingon: “Ang kaalam mapamatud-ang matarong pinaagi sa mga buhat niini.” (Mat. 11:18, 19) Siya padayong nagmasiboton sa pagbuhat sa kabubut-on sa iyang Amahan, ug nagmasaligon nga kadtong tinuod nga nangita sa kamatuoran makasabot sa kabililhon sa maayong balita. Mapalig-on kita kon atong hinumdoman nga nasinatian usab sa Anak sa Diyos ang maong pagtratar.

3. Nganong ang negatibong mga taho ug mga pagsupak dili angayng makapatingala kanato?

³ Gipakita ni Jesus nga ang kalibotan magdumot sa iyang mga sumusunod sama sa pagdumot niini kaniya. (Juan 15:18-20) Busa dili nato angayng ikatingala ang negatibong mga taho ug pagsupak karong adlawa. Gani, dahomon nato nga mosamot pa gayod ka kaylap ang maong mga butang samtang talitapos na ang kataposang mga adlaw ug mas nagkagrabe ang kasuko ni Satanas. (Pin. 12:12) Angay gayod kitang malipay tungod kay kini maoy pamatuod nga ang kalibotan ni Satanas hapit nang matapos.

4. Kon adunay magpakitag negatibong reaksiyon sa maayong balita, unsay angay natong sanong?

⁴ Ipakita ang Kaayo: Kon ang mga tawo mosultig negatibo kanato, kinahanglan nato silang pakitaan kanunay ug kaayo ug kalumo. (Prov. 15:1; Col. 4:5, 6) Kon itugot sa kahimtang, mahimong ipatin-aw nato sa sinserong tagbalay nga daghang sayop nga impormasyon ang gisabwag batok sa mga Saksi ni Jehova o kaha pangutan-on siya kon nganong ingon niana ang iyang gibati kanato. Kon malumo ang atong tubag basin siya maaghat sa pagpangutana bahin sa iyang nadunggan mahitungod sa mga Saksi ni Jehova ug sa pagpatalinghog sa sunod panahon nga moduaw ang mga Saksi. Apan, kon ang tagbalay suko kaayo, labing maayo nga manamilit na lang ta nga matinahoron. Makaseguro kita nga bisan unsa pa ang panglantaw sa uban bahin kanato, si Jehova nagpabili sa atong ministeryo.—Isa. 52:7.