Hatagig Magasin ang Tanang Interesado
1. Unsay namatikdan bahin sa napahimutang nga mga magasin dinhi sa Pilipinas, ug nganong angay kining tagdon?
1 “Makapainteres, mapuslanon, ug makapadasig.” “Kini ang labing makapadasig nga mga basahon nga akong nabasa sukad.” Kini ang sagad gikomento sa mga magbabasa sa Bantayanang Torre ug Pagmata! sa tibuok kalibotan. Ang atong mga magasin mapuslanon gayod aron maabot sa maayong balita ang “tanang matang sa mga tawo.” (1 Tim. 2:4) Apan namatikdan nga ubos kaayo ang napahimutang nga mga magasin dinhi sa Pilipinas. Unsay hinungdan niini, ug unsay atong mahimo aron mas daghang magasin ang mapanagtag?
2. Nganong nagpanuko ang uban sa pagkuha ug pagtanyag ug mga magasin?
2 Donasyon: Dili ba kaha nagpanuko ang uban sa pagkuha ug pagtanyag ug literatura o mga magasin tungod sa donasyon? Tingali nagtuo ang uban nga kinahanglan silang moamot ug eksaktong kantidad para sa matag magasin o literatura nga ilang kuhaon. Tungod niini, pipila lang ka magasin ang ilang kuhaon o wala gayod. Husto ba kini nga panglantaw?
3. Unsang kahikayan ang gihimo sa tuig 2000 bahin sa atong mga literatura ug magasin?
3 Sa Enero 2000, ang Nagamandong Lawas naghimog kahikayan nga ang mga magasin ug literatura dinhi sa Pilipinas, sama sa ubang mga nasod, mabatonan na sa mga magmamantala ug sa publiko pinaagig donasyon, nga walay isugyot nga tinong kantidad. Sa dihang magtanyag ug literatura, modawat kitag donasyon para sa atong tibuok kalibotang buluhaton sa pagsangyaw sa maayong balita.
4. Unsay mga panalangin sa dihang ang atong mga publikasyon mabatonan na pinaagig boluntaryong donasyon?
4 Sa unsang paagi gipanalanginan ni Jehova kini nga kahikayan? Ang sanga sa Central African Republic misulat: “Makabaton nag mga basahon ang tanan nga makatabang kanila nga mahimong sumusunod ni Kristo. Mapasalamaton gayod niini nga kahikayan ang mga igsoon ug ang publiko.” Ang sanga sa Indonesia miingon: “Ang gipangita sa mga igsoon mao ang mga interesadong mobasa sa atong mga publikasyon, dili lamang kadtong may ikadonar.” Ang sanga sa South Africa mitaho: “Ang pag-imprentag magasin miuswag ug kapig duha ka pilo, ug kapin pa ganig upat ka pilo diha sa ubang pinulongan! . . . Kini nagpakita nga mas daghang ‘binhi’ sa kamatuoran ang napugas karon kay sukad masukad.—Mat. 13:3-8.”
5. (a) Unsa ka daghang magasin ang atong kuhaon? (b) Kinsay angay natong tanyagan niini?
5 Busa, ang matag magmamantala kinahanglang magkuhag igong suplay sa mga literatura ug magasin nga ilang gamiton sa pagpamalaybalay, pagbalikduaw, ug pagtuon sa Bibliya. Ang atong boluntaryong donasyon maoy para sa tibuok kalibotang buluhaton, dili para mga publikasyon nga atong gikuha. Kita nag-amot para sa tanang kalihokan sa organisasyon nga naglakip sa pag-imprentag literatura, mga galastohan sa puy-anang Bethel, mga misyonaryo, nagapanawng mga magtatan-aw, ug uban pa. Panalanginan gayod ni Jehova kadtong kinasingkasing nga modonar sumala sa ilang maarangan.—2 Cor. 8:1-4; 9:7.
6. Nganong magmaalamon kita sa pagtanyag sa mga magasin?
6 Maalamong Gamita ang mga Magasin: Hinungdanon nga atong pangitaon ang mga interesado ug tabangan sila nga maluwas ngadto sa bag-ong kalibotan ni Jehova. Busa, dili kita magpanuko sa pagtanyag sa mga magasin ug literatura. Apan maanugon kini kon ato lang kining ibilin sa mga tawo nga walay pagpabili sa espirituwal nga mga butang. Busa dili nato kini ibilin sa mga dili interesado, dili mobasa, o niadtong gustong mobaligya niini.—Isa. 26:10.
7. Unsaon nato pagtino nga ang tagbalay interesado?
7 Daghan kitag mapanagtag nga literatura kon kita may katakos sa pagtino kon ang tagbalay interesado ba gayod. Unsay mga timailhan nga ang tagbalay interesado? Siya mahigalaon ug matinahorong makig-estorya, maminaw, motubag sa imong mga pangutana, ug mopahayag sa iyang opinyon. Kon siya maminaw samtang magbasa kag Bibliya, o kon andam siyang mobasag Bibliya, timailhan kana nga siya may pagtahod sa Pulong sa Diyos. Sagad, maayong pangutan-on siya kon basahon ba niya ang publikasyon nga gitanyag. Dugang pa, makapangutana ka niya kon puwede ka bang mobalik aron ipadayon ang panaghisgot. Kon siya mouyon, nan interesado siya. Kon imong makita kini nga mga timailhan, makabilin ka kaniyag publikasyon.
8. Unsay pipila ka paagi aron makapahimutang kitag mas daghang magasin?
8 Pagpahimutang ug Mas Daghang Magasin: Angayng himoong tumong sa tanang magmamantala dinhi sa Pilipinas nga makapahimutang ug mas daghang magasin. Unsaon nato kini pagkab-ot?
● Paghimog binulang tumong kon pila ka magasin ang mapahimutang.
● Paghatag ug regular nga order sa magasin ngadto sa Magazine Servant. Paneguroa nga duna kay igong suplay para sa pagpamalaybalay ug pagbalikduaw.
● Pag-eskedyul ug usa ka adlaw matag semana para sa pagpanagtag ug magasin.
● Itanyag nga paris ang Bantayanang Torre ug Pagmata! bisag usa lay imong ipresentar.
● Batasana ang pagtanyag ug magasin. Itanyag kini diha sa kabalayan, kadalanan, mga tindahan, ug sa publikong mga dapit. Pagdala kanunayg mga magasin sa dihang mobiyahe, mamalit, ug kon duna kay adtoon. Pahimusli ang tanang kahigayonan sa pagtabang sa uban nga makabenepisyo sa Bantayanang Torre ug Pagmata!
● Itanyag ang daandaang mga magasin nga wala mapahimutang sulod sa usa o duha ka bulan sukad petsa sa gula niini. Bililhon gihapon ang mga impormasyon niini. Ipahimutang kini sa mga interesado.
9. Unsay angay nimong himoon maylabot sa atong mga magasin?
9 Si Jehova naghatag kanatog daghang kahimanan sa pagpalampos sa atong ministeryo. Kini naglakip sa Bantayanang Torre ug Pagmata! Dili gayod kita magpanuko sa pagpaambit niini nga mga publikasyon ngadto sa mga interesadong mabuhi sa walay kataposan. Gamiton nato kini sa pagtabang sa milyonmilyon pang mga tawo nga makaila kang Jehova ug makaalagad kaniya.