Usa ka Makapalipay Kaayo nga Buluhaton
1. Unsang espirituwal nga pagpang-ayo ang ginahimo karon?
1 Sa unang siglo, nalipay kaayo kadtong nakasaksi sa pisikal nga pagpang-ayo. (Luc. 5:24-26) Karon, kita usab nalipay sa pagpakigbahin sa espirituwal nga pagpang-ayo. (Pin. 22:1, 2, 17) Makapalipay ang pagbasa sa kasinatian sa mga tawo kansang kinabuhi nabag-o sa Pulong ni Jehova ug sa iyang balaang espiritu. Apan mas makapalipay ang pagpakigbahin niini nga buluhaton pinaagi sa pagdumalag progresibong pagtuon sa Bibliya.
2. Unsay makapalipay kanato sa dihang atong tudloan ang uban sa kamatuoran?
2 Unsay ngalan sa Diyos? Nganong gitugotan niya ang pag-antos? Unsay himoon sa Gingharian sa Diyos alang sa katawhan? Malipay kita sa pagtubag niining mga pangutanaha ug sa pagkakita nga nalipay ang atong gitun-an nga nakakat-on sa kamatuoran. (Prov. 15:23; Luc. 24:32) Sa dihang mouswag ang usa ka estudyante, siya tingali mogamit na sa ngalan ni Jehova, magbag-o sa iyang pamesti ug pamostura, mobiya sa iyang mga bisyo, ug mosangyaw na sa uban. Kon siya magpahinungod na ug magpabawtismo, siya mahimong atong igsoon sa pagtuo ug isigkamagbubuhat. Kini nga mga pag-uswag makapalipay gayod kanato.—1 Tes. 2:19, 20.
3. Unsay angay natong himoon aron makasugod ug pagtuon sa Bibliya?
3 Makapakigbahin Ka Ba? Kon buot kang makigbahin niining makapalipay kaayo nga buluhaton, pag-ampo kang Jehova nga makakaplag kag pagtuon sa Bibliya, ug dayon lihok uyon sa imong mga pag-ampo. (1 Juan 5:14) Sangyaw kon asa ug kon kanus-a makaplagan ang mga tawo. Pagtanyag ug pagtuon sa Bibliya sa tanang nahiangay nga panahon. (Eccl. 11:6) Kon makakaplag kag interesado, baliki siya aron maugmad ang iyang interes.—1 Cor. 3:6-9.
4. Nganong kinahanglan tang motanyag ug pagtuon sa Bibliya uban ang pagkadinalian?
4 Daghan pa ang gigutom ug giuhaw sa pagkamatarong. Kinsay motabang kanila aron matagan-an ang ilang espirituwal nga panginahanglan pinaagi sa pagdumalag pagtuon sa Bibliya? (Mat. 5:3, 6) Hinaot bug-os kitang makigbahin sa pagsangyaw ug paghimog tinun-an sa dili pa matapos ang pagpangani.—Isa. 6:8.