Himoa Ninyong Sumbanan ang mga Manalagna—Si Jonas
1. Unsay maayong mga hiyas ni Jonas?
1 Unsay mosantop sa imong hunahuna kon hisgotan si manalagnang Jonas? Ang uban tingali nag-isip kaniya ingong talawan o tig-ag kasingkasing. Apan, dayag nga siya nagpakitag pagkamapainubsanon, kaisog, ug pagsakripisyo. Sa unsang paagi masundog nato ang iyang dalayegong mga hiyas?—Sant. 5:10.
2. Unsaon nato pagsundog ang pagkamapainubsanon ni Jonas?
2 Pagkamapainubsanon: Sa sinugdan, si Jonas miadto sa dapit nga sukwahi sa gipaadto kaniya. Dili kadto ikahibulong kay ang mga Asiryanhon nabantog nga mangtas, ug ang Nineve gitawag ug “siyudad nga nagaula ug dugo.” (Nah. 3:1-3) Apan, sa dihang gidisiplina ni Jehova si Jonas ug gihatagag ikaduhang higayon, mapainubsanon niyang gidawat ang maong asaynment. (Prov. 24:32; Jon. 3:1-3) Bisan sa primero siya mikalagiw, sa ulahi siya mibuhat sa kabubut-on ni Jehova. (Mat. 21:28-31) Kita ba usab determinadong mosangyaw bisan pag kita gidisiplina o lisod ang atong teritoryo?
3. Unsang bahina sa imong ministeryo nga nagkinahanglag kaisog ug pagsakripisyo?
3 Kaisog ug Pagsakripisyo: Sa dihang nakaamgo si Jonas nga ang iyang sayop nga desisyon nagpameligro sa kinabuhi sa mga marinero, iyang gisakripisyo ang iyang kinabuhi. (Jon. 1:3, 4, 12) Sa ulahi, sa pagtuman sa iyang asaynment sa Nineve, siya miadto sa sentro sa siyudad, tingali aron mangitag haom nga dapit nga imantala ang paghukom ni Jehova. Kadto maoy mga buhat, dili sa talawan, kondili sa usa ka maisog nga manalagna sa Diyos! (Jon. 3:3, 4) Komosta kita karon? Gikinahanglan nato ang kaisog gikan sa Diyos aron makasangyaw bisan pa sa pagsupak. (Buh. 4:29, 31) Gikinahanglan ang pagsakripisyo aron gamiton ang panahon ug kahinguhaan diha sa ministeryo.—Buh. 20:24.
4. Nganong angay tang mamalandong sa maayong sumbanan sa mga manalagna ni Jehova?
4 Sa matag higayon nga imong basahon ang asoy bahin sa usa sa mga manalagna ni Jehova, makabenepisyo ka kon imong ibutang ang imong kaugalingon sa maong kahimtang. Pangutan-a ang imong kaugalingon: ‘Buhaton ba sab nako ang sama sa iyang gihimo? Unsaon nako pagsundog ang iyang mga hiyas?’ (Heb. 6:11, 12) Hisgotan sa umaabot nga mga artikulo sa Atong Ministeryo sa Gingharian ang dugang leksiyon nga atong makat-onan gikan sa ubang matinumanong mga manalagna ni Jehova.