Ang Pagsangyaw Makapalig-on sa Atong Espirituwalidad
1. Sa unsang paagi kita makabenepisyo sa pagsangyaw?
1 Kon kita aktibo sa pagsangyaw, molig-on ang atong espirituwalidad ug modako ang atong kalipay. Siyempre, mosangyaw ta aron pahimut-an si Jehova. Apan pinaagi sa pagsunod sa sugo nga “iwali ang pulong,” kita panalanginan ni Jehova ug makabenepisyo usab sa ubang paagi. (2 Tim. 4:2; Isa. 48:17, 18) Nganong ang pagsangyaw makapalig-on ug makapalipay kanato?
2. Sa unsang paagi ang ministeryo makapalig-on kanato?
2 Kita Mapalig-on ug Mapanalanginan: Ang pagsangyaw motabang nato sa pagsentro sa atong hunahuna sa mga panalangin sa Gingharian inay sa atong mga problema. (2 Cor. 4:18) Dihang atong ipatin-aw ang mga pagtulon-an sa Bibliya, molig-on ang atong pagtuo sa mga saad ni Jehova ug modako ang atong pagpabili sa kamatuoran. (Isa. 65:13, 14) Samtang atong tabangan ang uban nga molig-on sa espirituwal aron sila mahimong “dili bahin sa kalibotan,” molig-on usab ang atong determinasyon sa pagpabiling bulag sa kalibotan.—Juan 17:14, 16; Roma 12:2.
3. Kon kita makigbahin sa ministeryo, unsang mga hiyas ang atong maugmad?
3 Sa dihang kita makigbahin sa ministeryo, atong maugmad ang Kristohanong mga hiyas. Pananglitan, kon kita maningkamot nga ‘mahimong tanang butang ngadto sa tanang matang sa katawhan,’ kita mahimong mas mapaubsanon. (1 Cor. 9:19-23) Samtang makig-estorya kita niadtong mga “pinanitan ug nagkatibuagsa sama sa mga karnero nga walay magbalantay,” atong maugmad ang simpatiya ug empatiya. (Mat. 9:36) Kon kita mopadayon bisan pag ang mga tawo dili interesado o mosupak, mahimo tang malahutayon. Ug kon atong tabangan ang uban, kita mas magmalipayon.—Buh. 20:35.
4. Unsay imong ikaingon sa imong ministeryo?
4 Pagkadakong pribilehiyo ang pagpakigbahin sa ministeryo nga makadayeg sa Usa nga takos sa atong pagsimba! Ang ministeryo makapalig-on kanato. Kini maghatag ug dagayang panalangin niadtong “bug-os magpamatuod sa maayong balita.”—Buh. 20:24.