Gamita ang jw.org/ceb sa Imong Ministeryo

Dakong tabang ang atong Web site sa pagpakaylap sa maayong balita “hangtod sa kinalay-ang dapit sa yuta.” (Buh. 1:8) Kadaghanan sa mga tawo wala mahibalo sa jw.org/ceb. Mahibaloan lang nila kini kon may Saksing motudlo nila bahin niini.

Usa ka nagapanawng magtatan-aw nag-download sa video nga Nganong Tun-an ang Bibliya? diha sa iyang cellphone ug ipakita niya kini kon may kahigayonan. Pananglitan, dihang mamalaybalay, siya moingon: “Miduaw ko aron tabangan ang mga tawo sa pagtubag sa tulo ka importanteng pangutana: Nganong daghan kaayog problema ang kalibotan? Unsaon kini pagsulbad sa Diyos? Ug unsaon nato pagsagubang niini karon? Tubagon kana niining mubo nga video.” I-play dayon niya ang video ug panid-an ang reaksiyon sa tagbalay. Halos di mamilok ang mga tawo tungod sa kanindot sa video. Dayon moingon ang nagapanawng magtatan-aw: “Ingon sa video nga makahangyo kag Bible study pinaagig Internet. Kay nia man ko, akong ipakita nimo kadiyot kon unsaon.” Kon mosugot ang tagbalay, iyang ipakita kon unsaon pag-Bible study gamit ang Maayong Balita nga brosyur. Kon puliki ang tagbalay, makigsabot siya nga inigbalik na niya ipakita ang pagtuon. Kana sab ang iyang isulti sa mga tawong iyang maestorya dihang magmeryenda siya sa coffee shop. Gigamit pod ba nimo ang jw.org/ceb sa imong ministeryo?