Reperensiya Para sa Workbook sa Tigom nga Kinabuhi ug Ministeryo
Pebrero 4-10
BAHANDI GIKAN SA PULONG SA DIYOS | ROMA 1-3
“Padayong Bansaya ang Imong Konsensiya”
(Roma 2:14, 15) Kay dihang ang katawhan sa kanasoran nga walay balaod nagabuhat nga kinaiyanhon sa mga butang sa balaod, kining mga tawhana, bisan tuod walay balaod, maoy balaod sa ilang kaugalingon. 15 Sila mismo mao ang nagpasundayag sa mga butang labot sa balaod nga nahisulat diha sa ilang mga kasingkasing, samtang ang ilang tanlag nagpamatuod duyog kanila ug, tali sa ilang kaugalingong mga panghunahuna, sila ginasumbong o ginapalingkawas.
Sa Unsang Paagi Makahupot Ka ug Maayong Tanlag?
6 Mga alagad ni Jehova ba lamang ang may tanlag? Tagda ang inspiradong mga pulong ni apostol Pablo: “Dihang ang katawhan sa kanasoran nga walay balaod nagabuhat nga kinaiyanhon sa mga butang sa balaod, kining mga tawhana, bisan tuod walay balaod, maoy balaod sa ilang kaugalingon. Sila mismo mao ang nagpasundayag sa mga butang labot sa balaod nga nahisulat diha sa ilang mga kasingkasing, samtang ang ilang tanlag nagpamatuod duyog kanila ug, tali sa ilang kaugalingong mga panghunahuna, sila ginasumbong o ginapalingkawas.” (Roma 2:14, 15) Bisan kadtong bug-os walay alamag sa mga balaod ni Jehova usahay matukmod pa sa ilang tanlag sa paglihok uyon sa mga prinsipyo sa Diyos.
(Roma 2:15) Sila mismo mao ang nagpasundayag sa mga butang labot sa balaod nga nahisulat diha sa ilang mga kasingkasing, samtang ang ilang tanlag nagpamatuod duyog kanila ug, tali sa ilang kaugalingong mga panghunahuna, sila ginasumbong o ginapalingkawas.
Sa Unsang Paagi Makahupot Ka ug Maayong Tanlag?
8 Sa unsang paagi makahimo kag usa ka desisyon nga gipasukad sa tanlag? Morag susihon lang sa uban ang ilang mga hunahuna ug pagbati, ug modesisyon kon unsay buhaton. Unya mahimong moingon sila, “Wala man mahasol ang akong tanlag.” Ang mga tinguha sa kasingkasing mahimong kusganon kaayo, nga mag-impluwensiya pa gani sa tanlag. Ang Bibliya nag-ingon: “Ang kasingkasing labaw nga malimbongon kay sa bisan unsa pa ug desperado. Kinsa ang makahibalo niini?” (Jeremias 17:9) Busa, ang gitinguha sa atong kasingkasing dili mao ang una natong tagdon. Hinunoa, buot natong tagdon pag-una kon unsay makapahimuot kang Jehova nga Diyos.
9 Kon ang usa ka desisyon gipasukad gayod sa atong nabansay nga tanlag, ipabanaag niini ang atong kahadlok sa Diyos, dili ang atong personal nga mga tinguha. Tagda kining usa ka pananglitan. Ang matinumanong gobernador nga si Nehemias may katungod sa pagpaningil ug mga bayranan ug buluhisan gikan sa mga tawo sa Jerusalem. Apan wala niya kana buhata. Ngano man? Dili niya gustong si Jehova masuko kaniya tungod kay mabug-atan ang katawhan sa Diyos. Siya miingon: “Wala ako magbuhat sa ingon tungod sa kahadlok sa Diyos.” (Nehemias 5:15) Ang sinserong kahadlok sa Diyos, tibuok-kasingkasing nga kahadlok nga masuko kanato ang atong langitnong Amahan, maoy labing hinungdanon. Ang maong matahaon nga kahadlok makadasig kanato sa pagtinguhag giya gikan sa Pulong sa Diyos kon mohimo kitag mga desisyon.
Pagpangitag Espirituwal nga Bahandi
(Roma 3:4) Dili gayod unta kana mahitabo! Apan hinaot nga makaplagang matinud-anon ang Diyos, bisan pag ang tanang tawo makaplagang bakakon, ingon sa nahisulat: “Aron mapamatud-an ka nga matarong sa imong mga pulong ug makadaog dihang ikaw ginahusay.”
Mga Pangunang Punto sa Sulat Ngadto sa mga Taga-Roma
3:4. Kon ang pulong sa tawo supak sa kon unsay giingon sa Diyos diha sa iyang Pulong, atong “makaplagang matinud-anon ang Diyos” pinaagi sa pagsalig sa mensahe sa Bibliya ug molihok uyon sa iyang kabubut-on. Pinaagi sa atong pagkamasiboton diha sa pagsangyaw sa Gingharian ug paghimog tinun-an, atong matabangan ang uban aron ilang makaplagan nga ang Diyos matinud-anon.
(Roma 3:24, 25) ug ingong walay bayad nga gasa nga sila gipahayag nga matarong pinaagi sa iyang dili-takos nga kalulot tungod sa pagpagawas pinaagi sa lukat nga gibayad ni Kristo Jesus. 25 Gitanyag siya sa Diyos ingong halad alang sa pagpasig-uli pinaagi sa pagtuo diha sa iyang dugo. Kini maoy aron ipasundayag ang iyang kaugalingong pagkamatarong, tungod kay siya nagpasaylo sa mga sala nga nahitabo sa nangagi samtang ang Diyos nagmainantoson;
Mga Pangunang Punto sa Sulat Ngadto sa mga Taga-Roma
3:24, 25—Sa unsang paagi ang “lukat nga gibayad ni Kristo Jesus” nagpasaylo sa “mga sala nga nahitabo sa nangagi” una pa sa iyang kamatayon? Ang unang Mesiyanikong tagna nga natala sa Genesis 3:15 natuman sa tuig 33 K.P. sa dihang gipatay si Jesus sa estaka sa pagsakit. (Gal. 3:13, 16) Sa dihang gisulti ni Jehova ang maong tagna, ang bili sa lukat nabayran na sumala sa iyang panglantaw, tungod kay wala gayoy makapugong sa Diyos sa pagpalampos sa iyang mga katuyoan. Busa pinasukad sa umaabot nga halad lukat ni Jesu-Kristo, pasayloon ni Jehova ang mga anak ni Adan nga nagpasundayag ug pagtuo niana nga saad. Ang lukat nagpaposible usab nga mabanhaw ang mga alagad sa Diyos nga nagkinabuhi sa wala pa si Jesus.—Buh. 24:15.
Pagbasa sa Bibliya
(Roma 1:1-17) Si Pablo, ulipon ni Jesu-Kristo ug gitawag aron mahimong apostol, gilain alang sa maayong balita sa Diyos, 2 nga iyang gisaad kanhi pinaagi sa iyang mga manalagna diha sa balaang Kasulatan, 3 mahitungod sa iyang Anak, kinsa naggikan sa binhi ni David sumala sa unod, 4 apan kinsa uban sa gahom gipahayag nga Anak sa Diyos sumala sa espiritu sa pagkabalaan pinaagi sa pagkabanhaw gikan sa mga patay—oo, si Jesu-Kristo nga atong Ginoo, 5 nga pinaagi kaniya kami nakadawat ug dili-takos nga kalulot ug pagkaapostol aron adunay pagkamasinugtanon sa pagtuo taliwala sa tanang kanasoran tungod sa iyang ngalan, 6 diin taliwala nianang mga nasora kamo usab mao ang gitawag aron maiya ni Jesu-Kristo— 7 ngadto sa tanan nga anaa sa Roma ingong mga hinigugma sa Diyos, nga gitawag aron mahimong mga balaan: Hinaot nga kamo adunay dili-takos nga kalulot ug kalinaw gikan sa Diyos nga atong Amahan ug sa Ginoong Jesu-Kristo. 8 Una sa tanan, ako nagpasalamat sa akong Diyos pinaagi ni Jesu-Kristo mahitungod kaninyong tanan, tungod kay ang inyong pagtuo gihisgotan lukop sa tibuok kalibotan. 9 Kay ang Diyos, nga akong gihatagan ug sagradong pag-alagad uban sa akong espiritu maylabot sa maayong balita bahin sa iyang Anak, mao ang akong saksi kon sa unsang paagi sa walay hunong ako naghisgot kanunay kaninyo sa akong mga pag-ampo, 10 nga nagpakiluoy nga kon mahimo ako unta karon sa kataposan mahinayon na pinaagi sa kabubut-on sa Diyos sa pag-anha kaninyo. 11 Kay ako nangandoy sa pagpakigkita kaninyo, aron ako makahatag kaninyo ug espirituwal nga gasa aron mapalig-on kamo; 12 o, labi pang maayo, aron adunay pagdinasigay sa inyong taliwala, pinaagi sa pagtuo sa tagsatagsa, sa inyo ug sa akoa. 13 Apan dili ko buot nga kamo dili mahibalo, mga igsoon, nga sa makadaghan ako naglaraw sa pag-anha kaninyo, apan ako nababagan hangtod karon, aron ako makabaton usab ug pipila ka bunga diha kaninyo nga sama sa uban pang kanasoran. 14 Ngadto sa mga Grego ug sa mga Barbaro, sa mga maalamon ug sa mga walay salabotan ako utangan: 15 busa ako may kaikag nga ipahayag usab ang maayong balita kaninyo diha sa Roma. 16 Kay wala ko ikaulaw ang maayong balita; kini, sa pagkatinuod, gahom sa Diyos alang sa kaluwasan sa matag usa nga may pagtuo, una ngadto sa Hudiyo ug usab ngadto sa Grego; 17 kay diha niini gipadayag ang pagkamatarong sa Diyos tungod sa pagtuo ug nganha sa pagtuo, ingon sa nahisulat: “Apan ang matarong—pinaagi sa pagtuo siya mabuhi.”
Pebrero 11-17
BAHANDI GIKAN SA PULONG SA DIYOS | ROMA 4-6
“Ang Diyos Nagrekomendar sa Iyang Kaugalingong Gugma Kanato”
(Roma 5:8) Apan ang Diyos nagrekomendar sa iyang kaugalingong gugma kanato sa pagkaagi nga, samtang kita mga makasasala pa, si Kristo namatay alang kanato.
(Roma 5:12) Mao nga, ingon nga ang sala misulod sa kalibotan pinaagi sa usa ka tawo ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man—.
Ang Diyos Nagrekomendar sa Iyang Gugma Kanato
5 Sa pagpatin-aw niana, kini ang unang punto nga gisulti ni Pablo: “Ang sala misulod sa kalibotan pinaagi sa usa ka tawo ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man.” (Roma 5:12) Kita makasabot niini kay gipasulat sa Diyos ang sinugdanan sa tawo. Gilalang ni Jehova si Adan ug Eva. Kay ang Maglalalang hingpit, mao man usab ang atong unang ginikanan. Sila gidid-an sa Diyos sa usa lamang ka butang ug giingnan nga kon sila mosupak sa maong balaod, sila mamatay. (Gen. 2:17) Apan, sila misupak sa makataronganong sugo sa Diyos, sa ingon ilang gisalikway siya ingong Maghahatag-balaod ug Soberano.—Deut. 32:4, 5.
(Roma 5:13, 14) Kay sa wala pa ang Balaod ang sala diha na sa kalibotan, apan ang sala dili idat-og batok kang bisan kinsa kon walay balaod. 14 Bisan pa, ang kamatayon nagmando ingong hari sukad kang Adan hangtod kang Moises, bisan ibabaw kanilang wala makasala sama sa dagway sa paglapas ni Adan, kinsa may kaamgiran kaniya nga umaabot.
Ang Diyos Nagrekomendar sa Iyang Gugma Kanato
6 Human makasala si Adan, siya nakabatog mga anak, ug busa sila nakapanunod sa sala ug sa mga epekto niini. Siyempre, sila wala makalapas sa balaod sa Diyos sama kang Adan, busa sila dili sad-an sa samang sala; ni may mga balaod nga gihatag na. (Gen. 2:17) Bisan pa niana, ang kaliwat ni Adan nakapanunod sa sala. Busa, ang sala ug kamatayon nagmando na sa dihang ang Diyos naghatag sa mga Israelinhon sa Moisesnong Balaod, nga tin-awng nagpakita nga sila makasasala. (Basaha ang Roma 5:13, 14.) Ang epekto sa sala ikailustrar sa napanunod nga mga sakit o depekto, sama sa Mediterranean anemia o hemophilia (bleeding disorder). Tingali nakabasa ka nga si Alexis, ang anak lalaki sa Rusong Czar nga si Nicholas II ug ni Alexandra, nakapanunod sa hemophilia. Tinuod nga bisan sa ingon nga mga pamilya, ang pipila ka anak dili masakit niana, apan sila makapasa gihapon niini ngadto sa ilang mga anak. Apan lahi ang sala nga gikan ni Adan, kini dili kalikayan ug kanunayng makamatay. Ug kini gipasa sa tanang anak. Matapos pa kaha kining alaot nga kahimtang?
(Roma 5:18) Busa, ingon nga pinaagi sa usa ka paglapas nahimong hinukman ang tanang matang sa tawo, sa ingon usab pinaagi sa usa ka buhat sa pagkamatarong ang tanang matang sa tawo igapahayag nga matarong alang sa kinabuhi.
(Roma 5:21) Sa unsang katuyoan? Aron nga, ingon nga ang sala nagmando ingong hari uban sa kamatayon, sa ingon usab ang dili-takos nga kalulot magmando ingong hari pinaagi sa pagkamatarong alang sa kinabuhing walay kataposan pinaagi kang Jesu-Kristo nga atong Ginoo.
Ang Diyos Nagrekomendar sa Iyang Gugma Kanato
9 Unsay kahulogan sa Gregong mga pulong nga gihubad nga “pagpahayag sa pagkamatarong” ug “igapahayag nga matarong”? Usa ka maghuhubad sa Bibliya misulat: “Kini maoy pagtandi nga nagpahayag ug daw legal nga punto. Nagtumong kini sa kausaban sa kahimtang sa usa ka tawo maylabot sa Diyos, dili sa kausaban sa iyang pagkatawo . . . Kini nga pagtandi naghulagway sa Diyos ingong maghuhukom nga midesisyon pabor sa akusado, kinsa samag gidala atubangan sa hukmanan sa Diyos nga giakusahan sa pagkadili-matarong. Apan siya giabsuwelto sa Diyos.”
10 Unsay basehanan sa matarong nga “Maghuhukom sa tibuok yuta” sa pag-absuwelto sa tawong dili-matarong? (Gen. 18:25) Una, siya mahigugmaong nagpadala sa iyang bugtong Anak sa yuta. Si Jesus hingpit nga nagbuhat sa kabubut-on sa iyang Amahan bisan pa sa mga tentasyon, grabeng pagbiaybiay, ug pagdagmal. Siya nagmatinumanon hangtod nga namatay sa sakitanang estaka. (Heb. 2:10) Sa paghalad sa iyang hingpit tawhanong kinabuhi, gitanyag ni Jesus ang lukat nga mahimong magpahigawas o magtubos sa mga kaliwat ni Adan gikan sa sala ug kamatayon.—Mat. 20:28; Roma 5:6-8.
Pagpangitag Espirituwal nga Bahandi
(Roma 6:3-5) O wala ba kamo mahibalo nga kitang tanan nga gibawtismohan ngadto kang Kristo Jesus gibawtismohan ngadto sa iyang kamatayon? 4 Busa kita gilubong uban kaniya pinaagi sa atong bawtismo ngadto sa iyang kamatayon, aron nga, ingon nga si Kristo gibangon gikan sa mga patay pinaagi sa himaya sa Amahan, kita usab sa susama angay magalakaw diha sa pagkabag-o sa kinabuhi. 5 Kay kon kita nahiusa uban kaniya sa dagway sa iyang kamatayon, kita tino usab nga mahiusa uban kaniya diha sa dagway sa iyang pagkabanhaw;
Mga Pangunang Punto sa Sulat Ngadto sa mga Taga-Roma
6:3-5—Unsay kahulogan sa pagbawtismo ngadto kang Kristo Jesus ug bawtismo sa iyang kamatayon? Sa dihang gidihogan ni Jehova ang mga sumusunod ni Kristo pinaagi sa balaang espiritu, sila nahiusa kang Jesus ug nahimong membro sa lawas ni Kristo nga mao ang kongregasyon, diin siya mismo mao ang Ulo. (1 Cor. 12:12, 13, 27; Col. 1:18) Mao kini ang kahulogan sa pagbawtismo ngadto kang Kristo Jesus. Ang dinihogang mga Kristohanon usab ‘gibawtismohan ngadto sa kamatayon ni Kristo’ sa pagkaagi nga sila nakasinatig mga pag-antos ug ilang gitalikdan ang paglaom nga mabuhing walay kataposan dinhi sa yuta. Ang ilang kamatayon maoy usa ka pagsakripisyo, sama sa kamatayon ni Jesus, apan dili makahimo sa paglukat. Ang ilang pagkanabawtismohan sa kamatayon ni Kristo makompleto sa dihang sila mamatay ug banhawon sa langitnong kinabuhi.
(Roma 6:7) Kay siya nga namatay nahigawas na gikan sa iyang sala.
Unsay Paglaom sa Akong mga Katigulangan?
Dihang banhawon ang mga dili matarong, sila ba hukman base sa ilang nangaging binuhatan? Dili. Ang Roma 6:7 nag-ingon: “Siya nga namatay nahigawas na gikan sa iyang sala.” Ang mga dili matarong nakabayad na sa ilang mga sala dihang sila namatay. Busa sila hukman base sa ilang binuhatan human sila banhawon, dili sa ilang nabuhat sa wala pa sila mamatay. Sa unsang paagi sila makabenepisyo?
Pagbasa sa Bibliya
(Roma 4:1-15) Kay ingon man niana, unsay atong ikaingon bahin kang Abraham nga atong katigulangan sumala sa unod? 2 Kon, pananglitan, si Abraham gipahayag pa nga matarong tungod sa mga buhat, siya aduna untay pasukaranan sa pagpanghambog; apan dili sa Diyos. 3 Kay unsay giingon sa kasulatan? “Si Abraham nagpasundayag ug pagtuo kang Jehova, ug kadto giisip kaniya ingong pagkamatarong.” 4 Karon ngadto sa tawo nga nagabuhat ang bayad pagaisipon, dili ingong dili-takos nga kalulot, kondili ingong utang. 5 Sa laing bahin, sa tawo nga wala magabuhat apan nagabutang ug pagtuo kaniya nga nagapahayag nga matarong sa usa nga dili-diyosnon, ang iyang pagtuo pagaisipon ingong pagkamatarong. 6 Ingon nga si David naghisgot usab labot sa kalipay nga iya sa tawo nga nganha kaniya pagaisipon sa Diyos ang pagkamatarong nga bulag sa mga buhat: 7 “Malipayon kadtong kansang mga kalapasan gipasaylo ug kansang mga sala gitabonan na; 8 malipayon ang tawo kansang sala dili gayod pagaisipon ni Jehova.” 9 Nan, moabot ba kining kalipaya diha sa katawhang tinuli o sa katawhang dili-tinuli usab? Kay atong giingon: “Ang iyang pagtuo giisip ngadto kang Abraham ingong pagkamatarong.” 10 Nan, ilalom sa unsang mga kahimtang nga kini giisip? Sa dihang siya diha sa pagkatinuli o sa pagkadili-tinuli? Dili diha sa pagkatinuli, kondili sa pagkadili-tinuli. 11 Ug siya nakadawat ug ilhanan, nga mao, ang pagkatinuli, ingong usa ka timbre sa pagkamatarong pinaagi sa pagtuo nga nabatonan niya samtang siya diha sa kahimtang nga dili-tinuli, aron siya mahimong amahan sa tanan nga nagbatog pagtuo samtang anaa sa pagkadili-tinuli, aron ang pagkamatarong pagaisipon nganha kanila; 12 ug usa ka amahan sa tinuling kaliwat, dili lamang niadtong nagatapot sa pagkatinuli, kondili niadtong nagalakaw usab nga mahusay diha sa mga tunob nianang pagtuoha samtang anaa sa kahimtang nga dili-tinuli nga gibatonan sa atong amahang si Abraham. 13 Kay dili pinaagi sa balaod nga si Abraham o ang iyang binhi nakabaton sa saad nga mahimo siyang manununod sa usa ka kalibotan, kondili pinaagi sa pagkamatarong tungod sa pagtuo. 14 Kay kon ang nagatapot sa balaod maoy mga manununod, ang pagtuo nahimong walay-pulos ug ang saad nahanaw. 15 Sa pagkatinuod ang Balaod nagpatunghag kapungot, apan diin gani walay balaod, walay kalapasan usab.
Pebrero 18-24
BAHANDI GIKAN SA PULONG SA DIYOS | ROMA 7-8
“Ikaw ba ‘Maikagong Nagpaabot’?”
(Roma 8:19) Kay ang maikagong pagpaabot sa kalalangan nagahulat sa pagpadayag sa mga anak sa Diyos.
Magpagiya Kang Jehova Ngadto sa Tinuod nga Kagawasan
17 Dihang gihisgotan ni Pablo ang kagawasan nga ihatag ni Jehova sa iyang katawhan, siya misulat: “Ang maikagong pagpaabot sa kalalangan nagahulat sa pagpadayag sa mga anak sa Diyos.” Dayon siya midugang: “Ang kalalangan usab ipagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.” (Roma 8:19-21) “Ang kalalangan” nagtumong sa katawhan nga may yutan-ong paglaom, kinsa makabenepisyo sa “pagpadayag” sa dinihogang mga anak sa Diyos. Ang maong pagpadayag magsugod sa dihang ang mga dinihogan sa langit moduyog kang Jesus sa paglaglag sa tanang daotan ug sa pagluwas sa “dakong panon” ngadto sa bag-ong sistema sa mga butang.—Pin. 7:9, 14.
(Roma 8:20) Kay ang kalalangan gipailalom sa pagkawalay-pulos, dili pinaagi sa kaugalingong kabubut-on niini kondili pinaagi kaniya nga nagsakop niini, pinasukad sa paglaom
Magmaya sa Atong Paglaom
11 Gihatag ni Jehova ‘ang pasukaranan sa paglaom’ sa katawhan dihang gisaad niya nga luwason sila gikan sa “orihinal nga halas,” si Satanas nga Yawa, pinaagi sa sinaad nga “binhi.” (Pin. 12:9; Gen. 3:15) Ang pangunang bahin sa binhi mao si Jesu-Kristo. (Gal. 3:16) Ang kamatayon ug pagkabanhaw ni Jesus mao ang pasukaranan sa paglaom sa katawhan nga motultol sa kagawasan gikan sa pagkaulipon sa sala ug kamatayon. Ang katumanan niini nga paglaom nalangkit “sa pagpadayag sa mga anak sa Diyos.” Ang hinimayang mga dinihogan mao ang ikaduhang bahin sa “binhi.” Sila ‘madayag’ dihang sila motabang kang Kristo sa paglaglag sa daotang sistema ni Satanas. (Pin. 2:26, 27) Kini moresulta sa kaluwasan sa ubang karnero kinsa makalabang sa dakong kasakitan.—Pin. 7:9, 10, 14.
(Roma 8:21) aron nga ang kalalangan usab ipagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.
Magmaya sa Atong Paglaom
12 Sulod sa Usa ka Libo ka Tuig nga Pagmando ni Kristo, mahupayan gayod ang katawhan! Nianang panahona, ang “mga anak sa Diyos” ‘madayag’ sa laing paagi. Sila molihok ingong mga saserdote uban ni Kristo ug motabang sa katawhan nga makadawat sa mga benepisyo sa iyang halad. Dihang ang Gingharian sa Diyos magmando na ibabaw sa yuta, ang masinugtanong katawhan anam-anam nga ‘mahigawas gikan sa pagkaulipon sa pagkadunot.’ Sila mahigawas sa epekto sa sala ug kamatayon. Kon sila magpabiling matinumanon kang Jehova sulod sa Milenyo ug sa kataposang pagsulay human niana, ang ilang ngalan permanenteng mahisulat sa “linukot nga basahon sa kinabuhi.” Ilang mabatonan ang “mahimayaong kagawasan sa mga anak sa Diyos.” (Pin. 20:7, 8, 11, 12) Usa gayod kana ka mahimayaong paglaom!
Pagpangitag Espirituwal nga Bahandi
(Roma 8:6) Kay ang paghunahuna sa unod nagkahulogan ug kamatayon, apan ang paghunahuna sa espiritu nagkahulogan ug kinabuhi ug kalinaw;
Nahinumdom Ka Ba?
Unsay kalainan sa “paghunahuna sa unod” ug sa “paghunahuna sa espiritu”? (Rom. 8:6)
Ang tawong naghimo nianang nahauna nagpokus sa mga tinguha ug kiling sa makasasalang unod, nga nagsigeg hisgot ug nagsigeg dayeg sa mga butang sa unod. Ang tawong naghimo nianang ikaduha nagsentro sa iyang kinabuhi sa mga butang nga may kalabotan sa Diyos ug sa Iyang panghunahuna; kana nga Kristohanon gipalihok sa balaang espiritu. Ang una moresulta sa kamatayon, ang ikaduha sa kinabuhi ug kalinaw.—w16.12, p. 15-17.
(Roma 8:26, 27) Sa samang paagi ang espiritu moduyog usab nga motabang sa atong mga kahuyangon; kay ang suliran kon unsay angay natong iampo sumala sa atong gikinahanglan wala nato mahibaloi, apan ang espiritu mangamuyo alang kanato uban ang mga pag-agulong wala mabungat. 27 Apan siya nga nagasusi sa kasingkasing nahibalo kon unsa ang ipasabot sa espiritu, tungod kay kini nangamuyo nga uyon sa Diyos alang sa mga balaan.
Unsay Gipadayag sa Imong mga Pag-ampo Bahin Kanimo?
20 Usahay, wala kita mahibalo kon unsay atong isulti diha sa atong pribadong mga pag-ampo. “Ang suliran kon unsay angay natong iampo sumala sa atong gikinahanglan wala nato mahibaloi,” misulat si Pablo, “apan ang [balaang] espiritu mangamuyo alang kanato uban ang mga pag-agulong wala mabungat. Apan siya [ang Diyos] nga nagasusi sa kasingkasing nahibalo kon unsa ang ipasabot sa espiritu.” (Roma 8:26, 27) Daghang pag-ampo ang gipasulat ni Jehova sa Kasulatan. Iyang dawaton kining inspiradong mga pangaliya nga daw kini gikan kanato ug busa dunggon niya kini. Ang Diyos nakaila kanato ug nahibalo sa kahulogan sa mga butang nga iyang gipasulti sa iyang espiritu pinaagi sa mga magsusulat sa Bibliya. Dunggon ni Jehova ang atong mga pag-ampo sa dihang ang espiritu “mangamuyo,” o mohangyo, alang kanato. Apan kon daghan na kitag mahibaloan sa Pulong sa Diyos, mas daling mosantop sa atong hunahuna ang mga butang nga angay natong iampo.
Pagbasa sa Bibliya
(Roma 7:13-25) Nan, ang maayo ba nahimong kamatayon ngari kanako? Dili gayod unta kana mahitabo! Apan gihimo kini sa sala, aron ikapakita kini ingong sala nga nagpahinabog kamatayon alang kanako pinaagi sa maayo; aron ang sala mahimong labaw pa kaayong makasasala pinaagi sa sugo. 14 Kay kita nahibalo nga ang Balaod espirituwal; apan ako unodnon, gibaligya ilalom sa sala. 15 Kay ako wala makasabot sa akong ginabuhat. Kay ang buot nakong buhaton, wala nako buhata; apan ang akong gidumtan mao ang akong ginabuhat. 16 Hinunoa, kon ang dili nako buot buhaton mao ang akong ginabuhat, ako uyon nga ang Balaod maayo. 17 Apan karon ang usa nga nagbuhat niini dili na ako, kondili ang sala nga nagpuyo kanako. 18 Kay ako nahibalo nga kanako, nga mao, sa akong unod, walay nagpuyo nga bisan unsang maayo; kay ang katakos sa pagtinguha ania kanako, apan ang katakos sa pagbuhat ug maayo wala kanako. 19 Kay ang maayo nga buot nakong buhaton wala nako buhata, apan ang daotan nga dili nako buot buhaton mao ang akong ginabuhat. 20 Kon, karon, ang dili nako buot buhaton mao ang akong ginabuhat, ang usa nga nagabuhat niini dili na ako, kondili ang sala nga nagpuyo kanako. 21 Busa, nakita ko kini nga balaod sa akong kahimtang: nga sa dihang buot nakong buhaton ang maayo, ang daotan ania kanako. 22 Nahimuot gayod ako sa balaod sa Diyos sumala sa akong pagkatawo sa sulod, 23 apan nakita ko sa akong mga sangkap ang laing balaod nga nakigbugno batok sa balaod sa akong hunahuna ug nagbihag kanako ngadto sa balaod sa sala nga ania sa akong mga sangkap. 24 Alaot ako nga tawo! Kinsa ang magluwas kanako gikan sa lawas nga nahiagom niini nga kamatayon? 25 Salamat sa Diyos pinaagi kang Jesu-Kristo nga atong Ginoo! Busa, sa akong hunahuna ako usa ka ulipon ngadto sa balaod sa Diyos, apan sa akong unod ngadto sa balaod sa sala.
Pebrero 25–Marso 3
BAHANDI GIKAN SA PULONG SA DIYOS | ROMA 9-11
“Ang Ilustrasyon sa Kahoyng Olibo”
(Roma 11:16) Dugang pa, kon ang bahin nga gikuha ingong mga unang bunga maoy balaan, ang minasa mao usab; ug kon ang gamot maoy balaan, ang mga sanga mao usab.
‘Oh Pagkalawom sa Kaalam sa Diyos!’
13 Gitandi ni apostol Pablo kadtong mahimong bahin sa binhi ni Abraham ngadto sa mga sanga sa usa ka simboliko nga kahoyng olibo. (Roma 11:21) Kining tinikad nga kahoyng olibo naghawas sa katumanan sa katuyoan sa Diyos bahin sa Abrahamikong pakigsaad. Ang gamot sa kahoy maoy balaan ug naghawas kang Jehova ingong usa nga naghatag ug kinabuhi sa espirituwal nga Israel. (Isa. 10:20; Roma 11:16) Ang lawas sa kahoy naghawas kang Jesus ingong pangunang bahin sa binhi ni Abraham. Ang mga sanga sa katibuk-an naghawas sa “bug-os nga gidaghanon” niadtong nalakip sa ikaduhang bahin sa binhi ni Abraham.
(Roma 11:17) Apan, kon ang pipila sa mga sanga giputol apan ikaw, bisan tuod ihalas nga olibo, gisumpay taliwala kanila ug nahimong mag-aambit sa katambok sa gamot sa olibo,
(Roma 11:20, 21) Husto! Kay sa ilang kawalay-pagtuo sila giputol, apan ikaw nagabarog tungod sa pagtuo. Hunong na sa pagbaton ug mapahitas-ong mga hunahuna, apan magmahadlokon. 21 Kay kon ang Diyos wala magpalingkawas sa kinaiyanhong mga sanga, siya dili usab magpalingkawas kanimo.
‘Oh Pagkalawom sa Kaalam sa Diyos!’
15 Nan, unsay gihimo ni Jehova aron matuman ang iyang katuyoan? Gipatin-aw ni Pablo nga ang mga sanga gikan sa ihalas nga kahoyng olibo gisumpay ngadto sa tinikad nga kahoyng olibo aron ipuli sa mga giputol. (Basaha ang Roma 11:17, 18.) Busa, ang dinihogan-sa-espiritung mga Kristohanon sa kanasoran, sama sa pipila sa kongregasyon sa Roma, mahulagwayong gisumpay niining simboliko nga kahoyng olibo. Niining paagiha, sila nahimong bahin sa binhi ni Abraham. Sa sinugdan, nahisama sila sa mga sanga sa ihalas nga olibo, nga walay kahigayonan nga mahimong bahin sa maong linaing pakigsaad. Apan gibuksan ni Jehova ang kahigayonan aron mahimo silang espirituwal nga mga Hudiyo.—Roma 2:28, 29.
(Roma 11:25, 26) Kay dili ko buot nga kamo, mga igsoon, mahimong walay alamag niining sagradong tinago, aron kamo dili magpakamaalamon sa inyong kaugalingong mga mata: nga nahabol ang pagbati sa Israel hangtod nga ang bug-os nga gidaghanon sa katawhan sa kanasoran mahisulod, 26 ug niining paagiha ang tibuok Israel maluwas. Ingon sa nahisulat: “Ang manluluwas moabot gikan sa Zion ug magpahilayo sa dili-diyosnong mga buhat gikan kang Jacob.
‘Oh Pagkalawom sa Kaalam sa Diyos!’
19 Oo, ang katuyoan ni Jehova bahin sa “Israel sa Diyos” ginatuman sa kahibulongang paagi. (Gal. 6:16) Sumala sa giingon ni Pablo, “ang tibuok Israel maluwas.” (Roma 11:26) Sa gitakdang panahon ni Jehova, “ang tibuok Israel”—ang bug-os gidaghanon sa espirituwal nga mga Israelinhon—mag-alagad ingong mga hari ug saserdote sa langit. Walay makapakyas sa katuyoan ni Jehova!
Pagpangitag Espirituwal nga Bahandi
(Roma 9:21-23) Unsa? Dili ba ang magkukulon adunay awtoridad ibabaw sa yutang-kulonon sa paghimo gikan sa mao ra nga minasa ug usa ka sudlanan alang sa gamit nga dungganon, ug lain alang sa gamit nga makauulaw? 22 Kon, karon, ang Diyos, bisan pag may tinguha nga ipasundayag ang iyang kapungot ug ipaila ang iyang gahom, nagtugot uban ang dagayang hataas-nga-pailob sa mga sudlanan sa kapungot nga gihimong angay sa kalaglagan, 23 aron iyang ikapaila ang bahandi sa iyang himaya nganha sa mga sudlanan sa kaluoy, nga iyang giandam nang daan alang sa himaya,
Magpaumol sa Disiplina ni Jehova
5 Komosta kon ang mga tawo dili magpaumol sa Dakong Magkukulon? Sa unsang paagi niya gamiton ang iyang awtoridad? Hunahunaa kon unsay mahitabo sa yutang kulonon kon dili kini maumol sumala sa gusto sa magkukulon. Puwede niya kining himoong laing matang sa sudlanan o kaha ilabay na lang! Kon dili na magamit ang yutang kulonon, sagad sayop kini sa magkukulon. Apan lahi ang atong Magkukulon. (Deut. 32:4) Kon ang usa dili magpaumol kang Jehova, sayop kini sa tawo. Gigamit ni Jehova ang iyang awtoridad nganha sa mga tawo pinaagi sa pagpasibo sa iyang pagpakiglabot kanila depende sa ilang sanong sa iyang pag-umol. Kadtong positibog sanong maumol sa mapuslanong paagi. Pananglitan, ang dinihogang mga Kristohanon maoy “mga sudlanan sa kaluoy” nga giumol aron mahimong mga “sudlanan alang sa gamit nga dungganon.” Apan kadtong dili magpaumol sa Diyos mahimong “mga sudlanan sa kapungot nga gihimong angay sa kalaglagan.”—Roma 9:19-23.
(Roma 10:2) Kay ako nagpamatuod mahitungod kanila nga sila may kasibot sa Diyos; apan dili sumala sa tukmang kahibalo;
Abughoan, Pangabugho
Sayop nga Kasibot. Ang usa ka tawo mahimong masiboton kaayo, o abughoan, alang sa usa ka tinong kawsa ug bisan pa niana maoy sayop ug dili makapahimuot sa Diyos. Ingon niini ang daghan sa mga Hudiyo sa unang siglo. Sila naglaom nga ang pagkamatarong modangat kanila pinaagi sa ilang kaugalingong mga buhat ubos sa Moisesnong Balaod. Apan gipakita ni Pablo nga sayop ang ilang kasibot tungod sa kakulang sa tukmang kahibalo. Busa sila wala makadawat sa tinuod nga pagkamatarong nga naggikan sa Diyos. Kinahanglan nilang makita ang ilang mga sayop ug moliso sa Diyos pinaagi ni Kristo aron makadawat sa pagkamatarong ug kagawasan gikan sa pagkahinukman sa Balaod. (Rom 10:1-10) Si Saulo sa Tarso maoy usa kanila, nga tungod sa hilabihan nga kasibot alang sa Judaismo, ‘naglutos sa kongregasyon sa Diyos ug naglaglag niini.’ Siya makutihon kaayong nagbantay sa pagtuman sa Balaod ingong “usa nga walay-ikasaway.” (Gal 1:13, 14; Flp 3:6) Bisan pa niana ang iyang pangabugho alang sa Judaismo maoy sayop nga pangabugho. Siya tim-os sa kasingkasing, nga tungod niana si Jehova nagpakitag dili-takos nga kalulot pinaagi kang Kristo sa pagtultol kaniya ngadto sa dalan sa matuod nga pagsimba.—1Ti 1:12, 13.
Pagbasa sa Bibliya
(Roma 10:1-15) Mga igsoon, ang maayong kabubut-on sa akong kasingkasing ug ang akong pangamuyo sa Diyos alang kanila maoy, sa pagkatinuod, alang sa ilang kaluwasan. 2 Kay ako nagpamatuod mahitungod kanila nga sila may kasibot sa Diyos; apan dili sumala sa tukmang kahibalo; 3 kay, tungod sa pagkawala-mahibalo sa pagkamatarong sa Diyos apan nagtinguha sa pagtukod sa ilang kaugalingong pagkamatarong, wala nila ipasakop ang ilang kaugalingon sa pagkamatarong sa Diyos. 4 Kay si Kristo mao ang kataposan sa Balaod, aron ang matag usa nga nagapasundayag ug pagtuo makabaton ug pagkamatarong. 5 Kay si Moises nagsulat nga ang tawong nakabuhat sa pagkamatarong sa Balaod mabuhi pinaagi niini. 6 Apan ang pagkamatarong nga tungod sa pagtuo nagsulti niining paagiha: “Ayaw pag-ingon diha sa imong kasingkasing, ‘Kinsa ang mosaka ngadto sa langit?’ nga mao, aron dad-on si Kristo sa ubos; 7 o, ‘Kinsa ang manaog ngadto sa kahiladman?’ nga mao, aron dad-on si Kristo sa itaas gikan sa mga patay.” 8 Apan unsa ang ginaingon niini? “Ang pulong haduol kanimo, sa imong kaugalingong baba ug sa imong kaugalingong kasingkasing”; nga mao, ang “pulong” sa pagtuo, nga atong ginawali. 9 Kay kon imong ipahayag sa dayag kanang ‘pulong sa imong kaugalingong baba,’ nga si Jesus maoy Ginoo, ug magpasundayag ug pagtuo sa imong kasingkasing nga ang Diyos nagbangon kaniya gikan sa mga patay, ikaw maluwas. 10 Kay pinaagi sa kasingkasing ang usa nagapasundayag ug pagtuo alang sa pagkamatarong, apan pinaagi sa baba ang usa nagahimog pagpahayag sa dayag alang sa kaluwasan. 11 Kay ang Kasulatan nag-ingon: “Walay usa nga magbutang sa iyang pagtuo kaniya ang mahigawad.” 12 Kay walay kalainan tali sa Hudiyo ug sa Grego, kay adunay sama ra nga Ginoo ibabaw sa tanan, kinsa madagayaon ngadto kanilang tanan nga nagatawag kaniya. 13 Kay “ang matag usa nga magatawag sa ngalan ni Jehova maluwas.” 14 Apan, unsaon nila pagtawag kaniya kinsa wala sila magbutang ug pagtuo? Unsaon, sa baylo, pagbutang nila ug pagtuo kaniya kinsa wala nila madunggi? Unsaon, sa baylo, nila pagkadungog kon walay magwali? 15 Unsaon, sa baylo, nila pagwali gawas kon sila gipadala? Ingon sa nahisulat: “Pagkatahom sa mga tiil niadtong nagapahayag sa maayong balita sa maayong mga butang!”