Reperensiya Para sa Workbook sa Tigom nga Kinabuhi ug Ministeryo
Marso 4-10
BAHANDI GIKAN SA PULONG SA DIYOS | ROMA 12-14
“Kon Unsay Ipasabot sa Pagpakitag Kristohanong Gugma”
(Roma 12:10) Sa inigsoong gugma batoni ang malumong pagmahal alang sa usag usa. Manguna sa pagpakitag pasidungog sa usag usa.
Pagmahal
Ang inigsoong gugma (Gr., phi·la·del·phiʹa, sa literal, “pagmahal alang sa usa ka igsoon”) angayng makita taliwala sa tanang membro sa Kristohanong kongregasyon. (Rom 12:10; Heb 13:1; tan-awa usab ang 1Pe 3:8.) Sa ingon, ang mga relasyon sa sulod sa kongregasyon kinahanglang suod, lig-on, ug mainiton sama sa mga relasyon sa kinaiyanhong pamilya. Bisan tuod ang mga membro sa kongregasyon nagpakita na ug inigsoong gugma, sila giawhag nga himoon kini sa mas bug-os pa.—1Te 4:9, 10.
Ang Gregong pulong nga phi·loʹstor·gos, nga nagkahulogang “pagbaton ug malumong pagmahal,” gigamit labot sa usa ka tawo nga suod kaayo sa laing tawo. Ang usa sa mga lintunganayng pulong niining linangkob nga termino, ang sterʹgo, sagad nga gigamit sa pagpasabot sa kinaiyanhong pagmahal, sama nianang pagmahal nga bation tali sa mga membro sa pamilya. Si apostol Pablo nagdasig sa mga Kristohanon sa pag-ugmad niini nga hiyas. (Rom 12:10) Gipakita usab ni Pablo nga sa kataposang mga adlaw ang mga tawo “walay kinaiyanhong pagbati” (Gr., aʹstor·goi) ug nga ang maong mga tawo takos sa kamatayon.—2Ti 3:3; Rom 1:31, 32.
(Roma 12:17-19) Ayaw balosi si bisan kinsa ug daotan tungod sa daotan. Pagtagana ug maayong mga butang sa atubangan sa tanang tawo. 18 Kon mahimo, kutob sa inyong maarangan, makigdinaitay sa tanang tawo. 19 Ayaw kamo pagpanimalos, mga hinigugma, kondili hatagig dapit ang kapungot; kay nahisulat: “Akoa ang panimalos; ako magabalos, nag-ingon si Jehova.”
“Makigdinaitay sa Tanang Tawo”
3 Basaha ang Roma 12:17. Gipatin-aw ni Pablo nga sa dihang kita lutoson, dili kita angayng mobalos. Ang pagpatalinghog sa iyang tambag ilabinang hinungdanon diha sa mga panimalay nga nabahin tungod sa relihiyon. Ang Kristohanong kapikas maningkamot nga dili mobalos pinaagi sa pagsulti o pagbuhat ug dili maayo. Walay maayong resulta kon ‘balosan ug daotan ang daotan.’ Sa kasukwahi, ang maong tinamdan makapasamot lamang sa situwasyon.
“Ayaw Balosi si Bisan Kinsa ug Daotan Tungod sa Daotan”
12 Ang sunod nga tambag ni Pablo kon unsaon pagtratar ang mga magtutuo ug dili-magtutuo mao kini: “Ayaw balosi si bisan kinsa ug daotan tungod sa daotan.” Atong masabtan kon nganong gisulti niya kini tungod kay siya miingon una pa niini nga: “Kasilagi ang daotan.” Sa pagkatinuod, makaingon ba ang usa ka tawo nga gikasilagan gayod niya ang daotan kon baslan niya ug daotan ang daotan? Ang pagbuhat niana maoy kaatbang sa pagbaton ug gugma nga ‘dili salingkapaw.’ Dayon miingon si Pablo: “Pagtagana ug maayong mga butang sa atubangan sa tanang tawo.” (Roma 12:9, 17) Sa unsang paagi ikapadapat nato ang maong mga pulong?
13 Una pa niana, naghisgot si Pablo bahin sa paglutos nga gisagubang sa mga apostoles diha sa iyang sulat sa mga taga-Corinto. Siya nag-ingon: “Kami nahimong talan-awon sa teatro sa kalibotan, ug sa mga manulonda, ug sa mga tawo. . . . Sa dihang gisultihag pasipala, kami nanalangin; sa dihang gilutos, kami nag-antos; sa dihang gidaot ang dungog, kami nangaliyupo.” (1 Corinto 4:9-13) Sa samang paagi, ang mga tawo sa kalibotan nagbantay sa lihok sa matuod nga mga Kristohanon. Sa dihang makita niadtong anaa sa atong palibot ang maayong mga butang nga atong gibuhat bisan kita gitratar nga dili-makataronganon, basin madani sila sa pagdawat sa atong mensahe.—1 Pedro 2:12.
(Roma 12:20, 21) Apan, “kon ang imong kaaway gigutom, pakan-a siya; kon siya giuhaw, hatagi siya ug tubig nga mainom; kay sa pagbuhat niini ikaw magapundok ug mga baga ibabaw sa iyang ulo.” 21 Ayaw pagpadaog sa daotan, kondili padayong daoga ang daotan pinaagi sa maayo.
Kinabubut-on nga Magpasaylo sa Usag Usa
13 Tingali dunay mga higayon nga imong natabangan ang usa ka dili magtutuo nga nakapasakit kanimo sa pag-apresyar sa mga sukdanan sa Bibliya. Si apostol Pablo misulat: “‘Kon ang imong kaaway gigutom, pakan-a siya; kon siya giuhaw, hatagi siya ug tubig nga mainom; kay sa pagbuhat niini ikaw magapundok ug mga baga ibabaw sa iyang ulo.’ Ayaw pagpadaog sa daotan, kondili padayong daoga ang daotan pinaagi sa maayo.” (Roma 12:20, 21) Kon kita magmatinahoron bisag suko kanato ang mga tawo, basin mausab ang ilang tinamdan ug molutaw ang ilang maayong hiyas. Pinaagi sa pagpakitag pagsabot, empatiya—kaluoy pa gani—imong matabangan kadtong dili maayo ug pagtratar kanimo nga makakat-on sa kamatuoran sa Bibliya. Bisag unsa pay reaksiyon sa tagbalay, ang imong malumong tubag makapahunahuna kaniya sa imong maayong panggawi.—1 Ped. 2:12; 3:16.
Pagpangitag Espirituwal nga Bahandi
(Roma 12:1) Busa ako nangaliyupo kaninyo pinaagi sa kaluoy sa Diyos, mga igsoon, nga itugyan ang inyong mga lawas nga usa ka halad nga buhi, balaan, dalawaton sa Diyos, usa ka sagradong pag-alagad uban sa inyong gahom sa pagpangatarongan.
Kon Unsaon Pagpilig Makapalig-ong Kalingawan
5 Ang tanang kalihokan sa imong kinabuhi nalangkit sa imong pagsimba kang Jehova. Sa iyang sulat ngadto sa mga taga-Roma, gigamit ni Pablo ang puwersadong mga pulong aron masilsil kining kamatuorana diha sa mga isigkamagtutuo. Iya silang giawhag: “Itugyan ang inyong mga lawas nga usa ka halad nga buhi, balaan, dalawaton sa Diyos, usa ka sagradong pag-alagad uban sa inyong gahom sa pagpangatarongan.” (Roma 12:1) Ang imong lawas naglakip sa imong hunahuna, kasingkasing, ug pisikal nga kusog. Gigamit nimo kining tanan sa pag-alagad sa Diyos. (Marcos 12:30) Si Pablo nagtawag sa maong bug-os-kalag nga pag-alagad ingong usa ka halad ug kini naundag dili-direkta nga pasidaan. Ubos sa Moisesnong Balaod, ang Diyos dili modawat ug usa ka halad nga may depekto. (Levitico 22:18-20) Sa samang paagi, kon ang espirituwal nga halad o pag-alagad nahugawan, isalikway kini sa Diyos. Apan, sa unsang paagi kini mahitabo?
6 Gitambagan ni Pablo ang mga Kristohanon sa Roma: ‘Ayaw itugyan ang inyong mga sangkap [“mga bahin sa inyong lawas,” Ang Biblia—Bag-ong Hubad nga Binisaya] ngadto sa sala.’ Gisugo usab sila ni Pablo nga ilang ‘patyon ang mga binuhatan sa lawas.’ (Roma 6:12-14; 8:13) Sa sinugdang bahin sa iyang sulat, mihatag siyag pipila ka pananglitan nianang “mga binuhatan sa lawas.” Bahin sa makasasalang mga tawo, atong mabasa: “Ang ilang baba napuno sa mga panunglo.” “Ang ilang mga tiil matulin sa pag-ula ug dugo.” “Walay kahadlok sa Diyos atubangan sa ilang mga mata.” (Roma 3:13-18) Mahugawan sa usa ka Kristohanon ang iyang lawas kon iyang gamiton ang iyang “mga sangkap” o mga bahin sa lawas alang sa maong makasasalang mga buhat. Pananglitan, kon ang usa ka Kristohanon karon tinuyong motan-awg ngil-ad nga materyal sama sa pornograpiya o sa mapintasong kalingawan, siya ‘nagtugyan sa [iyang mga mata] ngadto sa sala’ ug busa naghugaw sa tibuok niyang lawas. Ang bisan unsang pagsimba nga iyang himoon mahisama sa usa ka halad nga dili na balaan ug dili madawat sa Diyos. (Deuteronomio 15:21; 1 Pedro 1:14-16; 2 Pedro 3:11) Pagkagrabeng sangpotanan tungod sa pagpilig dili-makapalig-ong kalingawan!
(Roma 13:1) Magpasakop ang tanang kalag sa labaw nga mga awtoridad, kay walay awtoridad gawas nga pinaagi sa Diyos; ang nagalungtad nga mga awtoridad napahimutang sa ilang relatibong mga posisyon pinaagi sa Diyos.
Mga Pangunang Punto sa Sulat Ngadto sa mga Taga-Roma
13:1—Sa unsang paagi ang labaw nga mga awtoridad “napahimutang sa ilang relatibong mga posisyon pinaagi sa Diyos”? Ang tawhanong kagamhanan “napahimutang sa ilang relatibong mga posisyon pinaagi sa Diyos” sa pagkaagi nga sila gitugotan sa Diyos sa pagmando, ug sa pipila ka kahimtang ang ilang pagmando nakita nang daan sa Diyos. Kini nadayag diha sa mga tagna sa Bibliya bahin sa daghang magmamando.
Pagbasa sa Bibliya
(Roma 13:1-14) Magpasakop ang tanang kalag sa labaw nga mga awtoridad, kay walay awtoridad gawas nga pinaagi sa Diyos; ang nagalungtad nga mga awtoridad napahimutang sa ilang relatibong mga posisyon pinaagi sa Diyos. 2 Busa siya nga mosukol sa awtoridad misukol sa kahikayan sa Diyos; kadtong misukol niini makadawat ug paghukom alang sa ilang kaugalingon. 3 Kay sila nga nagamando maoy gikahadlokan, dili sa maayong buhat, kondili sa daotan. Nan, buot ba nimo nga ikaw dili mahadlok sa awtoridad? Magpadayon sa pagbuhat ug maayo, ug ikaw pagadayegon tungod niini; 4 kay kini ministro sa Diyos alang sa imong kaayohan. Apan kon ikaw nagabuhat sa daotan, angay ka nga mahadlok; kay dili sa walay katuyoan nga kini nagadala sa espada; kay kini ministro sa Diyos, usa ka tigpanimalos sa pagpahayag ug kapungot sa usa nga nagabuhat sa daotan. 5 Busa adunay lig-ong katarongan nga kamo magpasakop, dili lamang tungod niana nga kapungot kondili usab tungod sa inyong tanlag. 6 Mao nga kamo usab nagabayad ug mga buhis; kay sila publikong mga alagad sa Diyos nga kanunayng nagasilbi niining katuyoana mismo. 7 Ibayad ngadto sa tanan ang mga nahiangay kanila, kaniya nga nangayog buhis, ang buhis; kaniya nga nangayog tributo, ang tributo; kaniya nga nangayog kahadlok, ang maong kahadlok; kaniya nga nangayog dungog, ang maong dungog. 8 Ayaw kamo pangutang kang bisan kinsa ug bisan unsang butang, gawas sa paghigugma sa usag usa; kay siya nga nagahigugma sa iyang isigkatawo nakatuman sa balaod. 9 Kay ang kalagdaan sa balaod, “Dili ka manapaw, Dili ka magbuno, Dili ka mangawat, Dili ka maibog nga hinakog,” ug ang bisan unsa pang ubang sugo, nalangkob niining pulonga, nga mao, “Higugmaon mo ang imong silingan sama sa imong kaugalingon.” 10 Ang gugma dili magabuhat ug daotan ngadto sa silingan; busa ang gugma mao ang katumanan sa balaod. 11 Buhata usab kini, tungod kay kamo nasayod sa panahon, nga takna na aron kamo momata gikan sa pagkatulog, kay karon ang atong kaluwasan mas duol na kay sa dihang kita nahimong mga magtutuo. 12 Lawom na kaayo ang kagabhion; ang adlaw nagkaduol na. Busa hukason nato ang mga buhat nga iya sa kangitngit ug isul-ob nato ang mga hinagiban sa kahayag. 13 Ingon sa maadlaw molakaw kita nga may kahapsay, dili sa hudyaka ug sa paghuboghubog, dili sa ginadiling pakigdulog ug sa malaw-ayng panggawi, dili sa panag-away ug sa pangabugho. 14 Kondili isul-ob ang Ginoong Jesu-Kristo, ug ayaw paglaraw daan alang sa mga tinguha sa unod.
Marso 11-17
BAHANDI GIKAN SA PULONG SA DIYOS | ROMA 15-16
“Dangop Kang Jehova Alang sa Paglahutay ug Paghupay”
(Roma 15:4) Kay ang tanang butang nga gisulat kanhi gisulat alang sa pagtudlo kanato, aron nga pinaagi sa atong pag-antos ug pinaagi sa paghupay gikan sa mga Kasulatan kita makabatog paglaom.
“Hilak Uban sa mga Tawong Nanghilak”
11 Ang asoy bahin sa kaguol nga gibati ni Jesus dihang namatay si Lazaro maoy usa lang sa daghan kaayong makapahupayng teksto sa Pulong sa Diyos. Ug dili kana ikatingala, “kay ang tanang butang nga gisulat kanhi gisulat alang sa pagtudlo kanato, aron nga pinaagi sa atong pag-antos [o, paglahutay] ug pinaagi sa paghupay gikan sa mga Kasulatan kita makabatog paglaom.” (Roma 15:4) Kon nagbangotan ka, mahupayan ka sa mosunod nga mga teksto:
▪ “Si Jehova haduol niadtong mga dugmok ug kasingkasing; ug siya magaluwas niadtong mga nahugno sa espiritu.”—Sal. 34:18, 19.
▪ “Dihang ang makapatugaw nga mga hunahuna midaghan sa akong kahiladman, ang imong [kang Jehova] mga paghupay mihapohap sa akong kalag.”—Sal. 94:19.
▪ “Hinaot nga ang atong Ginoong Jesu-Kristo ug ang Diyos nga atong Amahan, nga nahigugma kanato ug naghatag ug walay kataposang paghupay ug maayong paglaom pinaagi sa dili-takos nga kalulot, maghupay sa inyong mga kasingkasing ug magpalig-on kaninyo.”—2 Tes. 2:16, 17.
(Roma 15:5) Karon hinaot ang Diyos nga naghatag ug pag-antos ug paghupay magtugot kaninyo nga mabatonan sa inyong taliwala ang samang tinamdan sa pangisip nga nabatonan ni Kristo Jesus,
Ipatapos sa Pagkamalahutayon ang Buluhaton Niini
5 Pangayog kusog kang Jehova. Si Jehova ang Diyos nga motaganag paghupay ug motabang kanato sa paglahutay. (Roma 15:5) Siya lamang ang bug-os nga makasabot dili lang sa mga problema nga atong giatubang kondili usab sa paagi nga kita maapektohan sa atong palibot, emosyon, ug bisan sa atong kagikan. Busa labaw kang bisan kinsa, siya ang makatabang nato sa paglahutay. “Pagatumanon niya ang tinguha niadtong nahadlok kaniya,” nag-ingon ang Bibliya. “Ang ilang pagtuaw alang sa tabang iyang pagadunggon, ug siya magaluwas kanila.” (Sal. 145:19) Apan, sa unsang paagi tubagon sa Diyos ang atong pag-ampo alang sa kusog aron makalahutay?
(Roma 15:13) Hinaot nga ang Diyos nga nagahatag ug paglaom magpuno kaninyo sa tanang kalipay ug kalinaw pinaagi sa inyong pagpanuo, aron kamo modagaya sa paglaom uban ang gahom sa balaang espiritu.
“Higugmaon Mo si Jehova nga Imong Diyos”
11 Si Jehova ‘naghatag ug paglaom nga magpuno kanatog kalipay ug kalinaw.’ (Roma 15:13) Ang paglaom nga gihatag sa Diyos makatabang kanato sa paglahutay sa mga pagsulay. Ang mga dinihogan nga mapamatud-ang ‘matinumanon bisan hangtod sa kamatayon hatagag purongpurong sa langitnong kinabuhi.’ (Pin. 2:10) Ang mga matinumanon nga may yutan-ong paglaom makatagamtam ug walay kataposang panalangin diha sa gisaad nga Paraisong yuta. (Luc. 23:43) Unsay atong pagbati sa maong mga saad? Dili ba kita mapuno sa kalipay ug kalinaw, maingon man sa gugma alang sa Maghahatag sa “matag maayong gasa ug matag hingpit nga regalo”?—Sant. 1:17.
Pagpangitag Espirituwal nga Bahandi
(Roma 15:27) Matuod, gikahimut-an nila ang pagbuhat sa ingon, apan sila utangan kanila; kay kon ang mga nasod nakaambit man diha sa ilang espirituwal nga mga butang, sila usab obligado nga moalagad sa dayag ngadto kanila pinaagig mga butang alang sa lawas nga unodnon.
“Usa ka Pagsulay sa Katiunay sa Imong Gugma”
Sa pagkamatuod, ang ilang Hentil nga kaigsoonan angay untang natandog nga mosanong sa ilang kahimtang. Kon buot sabton, utangan sila sa espesyal nga “utang” sa mga Kristohanon sa Jerusalem. Dili ba gikan man sa Jerusalem nga ang maayong balita mikanat ngadto sa mga Hentil? Si Pablo nangatarongan: “Kon ang Hudiyong mga Kristohanon nakig-ambit sa ilang espirituhanong mga bahandi uban sa mga Hentil, ang mga Hentil may dayag nga katungdanan nga moamot alang sa ilang materyal nga mga panginahanglan.”—Roma 15:27, The New English Bible.
(Roma 16:25) Karon ngadto kaniya nga makapalig-on kaninyo sumala sa maayong balita nga akong gimantala ug sa pagwali mahitungod kang Jesu-Kristo, sumala sa pagpadayag sa sagradong tinago nga gitipigan sa hilom sulod sa dugay nang kapanahonan
Pagkahibalo-daan, Pagbuot-daan
Ang Mesiyas o Kristo mao ang sinaad nga Binhi nga pinaagi kaniya ang tanang matarong nga mga tawo sa tanang kabanayan sa yuta pagapanalanginan. (Gal 3:8, 14) Unang gihisgotan ang maong “binhi” human sa pagrebelde didto sa Eden, apan sa wala pa matawo si Abel. (Gen 3:15) Kini maoy mga 4,000 ka tuig sa wala pa ipadayag ang “sagradong tinago” pinaagi sa tin-awng pagpaila niining Mesiyanikong “binhi.” Busa, kini gayod “gitipigan sa hilom sulod sa dugay nang kapanahonan.”—Rom 16:25-27; Efe 1:8-10; 3:4-11.
Pagbasa sa Bibliya
(Roma 15:1-16) Hinunoa, kita nga mga lig-on angayng mopas-an sa mga kaluyahon niadtong mga dili lig-on, ug dili kay magpahimuot sa atong kaugalingon. 2 Magpahimuot ang matag usa kanato sa iyang silingan sa kon unsay maayo aron sa paglig-on kaniya. 3 Kay bisan gani si Kristo wala magpahimuot sa iyang kaugalingon; kondili ingon sa nahisulat: “Nahiagoman ko ang mga pakaulaw niadtong mga nagapakaulaw kanimo.” 4 Kay ang tanang butang nga gisulat kanhi gisulat alang sa pagtudlo kanato, aron nga pinaagi sa atong pag-antos ug pinaagi sa paghupay gikan sa mga Kasulatan kita makabatog paglaom. 5 Karon hinaot ang Diyos nga naghatag ug pag-antos ug paghupay magtugot kaninyo nga mabatonan sa inyong taliwala ang samang tinamdan sa pangisip nga nabatonan ni Kristo Jesus, 6 aron nga uban ang panag-uyon kamo sa usa ka baba maghimaya sa Diyos ug Amahan sa atong Ginoong Jesu-Kristo. 7 Busa dawata ang usag usa, ingon nga si Kristo usab midawat kanato, alang sa himaya sa Diyos. 8 Kay ako nag-ingon nga si Kristo sa pagkatinuod nahimong ministro sa mga tinuli alang sa pagkamatinud-anon sa Diyos, aron lig-onon ang saad nga Iyang gihatag sa ilang mga katigulangan, 9 ug nga ang mga nasod makahimaya sa Diyos tungod sa iyang kaluoy. Ingon sa nahisulat: “Mao nga ilhon ko ikaw sa dayag taliwala sa mga nasod ug sa imong ngalan magaawit ako ug mga pagdayeg.” 10 Ug usab siya nag-ingon: “Pagsadya, kamong mga nasod, uban sa iyang katawhan.” 11 Ug usab: “Dayega ninyo si Jehova, kamong tanang kanasoran, ug padayega ang tanang katawhan kaniya.” 12 Ug usab nag-ingon si Isaias: “Aduna unyay gamot ni Jese, ug aduna unyay usa nga mobangon aron sa pagmando sa mga nasod; diha kaniya ang mga nasod managlaom.” 13 Hinaot nga ang Diyos nga nagahatag ug paglaom magpuno kaninyo sa tanang kalipay ug kalinaw pinaagi sa inyong pagpanuo, aron kamo modagaya sa paglaom uban ang gahom sa balaang espiritu. 14 Karon ako usab nakombinsir bahin kaninyo, mga igsoon ko, nga kamo usab puno sa pagkamaayo, ingon nga kamo natugob sa tanang kahibalo, ug nga makapahimangno usab kamo sa usag usa. 15 Bisan pa niana, ako nagasulat kaninyo nga labi pang walay lipudlipod bahin sa pipila ka punto, nga daw nagpahinumdom kaninyo pag-usab, tungod sa dili-takos nga kalulot nga gihatag kanako gikan sa Diyos 16 nga ako mahimong publikong alagad ni Kristo Jesus ngadto sa kanasoran, nga nagabuhat sa balaang buluhaton sa maayong balita sa Diyos, aron nga ang halad, nga mao, kining mga nasora, mahimong dalawaton, kay gibalaan kini pinaagi sa balaang espiritu.
Marso 18-24
BAHANDI GIKAN SA PULONG SA DIYOS | 1 CORINTO 1-3
“Ikaw ba Pisikal o Espirituwal nga Tawo?”
(1 Corinto 2:14) Apan ang tawong pisikal dili magadawat sa mga butang nga iya sa espiritu sa Diyos, kay kini kabuangan man alang kaniya; ug siya dili arang makaila niini, tungod kay kini ginausisa man sa espirituwal nga paagi.
Unsay Kahulogan sa Pagkahimong Tawong Espirituwal?
4 Hisgotan unâ nato ang panghunahuna sa tawong pisikal. Ang kalibotan nagpokus sa unodnong mga tinguha. Gihubit kana ni Pablo ingong “espiritu nga nagalihok karon diha sa mga anak sa pagkadili-masinugtanon.” (Efe. 2:2) Kana nga espiritu nag-impluwensiya sa kadaghanan nga mosunod sa ginahimo sa mga tawo sa ilang palibot. Nagpokus sila sa unodnong mga tinguha. Tungod niana, gibuhat sa kadaghanan nila ang gibati nilang husto ug wala sila maningkamot sa pagsunod sa sukdanan sa Diyos. Sagad ang pisikal, o unodnon, nga tawo maghunahuna nga ang posisyon, kuwarta, o personal nga katungod mao ang labing hinungdanon.
5 Lain pa, ang tawong pisikal naghimo sa “mga buhat sa unod.” (Gal. 5:19-21) Ang unang sulat ni Pablo sa Corinto naghisgot sa uban pang timailhan niadtong unodnon ug panghunahuna. Apil niini ang: nagpahinabog pagkabahinbahin, nagdapigdapig, naglalisay, nagkihaay, walay apresasyon sa pagkaulo, ug nagpatuyang sa pagkaon ug pag-inom. Dihang tentalon, ang unodnong tawo maluya ug mokompromiso. (Prov. 7:21, 22) Si Judas naghisgot bahin sa mga tawo nga mahimong pisikal kaayo nga mawad-an na sila sa ilang espirituwalidad.—Jud. 18, 19.
(1 Corinto 2:15, 16) Hinunoa, ang tawong espirituwal nagausisa gayod sa tanang butang, apan siya dili usisahon ni bisan kinsang tawo. 16 Kay “kinsa bay nakasabot sa hunahuna ni Jehova, aron iyang matudloan siya?” Apan nabatonan nato ang panghunahuna ni Kristo.
Unsay Kahulogan sa Pagkahimong Tawong Espirituwal?
6 Nan, unsa may kahulogan sa pagkahimong “tawong espirituwal”? Lahi sa tawong pisikal, ang tawong espirituwal mahunahunaon sa iyang relasyon sa Diyos. Ang mga tawong mahunahunaon sa espirituwal maningkamot nga “mahimong mga tigsundog sa Diyos.” (Efe. 5:1) Nagpasabot ni nga maningkamot sila nga mabatonan ang panghunahuna ug panglantaw ni Jehova sa mga butang. Ang Diyos tinuod gayod kanila. Sila naningkamot sa pagpahiuyon sa ilang kinabuhi sa mga sukdanan ni Jehova, dili sama sa unodnong mga tawo. (Sal. 119:33; 143:10) Imbes magpokus sa unodnong mga buhat, ang tawong mahunahunaon sa espirituwal maningkamot sa pagpakita sa “bunga sa espiritu.” (Gal. 5:22, 23) Aron mapatin-aw pa ang ekspresyong “mahunahunaon sa espirituwal,” tagda kini: Ang tawong maayo sa negosyo gitawag ug business-minded. Sa susama, ang usa nga nagpabili pag-ayo sa espirituwal nga mga butang gitawag ug mahunahunaon sa espirituwal o spiritually-minded.
Unsay Kahulogan sa Pagkahimong Tawong Espirituwal?
15 Unsaon nato pagsundog si Kristo? Ang 1 Corinto 2:16 nag-ingon nga angay natong batonan “ang panghunahuna ni Kristo.” Ug ang Roma 15:5 nagpahinumdom nga ugmaron nato “ang samang tinamdan sa pangisip nga nabatonan ni Kristo Jesus.” Busa, aron mahisama kang Kristo, kinahanglang mahibaloan nato ang iyang panghunahuna ug personalidad. Dayon sundon nato ang iyang mga tunob. Si Jesus nagpokus sa iyang relasyon sa Diyos. Busa, kon mahisama ta kang Jesus mahisama sab ta kang Jehova. Maong importante nga makakat-on ta sa paghunahuna nga sama kang Jesus.
Pagpangitag Espirituwal nga Bahandi
(1 Corinto 1:20) Hain man ang tawong maalamon? Hain man ang eskriba? Hain man ang debatedor niini nga sistema sa mga butang? Wala ba himoa sa Diyos nga binuang ang kaalam sa kalibotan?
Kaalam
Busa ang kalibotan tungod sa kaalam niini misalikway sa tagana sa Diyos pinaagi ni Kristo ingong kabuangan; ang mga magmamando niini, bisan tuod sila makinaadmanon ug maalamong mga administrador, ‘naglansang pa gani sa mahimayaong Ginoo.’ (1Co 1:18; 2:7, 8) Apan ang Diyos, sa baylo, nagpamatuod nga ang kaalam sa mga maalamon sa kalibotan maoy kabuangan, nga nagpakaulaw sa ilang maalamong mga tawo pinaagi sa paggamit sa ilang giisip nga “binuang nga butang sa Diyos,” ingon man sa mga tawo nga ilang giisip ingong ‘buangbuang, mahuyang, ug tinamay,’ sa pagpalampos sa Iyang dili mapakyas nga katuyoan. (1Co 1:19-28) Gipahinumdoman ni Pablo ang mga Kristohanon sa Corinto nga “ang kaalam niini nga sistema sa mga butang [ug] sa mga magmamando niini nga sistema sa mga butang” mangahanaw ra; busa ang maong kaalam dili bahin sa espirituwal nga mensahe sa apostol. (1Co 2:6, 13) Iyang gipasidan-an ang mga Kristohanon sa Colosas batok sa pagkahimong malit-agan “sa pilosopiya [phi·lo·so·phiʹas, sa literal, gugma sa kaalam] ug walay-pulos nga panglimbong sumala sa tradisyon sa mga tawo.”—Col 2:8; itandi ang Col 2 ber 20-23.
(1 Corinto 2:3-5) Ug ako mianha kaninyo sa kahuyang ug sa kahadlok ug uban ang labihan nga pagkurog; 4 ug ang akong mga pulong ug ang akong giwali dili pinaagig makapakombinsir nga mga pulong sa kaalam kondili pinaagig pagpasundayag sa espiritu ug sa gahom, 5 aron nga ang inyong pagtuo magasukad, dili sa kaalam sa tawo, kondili sa gahom sa Diyos.
Mga Pangunang Punto sa mga Sulat Ngadto sa mga Taga-Corinto
2:3-5. Samtang nagsangyaw sa Corinto, ang sentro sa Gregong pilosopiya ug edukasyon, si Pablo lagmit nabalaka kon madani ba niya ang iyang mga mamiminaw. Bisan pa niana, wala niya tugoti nga ang bisan unsang kahuyangan o kahadlok mobabag sa iyang pagtuman sa buluhaton nga gihatag sa Diyos kaniya. Sa susama, dili nato tugotan nga ang malisod nga mga kahimtang mobabag kanato sa pagpahayag sa maayong balita sa Gingharian sa Diyos. Sama kang Pablo, makasalig usab kita nga si Jehova motabang kanato.
Pagbasa sa Bibliya
(1 Corinto 1:1-17) Si Pablo, gitawag aron mahimong apostol ni Jesu-Kristo pinaagi sa kabubut-on sa Diyos, ug si Sostenes nga atong igsoon 2 nganha sa kongregasyon sa Diyos nga anaa sa Corinto, kaninyo nga nabalaan nga nahiusa kang Kristo Jesus, nga gitawag aron mahimong mga balaan, uban sa tanan nga sa tanang dapit nagatawag sa ngalan sa atong Ginoo, si Jesu-Kristo, ang ilang Ginoo ug atoa: 3 Hinaot nga kamo adunay dili-takos nga kalulot ug kalinaw gikan sa Diyos nga atong Amahan ug sa Ginoong Jesu-Kristo. 4 Sa kanunay nagpasalamat ako sa Diyos alang kaninyo tungod sa dili-takos nga kalulot sa Diyos nga gihatag kaninyo diha kang Kristo Jesus; 5 nga sa tanang butang kamo gibuhong diha kaniya, sa bug-os nga katakos sa pagsulti ug sa bug-os nga kahibalo, 6 ingon nga ang pagsaksi bahin kang Kristo gipalig-on diha kaninyo, 7 mao nga kamo wala gayod makulangi sa bisan unsang gasa, samtang kamo naghulat nga maikagon sa pagpadayag sa atong Ginoong Jesu-Kristo. 8 Siya magalig-on usab kaninyo hangtod sa kataposan, aron walay ikasumbong batok kaninyo sa adlaw sa atong Ginoong Jesu-Kristo. 9 Ang Diyos kasaligan, kinsa nagtawag kaninyo ngadto sa panag-ambitay uban sa iyang Anak nga si Jesu-Kristo nga atong Ginoo. 10 Karon ako magaawhag kaninyo, mga igsoon, pinaagi sa ngalan sa atong Ginoong Jesu-Kristo nga kamong tanan magasulti nga may panagkauyon, ug nga walay pagkabahinbahin diha kaninyo, kondili kamo unta bug-os nga magkahiusa sa samang kaisipan ug sa samang panghunahuna. 11 Kay gisuginlan ako bahin kaninyo, mga igsoon ko, nilang sakop sa balay ni Cloe, nga adunay mga pagsumpakiay diha kaninyo. 12 Ang buot kong ipasabot mao kini, nga ang matag usa kaninyo nag-ingon: “Ako iya ni Pablo,” “Apan ako kang Apolos,” “Apan ako kang Cefas,” “Apan ako kang Kristo.” 13 Si Kristo nabahinbahin. Si Pablo wala ilansang alang kaninyo, dili ba? O kamo ba gibawtismohan sa ngalan ni Pablo? 14 Ako mapasalamaton nga ako walay gibawtismohan kaninyo gawas ni Crispo ug ni Gayo, 15 aron walay makaingon nga kamo gibawtismohan sa akong ngalan. 16 Oo, akong gibawtismohan usab ang panimalay ni Estefanas. Mahitungod sa uban, wala na ako mahibalo kon may lain pa akong gibawtismohan. 17 Kay si Kristo nagpadala kanako, dili aron sa pagbawtismo, kondili sa pagpahayag sa maayong balita, dili pinaagig kaalam sa pagsulti, aron ang estaka sa pagsakit ni Kristo dili mahimong walay-pulos.
Marso 25-31
BAHANDI GIKAN SA PULONG SA DIYOS | 1 CORINTO 4-6
“Ang Diyutayng Lebadura Magpatubo sa Tibuok Minasa”
(1 Corinto 5:1, 2) Sa pagkatinuod may gitaho nga pakighilawas sa inyong taliwala, ug kana nga pakighilawas wala gani buhata bisan taliwala sa mga nasod, nga ang usa ka tawo nagkuha sa asawa sa iyang amahan. 2 Ug kamo ba nagpaburot, ug wala ba hinuon kamo magbangotan, aron nga ang tawo nga nagbuhat niini kuhaon gikan sa inyong taliwala?
(1 Corinto 5:5-8) itugyan ninyo ang maong tawo kang Satanas alang sa kalaglagan sa unod, aron nga ang espiritu maluwas sa adlaw sa Ginoo. 6 Ang inyong hinungdan sa pagpanghambog dili maayo. Wala ba kamo mahibalo nga ang diyutayng lebadura magpatubo sa tibuok minasa? 7 Kuhaa ang daang lebadura, aron kamo mahimong bag-ong minasa, ingon nga kamo walay igpapatubo. Kay, sa pagkatinuod, si Kristo nga atong inihaw sa paskuwa gihalad na. 8 Tungod niana atong saulogon ang pista, dili pinaagi sa daan nga lebadura, ni pinaagi sa lebadura sa kangil-aran ug pagkadaotan, kondili pinaagi sa mga tinapay nga walay igpapatubo sa katim-os ug sa kamatuoran.
(1 Corinto 5:13) samtang ang Diyos nagahukom kanilang anaa sa gawas? “Kuhaa ang tawong daotan gikan sa inyong taliwala.”
Lebadura
Gigamit ni apostol Pablo ang samang simbolismo sa dihang iyang gisugo ang Kristohanong kongregasyon sa Corinto sa pagpalagpot sa usa ka imoral nga tawo gikan sa kongregasyon, nga nag-ingon: “Wala ba kamo mahibalo nga ang diyutayng lebadura magpatubo sa tibuok minasa? Kuhaa ang daang lebadura, aron kamo mahimong bag-ong minasa, ingon nga kamo walay igpapatubo. Kay, sa pagkatinuod, si Kristo nga atong inihaw sa paskuwa gihalad na.” Dayon tin-aw niyang gipakita kon unsay buot niyang ipasabot sa “lebadura”: “Tungod niana atong saulogon ang pista, dili pinaagi sa daan nga lebadura, ni pinaagi sa lebadura sa kangil-aran ug pagkadaotan, kondili pinaagi sa mga tinapay nga walay igpapatubo sa katim-os ug sa kamatuoran.” (1Co 5:6-8) Gihubit dinhi ni Pablo ang malarawanong kahulogan sa Hudiyohanong Pista sa mga Tinapay nga Walay Igpapatubo, nga mosunod gilayon sa pagsaulog sa Paskuwa. Maingon nga ang usa ka diyutay nga minasang igpapatubo sa ngadtongadto makapatubo sa tibuok minasa, mao man usab ang kongregasyon ingong usa ka lawas mahimong mahugaw sa panan-aw ni Jehova kon dili nila hanawon kining makapadunot nga impluwensiya sa imoral nga tawo. Sila kinahanglang molihok sa pagkuha sa “lebadura” gikan sa ilang taliwala, maingon nga ang mga Israelinhon dili mahimong magbaton ug lebadura diha sa ilang mga balay panahon sa pista.
Satanas
Unsay ipasabot sa ‘pagtugyan sa usa ka tawo ngadto kang Satanas alang sa kalaglagan sa unod’?
Sa pagsugo sa kongregasyon sa Corinto bahin sa aksiyon nga himoon ngadto sa usa ka membro sa kongregasyon nga sa pagkadaotan mihimog insesto (o pakighilawas uban sa suod nga kabanay) uban sa asawa sa iyang amahan, si apostol Pablo misulat: “Itugyan ninyo ang maong tawo kang Satanas alang sa kalaglagan sa unod.” (1Co 5:5) Kini maoy usa ka sugo sa pagpalagpot sa maong tawo gikan sa kongregasyon, nga putlon ang bisan unsang pagpakig-uban kaniya. (1Co 5:13) Ang pagtugyan kaniya ngadto kang Satanas magpagula kaniya gikan sa kongregasyon ug magpahitumpawak kaniya ngadto sa kalibotan nga si Satanas mao ang diyos ug magmamando. Sama sa “diyutayng lebadura” diha sa “tibuok minasa,” kini nga tawo mao ang “unod,” o unodnong elemento sulod sa kongregasyon; ug pinaagi sa pagpalagpot niining tawong nakahimog insesto, ang kongregasyon nga mahunahunaon sa espirituwal maglaglag sa “unod” gikan sa taliwala niini. (1Co 5:6, 7) Sa susama, gitugyan ni Pablo si Himeneo ug si Alejandro ngadto kang Satanas tungod kay ilang gisalikway ang pagtuo ug ang maayong tanlag ug sila nakasinatig pagkalunod labot sa ilang pagtuo.—1Ti 1:20.
(1 Corinto 5:9-11) Sa akong sulat gisulatan ko kamo nga mohunong na sa pagpakig-uban sa mga makihilawason, 10 wala magkahulogan sa kinatibuk-an uban sa mga makihilawason niining kalibotana o sa mga tawong dalo ug mga mangingilkil o mga tigsimbag idolo. Kay kon mao pa, kamo sa tinuod kinahanglan untang mogula gikan sa kalibotan. 11 Apan karon ako nagsulat kaninyo nga mohunong na sa pagpakig-uban kang bisan kinsa nga gitawag ug igsoon nga usa ka makihilawason o tawong dalo o tigsimbag idolo o tigsultig pasipala o palahubog o mangingilkil, dili gani mokaon uban sa maong tawo.
Kon Unsaon Pagtagad ang Tawong Gipalagpot
Unsaon nato pagtagad ang tawo nga gipalagpot? Ang Bibliya nag-ingon: “[Hunong] na sa pagpakig-uban kang bisan kinsa nga gitawag ug igsoon nga usa ka makihilawason o tawong dalo o tigsimbag idolo o tigsultig pasipala o palahubog o mangingilkil, dili gani mokaon uban sa maong tawo.” (1 Corinto 5:11) Bahin sa usa nga “dili magpabilin diha sa pagtulon-an ni Kristo,” atong mabasa: “Ayaw gayod siya pasak-a sa inyong mga balay o mangomosta kaniya. Kay siya nga mangomosta kaniya maoy mag-aambit sa iyang daotang mga buhat.” (2 Juan 9-11) Dili kita makig-uban o makigsulti bahin sa relihiyosong mga butang sa mga gipalagpot. Ang Bantayanang Torre sa Marso 15, 1982, panid 19, nag-ingon: “Ang usa ka yanong ‘Hello’ sa usa ka tawo maoy unang lakang nga maugmad ang panagkolokabildo ug malagmit pa ngani panaghigalaay. Buot ba natong buhaton kanang unang lakang uban sa tawong gipalagpot?”
Kinahanglan bang likayan ang tanang pakigkontak sa mga gipalagpot? Oo, tungod sa pipila ka katarongan. Una, nalangkit niini ang pagkamaunongon ngadto sa Diyos ug sa iyang Pulong. Sugton nato si Jehova dili lang sa dihang kini sayon kondili bisan kon kini lisod. Ang atong gugma sa Diyos motukmod kanato sa pagsugot sa tanan niyang sugo, kay kita nasayod nga siya matarong ug mahigugmaon ug ang iyang mga balaod maoy alang sa atong kaayohan. (Isaias 48:17; 1 Juan 5:3) Ikaduha, ang pagpalayo sa dili-mahinulsolong mamumuhat ug daotan manalipod kanato ug sa uban sa kongregasyon batok sa espirituwal ug moral nga kahugawan ug maampingan ang maayong dungog sa kongregasyon. (1 Corinto 5:6, 7) Ikatulo, ang atong pagtuman sa mga prinsipyo sa Bibliya tingali makaayo pa sa gipalagpot. Pinaagi sa pagpaluyo sa desisyon sa hudisyal nga komite, basin makatandog kita sa kasingkasing sa mamumuhat ug daotan nga nagmagahi sa dihang naningkamot ang mga ansiyano sa pagtabang kaniya. Kay ang iyang mga minahal dili na makig-uban kaniya, basin siya ‘makaamgo,’ nga makasabot sa pagkaseryoso sa daotan niyang buhat, ug mohimog mga tikang sa pagbalik kang Jehova.—Lucas 15:17.
Pagpangitag Espirituwal nga Bahandi
(1 Corinto 4:9) Kay sa hunahuna ko ang Diyos nagbutang kanamong mga apostoles nga ulahi diha sa pasundayag ingong mga tawong natudlo sa kamatayon, tungod kay kami nahimong talan-awon sa teatro sa kalibotan, ug sa mga manulonda, ug sa mga tawo.
Mga Manulonda—“Mga Espiritu Alang sa Publikong Pag-alagad”
16 Ang mga Kristohanon nga nagasagubang ug mga pagsulay maoy ‘talan-awon sa mga manulonda.’ (1 Cor. 4:9) Ang mga manulonda mangayaon gayod nga magtan-aw kanato nga magmatinumanon ug malipay usab sila nga makita ang usa ka makasasala nga maghinulsol. (Luc. 15:10) Ang diyosnong paggawi sa Kristohanong kababayen-an makita sa mga manulonda. Gipakita diha sa Bibliya nga “ang babaye angay magbaton ug timaan sa awtoridad diha sa iyang ulo tungod sa mga manulonda.” (1 Cor. 11:3, 10) Oo, malipay ang mga manulonda nga makita ang Kristohanong kababayen-an ug ang uban pang mga alagad sa Diyos nga nagsunod sa teokratikanhong kahikayan ug sa pagkaulo. Ang maong pagpasakop maoy usa ka maayong pahinumdom alang niining langitnong mga anak sa Diyos.
(1 Corinto 6:3) Wala ba kamo mahibalo nga kita magahukom unya sa mga manulonda? Nan, nganong dili man sa mga butang niining kinabuhia?
Balaod
Balaod Ngadto sa mga Manulonda. Ang mga manulonda, nga labaw kay sa tawo, nailalom sa balaod ug mga sugo sa Diyos. (Heb 1:7, 14; Sal 104:4) Si Jehova nagsugo ug naghatag man gani ug restriksiyon sa iyang kaaway nga si Satanas. (Job 1:12; 2:6) Giila ug gitahod ni Miguel nga arkanghel ang posisyon ni Jehova ingong Supremong Maghuhukom sa iyang pag-ingon, sa dihang nakiglalis sa Yawa: “Hinaot si Jehova magabadlong kanimo.” (Jud 9; itandi ang Zac 3:2.) Gibutang ni Jehova nga Diyos ang tanang manulonda ilalom sa awtoridad sa hinimayang si Jesu-Kristo. (Heb 1:6; 1Pe 3:22; Mat 13:41; 25:31; Flp 2:9-11) Busa, pinaagi sa sugo ni Jesus, ang usa ka mensahero nga manulonda gipadala ngadto kang Juan. (Pin 1:1) Bisan pa niana, gihisgotan ni apostol Pablo sa 1 Corinto 6:3 nga ang espirituwal nga mga igsoon ni Kristo gitudlo aron sa paghukom sa mga manulonda, tungod kini kay sila makig-ambit sa pagpahamtang ug paghukom batok sa daotang mga espiritu.
Pagbasa sa Bibliya
(1 Corinto 6:1-14) May si bisan kinsa ba kaninyong may buroka batok sa laing tawo nga mangahas pagsang-at niana sa korte atubangan sa mga tawong dili-matarong, ug dili atubangan sa mga balaan? 2 O wala ba kamo mahibalo nga ang mga balaan magahukom sa kalibotan? Ug kon kamo magahukom sa kalibotan, kamo ba dili angayan nga mohusay sa gagmay kaayong mga butang? 3 Wala ba kamo mahibalo nga kita magahukom unya sa mga manulonda? Nan, nganong dili man sa mga butang niining kinabuhia? 4 Nan, kon kamo adunay mga butang niining kinabuhia nga pagahusayon, ang mga tawo ba nga gipakaubos diha sa kongregasyon ang ipahimutang ninyo ingong mga maghuhukom? 5 Ako nagasulti aron kamo mobatig kaulaw. Tinuod ba nga walay usa ka tawong maalamon taliwala ninyo nga makahimo sa paghukom tali sa iyang mga igsoon, 6 nga ang igsoon makigburoka batok sa igsoon, ug atubangan pa sa mga dili-magtutuo? 7 Nan, sa pagkatinuod kini nagkahulogan ug bug-os nga kaparotan alang kaninyo nga kamo nagkinihaay sa usag usa. Nganong dili hinuon ninyo tugotan nga kamo mabuhatan ug sayop? Nganong dili hinuon ninyo pasagdan nga kamo matikasan? 8 Sa kasukwahi, kamo nagabuhat ug sayop ug nagapanikas, ug sa inyong mga igsoon pa gayod. 9 Unsa! Wala ba kamo mahibalo nga ang mga tawong dili-matarong dili makapanunod sa gingharian sa Diyos? Ayaw pagpahisalaag. Walay mga makihilawason, ni mga tigsimbag idolo, ni mga mananapaw, ni mga lalaking gihuptan alang sa dili-kinaiyanhong mga katuyoan, ni mga lalaking makigdulog sa mga lalaki, 10 ni mga kawatan, ni mga tawong dalo, ni mga palahubog, ni mga tigsultig pasipala, ni mga mangingilkil nga makapanunod sa gingharian sa Diyos. 11 Ug gani ingon niana ang pipila kaninyo kaniadto. Apan kamo nahugasan na, apan kamo nabalaan na, apan kamo napahayag na nga matarong sa ngalan sa atong Ginoong Jesu-Kristo ug sa espiritu sa atong Diyos. 12 Alang kanako ang tanang butang subay sa balaod; apan dili ang tanang butang may kaayohan. Alang kanako ang tanang butang subay sa balaod; apan dili ko itugot nga ako mailalom sa awtoridad sa bisan unsang butang. 13 Ang mga pagkaon para sa tiyan, ug ang tiyan para sa mga pagkaon; apan hanawon sa Diyos kining duha. Karon ang lawas dili alang sa pakighilawas, kondili alang sa Ginoo; ug ang Ginoo alang sa lawas. 14 Apan ang Diyos nagbangon sa Ginoo ug magbangon kanato gikan sa kamatayon pinaagi sa iyang gahom.