Salig nga Maluwas Ta Dihang Taposon Kining Sistemaha

Ang pailob ni Jehova niining kalibotana hapit na gyong matapos. Laglagon ang bakak nga relihiyon, atakehon sa alyansa sa kanasoran ang katawhan sa Diyos, ug laglagon ni Jehova ang mga daotan panahon sa Armagedon. Ang mga Kristohanon naghinamhinam niining kulbahinam nga mga panghitabo.

Siyempre, wala ta mahibalo sa tanang detalye bahin sa dakong kasakitan. Pananglitan, wala ta mahibalo sa eksaktong panahon nga kini magsugod. Wala ta mahibalo sa mga rason kon nganong atakehon sa gobyerno ang relihiyon. Wala ta mahibalo kon unsa ka dugay ang pag-atake sa kanasoran batok sa katawhan sa Diyos o kon unsaon ta nila pag-atake. Wala pod ta mahibalo kon unsa gyoy gamiton ni Jehova sa paglaglag sa mga daotan panahon sa Armagedon.

Pero ang Bibliya naghatag sa tanang impormasyon nga atong gikinahanglan aron maatubang nato ang umaabot nga mga panghitabo nga may pagsalig ug kaisog. Pananglitan, nahibalo ta nga nagkinabuhi na ta sa kataposan sa “kataposang mga adlaw.” (2Ti 3:1) Nahibalo ta nga “pamub-on” ang pag-atake batok sa relihiyon aron dili malaglag ang matuod nga relihiyon. (Mat 24:22) Nahibalo ta nga luwason ni Jehova ang iyang katawhan. (2Pe 2:9) Ug nahibalo ta nga ang gipili ni Jehova sa paglaglag sa mga daotan ug sa pagluwas sa dakong panon panahon sa Armagedon maoy matarong ug gamhanan.​—Pin 19:11, 15, 16.

Seguradong ang mga tawo ‘panguyapan sa kahadlok’ tungod niini nga mga panghitabo. Pero pinaagi sa pagbasa ug pagpamalandong kon giunsa pagluwas ni Jehova ang iyang katawhan kaniadto ug sa iyang giingon bahin sa umaabot, ‘makatindog ta nga tul-id ug naghangad sa atong mga ulo,’ kay may pagsalig ta nga duol na ang atong kaluwasan.​—Luc 21:26, 28.