Katibuk-ang Larawan sa Sierra Leone ug Guinea

Yuta Ang duha ka nasod dunay mga katunggan, patag nga kasagbotan, kaumahan sa bukid, ug habog nga kabukiran. Ang Guinea mao ang tinubdan sa tulo ka dagkong suba sa West Africa​—ang Gambia, Niger, ug Senegal.

Katawhan Ang Mende ug Temne mao ang labing dagko sa 18 ka tribo sa Sierra Leone. Ang Krio​—kaliwat sa gipagawas nga Aprikanong mga ulipon—namuyo sa Freetown. Ang Guinea dunay kapig 30 ka tribo, nga ang dagko mao ang Fulani, Mandingo, ug Susu.a

Relihiyon Mga 60 porsiyento sa taga-Sierra Leone maoy Muslim; ang uban nag-angkong Kristohanon. Mga 90 porsiyento sa taga-Guinea maoy Muslim. Kadaghanan niining duha ka nasod nagsunod gihapon sa tradisyonal nga mga relihiyon sa Africa.

Pinulongan Matag tribo dunay kaugalingong pinulongan. Ang komong pinulongan sa Sierra Leone mao ang Krio—kombinasyon sa Iningles ug sa mga pinulongan sa Europe ug Africa. French ang opisyal nga pinulongan sa Guinea. Mga 60 porsiyento sa katawhan sa matag nasod dili antigong mobasa ug mosulat.

Panginabuhi Ang kadaghanan mag-uuma. Halos katunga sa kita sa eksportasyon sa Sierra Leone naggikan sa diamante. Naa sa Guinea ang usa sa dagko kaayong pondo sa mineral nga bauxite sa kalibotan.

Pagkaon Humay ang popular nga pagkaon. Ang fufu, linung-ag ug dinugmok nga balanghoy, sagad parisag karne, okra, ug aslom nga sarsa.

Klima Init ug igang sa baybay. Mas bugnaw sa bukid. Sa ting-init, ang harmattan, makapagbang hangin gikan sa Sahara, mohuros sa daghang adlaw, nga makapaubos sa temperatura ug ang rehiyon mapunog abog.