Gipriso Tungod sa Ilang Relihiyon—Ukraine

Sulod sa halos 30 ka tuig, ang mga Saksi ni Jehova sa Ukraine nakabenepisyo sa balaod nga naghatag ug katungod niadtong midumili sa pagsundalo tungod sa konsensiya nga mohimog alternatibong serbisyo para sa komunidad o alternative civilian service. Pinaagi niini, sila makapakigbahin sa lainlaing matang sa serbisyo publiko ug sa samang higayon dili nila malapas ang ilang baroganan.

Pero dihang nagsugod ang gubat sa Ukraine niadtong Pebrero 24, 2022, nakita nga walay legal nga sistema para sa alternative civilian service sa panahon nga mangandam ang nasod para sa gubat. Tungod niini, gatosan ang gikasohan kay midumili sila sa pagsundalo tungod sa ilang konsensiya. Kini nagbalewala sa ilang tinuohan nga nagpalihok nila nga dili ikompromiso ang ilang baroganan. Ug wala pod ni magtahod sa ilang katungod nga himoon kon unsay gitugot sa ilang konsensiya. Supak ni sa mga prinsipyo sa tawhanong katungod ug sa Konstitusyon sa Ukraine, nga nag-ingon: “Kon ang pagsundalo supak sa relihiyosong tinuohan sa usa ka lungsoranon, angay ning pulihan ug alternative (nonmilitary) service.”

Niadtong Hunyo 17, 2025, lima na ka Saksing lalaki ang napriso kay midumili sa pagsundalo tungod sa ilang konsensiya ug nagsilbi na sa ilang sentensiya nga 36 ka bulan. Tulo pa ka Saksing lalaki ang naa pa sa pretrial detention, nga nagpaabot sa ilang sentensiya.

Mga Gikabalak-an sa Internasyonal nga mga Organisasyon

Bahin niini nga kahimtang, gikuwestiyon sa tulo ka UN Special Rapporteur ang Ukraine kay wala ni alternative civilian service. Sa ilang pagpakig-estorya sa gobyerno sa Ukraine niadtong Nobyembre 8, 2023, sila miingon: “Nabalaka pod mi nga gikasohan ang mga tawo nga midumili sa pinugos nga pagserbisyo sa militar tungod sa ilang konsensiya, apil ang mga misuportar alang sa katungod sa pagdumili sa pagsundalo tungod sa konsensiya.”

Time Line

1. Hunyo 17, 2025

   Tanantanan, walo ka Saksi ang napriso.

2. Pebrero 24, 2022

   Gideklarar ang martial law, ug gisugdan ang pagpangandam para sa gubat.

3. Hunyo 23, 2015

   Sa kaso ni Vitaliy Shalaiko, giila sa High Court of Ukraine ang katungod sa pagdumili sa pagsundalo tungod sa konsensiya panahon sa pagpangandam sa nasod para sa gubat.

4. Disyembre 1991

   Giimplementar ang Law on Alternative (Nonmilitary) Service.

5. Pebrero 28, 1991

   Opisyal nga narehistro ang mga Saksi ni Jehova sa Ukraine.