Ang Bukas nga Hunahuna Makadani sa Pag-uyon sa Diyos

ANG bili sa pagbaton ug bukas nga hunahuna aron makadani sa pag-uyon sa Diyos gipakita sa mga pulong nga gitala sa Efeso 5:10, 17. Didto atong mabasa: “Paninguhaa ang pagsusi kon unsa ang pagakahimut-an sa Ginoo. Tungod niini hunong na sa pagkahimong di-makataronganon, kondili sabta hinuon kon unsa ang kabubut-on ni Jehova.”

Apan dili ba tinuod nga daghang tawo ang may siradong hunahuna kon bahin na sa relihiyon? Isalikway ngani sa uban ang ideya sa usa ka Supremong Persona ug dili-andam sa pagpamati sa ebidensiya sa iyang paglungtad nga ipadayag sa mga magtutuo. Usa ka siradong ulohan alang kanila ang relihiyon.

Bisan ang ubang relihiyosong mga tawo siradog hunahuna. Interesado lamang sila sa “ilang” relihiyon, dili andam sa pagpaminaw sa mga panghunahuna sa uban. Ug bisag dili sila ang nagpili sa ilang relihiyon kondili napanunod lamang kini sa ilang mga ginikanan, sa gihapon bation nilang husto ang ilang relihiyon. Apan dili tanang panulondon maayo. Ang pagkamasuk-anon, ang hakog nga tinamdan o ang malimbongong espiritu mahimong mapanunod usab gikan sa mga ginikanan, apan sa tino dili kini sila tilinguhaon.

Ang makapahimo sa relihiyon nga husto mao ang bug-os nga pagsunod niini sa Pulong sa Diyos. Kon nakab-ot o wala kining maong sukdanan mahibaloan lamang pinaagi sa bukas nga hunahunang pagtandi niini diha sa Bibliya. Sa pagkamatuod ang usa ka importanteng butang sama sa atong pagsimba dili angay ipasukad kon diing dapita kita mahimugso. Gawas pa walay mahimo niining bahina ang bata nga matawo gikan sa Katolikong mga ginikanan sama nga walay mahimo ang bata nga matawo gikan sa usa ka Muslim nga ginikanan.

Likayi ang Relihiyosong Pagpihig

Kon atubangon ang mga tawo uban sa relihiyosong balita, moreaksiyon sila sa nagkalainlaing paagi. Ang uban moingon: “Imposibleng makita ang bug-os nga kamatuoran”; “ang tanang relihiyon interesado lamang sa imong salapi”; “gipanghimakak sa siyensiya ang relihiyon”; “sungkod lamang ang relihiyon sa mahuyang nga mga tawo.” Kining mga panglantawa, ug ang uban nga sama kanila, nagasira sa hunahuna ug nagaputol sa pag-usisa bisag wala pa gani makasugod. Pagpihig kini nga nagalihok.

Ngani, ilado ang ubang mga tawo nga magduhaduha sa pagkatinuod sa balita tungod lamang sa gigikanan sa tigdala sa balita. Tagda, pananglitan, ang usa ka hitabo sa unang siglo K.P. Ang Juan 1:45, 46 nagsugilon kanato: “Gikahibalag ni Felipe si Natanael ug siya miingon kaniya: ‘Among gikahibalag siya nga mahitungod kaniya si Moises diha sa Kasugoan, ug usab ang mga Propeta nanagsulat, mahitungod kang Jesus nga anak ni Jose, nga gikan sa Nazaret.’ Apan si Natanael nangutana kaniya: ‘Aduna ba guy maayong butang gikan sa Nazaret?’ Si Felipe mitubag kaniya: ‘Umari ka ug tan-awa.’” Sa dayag giawhag ni Felipe si Natanael sa paghupot ug bukas nga hunahuna.

Managsamang mga butang ang nahitabo karon. Kon mosangyaw ang mga misyonaryo sa mga Saksi ni Jehova sa langyawng kanasoran, makaeksperyensiya silag pagkasinalikway, bisan pag pinasukad sa Bibliya ang ilang balita, tungod lamang sa ilang nasyonalidad. Nagsunod sa panig-ingnan ni Natanael sa karaan, tingali mangutana ang ubang tawo: “Aduna ba guy maayong butang gikan sa Amerika?”

Tingali dili modawat ang uban sa balita tungod kay gipahayag kini sa yanong paagi sa usa ka tawong yanog kagikan. Apan maalamon ba kini? Mahitungod sa mga membro sa unang Kristohanong kongregasyon, atong mabasa: “Sa dihang nakakita ang Konselyo [Hudiyohanong Sanhedrin] sa kaisog ni Pedro ug Juan, ug nakakita nga sila walay edukasyon ug walay propesyon, sila nahibulong ug ilang naila nga kini sila mao ang nagpakig-uban kang Jesus!”—Buhat 4:13, The Living Bible.

Oo, ang “walay edukasyon ug walay propesyon” makahimog katingalahang mga butang kon bansayon sa mga pulong sa Diyos. Busa ayaw siradoa ang inyong hunahuna gumikan sa ilang pagkakulang sa naandang teolohikal nga pagbansay o propesyonalismo; pasagdi kining bukas sa pag-usisa sa balita nga ilang ginadala.

Kon Unsaon sa Pagkaplag Relihiyosong Kamatuoran

Ang usa ka bukas nga hunahuna andam sa pagbuhat sumala sa gisugyot sa 1 Juan 4:1. Kini nag-ingon: “Mga hinigugma, ayaw ninyo pagtuohi ang tanang dinasig nga mga pulong, hinunoa sulayi ninyo ang dinasig nga mga pulong sa pagsuta kon sila ba iya sa Diyos, kay daghan ang mga mini nga propeta nga nanagpanungha sa kalibotan.” Apan tungod sa libolibong nagkalainlaing relihiyosong mga grupo ug mga sekta nga naglungtad karon, posible bang masuta kon unsa ang tinuod? Oo, dili lamang posible apan dili usab lisod kay sa inyong gihunahuna. Pananglitan:

Ang ubang mga relihiyon nagtudlo nga sa dili madugay ang atong literal nga yuta pagasunogon. Tingali mokutlo sila sa 2 Pedro 3:7 ingong ebidensiya: “Apan pinaagi sa mao ra usab nga pulong ang mga langit ug ang yuta nga karon nagalungtad gitagana alang sa kalayo ug ginatipigan alang sa adlaw sa paghukom ug sa kalaglagan sa mga tawong dili diyosnon.”

Apan nag-ingon ba gayod kining tekstoha nga sunogon ang literal nga yuta? Sa pagkatinuod, naghisgot lamang kini sa “kalaglagan sa mga tawong dili diyosnon.” Sa nag-unang mga bersikulo, sa 5 ug 6, gipakasama kini sa panahon sa lunop ni Noe sa dihang “ang kalibotan nianang panahona nag-antos sa kalaglagan sa gipalunopan kini sa tubig.”

Karon unsa sa aktuwal ang nangawagtang sa Lunop? Ang Genesis 7:23 nagtubag: “Busa iyang gilaglag ang tanang butang nga may kinabuhi sa ibabaw sa nawong sa yuta, gikan sa tawo hangtod sa kahayopan, . . . sila gilaglag gikan sa yuta.” Sa makataronganon, sa dihang “gilaglag gikan sa yuta,” ang mga tawong daotan, ang literal nga yuta nagpabilin.

Kaharmoniya kini sa Ecclesiastes 1:4, diin nagpahibalo kanato nga “usa ka kaliwatan moagi, ug ang lain nga kaliwatan moabot; apan ang yuta mopabilin sa walay kataposan.” Ngani mas puwersado pa ang Salmo 104:5: “Siya ang nagpahaluna sa mga patukoranan sa yuta; dili gayod kini matarog sa walay kataposan.”

Human sa pagtandi niining mga tekstoha, ang usa ka bukas nga hunahuna motuo nga ang tanang relihiyon nga nagtudlo sa literal nga kalaglagan sa yuta nagatudlog kabakakan. Nan dili ba tinuod nga relihiyon, ang nagrepresentar kang Jehova nga Diyos, ang Diyos sa kamatuoran? Oo unsay ikasulti kon nagatudlo usab kinig ubang mga doktrina nga sayop?a Pinaagi sa sistema sa pagkuha, atong mahagpat dayon ang bakak nga relihiyon.

“Magmakataronganon sa Hunahuna”

Ang tambag ni apostol Pedro nga “magmakataronganon sa hunahuna” naglakip, nga hinungdanon, sa paghupot ug bukas nga hunahuna, kay ang bukas nga hunahuna lamang ang makakab-ot ug makataronganong mga konklusyon ug makahimog makataronganong mga paghukom. Bukas ug hunahuna ang ubang pomuluyo sa Berea, tungod kay bahin kanila atong mabasa nga “ilang gidawat ang pulong uban sa bug-os nga kaikag sa hunahuna, nga mainampingong nagasusi sa Kasulatan sa adlaw-adlaw, sa pagsuta kon tinuod ba gayod kining mga butanga.”—1 Pedro 4:7; Buhat 17:11.

Ang usa ka bukas nga hunahuna, nga libre sa pagpihig, makatabang kanato sa pagpadayon sa “mainampingong pagsusi sa Kasulatan sa adlaw-adlaw” ug sa paglihok sumala sa atong makat-onan. Kaharmoniya kini sa tambag sa Bibliya sa “pagtuman sa pulong, ug dili kay mga tigpaminaw lamang.” Dili lamang mga tigpaminaw ang taga Berea, tungod kay ang Buhat 17:12 nagpahibalo kanato nga “daghan kanila nahimong mga magtutuo.”—Santiago 1:22; tan-awa usab ang Mateo 7:21.

Oo, ang paghupot ug bukas nga hunahuna adunay daghang balos. Ang paggamit niini aron matabangan kita nga makakaplag sa tinuod nga relihiyon makapatugob sa atong presenteng kinabuhi, makapauswag sa atong espirituwal nga panglawas ug makatabang kanato sa pagsulbad sa mga suliran sa kinabuhi. Apan, labaw sa tanan, makatabang usab kini kanato sa pagdani sa pag-uyon sa Diyos, busa motultol kanato diha sa dalan sa pagkadawat ug kinabuhing walay kataposan diha sa iyang bag-ong sistema.—Tan-awa ang Marcos 10:29, 30.

Sa literal gatosgatos ka libong tawo nga nagpuyo sa tibuok globo malipayon nga nakabaton ug bukas nga hunahuna nga igong makasusi sa balita sa Bibliya. Pinaagi sa paghupot ug bukas nga hunahuna bahin sa relihiyon ilang nakita ang katingalahang palaabutong kinabuhing walay kataposan diha sa usa ka paraisong yuta nga gibuksan alang kanila. Malipay ka ba sa maong palaabuton alang kanimo?

Aduna ka bay bukas nga hunahuna sa pag-usisa? Kini maoy alang sa imong walay kataposang kaayohan kon bukas kag hunahuna.

[Footnote]

[Letrato sa panid 10]

Isalikway ba nimo ang balita tungod sa napormang daang mga ideya? O mosusi ka ba?

[Letrato sa panid 11]

Ang usa ka bukas nga hunahuna motultol kanimo sa dalan sa kinahuhing walay kataposan diha sa Paraiso