Ang Paglakaw Miagpas sa Pagdagan

“Ang paglakaw . . . nahimong popular nga nakakuha kini sa iyang kusog gikan sa pagdiskobre pag-usab sa mga hiyas sa paglakaw nga . . . makahatag maayong panglawas.” Matud pa sa pulyetong Walking for Exercise and Pleasure, sa United States President’s Council and Physical Fitness and Sports.

Ang makakabig nga lista sa pisikal nga mga kaayohan nagpasiugda nianang pulonga. Lakip kanila: mapauswag ang kunsomo sa oksihino sa panahon sa pagpaugnat, moubos ang pinitik sa kasingkasing nga nagpahulay, mous-us ang presyon sa dugo, ug mouswag ang maayong pag-obra sa kasingkasing ug sa baga. Siempre, dili kini makab-ot pinaagi sa paglakawlakaw, sa pagpupasiyo lamang, matud pa sa pulyeto, kondili pinaagi sa paglakaw nga may “igong kabaskog nga makapakusog sa pinitik sa kasingkasing, ug makapaginhawa kanimog lawom.”

Katingalahan, ang mabaskog nga paglakaw makasunog ug sama ka daghanang kaloriya nga mahimo sa pagdagan. Sa gisusi ang 24 ka himsog nga mga lalaking estudyante sa nagamit nga kusog samtang naglakaw, nag-jogging, ug nagdagan sa nagkalainlaing gikusgon, nakita sa pagsusi nga ang “pagjogging ug usa ka milya sa 8 1/2 minuto makasunog lamag kapin sa 26 ka kaloriya kay sa paglakaw ug usa ka milya sa 12 minutos.” Ang paglakawg 5 ka milya sa usa ka oras makagamit ug 124 ka kaloriya sa usa ka milya, samtang ang pagdagan ug 9 milya sa usa ka oras makasunog lamag kapin sa 40 ka kaloriya.

Ang ubang kaayohan sa paglakaw naglakip sa mosunod: Walay gasto ang gikinahanglan alang sa espesyal nga kasangkapan (gawas sa maayong paresang sapatos), dili kinahanglang magpakondisyong daan sa lawas, ug halos libre sa pagkasamad ang paglakaw. Tingali mouyon ka sa panultihon sa pulyeto: “Paglakaw: Ang Mas Hinay, Mas Seguradong Paagi sa Kapiskay sa Panglawas.”