Nagduhaduha Ka ba sa Paglungtad sa Diyos? Nasayod Ka ba Ngano?
MOTUBAG ang pipila pinaagi sa maduhaduhaong pagpakibo sa abaga. Ang uban, pinaagi sa prangkang dili pagtuo. Kana ang pagsanong sa daghan karong adlawa sa pangutana bahin sa paglungtad sa Diyos. Usa ka ba kanila? Kon mao, dili katingalahan, kay ang gidaghanon sa katawhang nagaduhaduha sa paglungtad sa Diyos nagdaghan.
Kon Nganong Sila Dili Motuog Diyos
Misaysay ang usa ka Alemang babaye sa iyang kahimtang: “Ang akong mga ginikanan walay pagtuo sa Diyos ug dili relihiyoso, mao nga ako nagtubo nga walay relihiyon ug Diyos. Ako mopahiyom inighisgot sa relihiyon, ug wala ko hisabti nganong ang pila ka tawo nagtuo sa Diyos. Sa samang panahon, dili ako makahatag ug tinuod nga katarongan nganong dili ako makatuo.”
Ang usa ka 32-anyos nga Belgian, sa pagsaysay sa iyang kawalay pagtuo, miingon: “Bisan sa nagtungha pa ako, ako gidasig sa akong mga ginikanan sa pagpanapi ug pagpaningkamot alang sa materyal nga mga butang. Ang materyalistikanhong mga hunahuna nagpuli sa mga hunahuna sa relihiyon ug sa pagtuo.”
Nagduhaduha ka ba sa paglungtad sa Diyos? Nasayod ka ba ngano? Mahimo kahang yano kang nagapaanod sa panon? Kon mao, tinuod ka bang nasinati sa “mga pamatuod” nga ginahatag sa panon? Ikaw ba, sa bug-os nga pagkamatinud-anon ug kaugdang, nagpailalom sa ilang katin-awan sa usa ka pagtigi sa pagkakasaligan niini?
Ang Panginahanglan sa Makapatagbawng mga Tubag
Ang pagkab-ot ug tino nga konklusyon bahin sa paglungtad sa Diyos maoy butang nga dili lamang labot sa paghukom kon kinsa ang husto ug kon kinsa ang sayop. Kini usa ka paghukom nga mahimong dunay dakong epekto diha sa kinabuhi sa usa ka tawo. Kini pasukaranang butang sa atong pagkaplag sa makapatagbawng mga tubag sa mga pangutana mahitungod sa kahulogan sa kinabuhi.
Atong susihon ang duha ka “mga pamatuod” nga subsob ipresentar sa mga tawo sa pagsaysay sa dili nila pagtuo sa paglungtad sa Diyos.
“Ako motuo lamang sa akong makita, ug wala gayod ako makakita sa Diyos”
Sa sinugdan sa panahon sa kawanangan, kapig kawhaan ka tuig nga miagi, ang The New York Times mitaho nga ang mosunod nga pahayag gihimo sa usa ka programa sa radyo sa Moscow: “Ang kamatuorang ang mga satelayt ug mga roket wala makatiktik sa Labing Hataas, sa mga anghel ug uban pa, nagapamatuod batok sa relihiyosong mga pagtuo ug nagapalig-on sa dili pagtuo sa Diyos.”
Giisip mo ba nga kini pamatuod? Kon mao, andam ka bang modawat sa tanang sangpotanan nga malangkit nianang pangatarongana?
Ang distansiya nga makadungog ug makakita ang tawo napaabot sa halayo ngadto sa uniberso pinaagi sa higanteng mga teleskopyo. Atong ikunhod kini ngadto sa hisabtang mga sukod. Pananglitan nga ang yuta ingon ka dako sa mansanas. Sa maong sukod, ang makita nga uniberso maoy 2.9 libong milyong milya (4.7 libong milyong kilometros) sa diametro. Ug unsa ka layo ang naabot sa may-tawo ug walay-tawong mga pagsusi ug mga salakwanang gikan sa maong “mansanas”? Sila nakapalayo apan sa sulod pa sa kahon sa mansanas!
Gawas pa, bisan unsa tingali ka layo ang mga salakwanang mangahas sa pag-adto sa kawanangan, ang mga tawo dili gayod makadahom nga makakita sa Diyos, pinaagi kaha sa ilang literal nga mga mata o pinaagig ginamag-tawong mga kamera. Sila nagapamulong nga daw ang Diyos usa ka tawo, nga may unod ug dugo, apan ang Bibliya nagaingon, “Ang Diyos maoy usa ka Espiritu.”—Juan 4:24.
Sa pagkamatuod, ang mga butang gipahinabo sa mga puwersang dili makita sa mata sa tawo nagakahitabo alirong kanato sa tanang panahon. Samtang nagapalandong ka karon sa imong ginabasa, ang komplikadong mga palakaw sa hunahuna nagakahitabo diha sa kapin sa 10,000,000,000 ka selula sa nerbiyos sa imong utok. Ang modernong teknolohiya makasukod sa mga balod sa utok, nga makapresentar pa niana alang sa tawhanong mata pinaagi sa mga hulagway diha sa eskren o sa papel. Apan KON UNSA ang imong gihunahuna dili makita. Ang matag pulong imong isulti, matang tinuyong lihok nga imong himoon, mao ang resulta sa usa ka palakaw nga dili makita sa tawhanong mata. Pinasukad sa maong pinaniiran, unsa unya ang makataronganong mga sangpotanan sa pagsunod sa prinsipyo: “Ako motuo lamang sa akong makita”?
Apan daghan ang nag-ingon sa mosunod:
“Ang tanang butang milungtad nga sulagma, nga dili pinaagi sa Diyos”
Ang Schweizerische Akademiker- und Studentenzeitung (Swisong Akademiko ug Estudyanteng Mantalaan) nasudlan sa mopukaw-sa-hunahunang artikulo nga naghisgot sa teoriya sa ebolusyon. Ilalom sa ulohang “Ang Kahusay Motungha ba nga Sulagma?” kini miingon: “Ang pag-areglar sa usa ka librarya o koleksiyon sa prangkiyo sa mahusay nga paagi nagkinahanglag usa ka plano, usa ka sukod sa intelihensiya, ug sa tinong pagbudlay. Kon yano natong itugpo ang tanang butang nganha sa kuwarto nga piniyong ang atong mga mata, nga maglaom nga ‘mahikay ang tanang butang’ sa sulagma alang kanato, sa dili madugay atong masayrang kini dili mao ang paagi sa pagtungha sa kahusay. Ngani, kon wala ang atong kanunay nga pagtagad, ang mga butang daling magkalamukat na usab, sama sa dihang kuhaon ug ibalik kana sa kabataan sa sayop nga mga lugar, o dihang ang kalit nga huros sa hangin ‘magahikay’ sa atong koleksiyon sa prangkiyo. Ang matag-adlaw nga kasinatian nagatudlo kanato nga ang kahusay dili motunghang sulagma. . . . Sa laing bahin, atong hisabtang nag-obra ang intelihensiya gikan sa paglungtad sa kahusay. Pananglitan, ang usa ka maayong-pagkaareglar nga librarya nagapamatuod sa usa ka maayong libraryan. Sa prinsipyo, ang samang butang mapadapat sa tanang matang sa kahusay.”
Ingong pananglitan, palandonga ang utok. Hunahunaa ang katingalahang mga butang mahimo sa utok sa tawo kon bahin sa pinulongan. Sa tabang sa 20 ngadto 30 lamang ka nagkalainlaing letra (nga gikan niana nalangkoban ang kadaghanang dili-hulagway nga mga alpabeto), ang atong utok takos sa pagpormag dili-matapos nga gidaghanon sa mga pulong ug mga ekspresyon ug sa pagsabot sa nagkadaiyang mga hunahuna nga buot ipasa niana. Ang pila ka pinulongan dunay ginatos ka libong pulong. Dugang pa, ang bag-ong mga pulong ug mga kombinasyon sa pulong kanunay ginaporma. Kining tanan pinaagi lamang niining pipila ka letra sa alpabeto. Ang usa ka utok nga nabansay sa mga obra sa musikal nga komposisyon makabuhat sa susamang butang. Kinsay makaihap sa gidaghanon sa nagkadaiyang mga honi nga gikomposo gikan sa pito ra ka pangunang tono sa musikal nga alpabeto?
Bahin sa ubang kahibulongang mga obra sa utok sa tawo, ang usa ka basahong reperensiya nagapamulong nga kini may “10 bilyong selula sa nerbiyos, nga ang bisan hain niana tingali makonektar sa abot sa 25,000 ka ubang selula sa nerbiyos. Ang gidaghanon sa mga interkoneksiyon nga aboton niini makapalipong sa usa ka astronomo—ug ang mga astronomo naanad na sa pagsagubang sa dagko kaayong mga numero.” Ang Alemang basahong Architektur der Schöpfung (Arkitektura sa Kalalangan) nagdugang: “Ang mga tigdukiduki sa katakos sa utok sa tawo nagpanig-ingon niini ngadto sa kalihokan sa libolibong sentro sa telepono sa dakong siyudad nga nagbuhat sa kinalabwang katakos. . . . Gibanabanang sa lakaw sa tibuok kinabuhi nga 70 anyos ang memorya sa tawo makapondog abot sa 15,000,000,000,000 ka indibiduwal nga kasinatian.”
Kini bang mga kamatuorana uyon sa pangangkon nga “ang tanang butang mitungha nga sulagma, nga dili pinaagi sa Diyos”? O sila ba mas mohaom sa Biblikanhong pangatarongan nga “ang matag balay may nagtukod, apan siya nga nagtukod sa tanang butang mao ang Diyos”?—Hebreohanon 3:4.
Ang Kaalam sa Pagkab-ot sa Usa ka Hukom
Sa 1981 si Hans-Jochen Vogel, ang lider nga oposisyonista sa parliamento sa Pederal nga Republika sa Alemanya, miingon: “Sa akong hunahuna mas daghan ug mas daghang tawo ang nangahadlok nga ang mga kahimtang karon basin kalit mograbe pa, oo, nga bisan ang mga katalagman nga sa nangagi wala hisayri kon unsa ka dagko dili na imposible. Ug daghan ang nagaisip nga ang pagbag-o sa mga kahimtang sa maong direksiyon dili kapugngan ug dili kalikayan sama sa usa ka kalumpagan nga nagsugod na ug nagkatulin sa pagdahili niini ngadto sa walog.” Kana ba lamang ang imong umaabot?
Ang katawhang kombinsido sa paglungtad sa Diyos, ug kinsa nagatuon nga mainampingon sa iyang Pulong, nakabig nga ang Diyos nagaimpluwensiya sa mga butang sa positibong paagi. Nga gipasukad sa Bibliya, ilang nakita ang masanagon kaayong umaabot alang sa matinuohong katawhan, bisan pa sa mga kahimtang sa kalibotan karon.
Tungod sa ipasabot niini sa imong kaugalingong kinabuhi, kon nagduhaduha ka sa paglungtad sa Diyos, dasigon ka namo sa pagpangutana sa imong kaugalingon, ‘Unsa ba ang akong mga katarongan?’ Sulayi ang pagsulat niana. Pila na ba ang imong katarongan? Makapatagbaw ba kana sila?
Dili ba kaha panahon na karon sa pagsugod sa pagpalandong sa balit-ad nga pangutana: Unsa ang pamatuod nga adunay Diyos?
[Blurb sa panid 9]
“Ako motuo lamang sa akong makita, ug wala gayod ako makakita sa Diyos”
[Blurb sa panid 10]
“Ang tanang butang milungtad nga sulagma, nga dili pinaagi sa Diyos”
[Mga Letrato sa panid 11]
Ang kahusay nagkinahanglag intelihensiya, sama sa ginapakita sa sistematikanhong pagkaareglar nga librarya
Hunahunaa ang klaseklaseng honi nga imong makomposo gikan sa pila ra ka paninugdang nota