Mga Batan-on Nangutana . . .
Nganong Pagabasahon ang Bibliya?
‘Ang usa lamang ka panday, si Jesus nga taga-Nazaret, nakapagubot sa kalibotan tungod sa iyang mensahe!’ mipatugbaw ang propesor. Wala, siya wala magtudlo sa Bibliya kondili nagtandi niana sa usa ka basahong gitawag Don Quixote. Si Aaron (20 anyos), hinunoa, namati pag-ayo. Kay ang maong propesor, bisan tuod dili relihiyoso, nagpabili sa Bibliya ingong basahon—sumala pa niya, usa ka basahong ‘angay pagabasahon sa matag edukadong lalaki ug babaye.’
ANG Bibliya tinuod bang makapaedukar sa usa ka tawo? Ug unsay nakapabililhon pag-ayo sa mensahe sa usa ka panday? Buot ni Aaron nga hisayran kana, busa mihukom siya sa pagbasa sa Bibliya.
Si George (12 anyos) nakakita sa usa ka kinutlo sa Bibliya: “Hinumdomi, karon, ang imong Dakong Maglalalang sa mga adlaw sa imong pagkabatan-on.” (Ecclesiastes 12:1) Busa iyang gisukna ang iyang kaugalingon: ‘Sa unsang paagi akong mahinumdoman ang Maglalalang kon wala ako makaila kaniya sa unang bahin?’ Siya, usab, nakasabot nga kinahanglang basahon ang Bibliya.
Si Kelvin (21 anyos) maoy usa sa mga Saksi ni Jehova ug regular nga nagaapil sa balay-balay nga pagsangyaw. Siya nagakalipay sa pagsulti sa uban kon unsay iyang nakat-onan bahin sa Bibliya. Hinuon, iyang nasayran nga ang pipila sa katawhang iyang nahibalag nakabasa na sa mga bahin sa Bibliya. Ug kay si Kelvin buot nga makabatog intelihenteng mga pakigkabildo uban kanila, siya nangandam sa iyang kaugalingon pinaagig makugihong pagtuon sa Bibliya. Sa iyang mga pulong, “Kinahanglang imong basahon ang imong Bibliya aron mahibalo ka kon unsay imong ginasulti.”
Si Aaron, George, ug Kelvin nahimong seryosong mga estudyante sa Bibliya. Apan komosta ka man? Dili ba angay nga ikaw, usab, mobasa sa Bibliya? Sama sa daghang batan-on, basin motubag ka:
‘Dili ba Makapuol ang Bibliya?’
Ang pipila mibati niana. Apan sa pagkamatuod, wala sila masayod kon unsay ilang nasayloan. Ang Bibliya maoy pagpadayag sa Diyos sa tawo. Kini nagasugid kanato sa unsang paagi kita nakaabot dinhi ug kon asa kita nagapaingon. Sa unsang paagi kana makapuol?
Matuod, ang pipila ka bahin mopatim-aw nga mas tulin kay sa uban. Si David (19 anyos) miingon: “Sa mga basahon sa Bibliya nga Numeros ug Deuteronomio, adunay pipila ka hitabo, apan kadaghanan anaa ang mga kasugoan ug ang mga katarongan sa mga kasugoan. Dili ingon nga kini sila makapuol, apan sa Josue, ang sunod nga basahon, anaa ang mas daghang hitabo; mahiapil ka sa mga esena. Gikan sa Josue paunahan, kini matulin gayod.” Sa mipadayon si David sa iyang pagbasa, hinunoa, ang iyang hunahuna sa giingong hinay nga mga bahin sa Bibliya lagmit mausab. Ngano man? Palandonga ang kaugalingon nimong kasinatian.
Nakatan-aw ka ba sukad ug pelikula nga imong unang nakita sa bata ka pa kaayo? Niadtong panahona, lagmit wala ka makasabot sa kadaghanan niana, ug ingong sangpotanan, pipila ra ka esena ang mipatim-awng makapaukyab. Apan karon nga ikaw dakodako na, labaw pa ang imong masabtan. Ang estorya magbatog labawng kahulogan, ug ang mga esena labi pang matulin. Ang susama mahitabo samtang mouswag ang imong pagsabot sa labing himalitang basahon sa kalibotan. (Hebreohanon 5:14) Sa matag panahong imong basahon kini, ang mga kasugoan ug ang mga katarongan sa mga kasugoan makabatog labawng kahulogan. Makabaton kag apresasyon sa mga detalye.
Apan nganong hinungdanon kaayo ang mga detalye? Aw, palandonga ang magsisibya sa radyo. Ang iyang trabaho mao ang paghimo sa usa ka dula sa basketbol kaha o besbol nga tinuod alang sa iyang mamiminaw. Ug unsaon niya pagbuhat kana? Iyang ihatag ang daghang detalye—giunsa pag-igo sa bola, ang distansiya, ang dula, mga eskor, estadistika, mga estorya bahin sa mga magdudula. Makapuol ba kana? Siyempre dili! Sa susama, ang Bibliya tugob sa mga detalye—mga talaan sa kaliwatan, mga numero, mga sukod, mga kasugoan. Kining mga detalyeha mohimo gayod sa asoy nga buhi!
Dugang pa, kining mga kasugoana nagapadayag sa personalidad sa Diyos. Sa Exodo 22:21, 22 ug Levitico 19:32, pananglitan, ang Diyos nagasugo nga dili palabilabihan ang mga balong babaye, mga ilo nga batang lalaki, ug mga tigulang. Oo, buot ni Jehova nga ang tanan pagatahoron, walay sapayan sa sekso o panuigon. Dili ba kana mopahinabo nga buot nimo siyang labaw pang hiilhan? Kini ang gibati sa usa ka dalagang si Georgie. Mahitungod sa iyang pagbasa sa Bibliya, siya miingon: “Kini mopasuod kanimo kang Jehova.”
Ikaw, usab, makadiskobre nga ang Pulong sa Diyos “buhi ug gamhanan.” (Hebreohanon 4:12) Sa unsang paagi?
Buhi ang Bibliya!
“Ang pagbasag Bibliya lahi sa pagpunit ug peryodiko o magasin,” miingon si Marvin (19 anyos). “Ang imong mga hunahuna kinahanglang ipunting sa imong ginabasa. Ang imong kaisipan dili mahimong magsalaag ug magpaanod-anod samtang paklion nimo ang mga panid. Kinahanglan ang bug-os nga pagsingkamot ang pagbasag Bibliya. Sulayan ko ang paghanduraw sa dapit nahitaboan ug ibutang ang akong kaugalingon dinha inigbasa ko sa pagbahin sa Pulang Dagat o pagbukas sa kalangitan ug pagsulti ni Jehova.”
Makahimo ka niini! Inigbasa nimo sa asoy ni Daniel diha sa langob sa leyon, ibutang ang imong kaugalingon didto! Handurawang ikaw nagainusara ug walay hinagiban sulod sa langob sa gigutom nga mga leyon! (Daniel 6:16-23) O unsay ikasulti sa asoy ni Rayna Ester? Ang iyang katawhan hapit nang mabiktima sa masa nga pagpatay. Pagkalisod nga kahimtang! Sa pagluwas kanila kinahanglang gamiton niya ang sunodsunod nga pagmaneobra nga magpameligro sa iyang kaugalingong kinabuhi ug magpaatubang kaniya sa kaaway. Bation ba nimo ang tensiyon?—Ester 3:6–5:4; 2:10; 8:3-6.
Aduna pay laing butang imong mahimo aron ang Bibliya mahimong mas makapaukyab ug makapadasig sa hunahuna. Inigbasa nimo, matikdi sa unsang paagi konektado ang nagkalainlaing bahin sa Bibliya. Pananglitan, unsay gipanaghiusahan sa mga asoy sa Daniel ug sa Ester? Ang duruha nagapamatuod sa kamatuoran sa Salmo 34:7: “Ang manulonda ni Jehova nagabantay sa palibot niadtong nahadlok kaniya, ug siya nagaluwas kanila.”
Ang laing tema nga nagakonektar sa nagkalainlaing bahin sa Bibliya mao ang Gingharian sa Diyos. Ang Daniel 2:44 nagaingon: “Ang Diyos sa langit magatukod sa usa ka gingharian.” Apan unsay buhaton sa maong Gingharian? Gikan sa sinugdan hangtod sa kataposan ang Bibliya nagapadayag nga gamiton ni Jehova ang maong Gingharian—ang iyang kagamhanan—sa pagpatunghag malungtarong pakigdait. “Siya nagapahunong sa mga gubat ngadto sa kinatumyan sa yuta,” matud sa Salmo 46:9. Ug pinaagi sa Gingharian, “iyang pagapahiran ang tanang luha gikan sa ilang mga mata, ug ang kamatayon mawala na, ni may pagbalata ni paghilak ni kasakit pa.”—Pinadayag 21:4.
Ang tanang butang nagkalambiggit. Ang kagamhanan sa Diyos magatapos sa sakit, pag-antos, ug bisan sa kamatayon. Ang inhustisya mahimong usa ka butang sa kagahapon. Ang tanan pagatagdon nga may pag-angay-angay ug pagtahod. Dili katingalahang si Jesus miingon sa pag-ampo, “Umanhi ang imong gingharian”! (Mateo 6:10) Ang maong mensahe sa Gingharian nakapagubot pag-ayo sa kalibotan niadto ug nagapagubot niini karon mismo! Busa dili ba mapuslanon nga susihon nimo kining nagahatag-kinabuhing mensahe? Makahimo ka niana, pinaagi sa pagbasa sa Bibliya!
‘Apan sa Unsang Paagi Akong Mabasa Kini?’
Kon nagaeskuyla ka, basin imong bationg puliki ka kaayo sa imong homwork. Apan lisod ba kaayo ang pagbuhat sa imong homwork ug pagbasa sa Bibliya? Dili alang kang Richard (17 anyos): “Sa mahapon dihang ako dunay homwork, kana akong buhaton ug humanon kana. Sa among balay, walay TV sulod sa semana.” Kon buhaton nimo ang sama, matingala ka sa pagtan-aw kon pilay panahon ang mahibilin alang sa pagbasa sa Bibliya. Aw, kon mobasa ka lamag 15 minutos sa usa ka adlaw, mahimong matapos nimo ang tibuok Bibliya sulod sa duolan sa tuig!
Kini Makatabang Kanimo Karon Mismo!
Nagatubo ka sa panahong “lisod gayod nga sagubangon.” (2 Timoteo 3:1) Bisan pa niana, ang Bibliya nagatabang niining mga batan-on sa pagsagubang:
“Usahay ako maguol bahin sa kahimtang sa kalibotan. Akong tan-awon ang mga kasulatan sama sa Pinadayag 21:4, ug kini nagahatag kanakog butang kalaoman.”—Prentice.
“Ang pagbasa sa Bibliya mapuslanon kaayo, ilabina kon ako dunay suliran. Kadaghanan, adunay usa ka karakter sa Bibliya nga may ingon nga suliran, ug kana nagatabang kanako sa pagsagubang niana.”—Myrtie.
“Akong makita nga ako nagatubo tungod sa pagbasa sa Bibliya.”—Theresa.
Ikaw, usab, makakita nga ikaw nagatubo. Sinatia ang katagbawan sa pagsugod sa usa ka butang mapuslanon, pagpabilin niana, ug pagtapos niana. Labi pang magantihon mao ang pagkaila sa Dakong Maglalalang. (Ecclesiastes 12:1) Sa dili madugay, buot nimong gamiton ang Bibliya sa pagtabang sa uban. Sa pagkamatuod, ang pagbasa sa Bibliya maoy usa sa labing mapuslanong mga proyekto nga imong mahimo!
[Blurb sa panid 20]
“Mapuslanon kaayo ang pagbasa sa Bibliya, ilabina kon ako may suliran”
[Mga Letrato sa panid 19]
Sulayi ang paghanduraw sa mga hitabo samtang ikaw nagabasa