Dili pa Igo ang Pagkabitoon sa Musikang Rock
SA NAPULOG walo ka tuig kanhi usa ako ka iladong mag-aawit sa musikang rock ug nagkapopular ako. “Bulahan kaayo ka, Bruce!” matud pa sa akong mga higala samtang maibogon nilang gitan-aw ang mga butang nga akong nabatonan nga ilang ginapangandoy. “Gusto ko sa imong kahimtang. Guwapo ka; popular sa mga babaye; kuwartahan; ulitawo ug libre! Bisan asa ka moadto makaila nimo ang mga tawo. Nahibalo ka ba nga bulahan ka kaayo?”
‘Kon sukdanan pa sa kalipay kining mga butanga nga akong ginatagamtam,’ nahibulong ako, ‘nan nganong wala akoy kalinaw sa kinasuloran ug katagbawan?’ Sa ulahi akong nadiskobrehan nga kadtong nagapangitag kalipay pinaagi sa pagpangagpas nianang matanga sa kinabuhi nagsubay sa sayop nga dalan.
Tugoti ako sa pagsaysay sa nahitabo.
Nagsugod ang akong karera sa pag-awit sa katuigang 1960. Nagtungha ako sa Pranses-Canadianhon nga lalawigan sa Quebec ug tig-awit sa mga konsiyerto sa akong nahibalag ang usa ka estudyante nga gitarista. Miporma kamig musikal nga grupo nga nahimong inila dili lamang sa lokal nga dapit kondili sa publisidad usab.
Ang tigdumala sa bayle sa tunghaan nakahibalo sa akong abilidad ug gitanyagan akog lima ka dolyar sa matag awit duyog sa popular nga banda sa iyang gidumalang bayle. Misugot ako. Sa miabot ako sa baylehan, nakita nako nga puno kini kaayo sa maikagong mga mananayaw. Apan sa misugod pagtugtug ang banda ug miawit ako, ang mga panon sa batan-on nakalimot bahin sa sayaw ug misugod sa pagdugok atubangan sa entablado. Ang bayle nahimong pasundayag!
Gusto sa mga musikero nga moapil ako sa ilang grupo ingong mag-aawit. Misugot ako ug nailhan kami nga The Sultans. Sa 1965 gientra kami sa among manedyer sa gibaniog nga bangga sa rock-band. Ang unang ganti mao ang senemanang pasundayag sa usa ka labing dakong estasyon sa telebisyon sa Quebec. Gikan sa 28 ka banda sa tibuok lalawigan sa Quebec, among nadaog ang unang ganti! Dinhi nagsugod nga napailaila kami sa katilingban diha sa TV.
Ang among musika sa 45 rpm nga mga plaka misulpot sa tumoy sa mga tsart sa hit-parade o labing himalitan nga plaka, ug ang among programa sa telebisyon gikuha sa ubang mga estasyon. Sa mubo nahimo kaming numero unong grupo sa Quebec, diin ang halin sa mga plaka miabot ug kapin sa tunga sa milyon. Sa ulahi mibulag ako sa The Sultans ug nag-solo. Apan, sa pagbulag, may gihimo kaming panamilit nga paglibot nga pasundayag. Ang Montreal sa 1968 mao ang dapit sa among kataposang konsiyerto. Ang panon sa 8,000 ka tawo nanamilit kanamo. Naikag kaayo kami. Ang panon sa katawhan mas daghan pa kay sa panon sa mga tawo nga napundok sa Rolling Stones, Johnny Hallyday, ug Adamo (internasyonal nga mga mag-aawit) niadtong panahona.
Sanglit nahimong solo nga mag-aawit daghan ako ug kagawasan, ug bisag dili na kinahanglang isulti pa, daghang salapi usab. Kining bag-ong napalgang kagawasan nakahatag kanakog higayon sa pagbakasyon sa Uropa sa napulo ka semana, ug nakapanahon ako sa pagtimbangtimbang sa akong kinabuhi ingong mag-aawit sa musikang rock gikan sa mas realistikanhong panglantaw. Natugaw ako sa akong nakita. Ako karon 21 anyos na, nga nagkaambisyoso sa matag labay sa adlaw, ug maindigon aron makauna.
Sa mibalik sa Quebec, dihay akong duha ka plaka nga nanguna sa tsart sa hit-parade. Dayon, sa La Gala des Artistes sa 1969, gipasidunggan ako ingong Labing Hawod nga Mag-aawit nga Lalaki sa Tuig. Bisan pa sa atensiyon sa publiko ug sa pangidlap niadtong gabhiona, sa akong kinasuloran wala gihapon akoy katagbawan. Naglagot ako sa pagkadaotan sa sistema ug sa paagi sa pagtratar sa mga batan-on sa negosyo sa musika. Bisan pa ana, ako mismo nalaang niini. May mga pangutanang mobalikbalik sa pagtungha sa akong hunahuna, sama sa: ‘Asa padulong ang kinabuhi?’ ‘Nganong gipangagpas ko kining propesyona?’
Sa 1969 ang idolo sa musikang rock si Brian Jones sa Rolling Stones, sa panuigong 26, nakit-ang patay diha sa iyang swimming pool. Sa ulahing mga katuigan sa 1970 ang popular nga mag-aawit sa musikang blues ug rock si Jimmi Hendrix ug ang iladong babayeng mag-aawit sa musikang rock sa Amerika, si Janis Joplin, namatay sa panuigong 27 tungod sa mga droga o sa nalangkit sa droga nga mga hinungdan. Napulo ka bulan sa ulahi laing iladong mag-aawit sa musikang rock, si Jim Morrison, ang pangunang mag-aawit sa The Doors, namatay sa panuigong 27. Ang tanan nangamatay sa kinatumyan sa ilang mga karera! Ako usab nalangkit sa imoral nga paagi sa kinabuhi ug migamit ug mga droga. Kombinsido ako nga ang pagsunod sa dalan niining hawod kaayong mga mag-aawit sa musikang rock dili alang kanako.
Apan ang pangutana nagapabilin gihapon: ‘Unsa gayod ang tinuod nga katuyoan sa kinabuhi?’
Akong nakita ang akong inahan, usa ka babaye nga nagapas-an sa mga suliran sa pag-atiman sa duha ka lalaki nga walay bana, ug nagakatigulang. Maisogon niyang giatiman ang iyang mga kaakohan apan alang sa unsa nga katuyoan? Aron ba sa anam-anam mahimong tigulang, maluya, masakit, ug mamatay? Mao ba kini ang katuyoan sa kinabuhi? Kining wala-matubag nga mga pangutana nakaluya sa akong buut.
Sa nangaging katuigan, nawad-an akog pagtuo ug pagtahod sa akong relihiyon ug sa mga pagtulon-an niini. Nagduhaduha gayod ako sa paglungtad sa Diyos. Nasulayan ko ang bag-o ug nagkalainlaing mga droga, apan kaguol ang akong naangkon ug kagubot sa hunahuna usahay.
Naghunahuna nga ang kalit nga kausaban sa akong kinabuhi mohatag kanakog dakong kaayohan, nangita akog trabaho gawas sa natad sa musika. Nadawat ako sa kompaniyang tighimog asiro sa pito ka bulan nga kontrata sa 1975. Sulod niadtong mga bulana sa paggamag asiro, naikag kaayo ako sa usa ka edad-edarang trabahante nga, lahi sa uban, daw kalmado kaayo ug malinawon. Gisultihan niya ako nga nagabasa siyag Bibliya, busa midesider ako sa pagpalit ug usa aron sa pagsusi kon kini ba makatabang kanako sa pagkaplag kalinaw sa kinasuloran.
Sa natapos ang kontrata ug gipagawas ako, midesider ako sa pagpangitag kapangabuhian sa dungganong paagi ingong awtor-kompositor sa mga awit. Niining paagiha malikayan nako nga mahimong sentro sa atensiyon ug sa gihapon makabaton ug katagbawan sa pagtrabaho uban sa musika, sanglit ang akong gugma sa pag-awit dako gihapon kaayo. Mobasa usab ako ug usa ka kapitulo sa Bibliya kada buntag.
Anaa ako kanunay sa akong apartment sa tibuok adlaw, busa ginaduaw ako sa mga Mormons, pari sa parokya, ug sa mga Saksi ni Jehova. Dali akong madala sa panaghisgot uban kanila bahin sa katuyoan sa kinabuhi. Nasayran ko dayon nga lahi ang mga Saksi ni Jehova. Mapaubsanon sila ug nagpakitag tinuod nga kaikag kanako ug, labaw sa tanan, gipasukad nila ang ilang mga tubag direkta sa Bibliya, usa ka butang nga wala mahimo sa ubang mga hawas sa relihiyon.
Bisan pa sa akong maduhaduhaong kinaiya, misugot ako sa pagtuon sa Bibliya uban kang Roger, nga usa sa mga Saksi nga akong katalirongan. Usahay molighot ako sa senemanang pagtuon sa Bibliya, apan nagpadayon si Roger—nga tungod niini mapasalamaton kaayo ako karon. Gitabangan niya ako sa pagkaplag sa mga tubag sa pangutana nga nakapaluya sa akong buut sa dugay nang panahon.
Ang unang tigom nga akong natambongan sa Kingdom Hall tinuod nga nakatandog sa akong kasingkasing. Dinhi na usab akong nakita ang mapaubsanong mga tawo nga adunay tim-os nga pagtagad sa ilang mga silingan. Ug ang impormasyon nga gipahayag prangka ug gikan sa Bibliya. Sa unang higayon, nasabtan nako ang katuyoan sa Diyos alang sa tawo. Dili na kaayo ako maapektohan sa mga inhustisya niining daang sistema, sanglit nasayod ako nga sa dili madugay ang Diyos molihok, magpakanaog ug paraiso sa kalinaw niining yutaa ilalom sa pagmando sa Gingharian ni Kristo sumala sa gisaad sa Salmo 37:29 ug sa Daniel 2:44.
Sukad niadto ang praktikal nga tambag gikan sa Bibliya nakatabang kanako sa ‘pagtul-id sa mga butang’ sa akong kinabuhi. (2 Timoteo 3:16, 17) Akong gipakaslan ang babaye nga akong gimahal ug nga akong gipuyopuyo, si Danièle. Ug sa ulahi, akong gipahinungod ang akong kinabuhi sa pag-alagad kang Jehova. Misugot ang akong asawa sa pagtuon sa Bibliya, ug sa ulahi gipahinungod usab niya ang iyang kaugalingon kang Jehova.
“Dili sayon ang paghimog kausaban sa akong kinabuhi,” miingon si Danièle. “Apan pinaagi sa tabang ni Jehova ug sa pagpaluyo ug panig-ingnan ni Bruce, nakita ko ang tinuod nga kalipay sa matarong nga mga prinsipyo sa Bibliya.” Gibawtismohan kaming duha sa 1978.
Bisan pa nga giapresyar nako ang akong trabaho ingong ahente sa aduwana sa International Airport sa Montreal, ang akong kasingkasing anaa sa akong pangunang buluhaton ingong usa ka ministro. Sa pagkatinuod, nakahatag dakong kalipay kanako ang pagtabang sa uban pinaagi sa pagtuon sa Bibliya, sa ingon nga paagi nga ako natabangan. Niining matanga sa paghatag tinuod nga adunay ‘dakong kalipay kay sa pagdawat.’—Buhat 20:35.
Ug ingong ministeryal nga alagad sa lokal nga kongregasyon, daghang kalipay ug katagbawan ang akong natagamtaman pinaagi sa pagtabang sa uban. Tugob ug puno kaayo ang akong kinabuhi, apan matinud-anon akong makaingon nga karon gibati ko ang kalinaw sa kinasuloran nga akong gipangita ug ang tinuod nga kalipay sa pagkinabuhi. Bisan tuod natapos na ang akong karera sa show business, mapasalamton ako kang Jehova nga Diyos nga gibuksan alang kanako ang bug-os bag-o “tinuod nga kinabuhi.”—1 Timoteo 6:19.
Oo, gimahal ko gihapon ang musika! Ilabinang kalipayan ko ang klasikal, folk-rock, ug pipila ka jazz nga mga awit, apan mapilion na kaayo ako karon sa matang nga akong ginapamatian. Ang ubang modernong mga awit adunay imoral ug nalangkit sa drogang mga mensahe. Kanang matanga sa musika dili makatabang kanako sa pagpanghiangay sa akong kinabuhi ug paghunahuna sumala sa kabubut-on sa Diyos. Karon ako moawit tungod sa kalipay ko niana. Maoy hinungdan nga karon ikalipay nakog dako ang pagtigom uban sa akong asawa ug mga higala diha sa gamayng salosalo diin kaming tanan may higayon sa pag-awit.
Kon tan-awon nakog balik ang akong karera sa pag-awit, akong makita kon sa unsang paagi nagkawala ang akong kalipay sa nagkapopular ako. Apan karon nga gibiyaan ko na ang show business ug nahimong usa sa mga Saksi ni Jehova, bisan ug nagkawala na ang akong popularidad, ang akong kalipay nagakadako.
Ang mga tawo nga wala makaila niining internasyonal nga organisasyon sa mga Saksi ni Jehova tingali naghunahuna nga nawad-an na akog kadasig o gigamit lamang ang Bibliya ingong sungkod. Ang usa ka tigsibya sa radyo, human sa pagpatokar sa usa sa akong mga plaka, miingon bahin sa akong kinabuhi: “Walay suwerte si Bruce. Nahimo siyang usa sa mga Saksi ni Jehova.” Ang ikatubag ko lamang mao kini: “Tan-awa sa imong kaugalingon kon unsay mahimo alang kanimo sa Bibliya. Alang kanako, mao kini ang labing maayong butang nga nahitabo kanako.”
“Tinuod,” miuyon si Danièle, “pinaagi sa pagkahibalo sa kamatuoran sa Bibliya, si Bruce ug ako nakahatag ug tinuod nga katuyoan sa among mga kinabuhi.”—Sumala sa giasoy ni Bruce Huard.
[Blurb sa panid 19]
Sa ulahi may duha ako ka plaka nga nanguna sa tsart sa hit-parade
[Blurb sa panid 20]
Gingil-aran ako sa kadaotan sa sistema
[Blurb sa panid 21]
Ang praktikal nga tambag sa Bibliya nakatabang kanako sa ‘pagtul-id sa mga butang’ sa akong kinabuhi
[Blurb sa panid 21]
Sa paghatag, tinuod adunay ‘dakong kalipay kay sa pagdawat’
[Letrato sa panid 20]
Ang pagsangyaw ug pagtuon nakaamot sa paghimo sa kang Danièle ug akong kinabuhi nga malipayon ug matagbawon