Unsay Bag-o Diha sa Kabangisan sa Kalingawan?

Ang sekso ug kabangisan ba nga gipakita sa mga pelikula ug mga programa sa TV, nakahatag sa mga tumatan-aw ug mga ideya nga mopalihok kanila sa pagsunod niini sa ilang tinuod nga kinabuhi? Kining dugay nang gikalantugiang topiko gihatagag laing kahulogan di pa dugay.

“Sa kasagaran ginakontrolar kining mga ideyaha sa atong mga panagana,” miingon si Dr. Leonard Berkowitz, propesor sa sikolohiya sa University of Wisconsin. Apan kon kining mga pelikulaha ug mga programaha ipasiugda sa ngalan sa artistikanhong kapahayagan, ug hayan hatagan pa ug maayong mga komento sa pipila ka kritiko, miingon si Berkowitz, “makatabang kini sa pagpakamatarong dili lamang sa malaw-ayng pelikula kondili sa tinamdan, nga ginalingla ang mga tumatan-aw ug ginapaluya ang iyang panagana.” Kon sagolag sekso, nga maoy kasagarang mahitabo, “ginapukaw niini ang pangibog ug posible nga himoon sa mga tawo ang anaa sa ilang mga hunahuna.”

Ang konklusyon ni Dr. Berkowitz, nga maoy resulta sa kapin sa 20 ka tuig nga pagdukiduki, gikutlo sa The New York Times sa artikulo bahin sa mga pelikula nga sama niini. Alang sa kadaghanang tawo, miingon ang artikulo, kining mga programaha, “ilabinang gisaway tungod kay gihimong dungganon ang pagpasundayag sa labing makalilisang ug mapintas ang mga pag-atake.”