Dili ba ang “Pagkahimong Maayo” Maayo Na?
PAGKATAHOM nga kalibotan kini kon ang tanan nga buhi tinuod gayod nga maayo! Walay usa, bisan unsa pay sekso o panuigon, ang mahadlok nga matulisan, malugos, o maabusohan. Walay mga prisohan, ug walay mga polis, walay kasundalohan. Oo, pagkatahom nga kalibotan unta kini!
Sa pagkatinuod, ilalom sa presente nga mga kahimtang, ang pagpaabot ug ingon niini nga kalibotan daw dili realistikanhon. Apan, ang mga tawo nga naningkamot sa pagsubay ug maligdong nga mga kinabuhi dalayegon. Ang ilang mga panlimbasog daw wala kaayoy maayong resulta sa pagpatunghag mas maayong kalibotan, apan sila wala makaamot sa pagpasamot sa kahimtang niini.
Apan ang “pagkamaayo” ba maayo na? Tingali makalipay kana sa atong mga higala ug mga silingan, apan igo na ba kana sa pagpahimuot sa atong Maglalalang? Ang mga tawo nga matinguhaon nga makabaton sa pag-uyon sa Diyos buot nga masayod.
Unsay Kahulogan sa “Pagkahimong Maayo”
“Maayo siya nga bata” sa kasagaran nagkahulogan nga dili kaayo siya maldito, pagaingnon pa, dili ilado sa pagbuhat ug daotang mga butang. Apan kon gamiton sa relihiyoso nga diwa, daghan ang nalakip sa pagkahimong maayo. Ngano?
Dili ikalimod, daghang ateyista, mga agnostiko, ug dili-relihiyosong katawhan nga maayog moral. Dili sila ilado sa paghimog daotang mga butang. Apan ang ila bang pagkahimong maayo niini nga diwa maayo na sa pagpahimuot sa Malalalang, kansang paglungtad ilang gisalikway, giduhaduhaan, o gibale-wala? Dili gayod!
Busa, ang tukmang kahibalo sa kon unsay gitagad ni Jehova nga maayo hinungdanon, kay basin unya kita, “tungod sa pagkawalay kahibalo sa pagkamatarong sa Diyos” mangita “sa paghimog [atong] kaugalingon.” (Roma 10:1-3) Sayop kini, tungod kay ang tawhanong mga sukdanan sa pagkamatarong—nga atong giisip nga matarong—dili subay sa balaang sukdanan.
Sa panahon sa iyang yutan-ong ministeryo, ang Anak sa Diyos si Jesu-Kristo nagpakita kon unsa ang balaang sukdanan sa maayo: Ang usa ka adunahang batan-ong lalaki nangutana kaniya: “Unsay akong buhaton aron mabatonan ang kinabuhing dayon?” Ang taho sa ilang pagsultihay labing madayganon. Atong mabasa: “‘Bantayi kanunay ang mga sugo.’ Siya nangutana kaniya: ‘Hain man niini?’ Si Jesus mitubag: ‘Ayaw pagbuno, Ayaw pagpanapaw, Ayaw pangawat, Ayaw pagsaksig bakak, Tahora ang imong amahan ug inahan, ug, Higugmaa ang imong silingan sama sa imong kaugalingon.’ Ang batan-on miingon kaniya: ‘Kanang tanan ako nang ginabantayan; unsa pa may akong nakulang?’ Si Jesus mitubag kaniya: ‘Kon ikaw buot nga mamahingpit, lumakaw ka ug ibaligya ang imong mga kabtangan ug panghatag sa mga kabus ug makabaton kag bahandi sa langit, ug umanhi ka ug sumunod kanako.’ Sa pagkadungog niini sa batan-ong lalaki, siya milakaw nga masulob-on, kay daghan man siyag katigayonan.”—Mateo 19:16-22.
Ilabina sa matugotong moral ug sosyal nga kagawian karon, dili ba isipon nimo kining tawhana nga maayo? Wala gayod siya makapatay, wala makapanapaw, wala makapangawat, wala makasaksig bakak, wala mapakyas sa pagtahod sa iyang mga ginikanan o sa paghigugma sa silingan sama sa iyang kaugalingon.
Apan gipakita ni Jesus nga ang pagkahimong maayo niining tawhana dili kay maayo na. May butang gihapon ang nakulang, usa ka butang nga nakahawid sa paghimo sa iyang pagkahimong maayo nga hingpit, o bug-os. Unsa? Ang nagasakripisyo sa kaugalingong gugma alang sa Diyos nga mopalihok kaniya aron mahimong sumusunod ni Kristo. Ang nagasakripisyo sa kaugalingong gugma mopalihok kaniya sa pakigbahin nga aktibo sa pagsangyaw sa Gingharian sa Diyos, ang buluhaton nga gibansay ni Jesus ang iyang mga sumusunod nga maoy buhaton. Sanglit nag-ingon ang kasulatan nga kining tawhana “daghan ug katigayonan,” may posibilidad nga nakakuha kinig dako sa iyang panahon. Sa pagsunod sa praktikal nga tambag ni Jesus sa pagsalikway niining materyal nga kabtangan, sa pag-apod-apod niini ngadto sa kabus, iyang gihimo ang espirituwal nga mga butang nga mas hinungdanon kay sa materyal nga intereses. Makahimo kini kaniya sa pagpadayon sa “pagpangita pag-una sa gingharian” nga wala kaayoy mga kaulangan.—Mateo 6:33.
Busa ang pagkahimong maayo sa panan-aw sa Diyos nagpasabot ug labaw pa kay sa pagpugong sa pagbuhat ug daotang butang. Kini nagpasabot sa aktibong pagbuhat ug maayo pinaagi sa pagkahimong sumusunod ni Kristo. Naglakip kini sa “pagpanghimatuod sa kamatuoran” bahin sa Diyos ug sa iyang katuyoan, sa ‘pagpaila sa iyang ngalan’ ngadto sa uban, maingon man sa masibotong pagpanalipod kaniya atubangan sa bakak nga mga sumbong ug kabakakan, sama sa gihimo ni Jesus. (Juan 17:4, 6; 18:37) Nagkahulogan usab kini sa “pakigbahin sa mga butang ngadto sa uban.”—Hebreohanon 13:15, 16.
Unsaon sa Pagkahimong Mas Maayo Kay sa Maayo Lang
Sanglit ang pagkahimong maayo dili pa gayod maayo, unsay atong buhaton aron mahimong mas maayo? Ang Lucas 10:38-42 naghatag kanato ug pasumbingay. Didto atong masaba: “Dihay usa ka babaye nga ginganlag Marta nga midawat kaniya [Jesus] sa iyang balay. Ug siya may igsoong babaye nga ginganlan si Maria, nga milingkod sa tiilan sa Ginoo ug nagpatalinghog sa iyang pulong. Si Marta, sa laing bahin, nagkapuliki sa pag-atiman sa daghang buluhaton. Busa, miduol siya ug miingon: ‘Ginoo, wala ba ikaw magkabana nga gipasagdan man lamang ako ning akong igsoon sa pag-atiman sa mga butang? Busa, sultihi siya sa pagtabang kanako.’ Ang Ginoo mitubag kaniya: ‘Marta, Marta, naguol ug nahingawa ka sa daghang mga butang. Apan usa ra gayod ka butang ang kinahanglanon. Apan, gipili ni Maria ang maayong bahin nga dili na makuha gikan kaniya.’”
Unsay gipakita niini nga pagsultihay? Kon dalayegon ang pag-atiman kang Jesus sa pisikal nga paagi, ang pagpaminaw sa iyang mga pagtulon-an, ug busa nagpakitag tukmang pagpabili sa espirituwal nga mga butang, ilabinang dalayegon. Maayo ang gihimo ni Marta. Apan niadtong partikular nga gutlo dili kadto kaayo maayo. Busa, mas maayo ang gihimo ni Maria.
Kining paghatag ug pasiugda sa espirituwal nga mga balor, nga lahi gikan sa pisikal ug materyal nga mga balor, gipasiugda usab ni Jesus diha sa iyang Wali sa Bukid. Siya miingon: “Malipayon kadtong mahunahunaon sa ilang espirituwal nga panginahanglan, kay ila ang gingharian sa langit.”—Mateo 5:3.
May nailhan ka bang maayong mga tawo nga, bisan pa sa ilang pagkamaayo, dili “mahunahunaon sa ilang espirituwal nga mga panginahanglan”? Tingali may nailhan ka. Sa pagkatinuod, imong mamatikdan nga ikaw mismo usa kanila. Kon mao, maalamon ka kon maningkamot ka sa pagtuon sa sukdanan sa Diyos sa pagkahimong maayo pinaagi sa pagbali sa imong pagtagad sa espirituwal nga mga butang.
Sa pagbuhat niini mahimong imong mabatonan ang palaabuton sa pagkinabuhi sa pagtan-aw sa bag-ong sistema sa mga butang sa Diyos nga sa dili madugay pagatukoron sa tibuok yuta. Didto, walay usa ang mameligro nga matulisan, o mahadlok nga malugos o maabusohan. Wala na unyay mga prisohan. Ni mga polis o kasundalohan—kay kini sila makakaplag ug mas magantihong trabaho.