Usa ka Timaan sa Kasaysayan Nahimong Assembly Hall sa mga Saksi ni Jehova

SA GIBUKSAN ang bag-ong Stanley Theater sa Journal Square, Jersey City, sa Marso 24, 1928, kadto maoy usa sa labing dako sa Tinipong Bansa. Ang katahom niini gidayeg sa tanan, ilabina sa maanindot nga sulod niini ug sa Italyanong panagway sa atubangan. “Kon nakaadto ka sa Italya, . . . diin ang maanindot kaayong mga villa ug mabulokong mga lagwerta makapahinumdom kanato sa maartihong himaya sa Roma,” miingon ang usa sa reporter niadto, “nan may ideya ka sa panagway sa sulod niining bag-ong Stanley Theater.”

Apan tapos sa daghang katuigan sa mga pelikula ug mga pasundayag sa entablado, nawala ang katahom sa Stanley. Ang mga plano sa pag-usab niini ngadto sa lima ka gagmayng mga sinehan, o sa pagsunog niini o tukoran kinig edipisyo alang sa mga opisina, wala matuman. Dayon, sa Mayo 12, 1981, nakabaton ug bag-ong ngalan ang Stanley Theater: Gilista kini diha sa New Register of Historic Places.

Apan, niadtong panahona, dili na magamit ang Stanley Theater ug dakog panginahanglan sa pag-ayo. Ang ubang mga bahin sa silong sa entablado gilunopan sa duha ka piye (60 cm) sa tubig. Ang orihinal nga parte nga bronse ug tumbaga sa mga pultahan ug mga bentana natabonan sa baga kaayong pintura ug hugaw. Ang matahom nga Italyanong atubangan napanas tungod sa 50 ka tuig sa nikotina ug abug. Namansahan ang mga lingkoranan, nangagisi, ug nangalangkat. Ang dagkong mga aranyas dili na sinaw tungod sa mabagang abug. Sa 1982 gitanyag ang Stanley nga ibaligya. Nasayod sa mga pasilidad nga mao gayoy ilang gikinahanglan aron kahimoan sa ilang sirkitong mga asembliya, gipalit sa mga Saksi ni Jehova kini sa Nobyembre 1983.

Mitungha ang kasamok. Miingon ang mga opisyales sa siyudad nga dili mahimong gamiton ang Stanley alang sa relihiyosong katuyoan. Apan, ilang gitugotan ang mga Saksi sa pag-ayo sa atop ug sa initan. Apan sa ayohon na unta sa mga Saksi ang daang mga kasilyas, alambre sa koryente, ug mga tubo, ang permiso alang niini nga trabaho wala ihatag. Ang kaso miabot sa kapangulohang korte sa Septiyembre 1984. Ang mga Saksi nag-ingon nga ang tinuod nga hinungdan sa kabangian mao nga ang mayor sa siyudad dili gusto nga adunay mga Saksi ni Jehova sa Journal Square. Aduna siyay ubang mga plano sa maong propidad. Ang mayor ug ang uban gikiha tungod sa pagyatak sa konstitusyonal nga mga katungod sa mga Saksi.

Ang maayong pangatarogang opinyon ni Huwes Debevoise nag-ingon nga ang pag-ayo sa elektrikal ug sa mga tubo kinahanglang taposon ug nga ang katuyoan sa Stanley “dayag nga nasakop sa gitugotang paggamit ingong tigomanan sa kombensiyon.” Midangat sa pangunang isyu bahin sa kaso, siya misulat: “Taliwala sa hamiling sibil nga mga katungod nga gipasalig sa Konstitusyon sa Tinipong Bansa mao ang katungod nga malibre gikan sa mga balaod nga nagadili sa libreng paghupot ug relihiyon o sa pagpukgo sa kagawasan sa pagsulti. . . . Dinhi ang mga tagsumbong [ang mga Saksi] nangita sa pagbuhat, sa pagtudlo ug sa pagwali sa ilang relihiyosong mga pagtuo pinaagi sa paggamit sa pasilidad nga ilang giisip nga maayo alang niana nga katuyoan.”

Midugang si Huwes Debevoise nga kon moapelar ang siyudad sa kaso, “ang mga tagsumbong may kalig-onan nianang kataposang bista nga ang interpretasyon ug aplikasyon sa Jersey City sa Ordinansa sa Pangsona nagayatak sa intereses sa relihiyosong kagawasan sa tagsumbong.” Human niana, mihunong ang opisyales sa siyudad sa ilang pagtutol.

Ang sunod nga hagit nga giatubang sa mga Saksi: ang bug-os nga pagtapos sa Stanley alang sa pagpahinungod niini sa Septiyembre 7, 1985, ug alang sa programa sa graduwasyon sa mga misyonero sa ika-79ng klase sa Watchtower Bible School of Gilead sa pagkasunod adlaw. Busa siyam na lamang ka bulan ang paghuman niining dakong proyekto, gipaspasan kini sa pagtrabaho.

Libolibo sa boluntaryong mga trabahante miadto sa Stanley ug gihimo kining taboan sa kalihokan. Gitanyag sa hanas nga mga trabahante ang ilang mga serbisyo sa linain nga pagdibuho, pag-ayo sa tubo, pagpalitada, pagpamanday, ug sa elektrikal nga buluhaton. Busa gitagad pag-ayo ang daghang mga detalye nianang lunaa sanglit gamay ang lugar sa paghimo sa tanang trabaho nga buhaton niining mga boluntaryoha, nga nagtrahao sa hataas nga mga adlaw ug mga gabii sa daghang mga semana ug mga bulan. Ang makitang mga hulagway mohatag gamayng larawan sa dakong kausabang nahimo.

Ang mosunod nga programa ang gihikay: Agosto 17 ug 18, 1985: sirkitong asembliya sa mga Saksi ni Jehova. Agosto 30 ug 31: bukas sa publiko alang sa mga bisita nga gikan sa silingang mga komunidad. Septiyembre 7: pahinungod niining 4,300 ka lingkoranang teatro ingong Assembly Hall sa mga Saksi ni Jehova. Septiyembre 8: graduwasyon sa ika-79ng klase sa Watchtower School of Gilead.

Makapasigarbo karon ang Jersey City sa usa sa labing matahom nga mga tigomanan sa kombensiyon nga makita sa tibuok Tinipong Bansa. Dili lamang nabalik ang katahom niini kanhi kondili misamot hinoon ang katahom niini. Ang dakong obra niini mao nga karon magamit kini sa pagpabanaag sa himaya sa Soberanong Ginoo ug Maglalalang sa uniberso, si Jehova nga Diyos.

[Kahon sa panid 18]

Sulat Gikan sa Magbabasa sa The Jersey Journal

“Adunay kapin sa 4,000 ka mga Saksi ni Jehova sa Jersey City. Sila madasigon, matinabangon kaayo, nagasalig sa kaugalingon. Silang tanan mga boluntaryo sa usa ka kawsa nga hugot nilang gituohan. . . .

“Samtang naghinan-aw ako sa kontruksyon nga gihimo sa Stanley Theater sa Jersey City, nakita ko ang dulot nga determinasyon nga walay bili nga hilabihan ka dako nga ibayad sa ilang linain nga mga mithi.

“Ang Stanley Theater maoy bantayog sa dedikasyon nga resulta sa kalig-on nga naumol gumikan sa subsub nga pagtutol. Gidugokan ang teatro sa matinagdanong pagbati nga tagsa rang makita niining panahon sa pagkamayubiton, pagkamateryalistiko ug pagkamatahapon.

“Ang assembly hall sa mga Saksi ni Jehova sa Stanley Theater sa Jersey City seguradong mahimong usa ka timaan sa kasaysayan. Kadungganan kini sa komunidad.

“Sila maoy mga relihiyosong manggugubat nga primera klase ug kadan-agan sa usa ka kalibotan nga mangitngit kanunay.

“Takos nga ikapasigarbo sila sa Jersey City; usa ka dakong tabang sa siyudad. [C. T. P., Jersey City]”—The Jersey Journal, Hulyo 25, 1985, panid 21.

[Mga Letrato sa panid 15]

Sa tuo, ang kinadak-ang awditoryom sa makita sa balkonahe

Gikuha ang hulagway sa hapit nang matapos ang pag-ayo Sa wala, ang lawak-sudlanan

[Mga Letrato sa panid 16]

Mga larawan sa mga talan-awon sa Bibliya, gidibuho sa mga membro sa hedkuwarter sa Watchtower, gipulihan ang mga talan-awong gikan sa sugilambong

Ang ibabaw mao ang hulagway ni Jehonadab nga misaka sa karwahi ni Jehu.

Sa tuo mao ang magkakabayo sa Pinadayag kapitulo 6

[Mga Letrato sa panid 17]

Ang mga aranyas, de-kolor nga mga bildong bentana, ug mga kornisa gibag-o sa boluntaryong mga trabahante. Ang 50-piye nga makinang tigpupog cherry gigamit sa buluhaton sa pag-ayo ug sa pagpintura sa kisame