Ang Hunahuna sa Bibliya
Diyos—Siya Matinagdanon ba Kanako?
“DILI ko na maantos!” siya mihilak. “Kon may kaisog lang unta ako sa pagpatay sa akong kaugalingon, ako nang matapos ang kalaay sa kinabuhi niining laglagonon nga kalibotan.”
Si Jill “walay nakita nga katuyoan sa kinabuhi sa usa ka kalibotan nga may kahiubos, pagdumot, ug kabangisan.” Abi niyag ang kahupayan moabot gikan sa mga droga, alkohol, ug musika. Apan kadto wala makahupay. Sa dihang tungod sa diborsiyo ang mga sakop sa iyang pamilya natibulaag sa lima ka lainlaing dapit, siya nangutana: “Diin ba ang Diyos nianang tanang panahon?”
Dihang mahitabo kanimo ang daotang mga butang, ang susama bang mga pangutana moabot sa imong hunahuna? Sa prangka, hain ba ang Diyos sa atong gihampak-sa-trahedya ika-20ng siglo? Kini pangutana nga kinahanglang atubangon sa tanan nga buot motuo sa usa ka Diyos sa gugma. Ang Diyos matinagdanon ba gayod kon unsay mahitabo sa mga tawo? Siya matinagdanon ba kanimo?
Matinagdanon ang Diyos
Tan-awa ang imong palibot. Kon ang Diyos dili matinagdanon sa katawhan, nganong naghago pa siya sa pagmugna sa lamiang mga pagkaon, nindot-kugosong mga hayop nga makapasadya sa kasingkasing, ug sa kahibulongang talan-awon sa kinaiyahan? Bisan ang mangil-ad nga mga timawang dapit sa kasiyudaran modan-ag tungod sa katahom sa pagsalop sa adlaw. Sumala sa gisulti ni apostol Pablo ngadto sa karaang mga taga-Lycaonia, ang Diyos “wala magpasagad nga kamo walay pamatuod sa iyang kaugalingon tungod sa maayong mga butang iyang ginabuhat alang kaninyo: siya nagahatag ug ulan gikan sa langit, siya nagapatubo sa inyong mga tanom sa dihang kini angay nang motubo, siya nagahatag kaninyo sa pagkaon ug nagalipay kaninyo.”—Buhat 14:17, The Jerusalem Bible.
Apan kinahanglang uyonon nga ang matahom nga mga pagsalop sa adlaw dili mag-usab sa masulob-ong pamilya ngadto sa usa nga malipayon. Ang madulaon nga kahayopan dili maghanaw sa kasakit nga ipahinabo sa pagkamatay sa mga minahal. Ang lamiang mga prutas dili makahupay sa mga kasingkasing nga gibati sa kahaw-ang tungod sa pagkawalay-paglaom. Kon ang Diyos tinuod nga matinagdanon sa katawhan, nganong siya walay ginabuhat bahin sa mga hinungdan sa pag-antos karong adlawa?
Ang tubag mao nga siya may ginabuhat niana, ug ikaw makabatog kaayohan. Palandonga ang mosunod nga ebidensiya nga ang Diyos matinagdanon kanimo.
Giunsa Nato Pagkasayod nga Siya Matinagdanon
◻ Katuyoan sa Diyos nga ang usa ka kahibulongang paraiso magpuli sa may pag-antos nga sistema sa mga butang karon. Ang Bibliya tin-awng nagabatbat sa usa ka yuta diin “wala na ang kamatayon, ni may pagbalata ni paghilak ni kasakit pa.” (Pinadayag 21:4) Kinsa ang magpuyo ilalom niining mga kahimtanga? “Ang mga maaghop magapanunod sa yuta, ug sila makakaplag sa ilang tumang kalipay sa kadagaya sa pakigdait.” (Salmo 37:11) Nganong dili ablihan ang imong Bibliya ngadto sa Isaias kapitulo 11, 35, ug 65 aron sa dugang mabasa ang bahin niining maong Paraiso?
◻ Aron IKAW makapuyo sa maong Paraiso, gitagana sa Diyos ang iyang hinigugma, bugtong nga Anak. “Kay gihigugma pag-ayo sa Diyos ang kalibotan nga iyang gihatag ang iyang bugtong nga Anak, aron nga ang matag usa nga motuo kaniya dili unta malaglag kondili makabaton ug kinabuhing walay kataposan.” (Juan 3:16) Salamat sa maong kahikayan, bisan ang mga patay makabatog kaayohan gikan sa maong Paraisong yuta pinaagi sa pagkabanhaw ngadto sa kinabuhi.—Juan 5:28-30.
◻ Aron IKAW makapahimulos sa tagana sa Diyos, iyang gihikay nga ang maayong balita sa iyang Gingharian igawali sa tibuok nga yuta. “Kining maayong balita sa gingharian igawali sa tibuok gipuy-ang yuta ingon nga pamatuod sa tanang nasod; ug unya ang kataposan moabot.” (Mateo 24:14) Ilalom sa pagdumala sa iyang Anak, gisugo sa Diyos ang iyang katawhan sa “paghimog mga tinun-an sa katawhan sa tanang nasod.”—Mateo 28:18-20.
Apan aron makabatog kaayohan gikan sa paghunahuna sa Diyos kanimo, adunay lain pa nga kinahanglang imong buhaton. Kinahanglang imong ipakita nga ikaw matinagdanon kaniya.
Matinagdanon Ka ba sa Diyos?
Katingalahan ba kanang paminawon? Dili angay. Kon buot sabton, sa bisan unsang relasyon tali sa duha ka tawo, dili makataronganon ang pagdahom nga usa ra kanila ang matinagdanon, dili ba? Mao man usab sa relasyon tali sa usa ka tawo ug kang Jehova nga Diyos. Sa masubsob, ang iyang Pulong nagatin-aw niini. “Pakigsuod sa Diyos, ug siya mosuod kanimo,” mao ang agda sa Santiago 4:8.
Sa pagpunting sa kon unsay ginadahom sa Diyos gikan sa iyang katawhan, ang Deuteronomio 30:19, 20 nagaingon: “Akong gibutang ang kinabuhi ug ang kamatayon sa inyong atubangan, ang panalangin ug ang tunglo; ug pagapilion ninyo ang kinabuhi aron kamo makapabiling buhi, kamo ug ang inyong kaliwat, pinaagi sa paghigugma kang Jehova nga inyong Diyos, pinaagi sa pagpatalinghog sa iyang tingog ug pinaagi sa pag-unong kaniya.” Pagkamakapasubo kon dili nato mabatonan ang walay-kataposang mga kaayohan sa usa ka relasyon uban sa Diyos tungod sa kakulang sa tukmang pagkamahunahunaon sa atong bahin!
‘Sa unsang paagi ako makatino nga ako matinagdanon sa Diyos, nga kini gikan gayod sa akong kasingkasing?’ tingali maghunahuna ka. Pananglitan hangyoon ka sa Diyos nga himoon ang dili-popular nga baroganan tungod kaniya o sa paghimo sa dili-popular sa katilingbanong pag-alagad kaniya, sama sa pagwali sa dayag. Unsay imong sanong? Andam ka bang mopakita pinaagi sa imong binuhatan nga ikaw matinagdanon sa Diyos ug sa iyang Anak? Nagpasidaan si Jesus: “Kay si bisan kinsa nga maulaw kanako ug sa akong mga pulong niining mananapawon ug makasasala nga kaliwatan, igakaulaw usab siya sa Anak sa tawo inig-abot niya sa himaya sa iyang Amahan uban sa balaang mga manulonda.”—Marcos 8:38.
Sa laing bahin, si Jehova ug si Jesus nagapabili pag-ayo niadtong mga indibiduwal nga nagapakitag pagtagad kanila ug sa ilang matuod nga mga alagad karong adlawa. Matud ni Jesus: “Kon adunay magahatag bisan sa usa ka tasang bugnawng tubig sa usa niining mga gagmay, tungod kay siya akong tinun-an, suginlan ko kamo niini: kanang tawhana tinong pagabalosan.”—Mateo 10:41, 42, The New English Bible.
Oo, ang Diyos matinagdanon kanimo, sa buotag-kasingkasing nga katawhan sa tibuok yuta karong adlawa, ug bisan kadtong atua sa lubnganan. Apan ang pagkamatinagdanon maoy duhag-agianan nga dalan. Ikaw ba matinagdanon sa Diyos? Kon mao, ug kon andam kang mopakita nga ikaw matinagdanon, maangkon nimo ang kaugmaon nga dayon.
[Mga Letrato sa panid 20]
Nganong gitagana sa Diyos kining mga butanga kon siya dili matinagdanon?