Gikontrolar Ako sa mga Demonyo
USA ako ka espiritista, barangan, ungo nga lalaki. Nagpangdiwata ako. Nagapanan-aw akog mga tilimad-on. Manglamat akog tawo. Gipraktis ko ang mahika negra ug voodoo. Ang kadaghanang espiritistikanhong mga buhat nga gihukman sa Bibliya diha sa Deuteronomio 18:10-12, gihimo ko.
Ang kaubang tigbiyahe ni Pablo nga si Lucas misulat: “Gisugat kami sa usa ka dalagang ulipon nga adunay espiritu, usa ka demonyo sa pagpanag-an. Ug hingsapian siya sa iyang mga agalon pinaagi sa iyang pagpanag-an.” (Buhat 16:16) Sama sa kaso niadtong babayehana, gihatagan usab ako sa demonyo ug kahibalo sa mga butang nga dili mahibaloan sa ordinaryong mga paagi.
Pananglitan, sa wala pa mamatay ang akong apohang babaye, nasayod ako nga haduol na ang iyang kamatayon. Ug dihang nagsabak ang usa ka paryente, nahibalo ako niini una pa kay sa uban. Kini sila dili kay yanong mga panaghap lamang nga nahimong tinuod; ang akong kahibalo mahitungod niining mga butanga halos husto kanunay. Kon pangandoyon ko ang akong kaubang estudyante, magtutudlo, o paryente nga magkasakit, magkasakit sila.
Nasuko ako kas-a sa akong apohang babaye ug gusto kong masakitan siya. Gitawag ko ang mga demonyo, mihangyo sa espisipiko nga masamad siya—nianang hapona nasamad siya sa kutsilyo.
Sa paghimo sa voodoo, gamiton nako ang mga panapton ug naghimog larawan sa akong igsoon. Buot kong dili na niya ako hilabtan. Human niadto, matag duol niya nako sulod sa napulo ka tiil (3 m), mokalit lag sakit ang iyang dughan ug maglisod sa pagginhawa. Busa nakakat-on siya sa pagpalayo gikan kanako.
Dayon, dihay usa ka kaila nga miyubit sa akong abilidad sa pagsugo sa mga demonyo. Nahibalo ako nga nalangkit siya sa mga droga. Busa akong gisultihan siya nga madakpan siya ug dayon buhian. Gituman sa demonyo ang akong gihangyo. Sulod sa duha ka bulan nadakpan ang tawo. Tapos niadto gisibog ang sumbong, ug gibuhian siya. Ang tawo wala na gayod magduhaduha pa sa akong mga abilidad.
Nalangkit sa Okultismo
Ang akong pamilya grabeng nalangkit sa relihiyosong rituwal ug paganismo sa Ozark Mountain sa Tinipong Bansa, diin ang mga tawo mga tiggamit ug mga lumay, ug susama niini. Natawo ako tapos nga mibalhin ang akong mga ginikanan sa San Francisco. Sila dili gustog bata; nakababag kini sa ilang mapatuyangong paagi sa kinabuhi. Busa napasagdan ako, wala kapakitaig pagmahal, nabun-og sa emosyonal nga paagi. Nahimo akong tig-inusara, madumtanon sa mga tawo.
Sa bata pa nadani ako sa okulto. Motan-aw ako sa tanang mga salida ug mga programa sa TV mahitungod niini. Ug sa nag-sayis anyos ako, regular akong tiggamit ug Ouija board. Sa pagkatinuod, bukas ako ug maikagon sa pagpakigsulti sa kalibotan sa espiritu. Nasayod ako nga ang mga demonyo naglungtad ug komportable kaayo ang akong bation sa pagpakigsulti kanila. Ug gihatagan nila ako ug espesyal nga mga gahom ug kahibalo.
Misugod ako sa pagbasa sa tanang mga libro mahitungod sa okultismo nga akong nakuha, kuhaon ko kana sa publikong mga librarya ug, ilabina, sa mga tindahag libro. Ang usa ka tindahan, nga gipalakaw sa espiritista, tigpaigog kinahanglanon alang sa nagpraktis ug pangungo, kun mahika negra. Gikan sa pagbasa ug daang mga libro mahitungod sa okultismo, nahibaloan ko ang mga ngalan sa mga demonyo nga nakontak sa dugay nang mga katuigan sa mga tawong naghimog espiritismo.
Dayon, sa akong pagpakigsulti sa mga demonyo, misugod ako sa paggamit niining mga ngalana kon makigsulti ako kanila. Ug daw matag kontak nako sa usa ka partikular nga demonyo, ang iyang personalidad ug ang paagi sa iyang paglihok lahi gikan sa laing demonyo nga akong tawgon. Busa midangat ako sa pagkaila sa ngalan sa daghang mga demonyo.
Gikan sa akong pagbasa mahitungod sa okultismo, nasayran ko nga ang mga demonyo maoy mga manulonda nga nawad-an sa pabor sa Diyos ug dili mga espiritu, kun mga kalag, sa mga tawo nga nangamatay. Naluoy ako niining mga manulondaa, ug ilabinang naluoy ako kang Satanas. Nahimo akong magsisimba ni Satanas, apan, bisag may pagkasumpaki, moampo usab ako sa Diyos. Ug kon tubagon ang akong mga pag-ampo, nagtuo ako nga gitubag kini sa Diyos. Bug-os gayod akong nalingla ni Satanas.—2 Corinto 11:14.
Bisag gihatagan ako ug espesyal nga mga gahom, wala ako tabangi sa mga demonyo nga mahimong buotang tawo. Hinunoa, ilang gibaliko ang akong kaisipan sa pagdumot inay sa paghigugma. Sa ulahi, nahimo akong makihilawason, kawatan, palahubog, tig-abuso sa droga, ug homoseksuwal.
Sa Enero 1974 namatay ang akong apohan. Nasubo kaayo ako tungod niini, sanglit siya lamang ang tawo nga akong gimahal. Sa bata pa ako basahan niya ako gikan sa Bibliya ug maghisgot mahitungod sa pagkabanhaw. Karon buot kong makakat-on ug dugang pa mahitungod sa pagkabanhaw. Sukad pa sa pagkabata buot kong mabuhi sa walay kataposan, ug misaad ang mga demonyo nga mabatonan ko kana. Apan dili kaayo matin-aw kon sa unsang paagi mahimo kini.
Usa ka Hinungdanong Pagtagbo
Wala magdugay tapos sa paglubong sa akong apohang babaye, nakahisgot ako ngadto sa usa ka dalagang ginganlag Gwen, nga akong kauban sa trabaho, nga haduol na ang kataposan sa kalibotan apan walay nagtuo niana. Si Gwen miingon nga nagtuo siya niini ug nahibulong nganong nasayod ako. Nahibaloan ko kini gikan sa mga demonyo, apan gipakita ni Gwen kanako kining mga butanga gikan sa Bibliya.
Kanunayng maghisgot si Gwen kang Jehova ug miingon nga siya mao ang Usa nga motapos niining sistemaha. Akong gisultihan siya nga naglagot ako sa pagpaminaw sa tunog nianang ngalana, Jehova, ug mihangyo kaniya sa dili paggamit niana. Nasakitan siya ug miingon nga kon dili siya makagamit sa ngalan sa usa nga iyang labing gihigugma, mas maayo pang dili na siya makigsulti pa kanako, tungod kay Jehova ang ngalan sa Diyos.
Nakuratan ako. Busa niadtong gabhiona mipauli ako, ug gidala ang King James Version, nga Bibliya sa akong namatayng apohang babaye, misugod sa pagpakli niana, nangita sa ngalang Jehova. Nahibalo ako nga kon makita ko kini niini nga Bibliya, husto si Gwen, nga Jehova ang ngalan sa Diyos. Apan segurado ako nga wala kini didto. Apan nakurat ako dihang midangat ako sa Exodo 6:3, nga mabasa: “Ako mipakita kang Abnraham, kang Isaac, kang Jacob, pinaagi sa ngalan sa Diyos nga Makagagahom, apan mahitungod sa akong ngalan nga JEHOVA ako wala nila hiilhi.”
Akong nasayran dihadiha nga si Jehova mao gayod ang Diyos ug kon itandi kaniya si Satanas dili diay gamhanan! Nakakita sa ngalan nga akong gikaligotgotan diha sa Bibliya, maingon man sa pagkadungog sa paglaom sa pagkabanhaw, natukmod ako sa pagsugod sa pagtuon uban sa mga Saksi.
Pagbulag Gikan sa Gahom sa Demonyo
Wala magdugay gidala ako ni Gwen sa tigom sa mga Saksi ni Jehova. Ang tema sa pakigpulong mao ang mapintas nga mananap nga gihisgotan diha sa basahon sa Bibliya sa Pinadayag, ang usa nga may numerong 666. Daghan akog nakat-onang balikong mga impormasyon bahin niini gikan sa mga demonyo, ug karon natingala gayod ako nga kining mga butanga nasulat sa Bibliya. Naikag ako, busa sa pagkasunod semana misugod ako sa regular nga pagtuon sa Bibliya uban sa mga Saksi.
Sa pagkatinuod, ang mga demonyo dili gustong magtuon ako. Apan nasayod ako nga ang akong nakat-onan mao ang kamatuoran, ug dili gayod nako ihunong kini bisag misulay ang mga demonyo sa pagpaundang kanako. Ila akong gisuntok samtang naghigda ako. Kausa gisuntok akog kusog sa ulo nga nagkinahanglag pipila ka oras una pa nahupay ang sakit. Miampo ako kang Jehova ug panabang, ug sukad niadto iyang gipalayo sila sa akong lawak.
Apan, wala mohunong ang mga demonyo. Sa gawas sa akong lawak, ilang kagulkulon ang mga bentana. Gihimo nila kini sa tibuok gabii, aron makatulog lang akog pipila ka oras. Gusto nilang mahago ako. Apan padayon ako sa pag-ampo kang Jehova ug miadto sa tanang mga tigom sa mga Saksi, ug gitabangan ako ni Jehova.
Tinuod, nga gamhanan kaayo ang mga demonyo. Makahimo gani sila sa pagpatay ug tawo, sama sa ilang nahimo sa napulo ka anak ni Job. (Job 1:18, 19) Ug segurado ako nga gusto nila akong patyon, sanglit nahimo nila akong ulipon nga ilang gihatagan ug espesyal nga mga gahom apan mitalikod gikan kanila sa pag-alagad sa ilang kaaway, si Jehova nga Diyos. Busa ang katakos ni Jehova sa pagpanalipod kanako maoy pagmatuod nga dili kita angay mahadlok sa mga demonyo.
Sa ting-init sa 1974 mitambong ako sa distritong kombensiyon sa mga Saksi ni Jehova sa Oakland-Alameda County Stadium. Didto mihukom ako nga sa sunod nga kombensiyon magpabawtismo ako. Busa, diha sa mao gihapong istadyom, niadtong Hulyo 18, 1975, gibawtismohan ako, ug naminyo ug kaubang Saksi niana nga Oktubre.
Bisag naminyo na kami ni Mari, gisamok kami sa mga demonyo, may mga panahon nga hadlokon nila ang akong asawa. Sakop si Mari sa kongregasyon nga akong gisugdan sa pagtambong sa mga tigom. Nasayod siya sa akong kinabuhi sa wala pa kami maminyo. Miingon pa gani siya nga nagduda siya nga lalaki ako nga ungo sa una nakong pagtambong sa Kingdom Hall. Makahahadlok tinuod ako. Nagsul-ob akog itom ug dili makigsulti kang bisan kinsa, motambong lamang sa mga tigom ug molingkod lang didto.
Dihay higayon nga abi namog dili na gayod kami makalingkawas pa gikan sa pagsamok sa mga demonyo hangtod nga sila ug si Satanas matambog sa bung-aw. (Pinadayag 20:1-3) Tungod sa among pakigsuod kang Jehova diha sa pag-ampo ug sa pagpahimulos sa tanang espirituwal nga tagana nga iyang gihimo pinaagi sa iyang organisasyon, mga katuigan na sukad nga gisamok kami sa mga demonyo sama sa ilang gihimo sa sinugdan.
Gipanalanginan kami ug tulo ka matahom nga mga anak nga babaye, ug sa milabayng upat ka tuig, si Mari nag-alagad sa ministeryo ingong regular payonir. Kami nagapaabot sa panahon dihang si Satanas ug ang iyang mga demonyo mawala na sa walay kataposan! Kasamtangan, bisag wala na makasinati pa ug direktang pagsamok gikan sa mga demonyo, dili gayod namo kalimtan nga kami may pakig-away batok kanila, sama sa gisulat ni apostol Pablo: “Kita adunay pakigbugno, dili batok sa unod ug dugo, kondili . . . batok sa mga magmamando sa kalibotan niini nga kangitngit, batok sa daotang espiritung mga panon sa dapit sa kalangitan.” (Efeso 6:12)—Sumala sa giasoy ni Ralph Anderson.
[Blurb sa panid 12]
Matag pakigsulti nako sa usa ka partikular nga demonyo, lahi ang personalidad niini sa laing demonyo