Pulong sa Diyos—Ang Labing Maayong Depensa!
KON tulison ka, unsay imong buhaton? Ihatag dayon ang imong mga butang o makig-away pa aron panalipdan ang imong butang? Sa karong mabangis nga kalibotan, daghang tawo nagtuo nga ang paggamit ug kusog sa pagpanalipod sa kabtangan makataronganon. Ang pagbaton ug posil o ang pagbansaybansay sa usa ka porma sa martial arts giisip nga panalipod batok sa pag-atake. Apan mohatag ba gayod kinig maayong mga resulta? Sa kasagaran, ang mga tawong migamit ug mga armas nagbasol sa ulahi. Apan, sa kasukwahi, ang maalamong Haring Solomon miingon: “Dili ka mag-ingon: ‘Ako mobalos sa daotan.’ Humulat ka kang Jehova ug siya magaluwas kanimo.”—Proverbio 20:22.
Dili pa dugay, usa ka membro sa hedkuwarter sa mga Saksi ni Jehova sa tibuok-kalibotan sa Brooklyn, New York, miadto sa balay sa usa ka higala sa Brooklyn. “Dihang miabot ako sa atubangan sa edipisyo, usa ka tawong nagsul-ob ug dyaket miduol kanako nga may dalang korta, nga miingon: ‘Ambi ang imong kuwarta! Ihatag kanako ang tanan nimong kuwarta!’
“Nakakita nga wala ako mataranter sa iyang pag-atake, siya misugo: ‘Sulod sa edipisyo! Dili ko buot nga may makadungog! Hala sulod!’ Dihang nakasulod, iyang gipangayo ang akong pitaka. Ang iyang nakita $2.00 lamang. Dihang iyang gisusi ang ubang sulod niini, akong gisaysay kaniya nga usa ako sa mga Saksi ni Jehova.
“Nagpakaaron-ingnong wala makadungog, siya nangayog dugang kuwarta. Dayon, nagkuot sa iyang libreng kamot sa mga bulsa sa akong karsones samtang ang iyang usa ka kamot naghawid ug korta, nakakita siyag tibuok 20 dolyares nga akong gilain pagbutang. Naglaom nga makakita pag dugang, nagpadayon siya sa iyang pagrekisa, gibaligbag ang tanan nga iyang nakita sa akong mga bulsa diha sa salog. ‘Unsaon nimo ang kuwarta?’ Nangutana ako. ‘Alang ba sa droga?’ ‘Oo,’ mitubag siya. Dayon misaysay ako. ‘Nasayod ka ba nga kon dili pa ako usa sa mga Saksi ni Jehova, patay na unta ikaw karon? Hanas ako sa karate. Danghag ka sa imong pagdalag korta.’
“Samtang akong gikutlo ang Bibliya aron sa pagpatin-aw sa akong baroganan ingong usa sa mga Saksi ni Jehova, iyang gikuot ang bulsa sa iyang atubangan ug gikuha ang gamayng libro ug miingon, ‘Ania, may Bibliya ako!’ Gamayng de-bulsa nga Bibliya kadto.
“‘Maayong tabang kana alang kanimo,’ matud ko. ‘Wala gani nimo ipadapat kanang gipamulong dinhi.’ Akong gikuha ang iyang Bibliya ug gibasahan siya sa Mateo 6:33 ug Juan 17:3 ug gipasiugda ang bili dili lang ang pagkuhag kahibalo sa Bibliya kondili ang pagpadapat niini sa iyang kinabuhi.
“Miadmiter siya nga sa miaging duha ka bulan gipagawas siya gikan sa bilanggoan. Walay trabaho ug nagkinahanglag kuwarta, midangop siya sa pagpangawat. Nagbasa sa 1 Corinto 6:9, 10, akong gipakita kaniya nga ang mga kawatan dili makapanunod sa Gingharian sa Diyos. Midugang ako: “Moabot ra ang adlaw nga makasugat kag tawong buangon nga makig-away sa iyang kuwarta, ug moresulta pa nga mapatay mo siya, o kaha ikaw pa ang mapatay, o madakpan ka sa ulahi ug makalabuso na usab ikaw!’ ‘Ayaw pagsulti niana!’ mahadlokong miingon siya. Akong gipahinumdoman siya nga ‘ang magagamit ug espada mamatay sa espada.’—Mateo 26:52.
“Tingali natandog sa Kasulatan, nangayo siyag pasaylo. Miduko, iyang namatikdan ang butang nga iyang gibalibag sa salog samtang nanghabwa sa akong bulsa. Maulawong gipunit niya ang tanan ug gitunol kanako, apan iyang gitipigan ang kuwarta. Mipaingon sa pultahan, mihangyo siya nga iampo nako siya. Miingon ako, ‘Daotan ang imong gihimo kanako, apan labaw sa tanan, nakasala ka kang Jehova nga Diyos. Tali kini kanimo ug kaniya.’
“Dihang molakaw na unta, may gihangyo siya kanako. Gibukhad ang iyang kamot, nga nagkapot sa korta, siya mihangyo, ‘Mahimo bang ikaw na lay labay niini para nako? Mohunong na ako sa pagpangawat.’ Akong gikuha ang korta ug gipulihan kinig usa ka magasing Awake!”—Sumala sa gitaho ni Ricky Hanagami.