Pagkadaotan ug Pag-antos—sa Unsang Paagi Matapos?
ANG mapait nga mga kasinatian kadaghanan makapayugot. Apan, unsa man kon adunay angay nga hinungdan ang pag-antos sa tawo? Uban niana sa hunahuna, atong ipadayon ang asoy mahitungod kang Job. Sa pagkahuman sa tulo ka hugna sa mapaitong lantugi, ang usa ka batan-ong lalaki nga ginganlag si Eliu misulti. Siya miingon kang Job: “Ikaw nag-ingon, ‘Ang akong pagkamatarong labaw pa kay sa Diyos.’” Oo, si Job nahimong mahunahunaon sa kaugalingon ug nagpakamatarong sa kaugalingon. “Ania karon!” matud ni Eliu. “Tubagon ko ikaw, niini ikaw dili matarong; kay ang Diyos labing dako kay sa himalatyong tawo.”—Job 35:2; 33:8-12.
Ang Diyos nagbilin ug daghang ebidensiya nga siya maayo. (Buhat 14:17; Roma 1:20) Busa ang paglungtad ba sa pagkadaotan usa ka hinungdan sa paglalis sa pagkamaayo sa Diyos? Mitubag si Eliu: “Ipahalayo kana sa matuod nga Diyos nga siya magbuhat ug kadaotan, ug sa Labing Gamhanan nga siya magbuhat sa dili matarong!”—Job 34:10.
Diyos—Walay Gahom Batok sa Pagkadaotan?
Nan, mahimo kahang ang Diyos yanong walay igong gahom sa pagbalda alang kang Job o kang bisan kinsa? Sa kaatbang! Gikan sa makalilisang nga alimpulos, ang Diyos karon mitubag alang sa iyang kaugalingon, nga kusganong nagpamatuod sa iyang pagkalabing gamhanan. “Diin ka man sa pagtukod ko sa yuta?” siya nangutana kang Job. Aw, halayo sa pagkalimitado, siya misulti nga siya mao ang Usa nga makagahom sa kadagatan ug makamando sa kalangitan ug sa buhing mga linalang niini.—Job 34:4, 8-10, 33; 39:9; 40:15; 41:1.
Matuod, ang Diyos wala magpatin-aw kang Job nganong iyang gitugot nga siya mag-antos. Apan “ang usa ba ka tigpangitag-sayop makiglantugi sa Labing Gamhanan?” nangutana ang Diyos. “Sa pagkamatuod, imo ba nga kawangon ang akong hustisya? Ipahayag mo ba nga ako daotan aron ikaw pakamatarongon?” (Job 40:2, 8) Nan, mapangahason gayod ang pagpasangil sa Diyos sa mga suliran sa kalibotan o pagmugnag pinilosopong mga pangatarongan alang kaniya! Samang si Job karon nadasig sa pagbuhat, maayong “bakwion” nianang mga tawhana ang ilang nagkasumpaking mga teoriya.—Job 42:6.
Mga Isyu nga Pagahusayon
Si Job wala masayod nga ang iyang mga pag-antos naglangkit sa daghang dagko kaayong mga isyu nga mitungha dayon tapos sa paglalang sa tawo. Niadtong panahona ang rebelyosong espiritung linalang nga gitawag Satanas (“Tigsukol”) nag-agak sa tawo ngadto sa sala. Gisugo sa Diyos si Adan ug Eva sa paglikay sa pagkaon gikan sa “kahoy sa kahibalo sa maayo ug daotan.” Kinahanglang tahoron nila ang katungod sa Diyos sa paghukom kon unsay maayo o daotan alang kanila. Ugaling, ang Tigsukol nagtanom sa mga pagduhaduha diha sa hunahuna ni Eva, nga miingon: “Tinuod ba nga ang Diyos nag-ingon nga dili ka magakaon gikan sa tanang kahoy sa tanaman?” Sunod iyang gisupak ang Diyos: “Dili ka mamatay. Kay ang Diyos nahibalo nga sa adlaw mismo sa imong pagkaon gikan niini ang imong mga mata mangabuka ug ikaw mahisama sa Diyos.”—Genesis 2:17; 3:1-5.
Ang mapasipalahong mga pulong ni Satanas nagpatunghag dagkong mga isyu: Ang Diyos ba bakakon sa iyang gihukom ang kamatayon tungod sa pagkaon sa bunga nga gidili? Bisan pa niana, unsay iyang katungod nga ihikaw sa iyang mga linalang ang kaugalingnan o independensiya ug ipahamtang ang iyang mga sukdanan diha kanila? Dili ba siya Diyos nga hakog, kay naghikaw sa butang maayo gikan sa iyang mga linalang? Mahimo kahang ang pagkinaugalingon gikan sa Diyos maayo?
Ang pagpatay unta sa mga rebelde makapatungha lamag dugang mga pangutana. Pinaagi sa pagtugot lamang nga ang kaugalingnan o independensiya gikan sa Diyos dili pugngan sa igong yugto sa panahon nga kana kapamatud-an—makausa sa tanang panahon—nga ang tanyag ni Satanas sa independensiya maoy usa ka imbitasyon sa katalagman. Oo, “ang tibuok kalibotan nahiluna sa gahom sa usang daotan,” si Satanas nga Yawa, dili sa gahom sa Diyos. (1 Juan 5:19) Ang sakit, inhustisya, ekonomikanhong kaulipnan, kaguol sa kasingkasing—kining tanan mao ang mga bunga sa pagpalabi sa tawo sa kaugalingnan gikan sa Diyos ug pagpailalom sa satanasnong pagmando! Ug bisan pa sa pag-uswag sa teknolohiya, ang mga kahimtang sa kalibotan nagapadayon sa pagkadaot—kadaghanan tungod sa modernong teknolohiya.
Ang pagtugot sa Diyos niining tanang dili-ikabatbat nga kasakitan, hinunoa, wala maghimo kaniya nga dili matarong. Sa kaatbang, ang pagkadili-matarong sa tawo ‘nakapaila sa pagkamatarong sa Diyos.’ (Roma 3:5) Sa unsang paagi?
Pag-antos Nahanaw—Sa Walay Kataposan!
“Ang tanang linalang nanagduyog sa pag-agulo ug pagkagisakit hangtod karon,” matud ni apostol Pablo. (Roma 8:22) Oo, ang 6,000 ka tuig sa tawhanong pagkinaugalingon nagpadayag nga matuod ang mga pulong sa Jeremias 10:23: “Dili iya sa tawo nga nagalakaw ang pagtultol sa iyang lakang.” Hinuon, sa dili madugay ang Diyos sa pagkamatarong mobalda ug mosugod sa pagtultol sa mga kahikayan sa katawhan.
Tungod kay ang malaglagong mga resulta sa tawhanong pagkinaugalingon sa bug-os mayagyag na, ang Diyos unya makahanaw sa tanang butang nagapahinabog pag-antos: mga gubat, sakit, krimen, kapintasan—bisan ang kamatayon mismo! (Salmo 46:8, 9; Isaias 35:5, 6; Salmo 37:10, 11; Juan 5:28, 29; 1 Corinto 15:26) Kini maoy sumala sa nadungog ni apostol Juan diha sa usa ka langitnong panan-awon: “Ang Diyos . . . magapahid sa tanang luha gikan sa ilang mga mata, ug ang kamatayon mawala na, ni may pagbalata ni paghilak ni kasakit pa. Ang unang mga butang miagi na.”—Pinadayag 21:3, 4.
Makaiikag, ang Diyos nagtapos sa mga pag-antos ni Job pinaagi sa pagpasig-uli sa iyang maayong panglawas ug bahandi ug pagpanalangin kaniya sa dakong pamilya. (Job 42:10-17) Sa susama, ang Bibliya nagasaad kanato: “Ang mga pag-antos niining panahona dili ikatandi sa himaya nga igapadayag . . . Ang kalalangan mismo ipahigawas gikan sa kaulipnan sa pagkadunot, ug makabaton sa mahimayaong kagawasan sa mga anak sa Diyos.” (Roma 8:18, 21) Sa ingon ang pagkadaotan mapapas sa atong panumdoman!—Itandi ang Isaias 65:17.
Pagkinabuhi Uban sa Pagkadaotan
Hangtod sa pag-abot sa maong kagawasan, kinahanglang antoson nato ang pagkinabuhi sa usa ka daotang kalibotan, nga dili magdahom nga salipdan kita sa Diyos gikan sa personal nga katalagman. Si Satanas nga Yawa nagpatungha sa bakak nga kalaoman sa iyang gidani si Jesu-Kristo sa paglukso gikan sa templo, nga nagtuis sa teksto sa Bibliya sa Salmo 91:10-12, nga nagaingon: “Walay kadaotan ang mahitabo kanimo . . . Kay igahatag niya sa iyang mga manulonda ang usa ka sugo mahitungod kanimo, sa pagbantay kanimo.” Si Jesus, hinunoa, nagsalikway sa ideya nga makadawat ug pisikal nga panalipod. (Mateo 4:5-7) Ang Diyos nagasaad sa pagbantay lamang sa atong espirituwal nga kaayohan.
Ang matuod nga mga Kristohanon sa ingon dili “masuko batok kang Jehova mismo,” bisan pag mahitabo ang trahedya. (Proverbio 19:3) Kay “ang panahon ug wala daan mahibaloing hitabo mahitabo” sa mga Kristohanon usab. (Ecclesiastes 9:11) Bisan pa niana, kita dili ingong walay mahimo. Kita may paglaom nga mabuhi sa walay kataposan sa usa ka matarong bag-ong kalibotan, diin ang pagkadaotan wala na. Kita sa kanunay makaduol kang Jehova nga Diyos sa pag-ampo, kay siya nagasaad sa paghatag kanato sa kaalam nga gikinahanglan sa pag-antos sa bisan unsang kalisdanan! (Santiago 1:5) Gipahimuslan usab nato ang pagpaluyo sa isigka-Kristohanon. (1 Juan 3:17, 18) Ug kita nahibalo nga ang atong pagkamatinumanon dihang ginasulay maglipay sa kasingkasing ni Jehova!—Proverbio 27:11.
Bisan pa niana, ang pag-antos sa pagkadaotan dili gayod sayon. Busa, kon magalipay sa usang nagaantos, maayo nga ‘mohilak duyog niadtong nagahilak’—ug itanyag ang personal nga tabang. (Roma 12:15) Si Ana, nga gihisgotan sa sinugdan, sa ingon natabangan nga maulian gikan sa katalagman. Siya usa sa mga Saksi ni Jehova ug nakadiskobreng ang iyang isigka-Kristohanon andam kaayong motabang, nga nagtanyag kaniyag temporaryong puy-anan. Bisan pag siya mobati usahay ug kaguol, siya mahupayan sa paglaom sa pagkabanhaw. “Ako nahibalo nga ang akong mga anak mahibalik sa pagkabanhaw,” nagaingon si Ana. Ang iyang pagtuo sa Diyos sa kaayohan sa ingon labi pang nalig-on.
Kon ikaw nakaagom sa usa ka yugto sa pag-antos, hangyoa ang mga Saksi ni Jehova sa pagtabang kanimo sa imong mga pangutana ug mga pagduhaduha. Ikaw makakuha usab gikan kanila sa librong Ikaw Mabuhing Walay Kataposan sa Paraiso sa Yuta, nga may makatabang nga mga kapitulong “Nganong Gitugotan sa Diyos ang Pagkadaotan?” ug “Ikaw Nalangkit sa Usa ka Hinungdanong Isyu.” Matuod, sa pagkakaron ang daotang mga butang mahitabo sa maayong mga tawo, apan sa dili madugay kanang tanan mausab. Sayra ang dugang detalye sa imong kaugalingon pinaagi sa pagkontak sa mga Saksi ni Jehova sa inyong silinganan o pagsulat ngadto sa mga magpapatik niining magasina.
[Mga Letrato sa panid 9]
Sa matarong nga bag-ong kalibotan sa Diyos, ang pagkadaotan dili na mahinumdoman