Mga Sugyot Alang sa Imong Cassette Tapes

PISLITA ang boton sa pagtokar, hirag, ug pangandam nga malingaw. Apan sa kalit, ang tin-aw, linaing tingog molanggis pagkalit. Ikaw mahipugwat, apan ulahi na. Ang cassette tape nga nakalingaw kaayo nimo karon nagubot sa labihan nga dili na mahusay. Ang imong rekording nadaot.

Ang mga hitabong sama niini subsob mahitabo, apan may mahimo ka sa pagsanta niana. Sa samang panahon, kini makapaarang nimo sa pagpahimulos pag-ayo sa imong mga rekording. Aniay pila ka sugyot alang sa imong cassette tapes:

◼ Ipondo ang imong cassettes sa ilang kaugalingong mga kahon o album. Kini magpahilayo sa abog ug magsira sa mga budboran sa cassette mao nga dili maluag ang teyp. Kini makapamenos sa riyesgo nga magubot tungod sa mga parte sa rekorder.

◼ Ayaw gayod biyai ang cassettes sa duol sa init o sa adlaw, sama sa dapit sa likod nga bentana sa imong kotse.

◼ Ayaw ibutang ang imong cassettes duol sa trompa, telebisyon, duol sa telepono, o tapad sa ubang butang may magneto. Basin sila sa bahin o bug-os mapala.

◼ Hinloi sa regular ang magnetic heads, pinch-rollers, capstans, ug tanang metalikong mga parte sa agianan sa teyp. Kasagarang dali nimong maabot kining mga parteha pinaagi sa pag-abli sa buksanan sa sudlanan sa teyp. Gawas kon ang pulyeto sa instruksiyon magasulti sa lahi, himoa kining trabaho sa paghinlo pinaagig gapas ug isopropyl alkohol. Likayi nga maduot ang heads, sanglit ang ilang posisyon mainampingong gipasibo. Hinuon, ayaw pagbilin ug gapas sa rekorder.

◼ Ang demagnetizer mapuslanon kaayo sa paghanaw sa nabiling magnetismo nga makadaot sa pag-obra sa rekorder. Apan tinoa ang pagpatay sa teyp deck ug ibutang ang cassette sa layo sa agianan sa demagnetizer. Ug ampingi nga dili maigo o makaras ang heads. Sa pagpasayon sa trabaho, dunay human-daang panghinlo o demagnetizing cassettes nga imong mapalit.

Kon kining mga paagiha sa pagmentenar daw komplikado alang kanimo, hangyoang may motabang kanimo. Ang cassette tapes ug mga rekorder kasagaran aayo karong adlawa nga dili lisod ang pagkaplag ug higala nga makapakita kanimo kon unsay buhaton. Apan hinumdomi, ang paghinlo ug pagdemagnetize sa imong kasangkapan sa regular ug pagbutang sa imong cassettes sa tukmang paagi makapaarang nimo sa pagkalipay sa imong mga rekording sa dugayng panahon.

Sa karon, ang Watchtower Society nagagamag mga 500,000 cassettes kada bulan. Kini nagaapil sa mga rekording sa mga basahon sa Bibliya, mga dramang may mga tema sa Bibliya, ug mga honi sa mga awit nga gigamit sa mga Saksi ni Jehova sa tibuok kalibotan. Kining modernong paagi sa komunikasyon dakog bahin sa pagpakaylap sa maayong balita sa Gingharian sa tibuok yuta.—Mateo 24:14.

[Mga Letrato sa panid 17]

Paghinlo ug pagdemagnetize: duha ka sayong buluhaton aron mapahimuslag maayo ang imong cassettes