Kon Nganong ang mga Giraffe Walay Suliran sa Presyon sa Dugo!
SI Gn. Giraffe mao ang labing taas nga hayop sa yuta! Ang iyang sistema sa sirkulasyon katingalahan. Ngano? Kay ang iyang kasingkasing mobombag dugo abot sa iyang taas nga liog ug kinahanglan kanag dakong presyon. Bisan pa niana, inigpaubos niya sa iyang liog, ang kaugatan sa iyang utok ug mga mata dili mobuto. “Nganong ang hataas nga presyon dili makapabuto nianang delikadong mga kaugatan o makapaliki man lamang niana?” nangutana ang usa ka magasing siyentipikanhon.
Ang tubag mopatim-aw, sa bahin, nga tungod sa katingalahang gambalay sa pinong mga kaugatan nga tukmang matawag ang “kahibulongong pukot.” Ang dugo gikan sa mga arteriya sa liog moagi niining “kahibulongang pukot” sa dili pa makaabot sa utok. Kini manalipod sa utok gikan sa kalit nga pag-agos sa dugo.
Ang pagsud-ong niining ambongang mga linalang nga motikubo aron makainom makalingaw. Aron maabot sa ilang mga ulo ang tubig, kinahanglan unang ibikaka o pikoon ang ilang mga batiis sa unahan. Kon, samtang anaa niining bakikaw nga posisyon, himatikdan sa giraffe ang kapeligrohan, kini daling makabarog nga tul-id ug ipataas ang ulo niini. Kanang lihoka makapahinabo gayod ug kalipong tungod sa kalit nga pagkaubos sa presyon sa dugo. Bisan pa niana, sa walay duha ka segundo, si Gn. Giraffe makadalagan pahilayo. Ang usa ka artikulo sa South African Journal of Science nagpasidungog niini ngadto sa “katingalahang pagpaigoigo sa agos sa dugo sa ulo sa giraffe” ug miangkong gikinahanglan ang dugang panukiduki sa pagsabot niini.
Ang laing katingalahan, nga dugay nang nakapalibog sa mga siyentipiko, mao ang kabahin sa mga batiis sa giraffe. “Ang epekto sa grabidad,” matud sa Scientific American, “pagadahomong magpataas kaayo sa presyon sa dugo nga mapugos sa paggawas ang pluwido gikan sa mga kapilarya.” Apan walay ebidensiya niini. Ang mga giraffe dili makaagom sa varicose veins ug sa panghupong (paghubag sa tisyu). Ngano man kini?
Dili pa dugay, usa ka internasyonal nga grupo sa mga siyentipiko bag-ong nagsusi sa giraffe ug nakadiskobreg dugang mga detalye mahitungod sa katingalahang desinyo niini. Gisukod nila ang mga arteriya ug nadiskobrehang midako ang diametro ug kabaga sa pinakabungbong sa mga arteriya gikan sa kasingkasing paubos sa mga batiis. Kini, sumala sa South African Panorama, nagapugong sa “pagtigom sa dugo diha sa kaugatan ug sa varicose veins . . . diha sa mga batiis sa giraffe. Dugang pa, ang mibagang mga pinakabungbong sa mga arteriya ug ang baga, undanon nga panit sa mga batiis sa giraffe nagatabang niini sa pagbaton sa samang presyon.”
Ang Aprika mao ang bugtong kontinente diin ang mga giraffe nagakinabuhi gihapon sa lasang. Kon moduaw ka sa usa ka parke sa kahayopan didto, basin makakita ka niining malumong mga higante nga nagadalagan nga ambongan tabok sa kabugangan o mahilomong nagapanibsib sa mga dahon gikan sa mga tumoy sa kakahoyan. Kon mao, hinumdoming ang katingalahang sistema sa sirkulasyon ni Gn. Giraffe makaabot ug 5.5 metros sa itaas. Ug kon makabaton ka sa talagsaong kalingawan sa pagsud-ong kang Gn. Giraffe nga motikubo sa pag-inom, hinumdoming ang tawo naningkamot gihapon sa pagtuki sa iyang sekreto sa pagsagubang sa dagko kaayong kausaban sa grabidad. Nganong ang mga giraffe dili makaagom sa alta presyon o ubos nga presyon sa dugo? Si Jehova nga Diyos nga ilang Maglalalang mao lamang ang nasayod! Sila maoy iyang mga linalang nga katingalahang pagkadesinyo.—Job 37:14, 16.