Kinsa ang Nag-antos sa Kasakit sa Holocaust?
SA MIAGING Hunyo ang Kongreso sa Amerikanong Hudiyo mipadalag bukas nga sulat kang Papa Juan Paulo II. Kadto gipatik sa The New York Times, sa Hunyo 26. Kini miprotesta sa pagtugot kang Kurt Waldheim, nga presidente sa Austria, sa pakigkita sa papa diin siya giakusar nga nalangkit sa pagpamatay sa Nazi sa mga Hudiyo sa panahon sa Gubat sa Kalibotan II. Gikutlo si Waldhiem nga simbolo “sa mga paningkamot karon sa pagkunhod, sa pagpalsikpar ug sa pagkalimot sa Holocaust.”
Tapos midawat nga dili na mabakwi ang kasakit sa Holocaust, ang sulat miingon: “Apan siyempre ang labing sagradong kahusay sa atong kaliwatan mao ang panumdoman: sa dili pagkalimot sa pagpakahilom nga nahimong pagkawalay pagtagad, ang pagkawalay pagtagad nahimong panagkonsabo, ug sa kataposan makalilisang nga damgo sa pagpamatay sa milyonmilyon.” Si Waldheim, sumala sa sulat, “nagtinguha sa pagpabati diha sa mga biktima sa holocaust sa kataposang insulto niini pinaagi sa pagkalimot.” Ang papa gisaway tungod kay iyang “gipadaplin lang ang moral nga prinsipyo” ug gidawat si Waldheim sa Batikano. Ang sulat mipadayon:
“Posible ba, Imong Kasantosan, nga sa pagkalimot ni Waldheim [sa Holocaust] dunay sumbalik nga lanog, bisan unsa pa ka layo, sa pagkalimot usab sa Iglesya? Giatiman ba sa Imong Kasantosan ang pagkawalay pagtagad sa mga simbahang Katoliko sa Uropa sa kapalaran sa mga Hudiyo sa panahon sa Gubat sa Kalibotan II? Wala gayoy pulong bahin niini ang gipahayag sa imong Papal nga mga pagduaw sa nagkalainlaing mga nasod sa Uropa ug sa mga Kampo sa Kamatayon. Bisan pa sa tagsaong pagkabayani sa daghang indibiduwal nga mga Katoliko, dili ba tinuod nga, uban sa hilabihan ka daghan sa nahibilin sa kalibotan, ang opisyal nga mga iglesya sa katibuk-an nagpakahilom ug gipasagdan ang mga Hudiyo sa ilang kasakit? Ug kon ang Iglesya, nga niini nagalantaw ang milyonmilyon alang sa moral nga paggiya, dili gustong moatubang sa kamatuoran sa miagi, kon kini dili makatubag sa mga pangayog sagradong panumdoman, unsa na man lay paglaom alang sa uban?”
Sa pagkatinuod, ang gisulayang pagpuo sa milyonmilyong mga Hudiyo nagapangayog pagpahinumdom. Apan palandonga makadiyut. Dihang gihisgotan sa sulat ang Holocaust, dili ba gipresentar kini ingong Hudiyohanong holocaust lamang? Dili ba “kapalaran kadto sa mga Hudiyo” lamang nga niini giakusar ang mga simbahang Katoliko sa pagkawalay pagtagad? Ug sumala niining sulata, dili ba ang ‘nahibilin sa kalibotan ug ang ubang mga iglesya’ ang “mitalikod sa mga Hudiyo sa ilang mga kasakit?” Mga Hudiyo ba lamang? Dili ba nag-antos usab ang uban gawas pa sa mga Hudiyo?
Ang librong The Forgotten Holocaust nagpakita nga dihay tres milyones nga dili-Hudiyong mga Polako ang nalakip sa Holocaust. Ang A History of the Modern World naghisgot sa uban pang milyonmilyong mga tawo nga nalangkit niini. Bisan diha sa Alemang mga Saksi ni Jehova, ang dili-Saksi nga mga tuboran mitaho nga “duolan sa 10,000 ang nabilanggo” ug “kapin sa dos mil ang nangamatay sa mga kampong konsentrasyon.”
Busa, ang holocaust dili pagaisipong usa ka pag-atake sa mga Hudiyo lamang. Determinado si Hitler sa pagpuo sa tanang grupo sa mga tawo nga dili moyukbo sa iyang doktrina sa pagkalabaw sa Aryan. Gilakip ang mga Saksi ni Jehova tungod kay ilang gituohan ug gipadapat ang prinsipyo sa Buhat 17:26, 27.