Gikan sa Among mga Magbabasa

Kamatayon sa Usa ka Anak

Human nga nabasa ang mga artikulo bahin sa kamatayon sa usa ka anak, gusto kong komendahan kamo sa tinuod ug realistikong mga artikulo. (Agosto 8, 1987) Naagian namo sa akong asawa ang tanang butang nga inyong gipahayag tungod kay bag-o pa lang kaming nag-antos sa kamatayon sa among anak nga lalaking nagpanuigong lima ug tunga tungod sa atake sa kasingkasing. Among gibati ang mga pagbating pagkasad-ad, kasuko, ug uban pa, nga inyong gilista diha sa inyong artikulo. Lain pa, nakaagi kaming tanan sa “Mga Pulong nga Dili Kanunay Makahupay” ug labaw pa. Gipaabot gayod namo ang bag-ong kalibotan. Mawala lamang ang kasakit kon mabalik sa akong mga bukton ang akong anak nga lalaki. Sa makausa pa, salamat kaninyo sa mahigugmaon ug masinabtanong mga seryal sa mga artikulo, nga among naseguro nga daghan, sama kanamo, nakaagi ug natabangan.

K. I., Inglaterra

Dili ko ikasugid kon unsa ka dako sa akong apresasyon sa inyong mga artikulo bahin sa pag-atubang sa kamatayon sa usa ka anak. Nagpakamatay ang among anak nga lalaki sa miaging Agosto. Ang inyong impormasyon mipabati kanakong normal. Wala ako masayod nga daghan diay kaayong mga tawo nga sama kanakog gibati. Apan bisan pa nga gikinahanglan ko kaayo kadtong impormasyona bahin sa nagkalainlaing mga yugto nga agian sa tawo tapos sa kamatayon sa usa ka anak, dili ako makasabot nganong ang paghikog gilangkit sa ordinaryong kamatayon, sama sa makita diha sa panid 15. Walay ordinaryong kamatayon, nahibalo ako niana, apan makalilisang kaayo ang paghikog tungod kay ang paglaom sa pagkabanhaw wala diha kanunay. Ambot lang kon makita pa nako pag-usab ang akong anak nga lalaki.

J. D., Tinipong Bansa

Ang artikulo bahin kang George, nga naghikog, gilakip, dili sa pagpakita nga usa ka ordinaryong kamatayon ang paghikog, kondili sa pagpakita nganong ang amahan ni George nakasugakod pinaagi sa paghupay sa pipila ka mga teksto. Oo, seryoso ug makalilisang kaayo ang paghikog, apan sa matag kaso ang pasalig anaa kanunay nga si Jehova ug ang iyang Anak, si Jesu-Kristo, mobuhat sa hustong butang. Si Jehova nahibalo sa tanang mga sirkumstansiyang nalangkit, ang gidakoon sa responsabilidad, ug ang posibilidad sa paghinulsol. Kita bug-os makasalig kaniya sa pagpadapat sa iyang kaluoy sa bug-os nga sukod nga mahimo sibo sa iyang kabubut-on.—ED.

Paghunos sa Kinabuhi sa Uban

Ako nagsulat kaninyo mahitungod sa pahayag nga gihimo diha sa artikulong “Kalinaw sa Kalibotan—Sa Unsang Paagi ug Kanus-a?” (Hunyo 8, 1987) Gipahayag ang mga pulong bahin sa mga Saksi ni Jehova: “Sila nahimong tawong malinawon, ug ilalom sa bisan unsang kahimtang sila dili mohunos sa kinabuhi sa ilang isigkatawo.” Nagpasabot ba kini nga dili kita makagamit ug mapatayng puwersa aron sa pagpanalipod sa atong kaugalingon ug sa atong pamilya?

H. N., Tinipong Bansa

Ang mga pahayag ‘mohunos sa kinabuhi sa isigkatawo’ nagpasabot sa may panghunahunang paningkamot sa pagpatay ug tawo. Dili kini himoon sa tinuod nga Kristohanon. Kon atakehon ug dili makaikyas gikan sa iyang tig-atake nga desidido sa pagsamad o pagpatay, sagngon sa mga Kristohanon ang mga kulata o kaha mosukol aron sa pagdepensa, tingali gamiton ang bisan unsa nga makita sa pagpanalipod sa iyang kaugalingon o sa uban. Apan kinahanglang sa pagdepensa lamang ang iyang mga aksiyon. Dili gayod niya patyon ug silotan ang iyang tig-atake apan maningkamot lamang sa pagsugpo sa atake. Kon makadawat ug makamatayng hampak ang tig-atake, kini sa aksidente, dili tinuyo.—ED.