Pagpaniid sa Kalibotan
Mabungahong mga Bakasyon
Angay himoon sa mga ginikanan ang mga bakasyon sa mga bata sa tunghaan nga mabungahong mga panahon, miingon ang taga Mexico nga sikologo ug propesor sa unibersidad si Rafael Marti̇́nez. Pinaagi sa maayong pagplanong daan, ang mga ginikanan makapaangay sa instruksiyong ihatag sa balay ug sa tunghaan. Sumala sa taho sa mantalaang El Universal sa Mexico City, miingon si Marti̇́nez nga “ang tunghaan maoy usa ka sentro sa edukasyon nga dili makapuli sa edukasyon nga ihatag sa mga ginikanan ilang mga anak.” Lakip sa ubang mga butang, siya nagsugyot nga ang mapasiboong iskedyol nga naglakip sa pagbansay sa mga trabaho sa balay, pila ka trabaho nga kapangabuhian, ug sa pagtabang sa baldado ug sa mga tawong nanginahanglan. Mitambag si Marti̇́nez nga ang “panahon sa bakasyon dili angay magkahulogang bug-os lulinghayaw ug pahulay, kondili, usa hinoon ka kausaban sa kalihokan.”
Kabalaka Alang sa mga Trabahante
Nahimong hanas kaayo ang mga kompaniyang Hapones sa daghang mga dapit. Apan, sila, nagapanuko sa pagpakunhod sa mga trabahante bisan ug gikinahanglan. Gipakubsan pa gani sa temporaryo sa usa ka kompaniya ang semana sa pagtrabaho sa tulo ka adlaw aron dili mapahawa ang mga trabahante niini. Sa normal, naanad ang mga trabahanteng mga Hapones sa tibuok-kinabuhing trabaho uban sa ilang kompaniya. Paeskuylahon pa gani sa ubang mga kompaniya ang mga anak sa ilang mga trabahante ug dayon patrabahoon sila sa kompaniya. Apan tungod sa kausaban sa ekonomiya ug aron makaindig sa mga tiyanggihan sa kalibotan, ug sa sobrang mga trabahante sa tanang ang-ang, ang ubang mga kompaniya walay kapilian gawas sa pagpakunhod sa ilang trabahante. Dakong paningkamot ang gihimo sa pagpangitag bag-ong trabaho alang sa mga trabahante, tungod sa pagkamaunongon sa usa ug usa.
Alad nga Makadula ang Baboy
Dihang ang mga alad sa baboy himoong mga dulaanan sa baboy, ang mga baktin “may aberids sa pagtubo sa adlaw-adlaw nga kuwatro porsiento nga mas taas kay sa mga baboy nga dili modula.” Kanang maong report, nga gipatik sa Calgary Herald bahin sa mga resulta sa pagdukiduki sa siyentipiko nga si Al Schaefer diha sa Agrikultura sa Lacombe Research Station sa Canada, nakitang maayong balita sa mga tigbuhig baboy. Ang pagdukiduki ni Schaefer nagpakita nga dihang ang mga baboy may kadulaan aron sa pagpuliki kanila, mas maayo ang ilang tubo. Iyang gigamit sa eksperimento ang ordinaryong ligid sa awto nga gibitay sa kadena diha sa tunga sa alad. Nagdula ang mga baboy “pinaagi sa pagpalabyoglabyog sa ligid sa awto o sa pagpaak sa goma.” Niining paagiha, ang mga pag-atake sa mahasmagong mga baboy diha sa alad naliso diha sa “dulaan” imbes sa ilang mas talawang mga kauban sa alad. Ingong resulta, human sa duha ka tuig nga pagtuon, ang mga baboy niining alara nga gibaligya sa tiyanggihan mas diyutay ug mga samad ug menos nga pagkawala sa unod.
Mga Brilyantitos Gikan sa Bitoon
Ang mga tigdukiduki gikan sa U.S. National Bureau of Standards ug ang Enrico Fermi Institute sa Chicago, nga nagtuon sa mga piraso sa bulalakaw, nakakitag makaikag nga diskoberiya. Ang ubang mga bulalakaw adunay mga brilyantitos. Sa pagpailalom sa mga piraso sa bulalakaw sa X-ray ug sa pagpabrilyo pinaagi sa electrone nakita sa mga tigdukiduki ang tin-awng pagbrilyo diha sa tinagsip sa brilyante, mitaho ang New Scientist. Nagtuo ang mga siyentipiko nga mahimong midasok ang mga brilyante gikan sa mga atomo sa karbon nga gibuga sa usa ka bitoon ug mitapos nga “tingali ang kinaiyahan mas maayong mohimog brilyante kay sa bisan unsang labing maayong sintitikong brilyanteng hinimo sa laboratoryo nga nadiskobrehan sukad.”
Hataas nga Katulog
Ang mga magmimina nag-ingon nga nakakitag tagsaong diskoberiya samtang nangalot ug bulawan dili pa dugay diha sa tugnawng dapit sa Siberia sa Yakutia, ibabaw ug diyutay sa Arctic Circle. Katloan ka piye sa ilalom sa yuta sa polar tundra, sila nakadiskobreg triton, nga usa ka ikogang mananap sa tubig nga kaamgid sa newt (tabili), nga naputos sa yelo. Ang ahensiya sa balita nga Tass miingon nga, sa katingala sa mga magmimina, tapos sa pila ka gutlo sa adlaw, “mihinay kinig kamang . . . sa iyang lima ka tudlong mga paa, nga gilingi ang iyang ulo, nga may budlat linging mga mata, sa isigkakilid.” Namatay kini sa milabay ang pila ka adlaw. Ang mga siyentipiko sa Sobyet miingon nga diha sa kahimtang sa menos nga paglihok, nga nailhang anabiosis, posible nga mabuhi kining mga mananapa sa gatosgatos, libolibo ka tuig pa gani.
Pag-atake sa mga Pirata sa Musika
Ang industriya sa plaka ug tape nakig-away batok sa mga pirata nga sa ilegal nga paagi nangopya sa mga teyp ug namaligya niana. Ang usa ka kompaniya nakaugmad ug sistema nga “moputol,” o mopala, sa usa ka guhit sa frequency sa rekording sa pagkaagi nga ang circuits nga gitaod moreaksiyon sa pangputol nga awtomatikong mopahunong sa tape recorder. Apan, ang mga eksperto nga nakapatalinghog sa maong paagi miinsister nga ang pangputol dakog epekto sa kalidad sa musika. Busa, ang mga musikero, mga teknisyan, ug ang mga mamamalit ug mga plaka nabalaka nga ang pangputol, nga gidesinyo sa pagsumpo sa mga namiktimang mga pirata sa industriya sa musika, makadaot gayod sa daghang mga tuig sa teknolohiya nga gidesinyo sa pagpatungha ug daw buhi nga rekording sa sound ug nagahimo kanila nga mga bag-ong mga biktima.
“Mga Binhi sa Rebelyon”
Sa Hulyo niining tuiga, 110 ka magtutudlo sa New Jersey gitaral sa hukmanan tungod sa paghagit sa mando sa hukmanan sa pagtapos sa ilegal nga welga. Ang nagadumalang maghuhukom, si Paul R. Huot, miingon nga ang ilang “pagsukol sa iyang mando sa pagbalik sa trabaho nakadunot sa mga estudyante ug nakadasig sa dili-pagtahod sa balaod ug sa pagsukol sa hukmanan,” mitaho ang The New York Times. Nabalaka nga mapadpad ang katilingban gikan sa pagtahod sa balaod, sosyal nga paggawi, ug disiplina, ang maghuhukom miingon: “Dili na matin-aw ang tanan. Ang tanan hanap na. Nawala na kanato ang maayong batasan. Nawala kanato ang katahuran. Nawala kanato ang kaugdang.” Ang rason? “Nagkadiyutay na ang mga tawong nakaila sa kalainan sa husto ug matarong,” miingon si Huot. “Ang sala karon mao ang pagkahimong madakpan, dili ang paglapas.” Gipasanginlan ang mga ginikanan, iyang gisaysay nga ilang tudloan ang ilang mga anak sa pagsunod sa balaod, samtang sila nagalimbong sa mga buhis, gipadako ang kuwenta sa gastos, o nagalapas sa gikusgon sa pagpadagan sa sakyanan. “Nagtuo ako nga nanagpanom kita niining nasora ug mga binhi sa rebelyon samag buang.
Musika Alang sa Ilang mga Dalunggan
Aron matigom ug mapatay ang mga ilaga, gipatokar sa sugilambong nga si Pied Piper sa Hamelin ang iyang plawta. Dili pa dugay, usa ka “Pied Piper” mitungha sa Tokyo, nga nanglumay sa mga ilaga pinaagi sa modernong mga tubo sa musika. Ang “Piper” karon maoy usa ka kompaniya nga nagaespisyalisar sa paghinlo sa palibot, ug tapos sa 20 ka tuig nga pagdukiduki, sumala sa The Daily Yomiuri, kini nakaugmad ug mga sistema sa tubo nga nagasuyop aron sa pagwala sa mga ilaga gikan sa habog nga mga tinukod. Ang mga tubo may mga bangag sa matag pito ka piye nga gipahiluna diha sa mga salog ug mga bungbong. Ang musika? Nagakomunikar ang mga ilaga pinaagi sa ultrasonic waves nga may mga frequency nga 20 ngadto sa 30 kilohertz, ug bisan ang waves gikan sa mga alambre sa kompiyoter makadani kanila. Mopagawas ang mga tubo ug ultrasonic waves sa “pagtawag” sa mga ilaga, nga mosulod sa mga lungag ug suyopon ngadto sa gulaanan, nga matuok sa carbon dioxide, ug dayon puston sa vinyl nga pligo alang sa limpiyong paghipos. Gikan sa Hamelin ngadto sa Tokyo, ang konklusyon sama gihapon: Ang pagkagiyan sa musika nga ipaagi sa tubo makadaot sa mga ilaga.
Mga Multa, mga Multa, ug Dugang mga Multa
Ang kaulohan sa São Paulo, Brazil, nga may gibanabanang 12 milyones ka molupyo, may mga problema sa trapiko. Sa usa ka bulan, ang total nga 1,218,491 ka multa sa trapiko ang nahatag. Sa kataposan sa tuig, tres milyones sa kuwatro milyones ka sakyanan sa siyudad ang gilaomang mamultahan. Kada bulan, hapit 30,000 ka sakyanan ang namultahan ug Cz$1,290 (mga $30, U.S.) tungod sa pagparking sa daplin sa dalan, mitaho ang O Estado de São Paulo. Anaa sa mga libro, apan wala ipatuman, mao ang mga multa sa pagdalag panon sa mga baka diha sa mga karsada (Cz$1,149) ug sa pagparking sa karomatang giguyod ug kabayo diha sa daplin sa dalan (Cz$384). Ang pagbilin ug butang diha sa bentana nga mahulog diha sa lumalabay magkahulogan ug multa nga Cz$99. Ang usa ka hitabo, nga mahinumdoman sa kadaghanan, mao kadtong bahin sa baboy nga gibuhi diha sa balkon sa panaderiya nga nahadlok ug miambak sa daplin ug nahagbongan ang lumalabay, nga nakabali sa iyang bukton. Gikobra kining multaha.
Nakutaw nga Katubigan
Sumala sa mga tinubdan sa Israel, ang mga tuboran sa tubig alang sa Israel ug sa Jordan nameligrong madaot gayod tungod sa dakong mga trabaho nga gihimo sa Syria, ang ilang silingan sa sidlakan. Ang proyekto nga ginahimo karon mao ang pagpasimang sa agos sa labing dakong katampo sa suba sa Jordan, ang Nahr al Yarmuk, sa pagpatubig sa “10,000 ka ektaryang yuta” sa amihanan. Tungod niini, dakong mga linaw ang gikalot, nga ginasumpay sa sistema nga “kapin sa 260 ka kilometro sa bukas nga mga agianan sa tubig.” Nagplano ang Syria sa pagbalhin sa 500,000 ka molupyo ngadto sa habagatang dapit sa Golan Heights.