Yellowstone, Unang Nasyonal nga Parke

Ang labing karaan, labing dako, ug labing iladong nasyonal nga parke sa Tinipong Bansa. Nahimutang diha sa Wyoming ug natukod sa 1872, kini may 900,000 ka ektarya ug ginaduaw sa kapin sa duha ka milyong tawo kada tuig. Habog nga mga bukid, laglom nga mga dal-og, nagadaguhob nga mga busay, matin-awng mga linaw, lunhawng mga lasang, ug malabong nga mga tawid—usa ka matahom nga lugar alang sa uso, usa ug bison nga nagalibodlibod sa mga kasilinganan ug ang mga agila, mga gansa, ug mga pelican nga nagaalima sa ilang mga pamilya didto.

Nabantog ang Yellowstone tungod sa libolibong mainit nga mga tubod sa tubig ug sa gatosgatos nga mga tubig nga nagabugwak gikan sa yuta—nanguna niini mao ang Old Faithful, nga gipakita dinhi. Kini mobugwak sa aberids sa matag 65 minutos, apan sa karon nga mga katuigan kini siya dili na kaayo matinumanon.

DEVIL’S TOWER, Unang Nasyonal nga Monumento

Ang Wyoming ang unang nakabaton ug nasyonal nga monumento. Dako, nga daw mikaging nga tuod sa kahoy, ang Devil’s Tower gideklarar nga ingon niini sa 1906. Gikaingon nga bolkaniko sa sinugdan, kini nagbuntaog sa gihabugong 264 ka metro ngadto sa panganod. Ang mga geologo nag-ingon nga mao kini ang nabilin sa kagun-oban sa bolkan. Sa milabay ang panahon, kini mikankan hangtod sa porma niini karon.

Ang mga sugilambong sa Indian nag-ingon nga pito ka gagmayng Indian nga mga batang babaye gigukod sa mga uso ug mitago sa ubos nga bato, ug aron sa pagluwas kanila, gipataas sa mga diyos ang bato hangtod sa panganod. Ang mga batang babaye, matud pa sa sugilanon, makita gihapon ingong pito ka bitoon, ang Pleiades. Gikamras sa nasukong mga uso ang mga kilid sa bato sa paningkamot sa pagkuha kanila—ang mga agi sa kuyamoy makita gihapon ingong mga badlis diha sa kilid sa bukid.

Mao kana ang sugilambong. Apan usa ka butang ang tino: Sa likod sa katahom sa unang nasyonal nga parke ug sa unang nasyonal nga monumento mao ang ilang Maglalalang, ang buhi nga Diyos si Jehova: “Pinaagi sa iyang gahom gipalig-on niya ang mga bukid.”—Salmo 65:6.