Gikan sa Pag-ungaw sa Kamatayon

SA NAGTAN-AW ako sa akong asawa, si Bonnie, nga naghigda sa katre sa ospital, dili ako makapugong sa pagpalandong sa kakalit sa hitabo. Naghigda siya nga gipapitlan ang mga mata aron dili mausik ang gamayng kusog nga nabilin sa iyang lawas bisan sa pagkipat lang sa mata. Luspad kaayo ang iyang panit; mihanap na gani ang kolor sa iyang talomtom. Sayo niadtong buntaga ang doktor miingon, “Seguradong mamatay siya karong adlawa.” Ang usa sa mga nars miingon: “Dili na siya magdugay hangtod sa udto.”

Nganong nahiagoman ni Bonnie ang maong grabeng kondisyon? Nganong ang panalangin sa pagbaton ug bag-ong anak nahimong situwasyon nga makapatayg kinabuhi? Tugoti ako sa pag-asoy ug balik sa hitabo nga misangpot sa malisod nga pagsulay sa akong asawa.

Sa dihang nahibaloan ni Bonnie nga nagsabak na usab siya, nalipay kami apan nabalaka. Nabalaka kami tungod kay ang among diyes-anyos nga anak nga babaye, si Ashley, gipanganak nga cesarean ug tungod kay nakuhaan si Bonnie duha ka besis sukad niadto. Nakadugang sa makapabalakang mga kamatuoran mao ang posibilidad sa pagtungha sa isyu bahin sa mga pagdugang sa dugo. Kami nagtuo nga nahibalo ang atong Maglalalang sa labing maayo sa dihang mitambag siya diha sa Buhat 15:29, “Pagpahilayo . . . gikan sa dugo.”

Kalit nga Krisis

Mga lima pa ka semana una pa sa petsa nga gipaabot ni Bonnie nga siya manganak midesider kami sa pagpalabay sa Sabado, sa Pebrero 28, 1987, sa San Diego Zoo. Wala kami mahibalo nga wala pay 24 ka oras, ipanganak ang bata. Oo, sa pagkasunod buntag ang among kalmadong mga pagbati napusgay dihang nakamata si Bonnie nga nagdugo. Gitawag dayon namo ang doktor, ug sa pila lang ka minuto mipaingon kami sa ospital.

Nahibalo ang doktor sa among baroganan bahin sa mga pagdugang sa dugo, ug tungod niini, siya midesider dihadiha sa pag-opera pinaagig cesarean. Miadto kami sa lawak nga operahanan diin didto, sa pila lang ka yugto, gitunol sa doktor ang among bag-ong anak nga babaye sa nars. Gipakita makadiyut sa nars ang among anak kang Bonnie, dayon gidala ang bata sa nurseriya. Gisultihan ako sa paghulat sa lawak hulatanan, ug makahimo ako sa pakigsulti sa akong asawa sa recovery room sa mga tunga sa oras.

Kasamtangan, ang pipila namo ka mga higala nagtigom sa lawak hulatanan, busa nagdahom ako nga normal ang tanan ug mipahayag nga may bag-o na kaming anak. Wala ako mahibalo nga sa panahon sa cesarean nga operasyon, nadiskobrehan sa doktor nga si Bonnie dunay sakit nga nakapugos sa doktor sa pagkuha sa matris. Sa milabay ang mga duha ka oras, migawas ang doktor ug gipahibalo ako sa nahitabo. Siya miingon nga sa dihang nagbati si Bonnie, ang gidaghanon sa iyang hemoglobin maoy 12.5 apan mius-os sa 6.1. Giisip siya nga anaa pa siya sa peligrosong kahimtang, apan nagtuo ang doktor nga maayo ra ang tanan. Ugaling, misugod sa pagtungha ang mga problema.

Sa mga 15 minutos human nakigsulti sa doktor, gitawag ang akong ngalan diha sa intercom sa pag-adto sa nurseriya sa pagtan-aw sa bata. Sa dihang miabot, gipahibalo ako nga ang among bag-ong anak milagom ug mihunong sa pagginhawa. Naulian ang bata ug gihatagag oxygen apan nagkinahanglag daghang mga eksaminasyon, diin ang pipila hayan moresultag grabeng mga komplikasyon. Gipapirma akog mga porma sa pagsugot sa pag-eksamin sa bata ug sa samang panahon gipirmahan ko ang usa nga nag-ingon nga walay dugo nga ihatag.

Sa kataposan, human sa pila ka oras, nakakita ako sa akong asawa ug nakapakigsulti kaniya. Siya alisto ug positibo. Mapasalamaton kami kang Jehova nga daw maayo ang lakat sa tanan. Wala nako siya sultihi nga ang bata may sakit tungod kay dili ko gustong mabalaka siya.

Migrabe ang Kondisyon ni Bonnie

Sa ulahi niadto gihapong adlawa, sa Dominggo, migrabe ang kondisyon ni Bonnie. Sa dihang mikuha silag kuwenta sa dugo, ang iyang hemoglobin mius-os ngadto sa 2.5. Siya nagdugo sa sulod sa tiyan! Dayon mius-os ang iyang presyon sa dugo, ang tanang dagkong mga timaan nagakaluya, ug naglisod siya sa pagginhawa. Sa pagkabuntag sa Lunes, si Bonnie nagsalimoang ug usahay wala sa kaugalingon. Ang boktor nangonsulta ug mga espesyalista sa tibuok gabii. Natuki na niya ang paggamit sa artipisyal nga dugo. Natino niadto nga ang posibleng tambal nga makaluwas sa iyang kinabuhi mao ang hyperbaric oxygen chamber.

Ang magasing Awake! sa Mayo 22, 1979, nagbatbat niining paagiha sa pagtambal ingong usa nga nagapailalom sa lawas diha sa 100 porsiento nga oksihino sa presyon nga mas labaw kay sa atong atmospera. Ang taas nga presyon makatunaw sa oksihino diha sa mga tisyu sa lawas sa kaespisohon nga mas taas kay sa normal. Ang chamber gamiton sa pagtambal sa pagkawala sa dugo, grabeng mga paso, ug mga impeksiyon. Kinahanglang ibalhin si Bonnie sa Memorial Medical Center sa Long Beach, nga dunay madaladalang hyperbaric chamber ug hanas nga mga teknisyan sa pagpaandar niana.

Karong panahona grabe na kaayo si Bonnie nga dili na niya maagwanta pa ang 30-minutos nga pagsakay sa ambulansiya ngadto sa laing ospital. Busa gihikay nga ipasakay siyag helikopter, nga luparon lamag kuwatro minutos. Ang nars nga sakop sa medikal nga grupo sa helikopter, human nakakontak sa ospital ug nakahibalo nga ang gidaghanon sa hemoglobin mius-os sa 2.2, mitubag: “Nasayop tingali kamo. Patay na kana siya!”

Gisugdan ang mga pagtambal sa hyperbaric sa Lunes sa gabii ug nagpadayon sa tibuok gabii, usa ug tunga ka oras diha sa chamber ug duha ug tunga ka oras sa gawas. Ang unang duha ka pagtambal daw nakabaskog kang Bonnie ug nakapabalik sa iyang kusog. Apan ang kaapiki sa sulod sa chamber nakabalisa kaniya. Ang chamber dunay intercom nga mahimo ang pagpakigsulti, busa akong gigamit kini sa pagpakalma kaniya. Pinaagi sa paghisgot sa Paraisong yuta nga gipahayag sa Bibliya diha sa Pinadayag 21 ug Isaias kapitulo 35 ug 65 ug gipahinumdoman siya sa mahigugmaong pagtagad ni Jehova, milampos ako sa pagparelaks kaniya diha sa chamber.

Gipugos sa Pagdawat sa Dugo

Sa Martes sa buntag giduol ako sa doktor ug nangutana kon nabag-o ba ang akong baroganan bahin sa dugo. Siya miingon nga dunay pulahong likido nga migawas gikan sa samad sa operasyon ni Bonnie nga nagpaila nga nagdugo gihapon siya. Malig-on ang akong desisyon: walay dugo, buhi o patay. Ang matarong nga mga sukdanan sa Diyos dili mabungkag. Busa miingon ang doktor nga iyang hapinan ang samad sa operasyon ug espesyal nga bendaheng foam nga gidesinyo sa pagpahunong sa paggawas sa dugo. Daw miobra kini.

Niining panahona gipugos kami sa uban namong mga paryente nga dili mga Saksi ni Jehova sa pagdawat sa pagdugang sa dugo. Masabtan kini tungod kay mao usab kanay gisulti sa tanang doktor nga nalangkit: “Aron maluwas ang iyang kinabuhi, ang imong buhaton lamang mao ang pagtugot kanako sa pagdugang kaniya ug dugo.” Ang usa sa membro sa pamilya aktibong nangitag tanang paagi sa pagpugos sa pagdugang sa dugo, gikontak ang kapolisan, usa ka abogado, ug mantalaan.

Sa pagkakaron ang administrasyon sa ospital nabalaka nga basig ikiha kini kon dili maluwas si Bonnie ingong resulta sa pagdumili sa pagdawat sa pag-abuno sa dugo. Dihay gihimo nga miting uban sa usa ka empliyado sa ospital nga usa sa mga Saksi ni Jehova. Siya nakigsulti sa mga administrador sa ospital sulod sa 45 minutos bahin sa baroganan sa Bibliya sa dugo. Tingali napatagbaw niya sila tungod kay misugot sila sa pag-opera sumala sa among bug-os nga kagustohan.

Nag-ungaw sa Kamatayon

Kasamtangan, migrabe ang kondisyon ni Bonnie. Sa pagka Huwebes sa buntag wala siya sa iyang kaugalingon halos sa tanang panahon, ug 170 ang gikusgon sa pinitik sa iyang kasingkasing nga nagapahulay, nga taas kay sa normal nga mga 70. Iregular ang iyang presyon sa dugo. Ang gidaghanon sa iyang hemoglobin maoy 2.2, ug ang hematocrit (ang gidaghanon sa mga selula sa dugo nga nagasirkular) miabot sa makalilisang nga 6. Ang normal maoy 40-65.

Dili gayod ako makalimot niadtong Miyerkoles sa buntag. Ang mga doktor nga misusi sa kiliran ni Bonnie mihangyo nga makigkita kanako. “Mao na kini,” sila miingon. “Tawga ang mga paryente ug ang iyang mga higala. Seguradong mamatay na karong adlawa si Bonnie. Kami wala nay mahimo. Mahimong mamatay siya sa atake sa kasingkasing o sa stroke kun atake sa paralisis. Bisan ang pagdugang sa dugo dili na makatabang ning higayona. Milapas na siya nianang tanan. Among gibalhin siya nga usa ka pasyenteng ‘do not resuscitate’ code status, nga nagkahulogan nga dili na namo siya tambalan o paulian pa siya kon moubos ang presyon sa iyang dugo.”

Sukad niadtong yugtoa, dili na limitado ang mga bisita sa pamilya lamang. Dinosenang kaubang mga Saksi nga nagpabilin sa lawak hulatanan gitugotan sa pakigkita kang Bonnie sa dili pa siya mamatay. Human nga ang tanan nakapanamilit, gihatagan sa doktor si Bonnie ug drogang gitawag Pavulon aron dili siya makalihok. Dili palihokon niining tambala ang tanang kaunoran. Ang tawo matulog ug lawom. Daw nag-coma ang hitsura ni Bonnie. Ang doktor miingon nga wala siyay bationg sakit niining kondisyona kon ugaling atakehon siya sa kasingkasing ug siya mamatay nga malinawon. Niining yugtoa ang iyang mga mata gipapitlan aron dili mausik ang gamayng kusog nga nabilin sa iyang lawas bisan sa pagkipat lang sa mata.

Sa unang higayon, ang akong anak nga si Ashley ug ako mipauli sa balay aron maligo ug makapahulay. Sa pagsulod sa balay, miluhod kami ug mihilak dihang among gibubo ang among mga kasingkasing kang Jehova. Ug bisan asa kami molingi, nakapahinumdom kanamo ang balay kang Bonnie. Naamgohan namo kon unsa siya ka maayong inahan ug asawa. Gihisgotan gani namo ang tanang butang nga nahimo ni Bonnie alang kanamo nga kami na ang magbuhat sukad karon. Kami nahibalo nga ang among pagkamatinumanon makatino kanamo sa pagkakita kaniya pag-usab human nga laglagon sa Diyos kining daang sistema ug pulihan kini sa usa ka bag-ong sistema.

Sa pagka Miyerkoles sa gabii mibalik kami sa ospital, diin ang among nahimo lamang mao ang paghulat, apan wala kami maghulat nga nag-inusara. Ang mga paryente ug kaubang mga Saksi didto kanunay sa paglipay kanamo. Milabay ang Miyerkoles, ug sa katingala sa mga empliyado sa ospital, buhi gihapon si Bonnie sa Huwebes. Sa ulahi niadtong hapona, giduol ako sa doktor ug miingon nga sulayan na usab niya ang hyperbaric nga pagtambal. Gipadayon ang maong pagtambal sa tibuok gabii.

Miarang-arang ang Kondisyon sa Lawas

Sa pagka Biyernes sa buntag, natulog ako sa pasilyo sa dihang gipukaw ako sa mga doktor. Gipasaligan dayon nila ako nga ang balita nga ilang dala maayo ug dili daotan. Miaarang-arang ang kondisyon sa panglawas ni Bonnie. “Nasayod ka ba? Kita may rason sa paglaom,” miingon ang usa ka doktor. “Kon mous-os ang iyang presyon sa dugo, dili na makataronganong dili siya tambalan, busa giusab na nako ang mga instruksiyon sa iyang tsart. Maayo nimong hinumdoman nga dili gihapon kita makaseguro dinhi tungod kay wala pa kami makaagi niini nga walay paggamit ug dugo.”

Sa pagka Sabado sa gabii diha ako sa kiliran sa katre ni Bonnie uban sa iyang nars. Among gibitay ang hulagway sa among bag-ong anak ibabaw sa ulo ni Bonnie bisan pa nga gipapitlan gihapon ang iyang mga mata. Among gihimo kini aron nga inigbuka sa iyang mga mata, ang una niyang makita mao ang hulagway sa iyang bag-ong anak. Naglaom kami nga mohatag kini kaniyag kalig-on sa pakigbisog nga mabuhi. Ilalom niini nga mga kahimtang, akong gisultihan ang nars nga among ika-18 nga anibersaryo sa kasal sa pagkasunod adlaw. Sa pagkadungog niini, iyang gipahiran ang mga luha gikan sa iyang mga mata.

Maayong adlaw ang Dominggo tungod kay misaka ang gidaghanon sa hematocrit ni Bonnie ngadto sa 11, ug wala na siya hatagig Pavulon ug nakamata gikan sa daw paralisis nga kahimtang nga iyang giagian sulod sa upat ka adlaw. Apan nagpasidaan ang doktor: “Ayaw kaayo paglaom tungod kay mahimong mahitabo ang dili-maayo. Pagkalipay lang unya kon motaas na ang iyang hematocrit sa 20.”

Bisan pa, midako ang akong paglaom. Ang pagkakita sa akong asawa nga nagbuka ang iyang mga mata sa unang higayon sa upat ka adlaw daw samag gihatagan ug bag-ong kinabuhi. Dili makasulti si Bonnie tungod kay gibutangan siyag aparato sa pagginhawa ug luya kaayo. Gipahalipayan ko siya sa malipayong anibersaryo. Ang iyang mahimo lamang mao ang paglihok sa iyang baba, apan walay tingog nga migula. Luya kaayo siya nga bisag ang paghawid ug lapis ug pagsulat dili gayod madaog.

Niining yugtoa gihikay nga ibalhin ang among bag-ong anak sa Long Beach Memorial aron makita ni Bonnie ang tinuod nga bata ug dili lang hulagway. Sa dihang miabot ang bata ug gidala ngadto sa intensive care unit, gipakita sa mga nars ang bata kang Bonnie. Ilang giihap ang mga tudlo ug mga kumagko, gipakita ang tanang bahin sa lawas aron mahibalo si Bonnie nga normal ang bata ug mahimsog. Sa mapasalamaton, naulian sa lawas ang bata.

Apan, husto ang doktor, sa dihang siya miingon sa dili pagkalipay dayon. Bag-ong mga problema ang mitungha. Natugkan si Bonnie ug duha ka matang sa pulmoniya, ug ang ubang bahin sa iyang wala nga baga mihiyos. Gawas pa niini, natukian siya nga dunay Legionnaires’ disease. Ang bisan hain niining mga komplikasyona makapatay unta kaniya. Apan ikalipay kong isulti nga walay usa niini ang mipatay kaniya. Sulod sa 15 ka tuig si Bonnie nag-alagad ingong payunir, nga maoy pagtawag sa bug-os panahong mga ministro sa mga Saksi ni Jehova. Busa ang iyang nahimong mga paglakawlakaw diha sa ministeryo ug sa regular nga programa sa mga ehersisyong aerobic nakahatag kaniyag maayong panglawas. Kini sa walay duhaduha nakalig-on kaniya sa paglabang niining mapait nga mga kasinatian.

Human nga nawad-an ug 80 porsiento sa iyang dugo, ug nakagugol ug 28 ka adlaw sa ospital (diin 22 niini gigugol diha sa intensive care), ug 58 diha sa mga yugto sa sulod sa hyperbaric chamber, si Bonnie sa kataposan gitugotan sa pagpauli. Nahibulong, ang doktor miingon: “Maayo na ang iyang panagway. Milagro kini, mao lang kanay ikasulti ko.”

Bisag malisod kaayo kadto, ug makasubong panahon, dihay mga positibong mga resulta usab. Ang mga doktor, mga nars, mga administrador, mga tawo sa ubang mga pagtuo, ug ang palumagian sa balita tanan natabangan sa pagsabot pa sa hunahuna sa Bibliya bahin sa dugo. Sila nahimong mga saksi usab sa dili-matarog nga pagtuo nga nagalihok.

Human sa duha lang ka bulan sukad sa iyang makalilisang nga kasinatian, migula na usab si Bonnie sa pagsangyaw sa katilingban pag-usab, nagahimo sa buluhaton nga iyang labing gimahal. Ug ingong dugang panalangin, siya dunay bag-ong payunir nga kauban, ang among anak nga babaye, si Allie Lauren.—Sumala sa giasoy ni Steven M. Beaderstadt.

[Blurb sa panid 12]

Ang nars sa tem sa mananambal sa helikopter miingon, “Patay na tingali kana siya!’

[Blurb sa panid 14]

Ang doktor miingon: “Kita dili pa makaseguro niini tungod kay wala pa kami makaagi ug ingon niini sukad nga walay pagaamit ug dugo”

[Letrato sa panid 13]

Ang akong asawa gitambalan diha sa hyperbaric oxygen chamber nga sama niini

[Tinubdan]

Memorial Medical Center sa Long Beach

[Letrato sa panid 15]

Ang akong asawa ug ang among anak human nga naulian sila