Gikinahanglan sa mga Batang Ahat ang Mahigugmaong Pag-atiman
KADTO alas tres sa kaadlawon sa Dominggo. Kon unsay nakabikil sa ahat nga kasakit sa pagpanganak, ako wala masayod. Apan nagduda ako nga basin sobra ang akong gibuhat nga pagdawat ug bisita. Bisan kon unsay hinungdan, ang akong gamayng batang lalaki duol nang mahimugso nga sayog usa ka bulan.
Ang kasakit sa pagpanganak dugay ug dili piho. Sa tibuok adlaw sa Dominggo ug tibuok gabii sa Dominggo, gibati ko ang kasakit sa pagpanganak apan ako wala manganak. Kadaghan nga ang ulo sa bata madayag na sa komadrona sa usa ka pag-utong (paggawas sa ulo, sumala sa pagtawag niini) nga unya bug-os mawala nga dili na makaptan sa sunod nga pag-utong. Sa alas kuwatro sa buntag sa Lunes, 25 ka oras sukad sa pagsugod sa kasakit sa pagpanganak, gihukom sa komadrona gikan sa pagpamati sa pinitik sa kasingkasing sa bata nga naglisod ang bata. Gihatagan niya akog oksiheno ug gidala dayon sa ospital. Tulo ka oras sa ulahi, si Danny natawo.
Ang akong bana, si Bill, ug ako nakakitang siya nalisdang moginhawa, sanglit wala kaayo moobra ang iyang mga baga. Kami gipakugos nila kaniya sa pila ka segundo, ug nianang panahona, si Bill ug ako nakamatikod nga mas sayon ang iyang pagginhawa samtang amo siyang gikugos ug giestoryahan. Sa miingon ang mga trabahante sa ospital nga kinahanglang ibutang siya sa incubator, wala sa kondisyon ang akong hunahuna nga makig-ergo tapos niadtong dugay, makalibog nga kasakit sa pagpanganak.
Sa alas 9:30 s.b. ang pediatrisyan nakigkita kanako. Miingon siya nga nasusi niya ang bata ug daw maayo ra siya; gipakuha siya sa doktor aron makapatutoy ako kaniya. Apan wala moabot ang bata. Alas diyes, alas 11, alas 12, ug sa gihapon walay Danny. Sa kataposan, sa palis, ang usa ka nars miabot gikan sa nursery ug mihimo sa makapakurat nga pahibalo: “Ang imong bata nag-ulpot-ulpot ug namukad, ug kinahanglang ibalhin ngadto sa isolette!” Sa maong diwa ug walay dugang katin-awan, siya mibiya.
Makahanduraw ka kon unsay gihimo niana sa akong huyang nga kahimtang sa emosyon. Sanglit ako wala masayod sa “nag-ulpot-ulpot ug namukad” o retracting and flaring, gitawag nako ang komadrona ug gisukna siya kon kana seryoso ba. “Oo,” matud niya, “seryoso kaayo kana. Kana ang ilang gikabalak-an sa mga batang ahat.”
“Unsay imong ipasabot?” nangutana ako: “Mamatay kaha siya?”
“Posible,” matud niya. Giingnan niya ako nga ipugos nako nga makakita niya.
Giingnan ako sa mga nars nga dili ako makakita kaniya hangtod nga nasusi siya sa doktor. Niadtong puntoha ako misugod sa pagtiyabaw nga walay pugong ug nakapagubot kadto. “Siya akong anak ug siya himalatyon ug ako dili gani makakugos kaniya!” Misanong dayon sila pinaagi sa pagdala kanako ngadto kaniya. Bisan pag wala ko siya makugos, may gamayng giwang sa kilid sa isolette, o incubator, diin napalusot nako ang akong kamot
ug gihikap siya.
Makapasubo ang pagtan-aw kang Danny. Ang kaunoran sa iyang tiyan nag-ulpot-ulpot tungod sa paningkamot sa pagginhawa sa sayop nga paagi ug ang mga bangag sa iyang ilong namukad kay siya nakulangag oksiheno. (Kana ang hinungdan sa pamulong retracting sa bukog sa dughan ug flaring sa mga bangag sa ilong.) Ang iyang mga kamot ug mga tiil nanglagom tungod sa kakulang sa oksiheno.
Gipalusot ko ang akong kamot ug gihapyod siyang hinay gikan sa ulo hangtod sa tudlo sa tiil ug gisultihan siya nga gimahal ko pag-ayo siya. Gisultihan ko siya bahin sa iyang amahan ug sa iyang igsoong lalaki, si Timmy, ug sa iyang tibuok pamilya ug nga siya gimahal namong tanan ug gusto namong siya mopauli sa balay. Siya nanimatig maayo sa akong tingog, ug ang paghapyod nakatabang sa pagkalma kaniya. Walay kinahanglang magkombinsir nako nga ang gugma nagahimog mga katingalahan. Nakita ko kana sa akong kaugalingon niadtong adlawa mismo. Sulod sa tunga sa oras, ang iyang pagginhawa bug-os nga nanormal, ug ang iyang mga kamot ug mga tiil nahimong rosason.
Ang nars nga nagtrabaho miingon: “Dili ako makatuo! Tan-awa siya! Maayo na ang iyang pagginhawa, ug tan-awa ang iyang mga kamot ug mga tiil!” Iyang gipagawas siya ug gihatag kanako nga wala maghulat sa pagtugot sa doktor.
Ang krisis tapos na. Si Danny luwas na. Kadto maoy kapin sa pito ka tuig nga miagi. Niining adlawa, si Danny gustong makadungog sa estorya sa iyang kasinatian, ug buot niya nga kana isugilon sa uban.—Sumala sa gisugid ni Mary Jane Triggs.