Mga Milagro ug mga Aparisyon—Kon Nganong Dili Kinahanglan

SA DIHANG dinhi pa sa yuta, si Jesus mihimog daghang milagro. Iyang gihimo ang tubig nga bino, gitagan-ag pagkaon ang mga tawo, giayo ang mga masakiton, ug gipagula ang mga demonyo. Ang pagpanudlo ni Jesus ug ang kamatuoran nga iyang natuman ang mga tagna sa Bibliya mahitungod sa Mesiyas nakakabig sa kadaghanan sa iyang mga katalirongan. Ang uban nangatarongan sama sa mosunod: “Kon moabot na ang Kristo, himoon ba kaha niya ang labaw pa ka daghang milagro kay sa nahimo niining tawhana [Jesus]?”—Juan 7:31.

Ang Katuyoan sa mga Milagro

Unsa ang katuyoan sa mga milagro nga gihimo ni Jesus? Ang Bibliya nagbatbat nga si Jesus mahimong ‘usa ka manalagna nga sama kang Moises.’ (Deuteronomio 18:15, 18) Si Jehova nga Diyos naghatag kang Moises ug gahom sa paghimog pila ka milagro sa pagpamatuod nga siya mao ang pangulo nga napili sa pagpagawas sa mga Israelinhon gikan sa pagkaulipon sa Ehipto. (Exodo 4:1-9, 30, 31) ‘Sama kang Moises,’ si Jesus naghimog mga milagro sa pagpaila sa iyang kaugalingon ingong Mesiyas, ingong gisaad nga Manluluwas sa mga Hudiyo.—Buhat 3:22.

Apan ang mga milagro ni Jesus nagpamatuod usab nga siya nakadawat ug linaing gahom gikan sa Diyos. Sa dihang ang Gingharian sa Diyos momando sa yuta nga walay-mobatok, gamiton ni Jesus sa bug-os ang gahom nga iyang gipakita sa gamay nga sukod samtang dinhi pa sa yuta. Sa pag-ilustrar, atong tagdon ang milagro sa mga tinapay ug sa mga isda. (Lucas 9:12-17) Diha sa bag-ong kalibotan sa Diyos, tinoon ni Jesus nga ang tanang katawhan may igong makaon. (Salmo 72:16) Iyang ayohon usab ang tanang sakit ug balatian, busa makahimo sa masinundanong katawhan nga mabuhi sa walay-kataposan. (Pinadayag 21:4) Pinaagi sa paghimog tulo ka narekord mga pagkabanhaw, iyang gipamatud-an ang iyang katakos sa pagbanhaw sa minilyon gikan sa patay.—Lucas 7:11-17; 8:40-56; Juan 5:28, 29; 11:11-44.

Usa ka Paagi sa Pag-ila

Laing katarongan kon nganong si Jehova naghimog mga milagro alang sa Israel mao ang pagpamatuod sa walay duhaduha nga sila mao ang iyang piniling katawhan. (Deuteronomio 4:32-34) Ang tinabangan mao ang tanang katawhan, dili pipila ka pinalabing mga indibiduwal.

Sa susama, ang unang-siglong mga milagro maoy usa sa mga pamatuod nga si Jehova nagbalhin sa iyang kahimuot gikan sa lawasnong Israel ngadto sa unang Kristohanong kongregasyon. (Mateo 21:43; 27:51; Roma 9:6; 11:7) Ang daghang milagro nga gihimo sa mga apostoles maoy pamatuod sa pag-uyon sa Diyos sa kongregasyon ilalom sa pagpangulo sa Anak sa Diyos, si Jesu-Kristo.—Buhat 2:22, 43; 4:29, 30; Hebreohanon 2:3, 4.

Dugang pa, niadtong mga adlawa, ibutang sa mga tawo ang mga masakiton diha sa mga dapit nga basin kalandongan sila sa anino ni Pedro, ug ang Bibliya nag-ingon nga kadtong gidala ngadto kaniya ang “usa ug ang tanan nangaayo.” (Buhat 5:15, 16) Nan, nganong ang tanan sa mga tawong nangadto karong adlawa nga may pagtuo sa mga halaran wala mangaayo?

Mga Aparisyon Dili Kinahanglan

Ang pangunang katarongan mao nga ang mga ilhanan ug mga milagro dili na kinahanglan sa pagpamatuod nga ang Diyos nagbalhin sa iyang pag-uyon gikan sa lawasnong Israel ngadto sa tinuod Kristohanong kongregasyon. Diha sa iyang sulat alang sa iyang Kristohanong mga kauban, tin-awng gibatbat ni apostol Pablo nga ang milagrosong mga gasa sa ulahi pagahunongon. Moabot ang panahon sa dihang dili na sila mahimong paagi sa pag-ila sa tinuod nga mga Kristohanon.—1 Corinto 13:8-13.

Bisan ang pagtawag sa ngalan ni Jesus dili mopamatuod nga ang usa ka tawo tinuod nga Kristohanon. Diha sa iyang Wali sa Bukid, si Jesus mitagna nga iyang isalikway ang pipila nga moangkon: “Ginoo, Ginoo, dili ba kami . . . naghimog daghang milagro pinaagi sa imong ngalan?” Tungod sa unsang katarongan nga isalikway ni Jesus kining mga tighimog milagro? Siya mitubag: “Wala ko gayod kamo igkaila; pahawa kanako, kamong mga tawo daotan!” Tataw, ang uban naghimog mga milagro pinaagi sa ngalan ni Kristo, apan sa pagkatinuod sila mga mini.—Mateo 7:22, 23, The Jerusalem Bible.

Ang Tinuod nga Sukdanan

Bahin sa nag-una, sa unsang paagi posibleng mailhan ang tinuod nga mga Kristohanon karong adlawa? Si Jesus mihatag ug sukdanan sa dihang siya miingon: “Ang maayong kahoy dili makabungag nga bungang walay pulos . . . Sa ingon niana, maila ninyo kadtong mga tawhana pinaagi sa ilang mga bunga.” Sa adlaw sa wala pa siya mamatay, gipahinumdoman ni Jesus ang iyang mga apostoles: “Pinaagi niini ang tanan makahibalo nga kamo mga tinun-an ko, kon kamo maghigugmaay ang usa sa usa.” Mosunod nga ang paghimog mga milagro dili mahimong sukdanan sa walay kataposan. Apan kinahanglan pamatud-an sa tanan nga sila mga tinun-an ni Kristo pinaagi sa ilang tinuod nga gugma.—Mateo 7:18-20; Juan 13:34, 35.

Busa angay ba nga ipasukad ang imong pagtuo, bisan dili-bug-os, sa “mga milagro” nga gihimo karon diha sa ngalan ni Kristo? O ipasukad ba kini diha sa bug-os nga kamatuoran nga makita sa Pulong sa Diyos, ang Bibliya? Hinungdanong susihon diha sa kahayag sa Pulong sa Diyos ang paggawi niadtong nagaangkong mga alagad sa Diyos.

Sa tibuok kalibotan karong adlawa, kinsa ang nagapadayag sa Pulong sa Diyos ug nagapaningkamot sa pagkinabuhi nga uyon niana? Kinsa ang nailhan sa tibuok-yuta sa ilang panaghiusa? Kinsa ang walay nasodnon, politikanhon, rasanhon, o relihiyosong mga babag taliwala kanila? Kinsa ang madasigong nagawali sa maayong balita sa Gingharian sa Diyos? Kon ingong tawong sinsero ikaw duna pay daghang mga pangutana, malipay ang mga Saksi ni Jehova sa pagtagana kanimo sa mga kamatuoran nga imong kinahanglan aron sa paghukom sa imong kaugalingon. Palihog batiang libre ang pakigkontak sa mga Saksi diha sa imong kasilinganan o sa ilang lokal nga Kingdom Hall. Sila motabang kanimo sa pagbutang sa imong pagsalig diha kang Jehova ug Jesu-Kristo, ang iyang Anak, kay “walay kaluwasan pinaagi kang bisan kinsa pa nga lain.”—Buhat 4:12.

[Hulagway sa panid 10]

Ang mga milagro sa pagpangayo sa sakit dili na kinahanglan aron maila ang tinuod nga Kristohanong kongregasyon