Unsang mga Sukdanan Ang Nagamando sa Imong Kinabuhi?

SA DILI pa tubagon kanang pangutanaha, tingali maayo nimong palandongon kining usa: Unsay imong pangandoy sa kinabuhi? Bahandi ba, kadungganan, paukyab, nabantog nga adbentura, seksuwal nga katagbawan? O tingali ang imong tumong maoy kadungganan sa pagkamatinuoron, kaputli, kaluoy, pag-alagad sa katilingban, espirituwalidad? Bisan unsa man kana, kining Biblikanhong lagda matuod: ‘Bisan unsay igapugas sa tawo, mao usab kana ang iyang pagaanihon.’—Galacia 6:7.

Kon imong ibalibag ang matuod nga mga sukdanan, kinahanglang andam ka sa pagkinabuhi sa mga sangpotanan. Ang huwes sa Hataas nga Korte si Paul R. Huot mipunting ug pila niini. Mikutlo bahin sa pagkapadpad gikan sa pagtahod sa balaod, sa sosyal nga pamatasan, ug disiplina, siya miingon: “Ang mga butang dili na klaro. Ang tanan lubog. Nawala na kanato ang maayong pamatasan. Nawala kanato ang katahoran. Nawala kanato ang kaligdong. Nagkadiyutayng mga tawo ang nakaila sa kalainan sa matarong ug daotan. Ang sala karon mao ang pagkahidakpan, dili ang paglapas.”

Sa dihang motubo ang kahibalo ug molambo ang gahom, dunay mas dakong panginahanglag moralidad sa pagmando sa paggamit niini. (Proverbio 24:5) Sa pagkaalaot, ang pag-uswag sa kahibalo ug gahom giduyogan sa pagkahugno sa moralidad. Ang manalaysayng si Arnold Toynbee mikomento bahin niini: “Makasubo ang paghunahuna nga kita malamposon kaayo sa natad sa teknolohiya, samtang ang atong rekord sa moral nga mga kapakyasan halos dili-masukod. . . . Kon ang kal-ang sa moralidad magpadayon sa pagdako, nakapanan-aw na ako sa panahon sa dihang ang pribadong mga lungsoranon maglakawlakaw nga may de-bulsang mga bomba atomika.”

Ang bag-ong kiling mao ang pagpawalay-bili sa matuod nga mga sukdanan ug sa paglabay sa sala diha sa basurahan. Ang tinamdan sama niana sa babayeng mananapaw diha sa Proverbio 30:20: “Mao kini ang dalan sa usa ka mananapawng babaye: siya nagakaon ug nagapamahid sa iyang baba ug siya nagaingon: ‘Ako wala makabuhat ug daotan.’” Apan ang sala ania gihapon kanato, baskog ug kusgan, nagalihok lamang ilalom sa mga alyas sama sa pagkamadayganon, kagawasan, relatibismo, katin-awan sa mga sukdanan, dili-magmahukmanon—ang tanan giusa ingong “ang bag-ong moralidad.”

Paghimo sa Sayop nga Tan-awong Husto

Wala gayoy nausab sukad sa panahon ni Isaias. Ang iyang mga pulong punting gihapon: “Alaot ang nagngalan sa maayo nga daotan, ug sa daotan nga maayo, nga nagabutang sa kangitngit nga ilis sa kahayag ug sa kahayag ilis sa kangitngit, ug nagabutang sa mapait nga ilis sa katam-is ug sa katam-is ilis sa mapait!” (Isaias 5:20) Aron sa paghimo sa mga sayop nga hustong tan-awon, ilang giusab ang mga timaan sa termometro aron sa paghimo sa hilanat nga normal.

Unsang mga sukdanan ang mopatunghag maayong mga resulta? Unsang mga sukdanan ang nakahatag kanimog kalipay, nagapatunghag maunongong mga higala, nagahatag kalinaw ug katagbawan sa kinailadman? Nagatinguha ka bang makabaton ug dungog sa pagkamatinuoron, pagkamatinud-anon, kabalaka alang sa uban? Aron maangayan, matahod, o mahalon? O ang labaw ba nimong gipabilhan ang daghang kabtangan, ang pagtilaw sa gahom sa dakong bahandi? Ang katagbawan ba sa lawasnong pangibog mao ang labing hinungdanon? Importante ba kanimo ang pagkabalaka sa pagtagbaw sa kaugalingon?

Ang mahilayng sekso kaylap, nga ginatagamtam ang pag-uyon sa palumagian sa balita ug sa katilingban sa katibuk-an. Apan pagkamalaglagon niini diha sa kaminyoon ug sa pamilya ug sa kaayohan sa mga anak! Nanubo gikan niining pagkamatugoton sa sekso mao ang grabeng paghingapin sa supak sa kinaiyahang homoseksuwal nga kahiwian nga kaylap karong adlawa ug nga gipalabay ug gidawat pa gani sa pipila ka dagkong mga relihiyon sa Kakristiyanohan. Maylabot sa maong mga buhat, ang Pulong sa Diyos nangutana ug nagatubag: “Nangaulaw ba sila sa ilang pagbuhat ug dulumtanan? Wala, sila wala gayod mangaulaw; wala gani manghilaw ang ilang mga nawong.”—Jeremias 6:15, New International Version.

Gipasiugda ni Jesus ang espirituwal nga panginahanglan, nga nagaingon: “Malipayon kadtong mahunahunaon sa ilang espirituwal nga panginahanglan, kay ila ang gingharian sa langit.” (Mateo 5:3) Apan gisalikway sa kadaghanan kining maong panginahanglan ingong walay bili ug walay gihimo sa pagtuman niana; apan ang mga kinabuhi nga wala niini mahulog ingong taphaw. Bisan pag daghan ang makab-ot sa kalibotan, ang maong kinabuhi taphaw gihapon ug kulang sa matuod nga kalipay ug katagbawan sa espiritu. Ug makasubo, kadtong nahibalo sa panginahanglan ug sa pagpangitag katagbawan diha sa mga iglesya sa Kakristiyanohan manglakaw nga walay dala, kay diha sa Kakristiyanohan dunay, sumala sa gitagna ni Amos, “kagutmanan, dili sa tinapay, ug kauhaw, dili sa tubig, kondili sa pagpamati sa mga pulong ni Jehova.”—Amos 8:11.

Dugang pa, daghan diha sa iglesya walay gana sa makahimsog nga espirituwal nga pagtulon-an, apan ‘aron sa pagtagbaw sa ilang kaugalingong mga pangibog, sila magapaalirong ug mga magtutudlo nga mokulitog sa ilang mga dalunggan; ug ang ilang dalunggan ilang ilingiw gikan sa kamatuoran, ug ipaabong ngadto sa tinumutomo nga sugilanon.’ (2 Timoteo 4:3, 4) Samag gibati ang mga klero ug ang mga layko niadtong sa panahon ni Isaias, nga nagaingon niadtong nakakita sa espirituwal nga panginahanglan: “‘Ayaw kamo pagtan-aw,’ ug niadtong dunay mga panan-awon, ‘Ayaw kamo pagtagna kanamo sa mga butang nga matarong. Pagsulti kanamo ug malumo nga mga butang; pagtagna ug mga paglimbong. Pahawa kamo sa alagianan; tipas kamo gikan sa dalan. Himoa nga ang Usa nga Balaan sa Israel mawala alang kanato.’”—Isaias 30:10, 11.

Ang diyosnong mga sukdanan kinahanglan anaa sa imong kinailadman. Kon ang imong desisyon maoy sa pagbanaag sa matuod nga mga sukdanan nga girekomendar sa Diyos, ang pormula nga imong sundon gilaraw diha sa Pulong sa Diyos: “Hukasa ang daang kinaiya uban ang mga batasan niini, ug maoy isul-ob ang bag-ong kinaiya, nga pinaagi sa tukmang kahibalo gibag-o sibo sa dagway sa Usa nga naglalang niini.”—Colosas 3:9, 10.

Apan, tingali wala kay pagsalig sa Bibliya ingong Pulong sa Diyos. Tingali nawad-an kag gana tungod sa mga doktrina sama sa walay kataposang pagsakit sa dili-mamatayng mga kalag diha sa impiyernong kalayo, o sa higher criticism o pagsaway sa Bibliya nga nagahiklin sa Bibliya ingong sugilambong lamang, o sa diyosnon, salingkapaw, nagailog ug kuwarta nga mga predikador nga bakak nga nangangkong naghawas niini.

Ang personal nga pagtuki mopadayag nga “ang bayad sa sala mao ang kamatayon,” dili ang pagsakit diha sa kalayo; nga ang modernong arkeolohiya nagpamatuod sa Bibliya nga tukmang kasaysayan, dili sugilambong; nga daghang klero sa Kakristiyanohan sama sa mini nga mga klero sa panahon sa Bibliya, dili sa matinumanong mga propeta ug sa mga apostoles niadtong mga adlawa.—Roma 6:23; Mateo, mga kapitulo 5–7, 23.

Ang Bibliya mao ang tuboran sa tinuod nga mga sukdanan. Ang pagtugot niini nga maoy momando sa imong kinabuhi magkahulogan sa pag-uyon sa Diyos ug motultol sa kinabuhing dayon diha sa usa ka bag-ong kalibotan sa pagkamatarong, diin “siya magapahid sa tanang luha gikan sa mga mata [sa katawhan], ug ang kamatayon mawala na, ni pagminatay, ni paghilak, ni kasakit. Ang unang mga butang nangagi na.”—Pinadayag 21:4; Juan 17:3.

Busa pasagdi nga ang matuod nga mga sukdanan nga gibayaw diha sa Pulong sa Diyos maoy momando sa imong kinabuhi, busa makabaton kag kaayohan: “Ako si Jehova, nga imong Diyos, ang Usa nga nagatudlo kanimo sa pagpahimulos, ang Usa nga nagapalakaw kanimo sa dalan diin ikaw angay nga moagi. O kon mamati ka lang unta sa akong mga sugo! Unya ang imong pakigdait mahisama sa suba, ug ang imong pagkamatarong mahisama sa mga balod sa dagat.”—Isaias 48:17, 18.

[Letrato sa Panid 9]

Pakigdait nga sama sa suba