Unsay Paglaom Alang sa Kalibotan nga Walay Hinagiban?
DAKO kaayong kahupayan kon ang bug-at nga palas-anon sa negosyo sa armas mawagtang na ug mahanaw na ang pondo sa hinagiban sa tibuok yuta! Unsay paglaom nga mahitabo kana? Gipakita sa kasaysayan nga dili kana buhaton sa kanasoran sa kinabubut-on. Dugang pa, ang armamento maoy simtoma lamang. Ang usa ka suliran kinahanglang atakehon sa gamot o lintunganay mismo aron masulbad nga permanente. Masubay ba ang maong gamot, ug kon mao, kinsay makaatake niini?
Ang negosyo sa armas nagakuha sa iyang sustansiya gikan sa usa sa kinadagkoang mga tunglo sa katawhan, ang gubat. Apan ang gubat wala motubo gikan sa negosyo sa armas. Hinunoa, ang negosyo sa armas mitubo gikan sa gubat. Nan, ang gamot sa pagkadaotan hikaplagan ba diha sa gubat? Dili, ang gubat mao lamay usa ka sanga nga ibabaw niana ang negosyo sa armas nagamauswagon. Diin ba mokuha sa iyang sustansiya ang maong sanga?
Kinsa ang may gahom sa pagdeklarar ug gubat? Ang tanang batakang-balaod nagabutang nianang gahoma diha sa mga kamot sa ilang mga gobyerno, nga kasagarang mosugod sa mga gubat aron sa pagpadako o pagpanalipod sa nasodnong intereses. Ang mga gobyerno gisuportahan sa katawhan. Busa ang suliran konektado niining tibuok tawhanong sistema sa mga butang, nga naimpluwensiyahan sa nasyonalismo, ekonomikanhong panag-indig, teritoryonhong imperyalismo, ug rasismo. Nan, kini bang sistemaha ang gamot sa suliran? Dili. Ang duol nga pagsusi mopadayag nga kining daotang sistema nagakuha sa iyang sustansiya gikan sa usa ka natagong gamot, usa ka tinubdan nga wala tagda sa kadaghanang tawo.
Usa ka Natagong Gamot Nadayag
Kanang gamota giyagyag diha sa Bibliya. Kining karaang basahon nagapadayag nga ang usa ka gamhanang espiritung linalang, kay gitukmod sa mahakogong ambisyon, nagpatindog sa iyang kaugalingon sa pagsupak sa Diyos. (Job 1:6-12; 2:1-7) Siya gitawag Satanas (nga nagkahulogan, Kaaway) nga Yawa (nga nagkahulogan, Magsusumbong, Tigpasipala). Gipailaila niya ang sala ug kamatayon nganha sa tawhanong pamilya. (Genesis 3:1-7) Busa, siya gitawag “ang daotan nga usa.” Siya maoy midasig sa unang pagpatay sa tawhanong kasaysayan, ang pagpatay ni Cain kang Abel.—1 Juan 3:12; Genesis 4:8.
Ang Bibliya nagapadayag usab kang Satanas ingong “ang diyos niining sistema sa mga butang,” ang dakong “dragon” nga ‘nagahatag sa gahom, trono, ug dakong pagbulot-an’ sa tibuok-yutang politikanhong sistema sa pagmando. Si Jesu-Kristo maisogong mipunting nga “ang Yawa . . . maoy mamumuno sa iyang pagsugod” ug mibatbat kaniya ingong “ang magmamando sa kalibotan.”—2 Corinto 4:4; Pinadayag 12:9; 13:1, 2; Juan 8:44; 14:30.
Ugaling lang, kining makapatay nga gamot dili molungtad sa walay kataposan. Ang pagtuon sa Bibliya nagapaila niining presenteng malaglagong yugto sa tawhanong kasaysayan ingong kataposang mga adlaw sa sistema sa mga butang ni Satanas, nga nagkahulogang “siya may hamubo na lamang nga panahon” nga nahibilin una siya ug ang iyang mga panglipatlipat pahunongon na. Ang tagana alang sa kagawasan gikan niining satanasnong impluwensiya sa simboliko gibatbat sa apostol ni Jesus nga si Juan: “Nakita ko ang usa ka manulonda nga nanaog gikan sa langit nga may yawi sa bung-aw ug usa ka dakong talikala sa iyang kamot. Ug gidakop niya ang dragon, ang unang bitin, nga mao ang Yawa ug Satanas, ug gigapos siya sulod sa usa ka libo ka tuig. Ug iyang gitambog siya sa bung-aw ug gitakpan kini ug gitimrihan kini, aron siya dili na makalimbong sa kanasoran hangtod matapos ang usa ka libo ka tuig. Tapos niining mga butanga siya buhian sa makadiyut nga panahon.”—Pinadayag 12:12; 20:1-3.
Pagkuha sa Kabug-at sa Armamento
Sa dihang ang gamot dili na makalihok, ang tanang daotang impluwensiya niini mohunong. Aron maposible kining usa ka libo ka tuig nga yugto sa napasig-uling kalinaw sa yuta, si Jehova, ang Diyos nga Makagagahom sa Tanan mismo, magakuha sa kabug-at sa mga armamento: “Umari kamo, kamo nga katawhan, tan-awa ang mga buhat ni Jehova, kon giunsa niya pagpahimutang ang katingalahang mga hitabo sa yuta. Siya nagapahunong sa mga gubat hangtod sa kinatumyan sa yuta. Ang pana iyang ginabunggo ug ginaputolputol ang bangkaw; ang mga karo iyang ginasunog sa kalayo.”—Salmo 46:8, 9.
Minilyong tawo ang nagaandam na sa ilang kaugalingon sa pagpuyo ilalom nianang malinawong mga kahimtang. Ang mga Saksi ni Jehova nagatuman na niining tagnaa: “Ang nasod dili mobakyaw sa espada batok sa nasod, ni sila makakat-on pa sa gubat.” (Isaias 2:4) Busa, sila dili moapil sa bisan unsang matang sa negosyo sa armas. Sama kang Jesus ug sa iyang mga tinun-an, gihuptan nila ang estriktong baroganan sa pagkaneyutral bahin sa politikanhong mga isyu ug dili moapil sa bisan unsang yutan-ong gubat o away, bisan kon unsay mahitabo.—Juan 17:16.
Sumala sa natuman nga tagna sa Bibliya, ang panahon duol na sa dihang walay hinagiban ang pagagam-on alang sa gubat, sa dihang ang tanang kahinguhaan sa yuta gamiton lamang sa kaayohan sa mga molupyo niini. Ang Prinsipe sa Pakigdait, si Jesu-Kristo, ang Hari sa tibuok yuta, nagapasalig niini: “Pagaluwason niya ang kabos nga nagatuaw alang sa tabang, ang sinakit usab ug si bisan kinsa nga walay magtatabang. Siya maluoy sa timawa ug sa kabos, ug pagaluwason niya ang mga kalag sa mga kabos. Iyang pagalukaton ang ilang kalag gikan sa pagdaugdaog ug sa kabangisan, ug ang ilang dugo mahimong bililhon sa iyang mga mata.” Busa, pagmaya! Ang usa ka kalibotan nga walay mga hinagiban duol nang matuman!—Salmo 72:12-14.
[Mga Letrato sa panid 10]
Ang panahon haduol na sa dihang wala nay gubat. Sa kapulihay, ang yuta mahimong usa ka malinawong paraiso
[Tinubdan]
Letrato sa U. S. Marine Corps
Tahiti Tourist Promotion Board